Tambwilenu naKusakilila Hanenu naMuchima Wumu

YEHOVA, Tata yetu wamwiwulu watukeña watwakamenaña. Izu daNzambi datulejaña nawu wakamenaña nankashi ambuñindi ejima. (1 Petulu 5:7) Yehova watukwashaña munjila jashiyashana jatuloñeshelayi kulonda tumukalakeleña nakashinshi nawa jamwekeshaña nawu watwakamenaña. (Isaya 48:17) Sweje-e dinu neyi tumona kukala kwatuneñeshaña, Yehova wakeñaña tuheteli muwukwashu watuloñeshelañayi. Nshimbi jamwinkeluwu Mosi jashimunaña chumichi.

Yehova mukukeña waloñesheli njila mwakukwashila “kazweñi,” chidi neyi nshona, ntuluwa, nimwenyi kuhitila muNshimbi jamwinkeluwu Mosi. (Alevi 19:9, 10; Kuhituluka 14:29) Weluka nindi ambuñindi amakwawu anateli kukeña wukwashu kudi ana kwawu niahela akwaKristu. (Yakoba 1:27) Dichi, kwosi ambuñindi atela kukaana wukwashu wunafumi kudi antu anasañumunuwu kudi Yehova kulonda ayikwashuku. Hela chochu, neyi twiteja wukwashu weniwu, twatela kutambwila namuchima wumu.

Hampinji yoyimu, Izu daNzambi dashimuna nawu antu jaNzambi niwena akweti kukooleka kwakuhana. Anukenu nsañu ‘yamumbanda wamfwila kazweñi’ wamweniyi Yesu hatembeli muYerusalema. (Luka 21:1-4) Watela wahetelelumu munjila jajiwahi jaloñesheliyi Yehova jakukwashilamu amfwila neyi chashimwinuwu muNshimbi. Hela chakwila ona mumbanda mfwila wadiñi kazweñi, amwanukaña neyi muntu wahanini bayi neyi watambwililuku. Muchima windi wakuhana wamuleteleli muzañalu neyi chahosheliyi Yesu nindi, “chikweti kukooleka yowu kuhana, kutambula chakuminamu.” (Yililu 20:35) Hakwiluka iyi nsañu yalala tunateli ‘kudiza ñahi kuhana’ nikwikala namuzañalu?—Luka 6:38.

“Yehova Nukumwinkadi?”

Ñimbi yamasamu wadihwili nindi: ‘Indi Yehova nukumwinkadi nayuma yayiwahi yejima yinañililiyi?’ (Masamu 116:12) Kukoolekanyi kwatambwililiyi? Yehova wamukwashili hampinji yamweniyi “yihuñu nimakabi.” Kubombelahu, Yehova ‘wapulwishili niwumi windi mukufwa.’ Dichi wakeñeleña ‘kumwinka’ Yehova chuma munjila yidi yejima. Chumanyi chadi kwilayi ñimbi yamasamu? Wahosheli nindi: “Nukumufuta Yehova yuma yinadishiilili.” (Masamu 116:3, 4, 8, 10-14) Wafuukwiluhu kushikija yuma yejima yamukaniniyi Yehova nawa nikushikija yuma yejima yahosheliyi nindi wukumwilila.

Munateli kwila chuma cheliliyi ñimbi yamasamu. Munjilanyi? Kuhitila mukukakela kunshimbi jaNzambi muchihandilu chenu mpinji yejima. Dichi, ilukenu chikupu nenu mwalemesha nankashi kudifukula kudi Yehova muwumi wenu, nawa mwetejaña spiritu yaNzambi kuyilombola muyuma yejima yimwelaña. (Mukwakutaŋisha 12:13; Aŋalija 5:16-18) Kafwampi, himukutwesha kumufuntishila Yehova chikupu hayuma yejima yayililayuku. Hela chochu, ‘mwatiyishaña muchima waYehova kuwaha’  hakudihana namuchima wejima mumudimu windi. (Yishimu 27:11) Hikukooleka kwakweni kwakumuzañalesha Yehova muniyi njila.

