Kuwana Maheta ‘Aswekelawu Mudi Yena’

‘Mudi yena dimu mwanaswekeluwu maheta ejima amaana nakashinshi.’—AKOLOSI 2:3.

1, 2. (a) Mahetanyi awaninuwu mu 1922, nawa ayisha kudihi? (b) Indi Nzambi waleja antu ejima kwiladi Mwiizu dindi?

 NEYI antu awana maheta alema aswama, kakavulu ayimonaña neyi hinsañu yalema. Chakutalilahu, mu 1922 hanyima yakuzata nañovu hayaaka yayivulu nakuyanda, mukwakuvumbujola wakuBritain Howard Carter waweni yuma yekomwesha. Waweni ijamu damwanta Fwaro Tutankhamen, denzala nayozelu yakushika kwakwihi na 5,000.

² Maheta alema adi neyi awaniniyi Carter, amavulu makonu ekala mwitala dakuhembela yuma yakunyaka. Yuma yeniyi yatela kwikala yalema munsañu yanyaka hela munsañu yakuleñaleña, ilaña hiyinateli kutukwasha muchihandilu chetu chamafuku ejimaku. Hela chochu, kuhitila Mwiizu dindi Bayibolu, Nzambi watulejaña kukeñakeña maheta anateli kutukwasha chikupu. Antu ejima ayileja kwila mwenimu, nawa wuloku wawuwahi chikupu kubadika maheta ejima akumujimba.—Tañenu Yishimu 2:1-6.

3. Munjilanyi mwawahila maheta akonkomwenañayi Yehova akwakudifukula indi nindi akeñakeñeña?

³ Shinshikenu kulema kwamaheta akonkomwenañayi Yehova akwakudifukula indi nindi akeñakeñeña. Hakachi kanawa maheta ‘hikumutiya Yehova woma,’ chumichi chinateli kutukiña munanu mafuku akala. (Masamu 19:9) ‘Kumwiluka Nzambi’ kunateli kutuleñela kwikala alemeshewa chikupu—kwikala nawulunda waweni naMukwakubadika. Neyi twikala namaheta amaana atwinkawu kudi Nzambi, kwiluka nikashinshi, tunatweshi kumanisha chachiwahi kukala kutwamonaña mafuku ejima. (Yishimu 9:10, 11) Tunateli kuwana ñahi maheta amuchidiwu alema?

Kuwana Maheta akuSpiritu

4. Tunateli kuwana ñahi maheta atushiikayi Nzambi?

⁴ Kwambukaku nawakwakuvumbujola niakwakwenda amakwawu avula kukeñakeña kwejima kulonda kuwana maheta, etu tweluka chikupu kutwatela kuwana maheta akuspiritu. Izu daNzambi dekala neyi mapu yalema, datulejaña iluña dadeni kutwatela kuwana maheta atushiikayi Nzambi. Hakuhosha hadi Kristu, kapostolu Pawulu wasonekeli nindi: ‘Mudi yena dimu mwanaswekeluwu maheta ejima amaana nakashinshi.’ (Akolosi 2:3) Chitukutañaña awa mazu, twatela kudihula netu: ‘Muloñadi wutwatelela kukeñakeña awa maheta? Munjilanyi ‘mwayiswekelawu mudi’ Kristu? Nawa tunateli kuyiwana ñahi?’ Hakwila tuwani ñakwilu, tushinshikenu nakanañachima mazu akapostolu.

