Magbaton sing Mapinasalamaton Maghatag sing Tinagipusuon

SI JEHOVA, ang aton mahigugmaon nga langitnon nga Amay, nagaulikid gid sa aton. Ginapasalig kita sang Pulong sang Dios nga nagaulikid gid sia sa tanan niya nga alagad. (1 Ped. 5:7) Ang isa ka paagi nga ginapakita ni Jehova ang iya pag-ulikid amo ang pagbulig sa aton sa lainlain nga paagi agod maalagad naton sia sing matutom. (Isa. 48:17) Luyag ni Jehova nga panginpuslan naton ang mga bulig nga gin-aman niya ilabi na kon makaeksperiensia kita sing mga problema nga mahimo magpaluya sa aton. Ini nga kamatuoran ginpakita sang Mosaikong Kasuguan.

Sa idalom sang Kasuguan, may kahimusan nga gin-aman si Jehova para buligan ang mga “imol,” subong sang mga ilo, mga balo, kag mga dumuluong. (Lev. 19:9, 10; Deut. 14:29) Nahibaluan niya nga ang pila sang iya mga alagad nagakinahanglan sang bulig sang ila mga kauturan. (Sant. 1:27) Gani, indi dapat mangalag-ag ang iya mga alagad nga batunon ang bulig sang mga kauturan nga ginpahulag ni Jehova sa pagbulig. Pero, dapat husto ang aton panimuot sa pagbaton sini nga bulig.

Subong man, ginapadaku sang Pulong sang Dios nga ang katawhan sang Dios dapat man maghatag. Dumduma ang kasaysayan sang “imol nga balo nga babayi” nga nakita ni Jesus sa templo sa Jerusalem. (Luc. 21:1-4) Mahimo nga nakabenepisyo sia sa mahigugmaon nga aman ni Jehova para sa mga balo nga ginsambit sa Kasuguan. Bisan pa imol sia, nakilal-an ang balo indi sa iya pagbaton, kundi sa iya paghatag. Mahimo nga malipayon gid ining balo bangod nagsiling si Jesus nga “may kapin nga kalipay sa paghatag sangsa pagbaton.” (Binu. 20:35) Samtang ginahunahuna mo ini nga kamatuoran, paano mo ‘ugalion ang paghatag’ agod mabatyagan mo man ang kalipay?—Luc. 6:38.

“Ano Bala ang Ibalos Ko kay Jehova?”

Ang salmista namangkot: “Ano bala ang ibalos ko kay Jehova sa tanan nga kaayuhan nga ginhimo niya sa akon?” (Sal. 116:12, NW) Ano nga kaayuhan ang nabaton sang salmista? Si Jehova nagsakdag sa iya sa tion sang “kalisud kag kasubo.” Dugang pa, “ginluwas [ni Jehova ang iya] kalag sa kamatayon.” Gani luyag niya balusan si Jehova sa pila ka paagi. Paano ini himuon sang salmista? Nagsiling sia: “Magabayad ako sang akon mga saad sa GINOO.” (Sal. 116:3, 4, 8, 10-14) Determinado sia nga tumanon ang iya sinsero nga mga panaad kay Jehova kag himuon ang tanan niya nga obligasyon sa iya.

Mahimo mo man ini. Paano? Paagi sa pagsunod pirme sa mga kasuguan kag mga prinsipio sang Dios sa imo kabuhi. Gani, pat-ura nga ang imo pagsimba kay Jehova amo ang pinakaimportante sa imo kabuhi kag magpatuytoy pirme sa espiritu sang Dios sa tanan mo nga ginahimo. (Man. 12:13; Gal. 5:16-18) Matuod, indi mo mabalusan sing bug-os si Jehova sa tanan niya nga ginhimo para sa imo. Pero, mapahalipay mo ang tagipusuon ni Jehova kon makita  niya nga bug-os tagipusuon ka nga nagaalagad sa iya. (Hulu. 27:11) Isa gid ka pinasahi nga pribilehiyo nga mapahalipay mo si Jehova sa sini nga paagi!

