Amaha Ro ‘Thuhruk’ Chu Zawng Rawh
Amaha Ro ‘Thuhruk’ Chu Zawng Rawh
“Finna leh hriatna ro zawng zawng thuhrûkna Krista chu.”—KOL. 2:2, 3.
1, 2. (a) Kum 1922 khân eng thil hlu takte nge hmuh chhuah a nih a, chûngte chu a hnuah khawiah nge dah a nih? (b) Pathian Thuin mi tin tân eng sâwmna nge a tihchhuah?
RO PHUM RUK hmuh chhuah chu chanchin thar langsâr tak a ni ṭhîn. Entîr nân, kum 1922 khân thil hlui chanchin zir mi Sâp pa, Howard Carter-a chuan dinhmun hrehawm tak leh hahthlâk tak hnuaia kum sâwm têl rim taka a thawh hnuah thil hlu phûrawm tak mai a hmu chhuak a. Chu chu thil chi hrang hrang 5,000 dâwn lai awmna, Pharao Tutankhamen-a thlân a ngai ngai deuhthawa la awm chu a ni.
2 Carter-a thil hmuh chhuahte chu ropui hle mah se, a thil hmuh chhuah zawng zawng deuhthawte chu thil hlui dah khâwmna hmun museum-ah emaw, thil hlui la khâwmtute kutah emaw a thleng tawh a ni. Chûngte chuan hmasâng thil a nih vâng emaw, a siamzia ropui leh mawi vâng emawin hlut chin chu nei mah se, kan nî tin nunna atân chuan hlutna an nei mang meuh lo emaw, an nei lo hulhual emaw a ni. Pathian Thu erawh chuan kan tâna hlutna nei ro hlu chu zawng tûrin min sâwm a. Chu sâwmna chu mi tin tân a ni a, a lâwmman pawh ro tak tak engpawh aiin a hlu zâwk fê a ni.—Thufingte 2:1-6 chhiar rawh.
3. Eng kawngin nge Pathian Jehova’n amah chibai bûktute hnêna zawng tûra a fuih ro hlu chu a ṭangkai?
3 Pathian Jehova’n amah chibai bûktute hnêna zawng tûra a fuih ro hlu hlut dân chu han ngaihtuah teh. Chûng ro hlute zînga pakhat chu, hun chhe tak kâra min vênghim theitu “LALPA ṭihna” hi a ni. (Sâm 19:9) ‘Pathian hriatna’ zawn hmuhna chuan mihringte neih theih chawimawina azawnga sâng ber a thlen thei a—chu chu Chungnung bera nêna inlaichînna ṭha tak neih chu a ni. Tin, Pathian min pêk ro hlu tak finna te, hriatna te, leh hriat thiamna te nên chuan kan nî tin nuna harsatna leh lungngaihnate chu hlawhtling takin kan hmachhawn thei ang. (Thuf. 9:10, 11) Chutiang ro hlu chu engtin nge kan hmuh theih ang?
Thlarau Lam Ro Hlu Chu Zawng Hmu Rawh
4. Thlarau lam ro hlute chu engtin nge kan hmuh theih ang?
4 An thil zawn hmun tina phêk zawn ngai thil hlui chanchin zir mite leh thil eng engemaw zawnga vâkte ang lo takin, thlarau lam ro hlu zawn hmuhna tûr chu kan hria a ni. Ro hlu awmna târ langtu ram lem (map) ang maiin, Pathian Thu chuan Pathian min tiam ro hlute kan zawn hmuhna tûr hmun dik tak min hrilh a. Tirhkoh Paula chuan Krista chungchângah: “Finna leh hriatna ro zawng zawng thuhrûkna Krista chu,” tiin a ziak a ni. (Kol. 2:2, 3) Chûng thute kan chhiar lai chuan hêng zawhna: ‘Engvângin nge chûng ro hlute chu kan zawn ang? Chûngte chu engtin nge Kristaah chuan ‘thuhrûka’ a awm? Engtin nge kan zawn hmuh ang?’ tihte hi kan zâwt thei a ni. A chhânna hmuh nân, Paula thute hi i lo bih chiang ang u.
5. Engvângin nge Paula’n thlarau lam ro hlu chungchâng a ziah?
5 Paula chuan chûng thute chu Kolossa khuaa a Kristian unaute hnênah a ziak a. An hnênah chuan ‘hmangaihnaa insuih khâwma, an thinlungte chu thlamuanga a awm theih’ nân an tân nasa taka a beih ṭalh ṭalh thu a hrilh a ni. (Kolossa 2:1-3 chhiar rawh.) Engati nge chuti fakauva anni chu a ngaihtuah? Paula chuan chuta unaute chu Grik finna lam chawisângtu an zînga mi ṭhenkhatte thununin an awm emaw, Mosia Dân zâwm leh tûra fuih emaw an ni tih a hriat vâng a ni. Unaute chu hetiang hian vaukhânna khauh tak a pe a ni: “Fîmkhur rawh u, chutilochuan tupawhin Krista thu ang ni lovin, mihring thu rochhiah leh khawvêl A Aw B ang zâwkin an thu fing leh bumna mai maiin râl lâkin an la dah ang che u,” tiin.—Kol. 2:8.