5. Muloñadi Pawulu chasonekeleliyi hamaheta akuspiritu?

⁵ Pawulu wayisonekeleli akwawu akwaKristu amuKolosi awa mazu. Wayilejeli nindi wadiñi nakuyilwishila kulonda ‘ayikundeji munyichima yawu, nawa anuñañani mukukeña.’ (Tañenu Akolosi 2:1, 2.) Muloñadi chayakameneniyi chikupu? Chakadi kujina, Pawulu welukili nindi amana kwetu amuKolosi atela ayiluwañesheli kudi antu amakwawu adiñi mukachi kawu akolesheleña maana awantu awaGriki hela akolesheleña kuhemba Nshimbi jaMosi. Wayisoñamishili chikupu ana kwetu nindi: ‘Babalenu hakenda kamwekana muntu wukuyipupa namaanindi namakasu amukunkulwayi, mwaya  yaaku yawantu, mwaya yuma yampata yamunu mwishina yakuhemesha, hidimu mwaya Kristuku.’—Akolosi 2:8.

6. Muloñadi wutukushila maana kukufumba kwaPawulu?

⁶ Makonu, Satana nikaayi kindi katama katumweshaña kukala kwokumu. Maana amukaayi, kubombelahu nitushidikilu twawantu nintañishilu yakwila nawu yuma yadinjilili yayeni, yaluwañeshaña yitoñojoka yawantu, yililu yayiwahi, yikonkwanyi nichihandilu. Kwitiya kwakutwamba kwazataña mudimu weneni hakwanakana mafuku akunooka amavulu aya mpuhu. Akwakuhema yisela asañumunaña yitoñojoka yatama yakumujimba, nawa yuma yayivulu yahaIntaneti yaluwañeshaña atwansi niakulumpi. Kusweja kutalaña iyi yuma niyaaku yikwawu yakwituña kunateli kuluwañesha yitoñojoka niyililu yetu kutalisha hawunlomboli wahanañayi Yehova, nawa chikutuleñela kubula kukwata kuwumi walala chikupu. (Tañenu 1 Timotewu 6:17-19.) Chakadi nikujina, twatela kwiluka mazu aPawulu asonekeleliyi Akolosi nikutiyilila kufumba kwindi neyi hitunakukeña kufwa munyihetu yaSatanaku.

7. Yumanyi yiyedi yahosheliyi Pawulu nindi yikuyikwasha Akolosi?

⁷ Neyi tushinshika mazu aPawulu asonekeleliyi Akolosi, tukuwana netu, hanyima yakutena chayakameneniyi, wateneni cheñi yuma yiyedi yadi kuyikundeja nikwikala anuñañana mukukeña. Wasambilili kutena ‘chelukiluwu chalala chikupu.’ Ateleleli kukuhwelela chikupu nawu yuma yelukiluwu muNyikanda yadiña yalala kulonda chikuhwelelu chawu chishindameni hachikuku chakola. (Aheberu 11:1) Kuhiñahu wateneni ‘mwalumbulukila nsañu yajila yaNzambi yakujinda.’ Ateleleli kwiluka chikupu nsañu yalala nikutiyishisha nankashi yuma yaNzambi yakunama. (Aheberu 5:13, 14) Iku hikufumba kwakuwahi kwayifumbiluwu Akolosi nawa kukutukwasha ninetu makonu. Hanu dinu tunateli kwiluka ñahi nsañu yalala? Pawulu washimuna chuma chalema mumazu indi ahosheliyi hadi Yesu Kristu nindi: ‘Mudi yena dimu mwanaswekeluwu maheta ejima amaana nakashinshi.’

Maheta ‘Aswekelawu Mudi’ Kristu

8. Lumbululenu chalumbuluka mazu akwila nawu ‘aswekelawu mudi’ Kristu.

⁸ Kuhosha nawu maheta ejima amaana nikashinshi ‘ayiswekela mudi’ Kristu hichinayi mukwila nawu akala kuwanaku. Ilaña chaya mukwila nawu, hakwila tuwani maheta twatela kuzata nañovu chikupu nikusha kashinshi kudi Yesu Kristu. Chumichi chinesekani namazu ahosheliyi Yesu hadi yomweni nindi: “Ami yami njila, yami walala, yami wumi. Kwosi muntu niwumu wukwinza kudi Tata chiña hadami.” (Yowanu 14:6) Eña, hakwila tuwani maana aNzambi, twakeñaña wukwashu ninshimbi jahanañayi Yesu.

