Amogela ka Lethabo Nea ka Pelo ka Moka

JEHOFA, Tatago rena wa legodimong, o tshwenyega ka rena. Lentšu la Modimo le re kgonthišetša gore o rata bahlanka ba gagwe ka moka kudu. (1 Pet. 5:7) Tsela e nngwe yeo Jehofa a bontšhago lerato ka yona ke ka go re thuša ka ditsela tše fapa-fapanego gore re mo hlankele ka potego. (Jes. 48:17) Jehofa o nyaka gore re diriše thušo yeo a re neago yona kudu-kudu ge re lebeletšane le mathata ao a re gateletšago. Molao wa Moše o bontšha therešo yeo.

Thulaganyong ya Molao, Jehofa o neile thušo e lerato bakeng sa “badiidi” ba bjalo ka dišuana, bahlologadi le baeti. (Lef. 19:9, 10; Doit. 14:29) O a tseba gore ba bangwe ba bahlanka ba gagwe ba ka nyaka thušo go barapedi-gotee le bona. (Jak. 1:27) Ka gona, ga go le o tee wa bahlanka ba gagwe yo a swanetšego go gana thušo yeo e newago ke bao ba tutueditšwego ke Jehofa gore ba e nee. Lega go le bjalo, ge re amogela thušo re swanetše go dira bjalo ka moya o mobotse.

Ka nako e swanago, Lentšu la Modimo le gatelela gore batho ba Modimo le bona ba na le sebaka sa go nea. Gopola pego ya ‘mohlologadi wa mohloki,’ yoo Jesu a ilego a mmona tempeleng kua Jerusalema. (Luka 21:1-4) Mohlomongwe o be a newa thušo yeo Jehofa a ilego a rulaganya gore bahlologadi ba e newe go etša ge go hlalositšwe ka Molaong. Lega go le bjalo, le ge e be e le mohloki, mohlologadi yoo ga a gopolwe e le motho yo a ilego a newa, eupša o gopolwa e le motho yoo a ilego a nea. Mokgwa wa gagwe wa go nea o swanetše go ba o ile wa dira gore a thabe ka gobane Jesu o itše, “go na le lethabo le legolo go neeng go feta go amogeleng.” (Dit. 20:35) O e-na le therešo yeo ka mogopolong, o ka ‘tlwaela bjang go fa’ gomme o bone lethabo leo le tlišwago ke seo?—Luka 6:38.

“Morêna ke tlo mo Leboxa Ka’ng?”

Mopsalme o ile a ipotšiša gore: “Morêna ke tlo mo leboxa ka’ng tše di botse tšohle tše a ntiretšexo tšôna?” (Ps. 116:12) O be a mo diretše’ng? Jehofa o be a mo šireleditše nakong ya ‘mehlako le mahloko.’ Go feta moo, Jehofa o be a “namoletše môya [wa gagwe] diatleng tša lehu.” Ga bjale o be a nyaka go “leboxa” Jehofa ka tsela e itšego. Mopsalme o be a tla dira’ng? O ile a re: “Kênô tša-ka tše ke di enetšexo Morêna, ke tlo di phêtha.” (Ps. 116:3, 4, 8, 10-14) O ile a dira phetho ya go phethagatša dikholofetšo ka moka tšeo a di diretšego Jehofa le go phetha boikarabelo bja gagwe ka moka go yena.

Le wena o ka dira bjalo. Bjang? Ka go phela bophelo bjoo ka mehla bo dumelelanago le melao ya Modimo le melao ya gagwe ya motheo. Ka gona, kgonthišetša gore ka mehla borapedi bja gago go Jehofa e ba selo sa bohlokwa kudu le gore o dumelela moya wa Modimo o go hlahla dilong ka moka tšeo o di dirago. (Mmo. 12:13; Bagal. 5:16-18) Therešo ke gore o ka se ke wa leboga Jehofa ka mo go feletšego bakeng sa dilo tšohle tše a go diretšego tšona. Lega go le bjalo, go ‘thabiša pelo ya Jehofa’ go bona o ineela ka pelo ka moka tirelong ya gagwe. (Die. 27:11) Ruri ke tokelo e kgethegilego go thabiša Jehofa ka tsela ye!

