Tambula ye Matondo Vanina Kuna Mvevo

YAVE, wa S’eto ezulu, mfunu kikilu kekutuvwanga. Nkand’a Nzambi usonganga vo Yave olunga-lunganga selo yandi yawonso. (1 Pet. 5:⁠7) E mpila ina Yave kevangilanga wo i nkubika za mpila mu mpila kevanganga mu kutusadisa twansadila ye kwikizi kiawonso. (Yes. 48:​17) Musungula vava tukalanga mu mpasi, Yave ozolanga vo twalanda luludiku kasikidisa mu kutusadisa. O Nsiku a Mose usonganga e ziku kia diambu diadi.

Muna Nsiku kavana, Yave wasikidisa vo “asukami” nze wana ye akento ansona ye anzenza bavewa lusadisu. (Fuka 19:​9, 10; Nsi. 14:​29) Yave ozeye wo vo, akaka muna nkangu andi balenda vava lusadisu kwa mpangi zau asambidi. (Yak. 1:​27) Muna kuma kiaki, ke vafwete kala muntu ko ofwete katikisa mu tambula lusadisu lw’awana kesadilanga o Yave mu kutusadisa. Kana una vo i wau, tufwete kalanga ye ngindu zasikila vava tutambulanga lusadisu.

Kansi, Nkand’a Nzambi usonganga vo nkangu a Nzambi una mpe y’elau dia vana lusadisu kw’akaka. Badika nona kia “nkento ansona” ona Yesu kamona muna tempelo muna Yerusaleme. (Luka 21:​1-4) Nkento ndiona wazaya dina kasikidisa o Yave muna Nsiku mu kuma kia akento ansona. Kana una vo i wau, o nkento ndiona osungamenwanga, ke nze muntu watambula lusadisu ko, kansi nze muntu ona wavana. E fu kasonga kia vana, kiantwasila kiese kiayingi kadi nze una kavova o Yesu “edi diviokele e [nsambu], dia vana, ke mu tambula ko.” (Mav. 20:​35) Wau ozeye e ludi kiaki, aweyi lenda ‘vanina’ yo mona kiese ditwasanga?​—⁠Luka 6:⁠38.

“Nki Mvutula kwa Yave?”

Ntozi a nkunga wayuvula vo: “Nki mvutula kwa Yave, muna mvevo andi wawonso kwa mono?” (Nku. 116:​12) Nki kavewa kuna mvevo? Yave wansadisa muna ntangwa “mpasi ye ntantu.” Vana ntandu, Yave ‘watanina moyo andi muna fwa.’ Owau, yandi má kazola ‘vutula’ kwa Yave. Nki kavutula o ntozi a nkunga? Wavova vo: “Nlunganisa nsilu miame kwa Yave.” (Nku. 116:​3, 4, 8, 10-​14) Wabak’e nzengo za lungisa nsilu miawonso kasila kwa Yave.

Ngeye mpe lenda vanga diau adimosi. Mu nkia mpila? Muna zingilang’e ngwizani ye nsiku mia Nzambi. Muna kuma kiaki, diamfunu mu sianga nsambil’a Yave va fulu kiantete muna zingu kiaku yo yambula vo mwand’a Nzambi wafila muna mawonso ovanganga. (Kim. 12:13; Ngal. 5:​16-​18) Kansi e ludi i kiaki: Kulendi vutula Yave ko mawonso kevanganga kwa ngeye. Kana una vo i wau, lenda ‘mwesa ntim’a Yave e kiese’ vava kemonanga vo okuyivananga muna salu kiandi yo ntima wawonso. (Nga. 27:​11) Elau diampwena kikilu tuvwidi dia yangidika Yave muna kunsadila yo ntima wawonso.

 Sadisa e Nkutakani Yanungunuka

Ka lukatikisu ko vo lusadisu lwayingi otambulanga muna nkutakani y’Akristu. Muna nkutakani, Yave okutuvananga madia mayingi ma mwanda. Ozey’e ludi eki kiavevola muna nsambila zaluvunu ye mu tombe kia mwanda. (Yoa. 8:​32) Muna tukutakanu twampwena ye twakete tukubikwanga kwa “ntaudi akwikizi yo lulungalalu,” ovwanga zayi ufilanga ku moyo a mvu ya mvu muna paradiso ova ntoto, kondwa ntantu ye mpasi. (Mat. 24:​45-​47) Ka tulendi yika nluta miawonso ko tubakanga muna nkutakani a Nzambi. Nki olenda vutula kwa nkutakani?

Paulu wa ntumwa wasoneka vo: “E to kiawonso kiafwaninikinwa yo yikakeselwa muna mpambwil’a yikilwa yawonso, mun’owu wa mfunka, muna kiandi tezo, ya kîkwakîkwa yawonso, kivongeselang’e to yamuna kuvangamesa muna zola.” (Ef. 4:​15, 16) Kana una vo e sono kiaki Akristu akuswa kiyikanga, e luludiku luna mo lulenda sadilwa kw’Akristu awonso o unu. Elo, konso yîkwa kia nkutakani lenda sadisa, kimana nkutakani yanungunuka. Mu nkia mpila?