9. Nyidimwinyi yamwinkawu Yesu?

⁹ Kubombela hakwikala “njila,” Yesu wahosheli nindi diyi ‘walala niwumi.’ Chumichi chinakumwekesha nawu mudimu windi wekala wabadika hanjila yakumusolomokelamu Tata. Yesu wukweti cheñi nyidimu yalema yakwilukilamu chalala chamuBayibolu nikuheta wumi wahaya nyaka. Chalala, mudi Yesu aswekelamu maheta akuspiritu abadika kulema, kulonda atudizi aBayibolu akashinshi ayiwani. Tushinshikenu maheta amakwawu akundama kukuchiñeja kwetu kwakumbidi niwulunda wetu naNzambi.

10. Indi mukanda waAkolosi 1:19 ni 2:9 wunateli kutudizishadi hadi Yesu?

¹⁰ ‘Mumujimba windi yena dimu mwashakama yililu yaNzambi yejima muyishika.’ (Akolosi 1:19; 2:9) Chineli washakamini naTata yindi hadi yaaka yayivulu, Yesu wamwiluka Nzambi chikupu ninkeñelu yindi kubadika muntu wudi wejima. Mumudimu windi wejima wakushimwina, Yesu watañishileña amakwawu yuma yamutañishiliyi Tata yindi nawa wamwekesheli yuma yamudizishiliyi Tata yindi munzatilu yindi. Dihafumini Yesu kuhosha nindi: ‘Muntu wunanmonami namoni Tata.’ (Yowanu 14:9) Maana ejima nikwiluka kwaNzambi ayiswekela, hela ekala mudi Kristu, nawa kwosi  njila yitunateli kudizilamu chachiwahi hadi Yehova yabadika hakudiza nakanañachima yuma yejima hadi Yesu.

11. Kunuñañananyi kwekala hakachi kaYesu nawuprofwetu wamuBayibolu?

¹¹ ‘Wunsahu washimunañawu hadi Yesu hispiritu yawuprofwetu.’ (Chimwekeshu 19:10) Awa mazu amwekeshaña nawu Yesu wukweti mudimu walema wakushikija wuprofwetu wawuvulu wamuBayibolu. Tunateli kutiyishisha chiwahi wuprofwetu wamuBayibolu neyi twiluka mudimu waYesu wakundama kuWanta wawuMesiya, kutachikila tuhu kuwuprofwetu waYehova wakusambila wasonekawu haKutachika 3:15, nakushika kuyimwenu yalema yamumukanda waChimwekeshu. Chumichi chinakulumbulula muloña waweni wuprofwetu wawuvulu wamuNyikanda yachiHeberu chiwahayamishilaña antu abulaña kwiteja nawu Yesu diyi Mesiya wakaninuwu. Walumbululaña cheñi muloña waweni wamusekeshelañawu Yesu kudi antu abula kulemesha Nyikanda yachiHeberu mwekala wuprofwetu wawuvulu wawuMesiya. Kumwiluka Yesu kwakwashaña antu jaNzambi kwiluka chalumbuluka wuprofwetu wamuBayibolu wuchidi kanda wushikijewi.—2 Akorinda 1:20.

12, 13. (a) Indi Yesu wekala ñahi “chejeji champata yamunu mwishina”? (b) Atumbanji twaKristu akweti mudimwinyi chineli asubuka kumwidima wakuspiritu?

