De nanga tangi gi den sani di yu e kisi—Gi nanga yu heri ati

YEHOVAH, wi lobi-ati hemel Tata, e broko en ede nanga ibriwan fu wi. Gado Wortu e gi wi a dyaranti taki Yehovah e broko en ede nanga ala den futuboi fu en (1 Petr. 5:7). Wán fasi fa Yehovah e sori taki a e broko en ede nanga wi, na taki a e yepi wi na difrenti fasi, so taki wi kan tan dini en nanga wi heri ati (Yes. 48:17). Spesrutu te wi e kisi fu du nanga problema di e gi wi broko-ede, dan Yehovah wani taki wi musu teki a yepi di a e gi wi. A Wèt di Gado ben gi Moses e sori taki a sani disi tru.

A Wèt frubontu ben e sori taki, Yehovah ben seti sani na wan lobi-ati fasi fu yepi „den mofinasma”. Dati ben de sma soleki den pikin di no abi papa nanga mama, den uma di ben lasi den masra na ini dede, èn den trakondre sma di ben e libi na mindri den Israelsma (Lef. 19:9, 10; Deut. 14:29). Yehovah sabi taki sonwan fu den futuboi fu en kande abi yepi fanowdu fu den Kresten brada nanga sisa fu den (Yak. 1:27). Dati meki nowan fu den futuboi fu en musu weigri fu teki a yepi di a e kisi fu en Kresten brada noso sisa, bika na Yehovah e gi den Kresten dati deki-ati fu yepi en. Ma te wi e teki a yepi di trawan e gi wi, dan wi wani du dati nanga a yoisti denki.

Gado Wortu e sori krin tu taki a pipel fu Gado kan abi na okasi fu gi sani tu. Prakseri a tori fu a „pôti uma ” di Yesus ben e luku na ini a tempel na Yerusalem (Luk. 21:1-4). A Wèt ben e taki fu difrenti sani di Yehovah ben seti na wan lobi-ati fasi, fu yepi uma di ben lasi den masra na ini dede. Kande na uma disi ben e kisi wini fu den seti dati. Ma aladi na uma disi ben pôti, toku wi no e memre en leki wan uma di ben kisi sani, ma wi e memre en leki wan uma di ben gi sani. Fu di na uma disi ben de klariklari fu gi sani, meki a ben musu fu de so taki a ben de koloku, fu di Yesus ben taki: „Wan sma sa de moro koloku te a e gi sani, leki te a e kisi sani” (Tori. 20:35). Te yu e hori a sani dati na prakseri, dan fa yu kan kon „abi a gwenti fu gi sma sani”, so taki yu kan de koloku?​—Luk. 6:38.

„San mi sa pai Yehovah?”

A psalm skrifiman ben aksi ensrefi: „San mi sa pai Yehovah fu ala den bun di a du gi mi?” (Ps. 116:12) Sortu bun Yehovah ben du gi en? Yehovah ben gi en krakti na a ten di a ben ’e pina èn ben e sari’. Boiti dati, Yehovah ben ’kibri en gi dede’. Now, a ben wani du wan sani fu „pai” Yehovah baka. San a psalm skrifiman ben kan du? A ben taki: „Mi sa pai Yehovah san mi ben pramisi en” (Ps. 116:3, 4, 8, 10-14). A psalm skrifiman teki a bosroiti fu du ala san a ben pramisi Yehovah, èn fu du ala san A ben e fruwakti fu en.

Yu kan du dati tu. Fa yu kan du dati? Yu musu libi na wan fasi di e kruderi nanga den wèt nanga den gronprakseri fu Gado. Sobun, sorgu taki na anbegi fu Yehovah e tan a moro prenspari sani na ini yu libi, èn meki a yeye fu Gado tiri yu na ini ala sani di yu e du (Preik. 12:13; Gal. 5:16-18). A no de fu taki, dati noiti  yu o man pai Yehovah gi ala den sani di a du gi yu. Ma toku ’Yehovah en ati e prisiri’ fu si taki yu e dini en nanga yu heri-ati (Odo 27:11). A de wan tumusi bigi grani taki wi kan meki Yehovah prisiri na a fasi disi!

