Jtojtik ta vokol li kʼusi chkichʼtike xchiʼuk ta slekiluk koʼonton xkakʼtik

LI JKʼANVANEJ jTotik ta vinajele, li Jeovae, oy ta yoʼonton ta jujuntal li yajtuneltak jech kʼuchaʼal chal li Vivliae (1 Ped. 5:7). Jtos ti kʼuyelan chakʼ ta ilel ti oyutik ta yoʼontone jaʼ kʼalal tskoltautik sventa tukʼ chi jtun batel ta stojolale (Isa. 48:17). Li stuke smalaoj ti akʼo jchʼamtik li koltael chakʼe, mas to kʼalal ta jnuptan tsots jvokoltike xchiʼuk kʼalal chkat tajek koʼontontike. Jkʼeltik kʼuxi chakʼ ta ilel li sMantal Moisés ta sventa taje.

Ta skoj ti skʼanoj yajtuneltak li Jeovae, laj yal ta sMantal Moisés ti akʼo xichʼik koltael li buchʼutik mas abol sbaike, ti te tsakal skʼoplalik li meʼon ololetik, meʼon antsetik xchiʼuk li jyanlum krixchanoetik ti nakalik ta Israele (Lev. 19:9, 10; Deu. 14:29). Li Jeovae snaʼoj ti skʼan xichʼ koltael yuʼun yermanotakik li jlom yajtuneltak avi eke (Sant. 1:27). Jaʼ yuʼun, mi la stijbe yoʼonton junuk yajtunel Jeova sventa tskoltautike, mu me jpʼajtik. Skʼan lekuk li jnopbentik kʼalal ta jchʼamtike.

Ta yan xtoke, li Vivliae chal ti steklumal Jeovae xuʼ oy kʼusi xakʼ ta slekil yoʼonton. ¿Mi xvul ta ajol li sloʼilal meʼon ants ti laj yil Jesús ta chʼulna ta Jerusalene? (Luc. 21:1-4.) Ta melel, li meʼon ants taje laj van stabe sbalil li kʼusi chal sMantal Moisés ta sventa li meʼon antsetike. Pe manchuk mi abol sba, maʼuk chvul-o ta joltik ti laj yichʼ koltael yuʼun li yantike, moʼoj, yuʼun jaʼ ta jvules ta joltik ti oy ta yoʼonton laj yakʼ li kʼusi oy yuʼune. Ta melel, muyubaj-o ta skoj li slekil yoʼontone, yuʼun jech kʼuchaʼal laj yal Jesuse, jaʼ «echʼem noʼox xmuyubaj ti buchʼu ta xaqʼue, jaʼ mu sta xmuyubaj ti buchʼu ta xichʼe» (Hech. 20:35). Ta sventa li kʼusi laj yal Jesuse, ¿kʼuxi xuʼ jpastik ti «acʼbeic» xie, xchiʼuk ti xkaʼitik li muyubajel chakʼe? (Luc. 6:38.)

¿Kʼuxi ta jtojbetik li Jeovae?

Xi la sjakʼbe sba li jtsʼibajom yuʼun salmoe: «¿Cʼuxi xuʼ ta jtojbe Mucʼul Dios ta sventa scotol li cʼusi lec la spasbune?» (Sal. 116:12). ¿Kʼusitik lek la sta li jtsʼibajom yuʼun salmoe? Li Jeovae la skolta kʼalal «ep vocol xchiʼuc at-oʼnton» laj yile. Maʼuk noʼox taje, yuʼun «la [skolta] loqʼuel ta sventa lajel». Jaʼ yuʼun oy ox ta yoʼonton tstojbe ta vokol. ¿Kʼuxi xuʼ spas? Xi laj yal stuke: «Ta jtojbe li cʼusi caloj ta stojole» (Sal. 116:3, 4, 8, 10-14). Jaʼ jech, li jtsʼibajom yuʼun salmoe jpʼel yoʼonton tskʼan tspas li kʼusi yalojbe Jeovae xchiʼuk li kʼusi chkʼanbate.

Jech xuʼ jpastik ek. ¿Kʼuxi? Jaʼo kʼalal ta jchʼuntik ta skotol ora li smantaltak xchiʼuk beiltaseletik yuʼun Diose. Jaʼ yuʼun, skʼan jkʼeltik ti jaʼuk mas tsots skʼoplal ta jkuxlejaltik li yichʼel ta mukʼ Jeovae xchiʼuk ti jaʼuk tsbeiltasutik li xchʼul espiritu ta skotol kʼusi ta jpastike (Ecl. 12:13; Gál. 5:16-18). Ta melel, mu xtoj kuʼuntik skotol li kʼusi spasoj Jeova ta jtojolaltike. Akʼo mi jech, xuʼ jmuyubtabetik  yoʼonton mi chkakʼbetik yipal bu to kʼalal xuʼ kuʼuntik sventa xi jtun ta stojolale (Pro. 27:11). ¡Jaʼ jun mukʼta matanal jtaojtik!