Kwashenu Chipompelu Kwikala Chakola

Chakadi nikujina mukwiteja nenu chipompelu chawakwaKristu chinayikwashi munjila jajivulu. Yehova waloñesha yakudya yakuspiritu yayivulu kuhitila muchipompelu. Mwatambwilili nsañu yalala yayisubwili muwuduñu wakuyamba Nzambi ninkeñelu yindi. (Yowanu 8:32) Hakupompa kwachipompelu, kupompa kwanyanya nikupompa kwamaneni kwaloñeshañawu kudi ‘nduñu wamaana nikashinshi,’ mwadizaña nsañu yalala yakayilombola kuwumi wahaya nyaka muparadisa hamaseki chakadi kukata hela kukabakana. (Matewu 24:45-47) Himunateli kuchinda nkisu jejima jimwatambwila niyimuchidi kutambwila kuhitila muchipompelu chaNzambuku. Chumanyi chimunateli kuhana kuchipompelu?

Kapostolu Pawulu wasonekeli nindi: “Mujimba wejima, hiwukudikwata namanuñi akukwashañana, yidi yejima hiyikwila nyidimu yawu, iwu nawindi, iwu nawindi, kulonda mujimba wukulaña nakudituña mukukeña.” (Aefwesesa 4:15, 16) Hela chakwila nsona yeniyi yakundama chikupu kudi izanvu dawakwaKristu awayishewa, nshimbi yekalamu yinateli kuzatika kudi akwaKristu ejima makonu. Eña, muntu wejima wamuchipompelu nateli kukwasha chipompelu kwikala chakola nikuyilaku hambidi. Munjilanyi?

Tunateli kwila mwenimu kuhitila mukuzata nañovu mpinji yejima kulonda tukundejeña nikukolesha amakwawu kuspiritu. (Aroma 14:19) Tunateli cheñi kukwashaku ‘mujimba kukula’ kuhitila mukwikala namukabu waspiritu yaNzambi munzatilu yetu nawana kwetu niahela muchipompelu. (Aŋalija 5:22, 23) Kubombelahu tunateli kuwana mpinji ‘yakwilila antu ejima chachiwahi; nakubadika kwilila akwetu akwakwitiya kwakukuhwelela.’ (Aŋalija 6:10; Aheberu 13:16) Antu ejima muchipompelu, amana kwetu niahela, atwansi niakulumpi anateli kukwashaku ‘kutuña mujimba mukukeña.’

Tunateli cheñi kuzatisha yawaana yetu yitukweti, ñovu, nimaheta kulonda kuzataku mumudimu wakushimwina wakalakalaña chipompelu. Yesu Kristu wahosheli nindi: ‘Mwatambwilili chamukunkulu.’ Hanu dinu tunateli kwiladi? Wahosheli nindi: “Kahanenu nawa chamukunkulu.” (Matewu 10:8) Dichi, kalakalenuña nañovu jejima mumudimu walema wakushimwina Wanta nikwilisha atumbanji. (Matewu 24:14; 28:19, 20) Komana kudi yuma yayikañeshaña kwila mwenimu? Anukenu ona mumbanda mfwila kazweñi wateneniyi Yesu. Chuma chahaniniyi chadiña chanyanya nankashi. Ilaña, Yesu wahosheli nindi welili chuma chabadika akwawu ejima. Waheni yuma yadiñi nayu yejima.—2 Akorinda 8:1-5, 12.

Tambwilenu Wukwashu naMuchima Wumu

Hela chochu, mpinji jikwawu munateli kukeña wukwashu kuchipompelu. Bayi mushintajala kutambwila wukwashu wejima wunateli kuyikwashawu muchipompelu neyi mumona kukala kwekala mukanu kaayuku. Yehova wahana antu ashikahu nawa akamenaña kulonda ‘kubiña chipompelu,’ nikuyikwasha neyi mumona kukala nikweseka. (Yililu 20:28) Aeluda niantu amakwawu muchipompelu akeñaña kuyikundeja, kuyikwasha, nikuyikiña hampinji yimukumona kukala.—Aŋalija 6:2; 1 Atesalonika 5:14.