Fa yu kan yepi fu tranga a gemeente?

A no de fu taki, dati yu kisi wini fu a Kresten gemeente na furu difrenti fasi. Nanga yepi fu a gemeente, Yehovah e gi wi bun furu leri. Yu kon sabi a waarheid di meki yu kon fri fu falsi leri, yu kon leri sabi Gado, èn yu kon sabi tu san a o du (Yoh. 8:32). Na den gemeente konmakandra, den bigi konmakandra, èn na den kongres di „a getrow èn koni srafu” seti gi wi, yu kon kisi sabi di kan meki taki yu kisi têgo libi na ini wan paradijs na grontapu pe nowan sma o sari noso pina (Mat. 24:45-47). Noiti yu no o man teri ala den blesi di yu kisi kaba, èn di yu sa kisi ete nanga yepi fu a gemeente fu Gado. San yu kan du fu pai a gemeente baka?

Na apostel Paulus ben skrifi: „A heri skin e meki taki a kan gro kon tranga fu di a abi lobi; a skin man du disi fu di a de wán, èn fu di ala den pisi fu en e wroko makandra nanga yepi fu ibri skrufu fu a skin di e du san de fanowdu, aladi ibri pisi fu a skin e wroko na a yoisti fasi” (Ef. 4:15, 16). Na a fosi presi, a tekst disi abi fu du nanga den salfu Kresten, ma ala Kresten na ini a ten disi kan leri wan sani fu a tekst disi. Iya, ibri memre fu a gemeente kan yepi fu tranga a gemeente, èn den kan yepi tu fu meki a gemeente gro. Fa wi kan du dati?

Wi kan du dati, te wi e pruberi fu de sma di ala ten e gi trawan deki-ati na ini a diniwroko fu Gado (Rom. 14:19). Wi kan yepi tu fu ’meki a skin gro kon tranga’. Wi kan du dati te wi e sori a froktu fu a yeye fu Gado na ini a fasi fa wi e handri nanga wi Kresten brada nanga sisa (Gal. 5:22, 23). Wan tra sani di wi kan du, na taki wi kan suku okasi fu „du bun gi ala sma, ma spesrutu gi den wan di de na ini a srefi bribi leki wi” (Gal. 6:10; Hebr. 13:16). Ala sma na ini a gemeente, brada nanga sisa, yonguwan nanga owruwan, kan ’meki a skin gro kon tranga nanga yepi fu lobi’.

Boiti dati, wi kan gebroiki den koni fu wi, a krakti fu wi, èn den gudu fu wi, fu teki prati na a preikiwroko di a gemeente e du. „Un kisi sondro fu pai”, na so Yesus ben taki. San wi musu du fu wi sei? Yesus ben taki moro fara: „Gi sma sondro fu meki den pai” (Mat. 10:8). Fu dati ede, du ala san yu man na ini a tumusi prenspari wroko di wi abi fu preiki a bun nyunsu fu a Kownukondre èn fu meki disipel (Mat. 24:14; 28:19, 20). Wan sani e tapu yu fu du ala san yu man na ini a wroko disi? Memre a pôti uma di Yesus ben taki fu en. Na uma disi no ben man gi furu. Ma toku Yesus ben taki dati na uma disi ben du moro leki ala den tra sma. Na uma ben gi ala san a ben man gi.​—2 Kor. 8:1-5, 12.

Teki yepi nanga a yoisti denki

Ma a kan pasa son leisi taki yu abi yepi fanowdu fu a gemeente. Te yu e kisi fu du nanga den problema fu a grontapu disi, dan noiti no weigri fu teki a yepi di a gemeente kan gi yu. Yehovah poti lepi brada fu „luku a gemeente” na wan lobi-ati fasi. Den brada disi de fu yepi yu te yu e kisi tesi nanga problema (Tori. 20:28). Te yu de na ini muilek situwâsi, dan owruman nanga tra sma na ini a gemeente wani trowstu yu, den wani yepi yu, èn den wani kibri yu.​—Gal. 6:2; 1 Tes. 5:14.