Tulenda wo vanga muna kasakesanga yo fiaulwisa akaka muna mwanda. (Roma 14:​19) Tulenda mpe van’e moko muna ‘wokesa to’ muna yimanga mbongo a mwand’a Nzambi muna mpila tukadilanga y’akaka. (Ngal. 5:​22, 23) Vana ntandu, tufwete vavanga elau dia ‘vang’owu wambote kwa wantu awonso, musungula kwesi kilukwikilu.’ (Ngal. 6:10; Ayib. 13:​16) Awonso muna nkutakani, mpangi z’akala ye z’akento, aleke ye ambuta, balenda van’e moko muna ‘vangames’e to muna zola.’

E mpila yakaka tulenda wo vangila i sadila ngangu, ngolo ye mavwa meto muna salu kivuluza mioyo mia wantu, kisalwanga muna nkutakani. Yesu Kristu wavova vo: “Ngovo nutambwidi.” Adieyi tufwete vanga oyeto? Yesu wakudikila vo: “Nuvan’e ngovo.” (Mat. 10:⁠8) Muna kuma kiaki, vanga wawonso olenda mu yikama salu kia samun’e nsangu zambote za Kintinu yo kitula wantu s’alongoki. (Mat. 24:14; 28:​19, 20) Nga vena ye diambu dikukakilanga? Sungamena nkento ansona kayika o Yesu. Lukau kavana lwakete kikilu. Kana una vo i wau, Yesu wavova vo lukau lwandi lwaluta tukau twa wantu akaka. Wavana kina kalenda mun’owu wa zingu kiandi.​—⁠2 Kor. 8:​1-5, 12.

Kala ye Ngindu Zasikila Vava Otambulanga Lusadisu

Valenda kala ye ntangwa ina ilenda vava vo wasadiswa kwa nkutakani. Ku kadi ye lukatikisu ko lwa tambula lusadisu lwa nkutakani, vava okalanga mu mpasi za tandu kiaki. Yave wakubika mpangi zazikuka, akwa walakazi mu ‘vungula nkutakani’ yo kusadisa vava okalanga mu mpasi. (Mav. 20:​28) Akuluntu ye mpangi zakaka muna nkutakani bena ye luzolo lwa kufiaulwisa, kusadisa yo kutanina muna ntangw’ampasi.​—⁠Ngal. 6:2; 1 Tes. 5:⁠14.

Kansi ofwete kalanga ye ngindu zasikila vava tambulanga lusadisu. Vutulanga matondo muna lusadisu otambulanga. Ofwete badikilanga lusadisu otambulanga kwa mpangi zaku za mwanda nze sinsu kia nsambu za Nzambi. (1 Pet. 4:​10) Ekuma dinin’o mfunu? E kuma kadi ka tuzolele vanga ko dina divanganga wantu ayingi o unu, ana balembi vutulanga matondo vava bevewanga lusadisu.

Zayang’e Tezo

Muna nkand’andi kwa esi Filipi, Paulu wasoneka mu kuma kia Timoteo vo: “Kina  yankwa ntima mosi nze yandi ko, on’osia kikilu o mambu meno o moyo.” I bosi, Paulu wakudikila vo: “Kadi awonso, konso muntu, omandi i kavwidi mfunu, mana ma Yesu Kristu ke mau ko.” (Fili. 2:​20, 21) Muna kuma kia mvovo miami mia Paulu, aweyi tulenda vengela fu kia tokananga kwayingi muna mambu ma ‘yeto kibeni’?

Ka tufwete vavanga mayingi ko kw’akaka muna nkutakani vava tulombanga vo basadila ntangw’au mu kutusadisa muna ntangw’ampasi. Ekuma? Yindula diambu edi: Kele vo mpangi utuvene lusadisu mu ntangw’ampasi, kieleka tutoma yangalala. Kansi, nga diambote dia kunkomekena vo katusadisa? Ve kikilu. Diau adimosi mpe, kana una vo mpangi zeto azolwa bekalanga ye kiese kia kutusadisa, tufwete zayang’e tezo kia dina tuvavanga kwa yau. Muna kuma kiaki, konso dina balenda vanga mpangi zeto mu kutusadisa, vava tukalanga mu mpasi, tufwete vingila vo bavangila dio kuna mvevo.

Kala ye vuvu vo mpangi zaku z’Akristu bekwamanana kusadisa kuna mvevo. Kansi, ezak’e ntangwa ke balendi lungisa nsatu zaku zawonso ko. Avo i wau, kala ye ziku vo Yave okusadisa muna konso mpasi zilenda kubwila, nze una kasadisila ntozi a nkunga.​—⁠Nku. 116:​1, 2; Fili. 4:​10-13.

Muna kuma kiaki, kukadinge ye lukatikisu ko mu tambula konso lusadisu kekuvananga o Yave, musungula vava okalanga mu mpasi. (Nku. 55:​22) I diau kazolele vo wavanga. Kansi, ozolanga mpe wakala “mvani amvevo.” I kuma vo, kala ‘y’ekani muna ntim’aku’ dia vana konso kina olenda mu yikama nsambila aludi. (2 Kor. 9:​6, 7) Muna mpila yayi, olenda tambula ye matondo yo vanina kuna mvevo.

[Babu/​Mafoto zina muna lukaya lwa 31]

“Nki mvutula kwa Yave, muna mvevo andi wawonso kwa mono?”​—Nku. 116:12

▪ Vavanga elau dia ‘vang’owu wambote kwa wantu awonso’

▪ Kasakesanga yo fiaulwisa akaka muna mwanda

▪ Vanga wawonso olenda mu yikama salu kia kitula wantu s’alongoki