¹² ‘Yami chejeji champata yamunu mwishina.’ (Tañenu Yowanu 8:12; 9:5.) Mwahitili yaaka yayivulu henohu Yesu kanda yavwaliki hamaseki, kaprofwetu Isaya washimwineñahu dehi nindi: “Antu endeli mumwidima anamoni chejeji chacheni; ashakamini mwituña dawulelu wakufwa chejeji chinayitoñekeli.” (Isaya 9:2) Kapostolu Matewu walumbulwili nindi Yesu washikijili iwu wuprofwetu hampinji Yatachikiliyi kushimwina nakuhosha nindi: “Balumukenu munyichima yenu, muloña wanta wamwiwulu wunashiki dehi kwakwihi.” (Matewu 4:16, 17) Mudimu waYesu wakushimwina waleteleli antu chejeji chakuspiritu nikusubuka muwuduñu wantañishilu jakwitiya kwakutwamba. Yesu wahosheli nindi: “Ami nenzi niikali chejeji champata yamunu mwishina, kulonda muntu wukunkuhwelela abuli kushakama mumwidima.”—Yowanu 1:3-5; 12:46.

 ¹³ Chimwahitili yaaka yayivulu, kapostolu Pawulu walejeli akwawu akwaKristu nindi: “Muloña mwadiñilaña mwidima, kwinza katataka muneli dehi chejeji mudi Mwanta; endenuña neyi akwachejeji.” (Aefwesesa 5:8) Hamuloña wakusubuka muwuduñu wamwidima wakuspiritu, akwaKristu atela kulondela nshimbi yakwenda neyi akwachejeji. Chumichi chesekana nansañu yalejeliyi Yesu atumbanji twindi Mumpanji yahaMpidi nindi: “Chejeji chenu chitoñekaña kumesu awantu, kulonda amonaña nyidimu yenu yayiwahi, alemeshaña Tata yenu wudi mwiwulu.” (Matewu 5:16) Komana mwalemesha maheta akuspiritu yimwawana mudi Yesu chakwila munateli nikulejaku antu amakwawu munhoshelu nimuyililu yenu yayiwahi yawakwaKristu?

14, 15. (a) Indi nyikoku niyimuna yikwawu ayizatishileña ñahi mukudifukula kwalala kushankulu? (b) Muloñadi Yesu chekalilayi iheta dabadika kulema mumudimu windi neyi ‘Mwana kaMukoku waNzambi’?

¹⁴ Yesu diyi ‘Mwana kaMukoku waNzambi.’ (Yowanu 1:29, 36) Kushankulu, anyikoku ayizatishileña hakwanakena nshidi nikumusolomoka Nzambi. Chakutalilahu, hanyima yakwila Abarahama namwekeshi nawu neteji kulambula mwanindi Isaka, amulejeli kubula kumukatisha Isaka nawa amwinkeli chizamba chamukoku kulonda yolambuli. (Kutachika 22:12, 13) Hampinji yayilubwiluwu aIsarela kufuma muEjipitu, ajahili anyikoku nakuputa mashi hayipamba yamatala henohu “paseka yaYehova” kanda yishiki. (Kwidika 12:1-13) Kubombelahu, Nshimbi yamwinkeluwu Mosi yahosheli hakuhana yimuna yambokamboka neyi nyilambu, kushilahu anyikoku niampembi.—Kwidika 29:38-42; Alevi 5:6, 7.

¹⁵ Kafwampi nyilambu yejima yalambwileñawu antu hiyatwesheli kusubula antu kunshidi hela kukufwaku. (Aheberu 10:1-4) Hela chochu, Yesu diyi ‘Mwana kaMukoku waNzambi, mukwakufumisha nshidi yawantu ampata yamunu mwishina.’ Chumichi chamuletesha Yesu kwikala iheta dabadika iheta dejima datela kuwanawu antu. Dichi twatela kwikala nampinji yakudiza nsañu yefutu danyiloña nakanañachima nikukuhwelela munichi chawaana chalema. Neyi twila mwenimu tukwikala nakuchiñeja kwakutambwila isomu dadiwahi, ‘akamukanka kawanyikoku kantesha’ akayilemesha hamu naKristu mwiwulu, hakwila “anyikoku acheñi” akatambwila wumi wahaya nyaka muParadisa heseki.—Luka 12:32; Yowanu 6:40, 47; 10:16.

