Mi Okẹ avọ Uyere Kẹ Nevaze

JIHOVA, Ọsẹ oyoyou obọ odhiwu mai, o wo ọdawẹ kẹ omai. Ebaibol e ta kẹ omai nọ ọ be sẹro idibo riẹ kpobi. (1 Pita 5:7) Oware jọ nọ u bi dhesẹ nọ Jihova ọ be sẹro mai họ ọ be rọ idhere sa-sa fi obọ họ kẹ omai re ma sae gọe. (Aiz. 48:17) Maero nọ ma tẹ rẹriẹ ovao ku ebẹbẹ nọ e be wha idhọvẹ se omai, Jihova ọ gwọlọ inọ ma nya lele ọruẹrẹfihotọ riẹ re ma sai ku ebẹbẹ na họ. Uzi Mosis na u dhesẹ onana.

Evaọ Uzi na, Jihova ọ gbẹ edhere nọ a re ro fi obọ họ kẹ “iyogbere,” wọhọ emọ nọ i wo esẹ hẹ, eyae-uku, gbe erara. (Izerẹ 19:9, 10; Izie. 14:29) Ọ riẹ inọ idibo riẹ jọ a te gwọlọ obufihọ mi ibe eg’Ọghẹnẹ rai. (Jem. 1:27) Fikiere, Jihova ọ rẹ sai duobọte odibo riẹ kpobi re o fi obọ họ, yọ odibo riẹ ọvo ọ rẹ siọ obufihọ otiọye na ha. O make rrọ ere na, ma re mi okẹ na avọ uyere.

Eva oke ovona Ebaibol i dhesẹ inọ ahwo Ọghẹnẹ a rẹ sae jẹ kẹ okẹ. Kareghẹhọ “ayeuku oyogbere” na ọnọ Jesu o muẹrohọ eva etẹmpol obọ Jerusalẹm. (Luk 21:1-4) Ẹsejọhọ emamọ ọruẹrẹfihotọ nọ Jihova o ru fiki eyae-uku u fi obọ họ kẹe. Rekọ dede nọ ọ jọ oyogbere, ma be kareghẹhọ aye-uku na nẹnẹ, orọnikọ wọhọ ohwo nọ a kẹ okẹ hẹ, rekọ ọnọ ọ kẹ okẹ. Uruemu ọghoruo riẹ o wha evawere sei, keme wọhọ epanọ Jesu ọ ta: “Ẹkẹ oghale o mae rọ vi emio.” (Iruẹru 20:35) Nọ who bi roro kpahe onana, ẹvẹ whọ sai ro wo uruemu ‘ẹkẹ’ re whọ ruẹse wereva?—Luk 6:38.

“Eme Mẹ rẹ Za rọ kẹ ỌNOWO?”

Ọso-ilezi na ọ so nọ: “Eme mẹ rẹ za rọ kẹ ỌNOWO fiki irere nana kpobi nọ o ro ru omẹ ọghọ na?” (Ol. 116:12) Irere vẹ i te rie obọ? Jihova ọ rẹro tei okenọ ọ jọ “uye avọ ẹbẹbẹ.” Ofariẹ, Jihova o “siwi ẹzi [riẹ] no uwhu.” Enẹna, ọ gwọlọ rọ oghẹrẹ jọ hwosa zihe kẹ Jihova. Kọ eme ọso-ilezi na o ti ru? Ọ ta nọ: “Mẹ rẹ hwaosa eya nọ mẹ ya kẹ ỌNOWO.” (Ol. 116:3, 4, 8, 10-14) Ọ gba riẹ mu inọ o re koko eyaa kpobi nọ ọ ya kẹ Jihova je ru eware nọ i te rie eruo kpobi.

Whọ rẹ sai ru epọvo na re. Evaọ oghẹrẹ vẹ? Ẹkwoma izi Ọghẹnẹ nọ who re koko ẹsikpobi. Fikiere, ruẹ nọ egagọ Jihova whọ rẹ rọ karo evaọ uzuazọ ra whọ vẹ jẹ kẹ ẹzi Ọghẹnẹ uvẹ re o kpọ owhẹ evaọ iruẹru ra kpobi. (Ọtausi. 12:13; Gal. 5:16-18) Evaọ uzẹme, whọ sae hwosa eware kpobi nọ Jihova o ru kẹ owhẹ hẹ. Ghele na, whọ rẹ sai ‘ru eva were Jihova’ otẹrọnọ whọ rọ oma ra kpobi kẹ iruo riẹ. (Itẹ  27:11) O ginẹ rrọ uvẹ-ọghọ logbo re ma rọ enẹ ru eva were Jihova!

