Ariki ma te Akameitaki​—Oronga ma te Ngakau Katoa

E MANAKO mai ana to tatou Metua i te rangi ko Iehova uaorai ia tatou. Te akapapu maira te Tuatua a te Atua kia tatou e te manako oonu maira aia i tona au tavini katoatoa. (1 Pete. 5:7) Ko tetai mataara e akatutu maira a Iehova i tona manako koia oki, na te oronga anga mai kia tatou i te au tu tauturu tukeke kia tavini iaia ma te akarongo mou. (Isa. 48:17) Me aro atu tikai tatou i te au manamanata te akatupu ra i te taitaia, e inangaro ana a Iehova ia tatou kia taangaanga i te tauturu tana e oronga maira. Te akatutu maira te Ture a Mose i taua tuatua mou ra.

I raro ake i te akanooanga o te Ture, kua oronga mai a Iehova i te tauturu aroa no te aronga “putaua,” mei te au matiroeroe, te vaine takaua, e te tangata ke. (Levi. 19:​9, 10; Deu. 14:29) Kua kite aia e penei ka anoano tetai o tona au tavini i te tauturu mei to ratou au taeake akamori. (Iako. 1:27) No reira, eiaa rava tetai o tona au tavini tei kite i te tu ngere, e emiemi i te ariki i te tauturu a te aronga tei akakeuia e Iehova kia oronga mai i te tauturu. Noatu ra, me ariki tatou i te tauturu, ka inangaro tatou kia akaari i te reira na roto i te tu tau.

I taua taime rai, te akakite maira te Tuatua a te Atua e e atianga katoa to te au tangata o te Atua i te oronga atu. E akamaara ana i te papaanga o te “vaine takaua apinga kore” ta Iesu i akara atu i ko i te iero i Ierusalema. (Luka 21:​1-4) Kare e kore e kua puapingaia aia mei te aroa takinga meitaki o Iehova no te au vaine takaua e taikuia maira e te Ture. Noatu tona apinga kore, kua akamaaraia taua vaine takaua ra, kare no tei ariki mai aia, mari ra no tei oronga atu. Ko tona tu oronga ua kua apai mai te reira i te tu mataora kiaia no te mea, mei ta Iesu i tuatua e, “e mea meitaki i te oronga atu i te rave mai.” (Anga. 20:35) Na te akamanako anga i taua tuatua mou ra, akapeea koe i te “oronga” anga atu e te kite anga i te mataora te ka tupu?​—Luka 6:38.

“Eaa ra Taku e Apai Atu na Iehova?”

Te akamanako ra te tata taramo e: “Eaa ra taku e apai atu na Iehova, i te au takinga-meitaki katoa nona iaku nei?” (Sala. 116:12) Eaa ra te puapinga tei rauka iaia? Kua akono tikai a Iehova iaia i te tuatau “tumatetenga e te mamae.” Pera katoa, “kua akaora [a Iehova i tona] vaerua i te mate.” I teianei kua inangaro aia i te “apai atu” koia oki, i te tutaki atu ia Iehova. Eaa ra ta te tata taramo ka rave? Kua karanga aia e: “Ka akatupu au i taku i tia ia Iehova.” (Sala. 116:​3, 4, 8, 10-14) Kua tauta aia i te akono i te au taputou katoatoa tana i papau kia Iehova e i te akatupu pouroa i tana apainga i tia kiaia.

Ka rauka rai ia koe i te rave i te reira. Akapeea ra? Na te aru anga i tetai oraanga te rotai ra ki te au ture e te au kaveinga a te Atua, i te au taime ravarai. No reira, e akapapu e ko taau akamorianga ia Iehova ko te mea puapinga rava atu ia i roto i toou oraanga, e kia riro te vaerua o te Atua ei arataki ia koe i roto i te au apinga ravarai taau ka rave. (Kohe. 12:13; Gala. 5:​16-18) Ko te tikaanga tikai, kare rava e rauka ia koe i te apai atu, koia oki i te tutaki ia Iehova no te au mea ravarai tana i rave noou. Noatu ra, ‘ka rekareka te ngakau o Iehova’ i te kite e te oronga ra koe ia koe uaorai ma te ngakau katoa i roto i tana angaanga. (Mase. 27:11) Mei teaa atura te tikaanga ngateitei kia akarekareka ia Iehova i roto i teia mataara!