Ilukenu chikupu nenu neyi mutambwila wukwashu wunakukeñeka, mwatela kutambwila namuchima wumu. Mwatela kusakilila mpinji yejima yimunatambwili wukwashu. Wukwashu wumukutambwila kudi akwetu akwakwitiya wumonenu nenu Nzambi nayimwekesheli luwi lwindi lwasweja. (1 Petulu 4:10) Muloñadi chumichi chichalemena? Muloña hitwakeñaña kutambwila neyi chelañawu antu amavulu amukaayi abulaña kusakililaku.

Esekejenuña Yuma niKutoñojokelaku Amakwawu

Mumukanda windi wasonekeleliyi chipompelu chakuFwilipi, Pawulu wahosheli hadi  Timotewu nindi: “Nabuli mukwawu wudi neyi yena wukwakama chalala chimwashakama.” Hela chochu, Pawulu wabombeleluhu nindi: “Ejima adikeñelaña yawu hohu, hiyakeña nsañu yaYesu Kristuku.” (Afwilipi 2:20, 21) Chineli tuneluki iyi nsañu yalema yahosheliyi Pawulu, indi etu makonu tunateli kutondolwela ñahi kusweja ‘kudikeñela’ yuma yetu?

Neyi tunakukeña netu amakwawu muchipompelu atukwashuku kutalisha hakukala kutukweti, hitwatela kuyikanjikijaku. Muloñadi? Toñojokenu hachumiche: Chakadi kujina, tukusakilila hama neyi chakwila mana kwetu yatwinka wukwashu wakumujimba kulonda tudikwashi nachu neyi tudi mukukala. Komana tukumukanjikija kulonda yatwinki yumiyi? Hitukwila mwenimuku. Chochimu, chineli amana kwetu akeñaña kutukwasha mpinji yejima, anetu nawa twatela kwesekeja yuma nikuyitoñojokelaku, muloña tuneluki netu akwinza nakutukwasha hampinji yatelela. Kafwampi, twakeñaña netu akwetu akwakwitiya atukwashi kuumika kukala mukudikeñela.

Chakubula kujinoka, amana kwenu niahela akwaKristu ekala adiloñesha nawa adikeñelaña kuyikwasha mpinji yejima. Hela chochu, mpinji jikwawu hiyanatweshi kuyikwasha muyuma yejima yimunakankiluku. Neyi akañanya kuyikwasha, kuhwelelenu nenu Yehova wukuyikwasha, neyi chamukwashiliyi ñimbi yamasamu, mukukala kwejima kumukumona.—Masamu 116:1, 2; Afwilipi 4:10-13.

Dichi bayi mushintajala kutambwila nakusakilila wukwashu wejima wukuyinkayi Yehovaku, sweje-e neyi mudi nakukala. (Masamu 55:22) Wakeñaña nindi mutambwili wukwashu. Hela chochu, wakeñaña cheñi nindi ‘muhaneña namuzañalu.’ Dichi, ‘toñojokenu chachiwahi mumuchima wenu’ kulonda muhani yuma yimukweti hakukwasha kudifukula kwalala. (2 Akorinda 9:6, 7) Neyi mwila mwenimu, mukwila yuma yejima yiyedi, kutambwila nakusakilila nikuhana namuchima wumu.

[Chikasha/Mwevulu wudi hefu 32]

‘Indi Yehova nukumwinkadi nayuma yayiwahi yejima yinañililiyi?’—Masamu 116:12

▪ Ikalenu nampinji ‘yakwilila antu ejima chachiwahi’

▪ Ikalenu akwakukundeja nikukolesha amakwawu kuspiritu

▪ Zatenuña chikupu mumudimu wakwilisha atumbanji kwesekeja nahanakumini ñovu jenu