Zọhọ Fihọ Ẹnyaharo Ukoko Na

Ababọ avro whọ te rọwo inọ who wo irere buobu no evaọ ukoko Ileleikristi na. Jihova ọ rehọ ẹkwoma ukoko na kẹ omai emuore abọ-ẹzi buobu no. Who wuhrẹ uzẹme nọ u si owhẹ no igbo egagọ erue je no ebi abọ-ẹzi. (Jọn 8:32) Eva iwuhrẹ ukoko gbe ikokohọ nọ ‘ọrigbo nọ o wo ẹrọwọ avọ areghẹ na’ ọ ruẹrẹhọ, who wo eriariẹ no nọ i ti su owhẹ kpohọ uzuazọ ebẹdẹ bẹdẹ evaọ otọakpọ aparadase nọ o kare edada gbe uye-oruẹ. (Mat. 24:45-47) Kọ whọ sai tube kele irere nọ whọ jọ ukoko Ọghẹnẹ wo no, gbe enọ who ti wo evaọ obaro? Kọ eme whọ rẹ sai ru kẹ ukoko na fiki irere nọ who wo no?

Pọl ukọ na o kere nọ: “Oma na kpobi, o whẹgbe je ko kugbe eva ọwhẹgbe kpobi nọ a rọ ze, okenọ kabọ kabọ o te bi ru iruo ziezi ovẹ kẹ oma na oro gbe ekokohọ eva uyoyou.” (Ẹf. 4:15, 16) Dede nọ Ileleikristi kpobi nọ a rọ ẹzi wholo na họ enọ a kere eme yena kpahe, Ileleikristi kpobi nẹnẹ a rẹ sai wo erere no ai ze. Ẹhẹ, ohwo kpobi evaọ ukoko na ọ rẹ sai fiba ewoma gbe ẹnyaharo ukoko na. Evaọ idhere vẹ?

Ma rẹ sai ru onana otẹrọnọ ma rẹ daoma ẹsikpobi re ma kẹ inievo mai uduotahawọ gbe omosasọ abọ-ẹzi. (Rom 14:19) Ma rẹ sai je fiba ‘oro ọrọ oma na’ ẹkwoma ubi ẹzi Ọghẹnẹ nọ ma re dhesẹ via evaọ oware kpobi nọ ma bi ru kugbe inievo mai. (Gal. 5:22, 23) Ofariẹ, ma rẹ gwọlọ edhere nọ ma re ro “ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.” (Gal. 6:10; Hib. 13:16) Ohwo kpobi evaọ ukoko na, te inievo-emezae gbe erọ emetẹ, te emaha te ekpako, a rẹ sai wo obọ evaọ ‘ẹbọga oma na eva uyoyou.’

Ofariẹ, ma rẹ sae rehọ ona mai, ẹgba, gbe efe mai ro fi obọ họ evaọ iruo usiuwoma ota orọ ukoko na. Jesu Kristi ọ ta nọ: “Wha wo okẹ ọvọvẹ no.” Kọ eme ma re ru? Ọ ta nọ: “Wha kẹ ọvọvẹ.” (Mat. 10:8) Fikiere wo obọ ziezi evaọ iruo usiuwoma ota gbe amọfa nọ ma re fi obọ họ kẹ jọ ilele. (Mat. 24:14; 28:19, 20) Kọ o re bẹbẹ kẹ owhẹ re who wo obọ vọvọ evaọ iruo nana? Kareghẹhọ aye-uku oyogbere nọ Jesu ọ ta ẹme kpahe na. Okẹ riẹ o jọ kakao. Ghele na Jesu ọ ta nnọ ọ kẹ vi ahwo na kpobi. Uthoma riẹ kpobi o ru.—2 Kọr. 8:1-5, 12.

Mi Okẹ avọ Uyere

Ẹsejọ ukoko na o rẹ sae dhogbo bru owhẹ ze. Nọ whọ be daoma re whọ sae zọ evaọ udevie ẹgaga akpọ nana, jẹ obufihọ kpobi nọ ukoko na o gwọlọ kẹ owhẹ rehọ. Jihova ọ rehọ ezae nọ i te ziezi je wo ọdawẹ mu no re a ‘kuọ ukoko na,’ re a fi obọ họ kẹ owhẹ nọ whọ tẹ rrọ uye. (Iruẹru 20:28) Ekpako na gbe inievo efa a gwọlọ sasa owhẹ oma, fi obọ họ kẹ owhẹ, jẹ thọ owhẹ okenọ whọ tẹ rrọ ẹbẹbẹ.—Gal. 6:2; 1 Tẹs. 5:14.