 Tsenya Letsogo go Direng Gore Phuthego e Thabe

Ka ntle le pelaelo o tla dumela gore phuthego ya Bokriste e go hotše ka ditsela tše ntši. Jehofa o re neile dijo tše dintši tša moya a diriša phuthego. O amogetše therešo yeo e ilego ya go lokolla diphošong tša bodumedi le lefsifsing la moya. (Johane 8:32) Dibokeng tša Bokriste, dikopanong tše nyenyane le tše dikgolo tšeo di rulagantšwego ke “mohlanka yo a botegago le wa temogo,” o hweditše tsebo yeo e tla go lebišago bophelong bjo bo sa felego lefaseng la paradeise leo le se nago bohloko le tlaišego. (Mat. 24:45-47) Na o ka bala mehola yeo o e hweditšego—le yeo o sa tlago go e hwetša—ka phuthego ya Modimo? O ka leboga phuthego ka’ng?

Moapostola Paulo o ngwadile gore: “Mmele ka moka, ka go ba o kopantšwego gotee ka kwano le go dirwa gore o be le tirišano ka lelokololo le lengwe le le lengwe leo le neago se se nyakegago, go ya ka modiro wa setho se sengwe le se sengwe ka tekanyo e swanetšego, go dira gore mmele o gole bakeng sa gore o ikage ka lerato.” (Baef. 4:15, 16) Le ge lengwalo le le šoma kudu go Bakriste ba tloditšwego, molao wa lona wa motheo o ka šoma go Bakriste ka moka lehono. Ee, setho se sengwe le se sengwe sa phuthego se ka tsenya letsogo go direng gore phuthego e thabe le gore e gole. Ka ditsela dife?

Re ka dira bjalo ka gore ka mehla re katanele go kgothatša le go lapološa bangwe moyeng. (Baroma 14:19) Le gona, re ka tlaleletša go direng gore “mmele o gole” ka go hlagolela dienywa tša moya wa Modimo ditirišanong tša rena ka moka le badumedi-gotee le rena. (Bagal. 5:22, 23) Go feta moo, re ka lebelela dibaka tšeo re ka ‘direlago bohle botse, eupša kudu-kudu re bo direla bao ba tswalanego le rena tumelong.’ (Bagal. 6:10; Baheb. 13:16) Yo mongwe le yo mongwe ka phuthegong—bana babo rena le dikgaetšedi, bafsa le batho ba bagolo—a ka tsenya letsogo go ‘ageng mmele ka lerato.’

Go tlaleletša moo, re ka diriša ditalente tša rena, matla le dilo tšeo re nago le tšona bakeng sa go tšea karolo modirong wa go phološa maphelo woo o dirwago ke phuthego. Jesu Kriste o itše: “Le amogetše feela.” Re swanetše go arabela bjang? O itše: “Neang feela.” (Mat. 10:8) Ka gona, tšea karolo ka botlalo modirong o bohlokwa wa go bolela ka Mmušo le go dira barutiwa. (Mat. 24:14; 28:19, 20) Na maemo a gago a lekanyetša seo o ka se dirago? Gopola mohlologadi wa mohloki yoo Jesu a boletšego ka yena. Moneelo wa gagwe e be e le o monyenyane kudu. Lega go le bjalo, Jesu o itše o neetše go feta ba bangwe ka moka. O neetše ka sohle seo maemo a gagwe a bego a mo dumelela go se nea.—2 Bakor. 8:1-5, 12.

Amogela Thušo ka Moya o Nepagetšego

Lega go le bjalo, go ka ba le dinako tšeo ka tšona o nyakago thušo ya phuthego. O se ke wa dika-dika go amogela thušo le ge e le efe yeo phuthego e ka go neago yona ge o thatafalelwa ke go lebeletšana le dikgateletšo tša tshepedišo ye ya dilo. Jehofa o beile banna ba swanelegago le ba nago le lerato gore ba “diše phuthego”—gore ba go thuše ge o lebeletšane le diteko le mathata. (Dit. 20:28) Bagolo le ba bangwe ka phuthegong ba nyaka go go homotša, go go thekga le go go šireletša dinakong tša mathata.—Bagal. 6:2; 1 Bathes. 5:14.