Jkolta jbatik sventa lekuk oy li tsobobbaile

Ta melel jkotoltik van jech kilojtik ti ep ta tos skoltaojutik li tsobobbaile. Li Jeovae yakʼojbutik epal veʼlil ta mantal ta stojolal li tsobobbaile; xchanubtasojutik kʼusitik melel ti jaʼ kolemutik-o li ta jecheʼ relijione xchiʼuk li ta ikʼal osil ta mantale (Juan 8:32). Li ta tsobajeletik xchiʼuk ta mukʼta tsobajeletik ti xchapanoj li «jʼabtel ti jun [«tukʼ», NM] yoʼnton [...], ti lec bije» jtaojtik li yojtikinel ti xuʼ xi jkuxi-o sbatel osil ta Paraiso ti bu chʼabal xa kʼusi kʼux chkaʼitik mi jaʼuk vokolile (Mat. 24:45-47). Ta melel mu albajuk yepal li bendisionetik kichʼojtik xa ta stojolal li tsobobbaile xchiʼuk li kʼusi chkichʼtik ta jelavele. Jaʼ yuʼun, ¿kʼusi xuʼ jpastik ta stojolal li tsobobbaile?

Xi la stsʼiba li jtakbol Pabloe: «Sbecʼtal cʼotemutic, lec jtsacojan jbatic, lec jnitojan jbatic ta jtsʼacaliltic, ta jchʼuxuviltic. Jech coʼol ta jcolta jbatic jcotoltic ta sventa li cʼusitic cabteltic ta jujuchope. Jech coʼol chijchʼiutic batel jcotoltic, coʼol chijtsatsubutic batel ta sventa ti lec jcʼanoj jbatique» (Efe. 4:15, 16). Akʼo mi jaʼ chalbe skʼoplal yajtsʼaklomtak Cristo ti tʼujbil chbatik ta vinajel li loʼil taje, li beiltasel te ta jtatike chtun yuʼunik ek skotol li yajtsʼaklomtak Cristo avie. Jaʼ jech, jkotoltik xuʼ jkolta jbatik sventa slekilal xchiʼuk ti xchʼi-o batel li tsobobbaile. ¿Kʼu yelan?

Jtose jaʼ kʼalal chkakʼbetik yipal sventa jpatbetik xchiʼuk jtsatsubtasbetik yoʼonton skotol ora li yantike (Rom. 14:19). Yan ti kʼuyelan chi jkoltavan sventa «coʼol chijchʼiutic batel[e]» jaʼ ti chkakʼtik ta ilel ta jkuxlejaltik li yabtel chʼul espiritu kʼalal ta jchiʼintik li kermanotaktike (Gál. 5:22, 23). Yan xtoke jaʼ kʼalal ta jsabetik yorail sventa «jpastic cʼusi lec ta stojol scotol cristianoetic [...]. Pero jaʼ echʼem to tscʼan ta jpastic ta stojol ti bochʼo coʼol jchʼunojtic Dios jchiʼuctique» (Gál. 6:10; Heb. 13:16). Kʼuchaʼal laj yal Pabloe, ta jujuntalutik —kerem-tsebetik xchiʼuk mol-meʼeletik, viniketik xchiʼuk antsetik— xuʼ xi jkoltavan sventa xchʼi-o batel li tsobobbail kʼalal chi jkʼanvane.

Jech xtok, xuʼ jtunestik li kʼusitik jnaʼtik spasel, kipaltik xchiʼuk kʼusitik oy kuʼuntik li ta abtel ti toj tsots skʼoplal ti jaʼ li chol mantale. Xi laj yal li Jesucristoe: «Amotonic laj cacʼboxuc». ¿Kʼusi skʼan jpastik? Xi onoʼox laj yale: «Ta matanal me xacoltavanic ec» (Mat. 10:8). Jaʼ yuʼun, ti bu kʼalal xuʼ avuʼune cholbo batel skʼoplal li Ajvalilal yuʼun Diose xchiʼuk li spasel ta yajtsʼaklom Cristo li krixchanoetike (Mat. 24:14; 28:19, 20). ¿Ati mi mu spas avuʼun ti kʼuyepal cha kʼane? Nopbo skʼoplal li meʼon ants ti abol sba ti laj yalbe skʼoplal Jesuse. Akʼo mi jutuk ti kʼuyepal laj yakʼe, li Jesuse laj yal ti jaʼ mas ep laj yakʼe, ti jaʼ jutuk li yantike, yuʼun laj yakʼ skotol ti bu kʼalal xuʼ yuʼune (2 Cor. 8:1-5, 12).