Rekọ daoma ruẹ nọ okenọ a te fi obọ họ kẹ owhẹ, whọ jẹ obufihọ na rehọ. Ẹsikpobi jẹ obọ nọ a fihọ kẹ owhẹ rehọ avọ uyere. Rri obọ nọ inievo na a fihọ kẹ owhẹ kpobi wọhọ odhesẹvia aruoriwo Ọghẹnẹ. (1 Pita 4:10) Fikieme oyena u ro wuzou? Keme ma gwọlọ jọ wọhọ ahwo akpọ na ha, enọ e kare uyere.

 Jọ Owowa Je Roro kẹ Amọfa

Evaọ ileta nọ o kere se ukoko obọ Filipai, Pọl o kere kpahe Timoti nọ: “Me wo ohwo ọvo wọhọ iẹ he, nọ rẹ jọ eva riẹ ruawa ewoma rai.” Rekọ Pọl o te fibae nọ: “Ai kpobi a re gboduẹ ifowe omobọ rai, orọnọ erọ Jesu Kristi hi.” (Fil. 2:20, 21) Ma te roro kpahe eme nọ Pọl o kere na, eme ma re ru re ma siọ “ifowe omobọ” mai ọvo ba ẹgwọlọ?

Ma rẹ gba amọfa họ họ nọ ma tẹ be gwọlọ inọ a rehọ oke rai fi obọ họ kẹ omai. Eme jabọ? Roro kpahe onana: Ababọ avro eva e te were omai gaga otẹrọnọ oniọvo jọ o ru ọghọ kẹ omai okenọ oware idudhe jọ o tẹ via kẹ omai. Kọ ma te ta kẹe inọ o gbe fi obọ họ kẹ omai hi oja na? Vievie. Epọvo na re, dede nọ eva e rẹ were inievo mai ẹsikpobi re a fi obọ họ kẹ omai, ma re rẹro nnọ a rẹ rehọ oke rai kpobi fi obọ họ kẹ omai hi. Ma gwọlọ inọ inievo mai a te bi fi obọ họ kẹ omai thihakọ oke ogaga nana, a re ru ere no eva ze.

Avro ọ riẹ hẹ, o te were inievo Ileleikristi ra re a fi obọ họ kẹ owhẹ. Ghele na, ẹsejọ a rẹ sai ti ru ẹgwọlọ ra kẹ owhẹ hẹ. O tẹ via ere, jọ u mu owhẹ ẹro inọ Jihova o ti fi obọ họ kẹ owhẹ evaọ ẹbẹbẹ kpobi nọ who wo wọhọ epanọ o ru kẹ ọso-ilezi na.—Ol. 116:1, 2; Fil. 4:10-13.

Fikiere, whọ siọ obufihọ kpobi nọ Jihova ọ be kẹ owhẹ hẹ—maero evaọ oke uye. (Ol. 55:22) Ere ọ gwọlọ nọ who ru. Rekọ, ọ tẹ jẹ gwọlọ nọ whọ jọ “ohwo nọ ọ rẹ kẹ okẹ-evawere.” Fikiere gbaemu ‘evaọ eva ra’ inọ whọ rẹ dao uthoma ra kpobi re whọ zọhọ fihọ ẹnyaharo egagọ uzẹme. (2 Kọr. 9:6, 7) Kọ enẹ whọ sai ro mi okẹ avọ uyere whọ vẹ jẹ kẹ nevaze.

[Ẹkpẹti/Uwoho nọ e rrọ ẹwẹ-obe avọ 31]

“Eme mẹ rẹ za rọ kẹ ỌNOWO fiki irere nana kpobi nọ o ro ru omẹ ọghọ na?”—Ol. 116:12

▪ Gwọlọ edhere nọ who re ro “ru iruo ezi kẹ ahwo kpobi”

▪ Daoma ẹsikpobi re whọ kẹ inievo mai uduotahawọ gbe omosasọ abọ-ẹzi

▪ Rọ utho ẹgba ra ru iruo usiuwoma ota na ziezi