16, 17. Muloñadi chichalemena kwiluka mudimu waYesu neyi ‘Nlomboli Muneni nawa Mukwakuwanisha chikuhwelelu chetu’?

¹⁶ Yesu diyi ‘Nlomboli Muneni nawa Mukwakuwanisha chikuhwelelu chetu.’ (Aheberu 12:2) Mumukanda waAheberu kapetulu 11, twawanañamu nsañu yayiwahi yahosha hachikuhwelelu, yabombelamu kulumbulula chikuhwelelu mukwihihisha nimajina awantu emikili chakutalilahu chachiwahi adi neyi Nowa, Abarahama, Sara niRahaba. Hakwiluka yuma yejimiyi, Pawulu wakonkomweneni akwawu akwaKristu ‘kutalisha mesu kudi Nlomboli Muneni nawa Mukwakuwanisha chikuhwelelu chetu, Yesu.’ Muloñadi?

¹⁷ Hela chakwila ana antu achikuhwelelu atenawu muAheberu kapetulu 11 adiña akuhwelela chikupu muchikaninu chaNzambi, hiyelukili nsañu yejima kutalisha hanjila yadi kushikijilamu Nzambi chikaninu chindi kuhitila mudi Mesiya niWantaku. Dikwila nawu, chikuhwelelu chawu chawaninini wanyi. Kafwampi, niantu azatishiluwu kudi Yehova kusoneka wuprofwetu wawuvulu wawuMesiya hiyelukili chikupu kulema kwansañu yasonekeluwuku. (1 Petulu 1:10-12) Yesu hohu diwunateli kuwanisha chikuhwelelu, hela kumanisha. Komana chalema  nankashi neyi tutiyishisha nikwiluka mudimu waYesu neyi ‘Nlomboli Muneni nawa Mukwakuwanisha chikuhwelelu chetu.’

Keñakeñenuña

18, 19. (a) Shimunenu maheta amakwawu akuspiritu aswekelawu mudi Kristu. (b) Muloñadi wutwatelela kutwalekahu kutalisha kudi Yesu kulonda tuwani maheta akuspiritu?

¹⁸ Tunadizi hohu hanyidimu yatensha yalema yaYesu munkeñelu yaNzambi hakupulwisha antu. Kwekala cheñi maheta akuspiritu amakwawu aswekelawu mudi Kristu. Neyi tuyiwana tukutiya kuwaha nawa akutuhetesha. Chakutalilahu, kapostolu Petulu wamuteneni Yesu nindi ‘Kalamba wawumi’ nawa “ntanda” yinakusela. (Yililu 3:15; 5:31; 2 Petulu 1:19) Nawa Bayibolu yazatishaña izu dakwila nawu “Amena” hakumutena Yesu. (Chimwekeshu 3:14) Komana mweluka chalumbuluka iyi nyidimu nikulema kwayu? Yesu wahosheli nindi, “keñakeñenu mukuwana.”—Matewu 7:7.

¹⁹ Kwosi muntu niwumu muchihandilu chawantu chejima wukweti wumi walema chikupu nawa wakundama nankashi kuwumi wetu wahaya nyaka neyi Yesuku. Mudi yena mwekala maheta akuspiritu aswayi kuwana kudi muntu wejima wayikeñaña namuchima wumu. Ikalenu namuzañalu ninkisu hakuwana maheta ‘aswekelawu mudi yena.’

Munakwanuka?

• Indi akwaKristu ayikonkomwena kukeñakeña mahetanyi?

• Muloñadi kufumba kwaPawulu kwayifumbiliyi Akolosi chikwatukwashilaña ninetu makonu?

• Shimunenu nawa lumbululenu maheta akuspiritu amakwawu ‘aswekelawu mudi’ Kristu.

[Malwihu aKuzatisha haKudiza]

[Nyevulu yidi hefu 10]

Bayibolu yekala neyi mapu yalema yatulejaña kwakuwana maheta ‘aswekelawu’ mudi Kristu