Lekuk jnopbentik kʼalal chkichʼtik koltaele

Bakʼintike voʼot van ti chtun avuʼun li koltael chakʼ tsobobbaile. Mi jaʼ jeche, mu me xa pʼaj li koltael chakʼbot ermanoetike, taje jaʼ me tskoltaot sventa stsal avuʼun li vokoliletik ta balumile. Li Jeovae yakʼoj viniketik ti lek chapalik «sventa [ch]chabiik li tsobobbail» ta slekil yoʼontonike. Pato avoʼonton ti tskoltaoxuk kʼalal mi la nuptan vokoliletike (Hech. 20:28, NM). Li kʼusi oy ta yoʼonton li moletik xchiʼuk li yan ermanoetike jaʼ ti tspatboxuk avoʼontone, ti chchabioxuke xchiʼuk ti chakʼboxuk li koltael chtun avuʼune (Gál. 6:2; 1 Tes. 5:14).

Pe lekuk noʼox me li anopbene. Mu me xchʼay ta ajol xa toj ta vokol li koltael chakʼboxuk ermanoetike. Vuleso me ta ajol ti jaʼ yakʼobil ta ilel slekil yoʼonton Diose (1 Ped. 4:10). Yuʼun mu jkʼan jchanbetik stalelal li krixchanoetik ta balumil ti mu snaʼ stojik ta vokole.

 Oyuk noʼox me smelolal

Li ta karta ti la stakbe batel tsobobbail ta Filipos li Pabloe, xi laj yalbe li Timoteoe: «Muʼyuc bochʼo yan liʼ oy ti coʼol coʼnton jchiʼuque ti oy ta yoʼnton chascoltaoxuc ti cʼu chaʼal lec chabatique». Vaʼun xi to laj yale: «Scotolic jaʼ noʼox tsaʼic cʼusi tscʼan stuquic. Mu jaʼuc tsaʼic cʼusi tscʼan li Cristo Jesuse» (Fili. 2:20, 21). Kichʼtik ta venta li kʼusi laj yal Pabloe xchiʼuk xi jakʼbe jbatike: «¿Kʼusi xuʼ jpas sventa maʼuk chbat tajek ta koʼonton li kʼusi ta jkʼan jtuke?».

Mi jaʼuk me jsujtik li kermanotaktik sventa xchʼak skʼakʼalik xchiʼuk ti skoltautik ta jvokoltike. ¿Kʼu yuʼun moʼoj? Jnoptik avaʼi liʼe: Ta melel ta van jtojtik ta vokol ti tskoltautik ta takʼin li kermanotaktik kʼalal oy jvokoltike, pe ¿mi mu jechuk ti muʼyuk ta jsujtik sventa tskoltautike? Jaʼ jech ek ta sventa li skʼakʼalik xchiʼuk li koltael chakʼbutik yantike: akʼo mi oy ta yoʼontonik tskoltautik, skʼan oyuk noʼox smelolal li kʼusi ta jmalatik chakʼbutike. Yuʼun li kʼusi ta jkʼantike chaʼa, jaʼ ti ta slekiluk yoʼonton tskoltautik li kermanotaktike, maʼuk ti sujbiluk chaʼi sbaike.

Akʼo mi oy onoʼox ta yoʼonton tskoltaoxuk li ermanoetike, bakʼintike mu me xuʼ yuʼunik chakʼboxuk skotol li kʼusi chtun avuʼune. Kʼalal jech taje, xuʼ xa pat avoʼonton ti chtal skoltaot li Jeovae, jech kʼuchaʼal la skolta li jtsʼibajom yuʼun salmoe (Sal. 116:1, 2; Fili. 4:10-13).

Vaʼun chaʼa, mu me jpʼajtik li koltael chakʼ Jeovae, mas to kʼalal tsots jvokoltike (Sal. 55:22). Li stuke tskʼan akʼo jchʼamtik xchiʼuk ti jtojtik ta vokole. Jech noxtok, tskʼan ti ta slekiluk koʼontontik oy kʼusi xkakʼtike. Jaʼ yuʼun jpʼeluk ta avoʼonton xa kolta aba ti bu kʼalal xuʼ avuʼun li yichʼel ta mukʼ Diose (2 Cor. 9:6, 7). Jaʼ yuʼun chaʼa, kʼalal chavichʼ koltaele tojo ta vokol, yan mi voʼot cha koltavane, ta slekil avoʼonton xavakʼ.

[Lokʼol ta pajina 31]

«¿Cʼuxi xuʼ ta jtojbe Mucʼul Dios ta sventa scotol li cʼusi lec la spasbune?» (Sal. 116:12)

[Rekuadro ta pajina 31]

▪ Sabo yorail sventa xa pas «cʼusi lec ta stojol scotol cristianoetic»

▪ Akʼbo yipal sventa cha patbe xchiʼuk cha tsatsubtasbe yoʼonton yantik

▪ Ti bu kʼalal xuʼ avuʼune paso li abtelal ta spasel ta yajtsʼaklom Cristo li krixchanoetike