Magbulig Para sa Kaayuhan sang Kongregasyon

Wala duhaduha nga nagaugyon ka nga madamo nga benepisyo ang imo natigayon sa Cristianong kongregasyon. Paagi sa kongregasyon, nagaaman si Jehova sing bugana nga espirituwal nga pagkaon. Nabaton mo ang kamatuoran nga naghilway sa imo gikan sa butig nga mga panudlo kag espirituwal nga kadulom. (Juan 8:32) Paagi sa mga miting sa kongregasyon, asembleya, kag kombension nga ginhanda sang “matutom kag mainandamon nga ulipon,” natigayon mo ang ihibalo nga magadul-ong sa kabuhi nga wala sing katapusan sa paraiso nga duta, sa diin wala na sing kasakit kag pag-antos. (Mat. 24:45-47) Maisip mo ayhan ang mga benepisyo nga nabaton mo sa kongregasyon sang Dios? Ano ang mabalos mo sa kongregasyon?

Si apostol Pablo nagsiling: “Ang bug-os nga lawas, bangod ang mga bahin sini nagaangtanay sing nahisanto kag ginatingob paagi sa tagsa ka lutalutahan nga nagahatag sang kinahanglanon, suno sa nagakaigo nga pagpanghikot sang tagsa ka bahin, nagapatubo sa lawas agod magbakod ini sa gugma.” (Efe. 4:15, 16) Bisan pa ini nga teksto panguna nga nagapatuhoy sa hubon sang hinaplas nga mga Cristiano, ang prinsipio sini maaplikar man sa tanan nga Cristiano subong. Huo, ang tagsa ka katapo sang kongregasyon makabulig para sa kaayuhan kag pag-uswag sang kongregasyon. Sa ano nga mga paagi?

Mahimo naton ini kon nagapanikasog kita nga pabakuron kag paumpawan ang iban sa tanan nga tion. (Roma 14:19) Makabulig man kita sa ‘pagtubo sang lawas’ paagi sa pagpalambo sang mga bunga sang espiritu sang Dios sa tanan naton nga pagpakig-angot sa mga kauturan. (Gal. 5:22, 23) Subong man, makapangita kita sang kahigayunan nga ‘maghimo sing maayo sa tanan, apang ilabi na sa mga may labot sa aton sa pagtuo.’ (Gal. 6:10; Heb. 13:16) Ang tanan sa kongregasyon—lalaki man ukon babayi, bata man ukon tigulang—may bahin sa ‘pagpabakod sang lawas paagi sa gugma.’

Dugang pa, magamit naton ang aton ikasarang, kusog, kag mga pagkabutang sa pagpakigbahin sa nagaluwas kabuhi nga hilikuton nga ginahimo sang kongregasyon. Si Jesucristo nagsiling: “Nagbaton kamo nga wala sing bayad.” Bangod sini, ano ang aton himuon? ‘Maghatag nga wala sing bayad,’ siling niya. (Mat. 10:8) Gani, makigbahin sing bug-os sa importante nga hilikuton nga pagbantala sang Ginharian kag paghimo sing disipulo. (Mat. 24:14; 28:19, 20) Limitado lang bala ang imo masarangan sa paghimo sini? Dumduma ang imol nga balo nga ginsambit ni Jesus. Diutay lang katama ang iya nahatag. Apang, nagsiling si Jesus nga ang iya ginhatag kapin pa sa ginhatag sang iban. Ginhatag niya ang tanan niya nga masarangan.—2 Cor. 8:1-5, 12.