 Tauturu i te Turanga Meitaki o te Putuputuanga

Kare e ekoko, e ka akatika koe e kua puapingaia koe mei te putuputuanga Kerititiano i roto i te au mataara e manganui. Na roto i te putuputuanga, e maata ua atu ta Iehova kai i oronga mai i te pae vaerua. Kua rauka ia koe te tuatua mou tei akarangatira ia koe mei te au tarevake o te akonoanga e te tu kamakura i to te Atua anoano. (Ioa. 8:32) I ko i te au uipaanga a te putuputuanga, te au akaputuputuanga, e te au uruoaanga tei akanooia e “te tavini akono meitaki e te pakari,” kua rauka ia koe te kite te ka taki atu ki te ora mutu kore i runga i te enua parataito, ma te kore e mamae e te au tu ngata. (Mata. 24:​45-47) Ka rauka ainei ia koe i te akamata i te tare i te au puapinga katoatoa tei rauka ia koe​—e te ka rauka mai​—na roto i te putuputuanga o te Atua? Eaa taau ka oronga atu ki te putuputuanga no te reira?

Kua tata te apotetoro a Paulo e: “Te tau meitaki o te kopapa katoa e i piri ei oki, no te meitaki o te au pirianga katoa i te pakari ou o te au ngai katoa kia tau, tupu akera te kopapa i te maata anga o tona uaorai meitaki ma te aroa.” (Ephe. 4:​15, 16) Noatu e no te au Kerititiano akatainuia tikai teia irava, ko te kaveinga ra o te reira, ka tau no te au Kerititiano pouroa i teia tuatau. Ae, ka rauka i te au mema tataki tai o te putuputuanga i te tauturu i te turanga meitaki e te tupuanga o te putuputuanga. I roto i teea au mataara?

Ka rauka ia tatou teia na te tauta anga kia riro ua rai ei tumu no te akamaroiroi e kia akamatutu i tetai e tetai. (Roma 14:19) Ka rauka katoa ia tatou te tauturu kia ‘tupu te kopapa’ na te tatanu anga i te au ua o te vaerua o te Atua i roto i te tu e akono ana tatou i to tatou au taeake irinaki. (Gala. 5:​22, 23) Pera katoa, ka rauka ia tatou i te kimi i tetai au atianga kia ‘takinga-meitaki i te tangata ravarai, kia maata atura ki to te ngutuare o te akarongo ra.’ (Gala. 6:10; Ebe. 13:16) Ka rauka i te katoatoa rava i roto i te putuputuanga​—te au taeake e te au tuaine, mapu e te pakari​—kia piri atu ki te akamatutu anga i te putuputuanga “ma te aroa.”

Ko tetai atu, ka rauka ia tatou i te taangaanga i to tatou tareni, to tatou maroiroi, e ta tatou au apinga kia piri atu ki roto i te angaanga akaora anga e raveia ra e te putuputuanga. “E mea o mai ua to kotou,” i tuatua ai a Iesu Karaiti. Akapeea tatou me ariu atu? “E oronga ua atu oki kotou,” i tuatua ai aia. (Mata. 10:8) No reira, e piri pu tikai ki roto i te angaanga puapinga o te tutu aere i te Patireia e te akariro anga i te tangata ei pipi. (Mata. 24:14; 28:​19, 20) E au mea ainei tetai e arai ra ia koe? E akamaara i te vaine takaua apinga kore tei akatakaia mai e Iesu. E iti ua tana i oronga. E oti akera, kua karanga a Iesu e e maata atu tana i rave i ta te katoatoa. Kua oronga katoatoa aia i tei tau ki tona turanga.​—2 Kori. 8:​1-5, 12.

Ariki ma te Tu Tau

Noatu rai, penei e au taime tetai te ka anoanoia koe kia ariki i te turuturu mei te putuputuanga. Eiaa rava e emiemi i te ariki i tetai ua atu tauturu te orongaia maira e te putuputuanga me te kite ra koe i te tu ngata i te akono i te au taomianga o teia akatereanga. Te oronga maira a Iehova i te au tangata tukatau e te takinga meitaki kia “tiaki i te putuputuanga”​—ei tauturu ia koe me tupu mai te au timataanga e te au tumatetenga. (Anga. 20:28) Ko te aronga pakari e etai ke atu i roto i te putuputuanga te inangaro ra i te akapumaana, te turuturu, e te paruru ia koe i te au tuatau ngata.​—Gala. 6:2; 1 Tesa. 5:14.