Ma te yu e kisi a yepi di yu abi fanowdu, dan yu musu teki a yepi dati nanga a yoisti denki. Ala ten sori taki yu de nanga tangi gi a yepi di yu e kisi. Te tra Kresten brada nanga sisa e yepi yu, dan yu musu si en leki na Gado e sori bun-ati gi yu (1 Petr. 4:10). Fu san ede dati de prenspari? Bika wi no wani de leki furu sma na ini grontapu. Te den sma dati e kisi sani, dan den no de nanga tangi kwetikweti.

No poti prakseri na yu eigi afersi wawan, èn no fruwakti tumusi furu fu trawan

Na ini a brifi di Paulus ben seni gi a gemeente na ini Filipi, a ben taki disi fu Timoteyus:  „Mi no abi nowan tra sma di e denki leki fa en e denki èn di sa sorgu trutru gi den sani di abi fu du nanga unu.” Ma Paulus ben taki moro fara: „Ala den trawan e suku den eigi bun, den no e suku a bun fu Krestes Yesus” (Fil. 2:20, 21). Te wi e hori a seryusu sani disi na prakseri, dan fa wi na ini a ten disi kan sorgu taki wi no e ’suku wi eigi bun’ nomo?

Noiti wi musu feni taki trawan na ini a gemeente de fruplekti fu meki ten gi wi fu yepi wi nanga den problema fu wi. Fu san ede wi no musu abi a denki dati? Denki a tori disi: A no de fu taki, dati wi ben o de nanga tangi trutru efu wan brada ben o gi wi wan sani fu yepi wi te wi de na nowtu. Ma wi ben o dwengi a brada dati fu yepi wi na so wan fasi? Kwetikweti. Na so a de tu taki aladi den lobi-ati brada nanga sisa de klariklari fu yepi wi ala ten, toku wi no kan bosroiti gi den o furu fu den ten den musu gebroiki fu yepi wi. Te yu e luku en bun, dan awinsi fa wi Kresten brada nanga sisa e yepi wi, wi wani taki den musu du dati nanga prisiri.

A no de fu taki, dati yu Kresten brada nanga sisa ala ten sa de klariklari fu yepi yu. Ma son leisi den no man gi yu a yepi di yu abi fanowdu. Efu dati de so, dan yu kan abi a dyaranti taki neleki fa Yehovah ben yepi a psalm skrifiman, na so a sa yepi yu tu, awinsi sortu problema yu abi.​—Ps. 116:1, 2; Fil. 4:10-13.

Sobun, de klariklari fu teki iniwan yepi di Yehovah e gi yu, spesrutu na ini muilek ten, èn de nanga tangi gi a yepi dati (Ps. 55:22). Yehovah wani taki yu musu du dati. Ma a wani tu taki yu musu de wan sma di e „gi sani nanga prisiri”. Fu dati ede, awinsi san yu wani gi fu horibaka gi a tru anbegi, ’gi soleki fa yu bosroiti na ini yu ati’ (2 Kor. 9:6, 7). Te yu e du dati, dan yu sa sori taki yu de nanga tangi gi a yepi di yu e kisi, èn yu sa yepi trawan nanga yu heri ati.

[Faki/​Prenki na tapu bladzijde 31]

„San mi sa pai Yehovah fu ala den bun di a du gi mi?”​—Ps. 116:12

▪ Suku okasi fu „du bun gi ala sma”

▪ De wan sma di e gi trawan deki-ati èn di e yepi trawan fu tan anbegi Yehovah nanga prisiri

▪ Du ala san yu man na ini a wroko di wi abi fu meki disipel