Magbaton nga may Husto nga Panimuot

May mga tion nga kinahanglan mo man ang bulig sang kongregasyon. Kon nabudlayan ka sa pag-atubang sa mga problema sini nga kalibutan, indi mangalag-ag sa pagbaton sang bulig sang mga kauturan. Si Jehova nag-aman sing kalipikado kag matinatapon nga mga lalaki agod “bantayan ang kongregasyon.” Buligan ka nila kon nagaatubang ka sang mga pagtilaw kag mga kabudlayan. (Binu. 20:28) Luyag sang mga gulang kag sang iban pa sa kongregasyon nga lugpayan ka, sakdagon, kag amligan sa tion sang kabudlayan.—Gal. 6:2; 1 Tes. 5:14.

Apang, dapat ka magpakita sing husto nga panimuot kon ginahatagan ka sing bulig. Apresyaha pirme ang bulig nga imo nabaton. Dapat mo tamdon ang bulig sang mga kauturan subong pagpabutyag sang Dios sang iya wala tupong nga kaayo. (1 Ped. 4:10) Ngaa importante gid ini? Bangod indi naton luyag ilugon ang kalabanan nga tawo sa kalibutan nga indi mapinasalamaton.

 Mangin Balanse kag Makatarunganon

Sa iya sulat sa kongregasyon sa Filipos, si Pablo nagsulat tuhoy kay Timoteo: “Wala na ako sing iban pa nga may panimuot kaangay sang iya nga magaulikid gid nahanungod sa inyo.” Apang, si Pablo nagdugang: “Ang tanan nga iban pa nagapangita sang ila kaugalingon nga kaayuhan, indi ang iya ni Cristo Jesus.” (Fil. 2:20, 21) Samtang ginahunahuna naton ining ginsiling ni Pablo, paano naton malikawan ang sobra nga pagkabalaka sa aton “kaugalingon nga kaayuhan”?

Indi naton dapat pagpiliton ang iban sa kongregasyon nga ihatag nila ang ila tion kag atension agod buligan kita sa aton mga problema. Ngaa? Hunahunaa ini: Wala duhaduha nga magapasalamat gid kita kon ang isa ka utod magahatag sa aton sing materyal nga bulig sa tion sang emerhensia. Apang piliton bala naton sia nga ihatag ina nga bulig? Siempre indi. Sing kaanggid, bisan pa nalipay pirme ang aton mga kauturan sa pagbulig sa aton, indi naton sila dapat pagdalidalion sa paghatag sing bulig. Isa pa, bisan ano man ang mabulig sang aton mga kauturan agod maatubang naton ang mga kabudlayan, luyag naton nga himuon nila ini sing kinabubut-on.

Makasalig ka nga ang imo mga kauturan handa pirme magbulig sa imo. Apang kon kaisa, indi nila mahatag ang tanan nga bulig nga kinahanglanon mo. Kon amo sini ang matabo, mapat-od mo nga si Jehova magasakdag sa imo sa bisan ano nga pagtilaw nga imo maatubang, subong sang ginhimo niya sa salmista.—Sal. 116:1, 2; Fil. 4:10-13.

Gani, batuna sing mapinasalamaton ang tanan nga mga aman ni Jehova para sa imo, ilabi na sa tion sang mga kabudlayan. (Sal. 55:22) Amo sina ang luyag niya nga himuon mo. Apang, luyag man niya nga ‘maghatag ka sing malipayon.’ Gani, ‘magpamat-od sing bug-os sa imo tagipusuon’ nga maghatag suno sa imo masarangan para sakdagon ang matuod nga pagsimba. (2 Cor. 9:6, 7) Paagi sini, mahimo ka magbaton sing mapinasalamaton kag maghatag sing tinagipusuon.

[Kahon/Mga Retrato sa pahina 31]

“Ano bala ang ibalos ko kay Jehova sa tanan nga kaayuhan nga ginhimo niya sa akon?”—Sal. 116:12, NW

▪ Mangita sing kahigayunan nga ‘maghimo sing maayo sa tanan’

▪ Mangin makapalig-on kag makapaumpaw sa iban

▪ Makigbahin sing bug-os sa paghimo sing disipulo nga hilikuton tubtob ginatugot sang imo kahimtangan