Inara, e akapapu e me ariki koe i tetai tauturu tei anoanoia, e rave koe i te reira ma te tu tau. E ariki ua rai ma te akameitaki i te turuturu tei rauka ia koe. E akamanako i taua tauturu ra tei orongaia mai e te au taeake irinaki ei akakite anga i te aroa ua o te Atua. (1 Pete. 4:10) Eaa tera i puapinga ai? No te mea, kare tatou e inangaro i te ariki na roto i te mataara ta te manganui anga i roto i teianei ao e rave ra​—ma te kore e akameitakianga.

Ei Tu Parani e ei Tu Tau

I roto i tana reta ki te putuputuanga i Philipi, kua tata a Paulo no runga ia Timoteo e: “Kare oki oku e tangata mei iaia nei te tu i te ngakau, i te akono tikai i ta kotou na.” Inara, kua kapiti atu a Paulo e: “Te kimi nei oki te tangata  ravarai i ta ratou uaorai, kare i ta Iesu Mesia.” (Phili. 2:​20, 21) Ma te akamanako anga i ta Paulo akaraanga puapinga, akapeea tatou i teia tuatau i te kopae anga kia kore tatou e varenga ua ki to ‘tatou uaorai’ anoano?

Auraka rava tatou e maro atu me pati atu tatou i etai ke i roto i te putuputuanga kia oronga mai i to ratou taime e to ratou manako i te tauturu ia tatou. No teaa ra? E akamanako ana no runga i teia: Kare e ekoko, e ka rekareka maata tatou me oronga mai tetai taeake i te au apinga materia ei tauturu ia tatou i te akono atu i tetai tupuanga poitirere. Inara, ka maro atu ainei tatou iaia kia oronga mai i taua tauturu ra? Kare roa ia. I roto i tetai mataara e aite atura, i to tatou au taeake aroa e rekareka ua ra i te tauturu mai ia tatou, ka anoanoia ei tu parani to tatou e ei tu tau i roto i te tapapa anga atu i to ratou taime. Ina e, noatu eaa ta te au taeake irinaki ka rave i te tauturu ia tatou kia akakoromaki i te au tuatau ngata, ka inangaro tatou ia ratou kia rave puareinga ua i te reira.

Kare ekoko e, ka papa ua rai toou au taeake e te au tuaine Kerititiano e ka inangaro puareinga ua i te tauturu ia koe. Noatu ra, penei i tetai au taime kare rai e rauka ia ratou i te oronga mai i te tauturu taau e anoano ra. Me tupu tera, kia papu e ka akono a Iehova ia koe, mei iaia rai i akono i te tata taramo, i roto i tetai ua atu timataanga taau ka aro atu.​—Sala. 116:​1, 2; Phili. 4:​10-13.

No reira, auraka e emiemi i te ariki ma te akameitaki i tetai ua atu apinga ta Iehova ka oronga atu kia koe​—i te au taime tikai o te tumatetenga e te manamanata. (Sala. 55:22) Te inangaro maira aia kia rave koe i te reira. Inara, te inangaro katoa maira aia kia riro koe ei “tangata oronga ma te rekareka.” No reira, e “akakoro i roto i [toou] ngakau” kia oronga atu i tei tau ki toou au turanga i te turuturu i te akamorianga mou. (2 Kori. 9:​6, 7) I roto i tera mataara, ka rauka ia koe i te rave i nga mea roa ai—​e ariki ma te akameitaki e e oronga ma te ngakau katoa.

[Pia/​Au Tutu i te kapi 31]

“Eaa ra taku e apai atu na Iehova, i te au takinga-meitaki katoa nona iaku nei?”​—Sala. 116:12

▪ Kimiia te au atianga kia ‘takinga-meitaki i te tangata ravarai’

▪ Kia riro ei tumu no te akamaroiroi e kia akamatutu i tetai e tetai

▪ E piri pu tikai ki roto i te angaanga akariro anga i te tangata ei pipi i te ka rauka i toou turanga