Lega go le bjalo, kgonthišetša gore ge o amogela thušo e nyakegago, o dira bjalo ka moya o nepagetšego. Ka mehla leboga thekgo yeo o e newago. Lebelela thušo yeo o e newago ke badumedi-gotee e le pontšho ya botho bja Modimo bjo bo sa swanelago. (1 Pet. 4:10) Ke ka baka la’ng se se le bohlokwa? Ka gobane ga re nyake go amogela ka tsela yeo ba bantši lefaseng ba amogelago ka yona—ka ntle le tebogo.

E-ba yo a Leka-lekanego

Ka lengwalong la gagwe le le yago phuthegong ya Filipi, Paulo o ngwadile mabapi le Timotheo gore: “Ga ke na yo mongwe yo a nago le kgopolo e swanago le ya gagwe yo a tlago go hlokomela e le ka kgonthe dilo tše di lego mabapi le lena.” Lega go le bjalo, Paulo o ile a tlaleletša  ka gore: “Ba bangwe ka moka ba nyaka dikgahlego tša bona, e sego tša Kriste Jesu.” (Bafil. 2:20, 21) Re e-na le pono yeo ya Paulo ka megopolong, rena lehono re ka efoga bjang go tshwenyega kudu ka ‘dikgahlego tša rena’?

Le ka mohla ga se ra swanela go gapeletša ge re kgopela ba bangwe ka phuthegong gore ba re thuše go rarolla mathata a rena. Ka baka la’ng? Nagana ka se: Ka ntle le pelaelo re be re tla thaba kudu ge e ba ngwanabo rena a ka re nea thušo ya dilo tše di bonagalago gore re kgone go lebeletšana le boemo bja tšhoganetšo. Eupša na re be re ka mo gapeletša gore a re nee thušo e bjalo? Ga go bjalo le gatee. Ka tsela e swanago, gaešita le ge bana babo rena bao ba nago le lerato ba thabela go re thuša, re swanetše go ba le teka-tekano gomme re se ke ra letela gore ba fetše nako e ntši ba re thuša go feta kamoo ba bego ba ka kgona. Ge e le gabotse, re nyaka gore selo le ge e le sefe seo badumedi-gotee ba se dirago go re thuša bakeng sa go lebeletšana le dinako tše thata, ba se dire ka go rata.

Ga go pelaelo gore ka mehla bana beno le dikgaetšedi ba Bakriste ba tla dula ba ikemišeditše go go thuša. Lega go le bjalo, ka dinako tše dingwe ba ka no se kgone go fihlelela dinyakwa tša gago ka moka. Ge e ba seo se direga, kgonthišega gore Jehofa o tla go matlafatša ditekong ka moka tšeo o lebeletšanago le tšona, go swana le ge a ile a matlafatša mopsalme.—Ps. 116:1, 2; Bafil. 4:10-13.

Ka gona, o se ke wa dika-dika go amogela ka tebogo selo se sengwe le se sengwe seo Jehofa a go direlago sona—kudu-kudu dinakong tša kgateletšego le mathata. (Ps. 55:22) O nyaka gore o dire bjalo. Lega go le bjalo, gape o nyaka gore o be “monei yo a neago ka go hlalala.” Ka gona, ‘phetha ka pelong ya gago ka mo go feletšego’ gore o nee sohle seo maemo a gago a go dumelelago go se nea bakeng sa go thekga borapedi bja therešo. (2 Bakor. 9:6, 7) Ka tsela yeo, o tla kgona go dira dilo tše ka bobedi—go amogela ka tebogo le go nea ka pelo ka moka.

[Box/​Pictures on page 31]

“Morêna ke tlo mo leboxa ka’ng tše di botse tšohle tše a ntiretšexo tšôna?”​—Ps. 116:12

▪ Tsoma dibaka tša go ‘direla bohle botse’

▪ Kgothatša le go lapološa ba bangwe moyeng

▪ Tšea karolo ka botlalo modirong wa go dira barutiwa go ya kamoo maemo a gago a go dumelelago ka gona