6. Engvângin nge Paula fuihna thu chu kan ngaihven ang?
6 Tûn laiah pawh Setana leh a khawvêl suaksual tak aṭangin chutiang bawk thununna chu kan tawng ve a. Pathian tel lo va mihringte hamṭhatna tûra hma lâkna leh chanchhâwnna ngaih dân pawh tiamin, khawvêl finnate chuan mite ngaihtuahna te, nungchang te, thiltum te, leh nunphung te chu a thunun a ni. Ni serh hman langsâr tam takahte hian sakhaw dik lo chu a inrawlh thûk hle a. Intihhlimna lam thilte chu tisa châkna ṭha lo tichhuak tûrzâwnga siam a ni a, Internet-a thil lang tam takte chu a pui a pangte tân a hlauhawm hle bawk. Hêng thilte leh khawvêl rilru put hmang dangte kâra awm rengna chuan Pathian Jehova pêk kaihhruaina chunga kan rilru put dân chu awlsam takin a nghawng thei a, nunna tak tak kan vawnna chu min thlahdultîr thei a ni. (1 Timothea 6:17-19 chhiar rawh.) Setana ruahmanna fing vervêk tak hneha awm kan duh loh chuan, Kolossa khuaa mite hnêna Paula thusawi awmzia chu kan hriatthiam a, kan zawm a ngai a ni tih a chiang hle.
7. Paula’n Kolossa khuaa mite ṭanpuitu tûr eng thil pahnihte nge a sawi?
7 Kolossa khuaa mite hnêna Paula thuziak-ah bawk lo kîr leh ta ila, anmahni a ngaihtuahzia a sawi hnuah, thlamuang leh hmangaihnaa insuih khâwma an awm theih nâna anmahni ṭanpuitu tûr thil pahnih a sawi zawm a ni. A hmasain, ‘hriata rin tlatna zawng zawng’ chungchâng a sawi a. An rinna chuan nghahchhan nghet a neih theih nân Pathian Lehkha Thu an hriatthiam dân chu a dik ngei a ni tih an rin tlat a ngai a ni. (Heb. 11:1) A dawtah, ‘Pathian thurûk hriatna’ chungchâng a sawi leh a. Anni chuan thutak hriatna bul aia tam an mamawh a, Pathian thu rilte hriat thiamna chiang tak an neih a ngai a ni. (Heb. 5:13, 14) Khatih laia Kolossa khuaa mite leh tûn laia Kristiante tân fuihna ṭha a va ni êm! A nih leh engtin nge chutianga rin tlatna leh hriatna chu kan neih theih ang? Paula’n: “Finna leh hriatna ro zawng zawng thuhrûkna,” tia Isua Krista chungchâng thu ril tak a sawiah hian kan neih theih dân tûr chu min hrilh a ni.
Kristaa Ro ‘Thuhrûk’ Chu
8. Kristaa ‘thuhrûk’ tih thu awmzia chu hrilhfiah rawh.
8 Finna leh hriatna ro zawng zawng Kristaa ‘thuhrûk’ tih chu tuma zawn hmuh theih loh tûra thuhrûk bo a ni tihna a ni lo. Chu ro hmu tûr chuan theihtâwp kan chhuah a, Isua Krista lam kan hawi a ṭûl tihna mai zâwk a ni. Chu chu Isua’n ama chungchâng a sawi: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” tih nên a inrem thlap a ni. (Joh. 14:6) Ni e, Pathian hriatna nei tûr chuan, Isua pêk ṭanpuina leh kaihhruaina chu kan mamawh a ni.
9. Eng chanvote nge Isua hnêna pêk a nih?
9 “Kawng” a nih bâkah, Isua chuan “thutak leh nunna” a nih thu a sawi bawk a. Chu chuan ani chu Pathian panna kawng a nih mai bâkah, chanvo dang pawh a neihzia a târ lang. Isua chuan Bible thutak hriat thiam nân leh chatuan nunna neih theih nân pawh chanvo pawimawh tak a nei bawk a ni. Isuaah chuan, Bible ngun taka zirtute hmuh chhuah ngei ngei tûr, thlarau lam ro hlu a inthukru tak zet a ni. Tûnah chuan, kan nakin hun beiseina leh Pathian nêna kan inlaichînna khawihtu ro hlu ṭhenkhat chu i lo bih chiang ang u.
10. Kolossa 1:19, 20 leh 2:9 aṭangin Isua chungchâng eng nge kan hriat theih?
10 “Amahah chuan Pathian [mize] famkimna tinrêng chu taksa neiin a awm reng si a.” (Kol. 1:19, 20; 2:9) A Pa vâna mi bula kum chhiar sên loh chhûng awm a nih avângin, Isua chuan tu dang zawng aiin Pathian mizia leh a duhzâwngte chu a hria a ni. Leia rawng a bâwl chhûng zawng khân, Isua chuan a Pa hnên aṭanga a thil zirte chu mi dangte hnêna zirtîr chhâwngin, a thiltihah a Pa zirtîr miziate chu a lantîr ṭhîn. Chuvângin: “Tupawh mi hmu chu Pa hmu a ni,” tiin a sawi thei a ni. (Joh. 14:9) Pathian finna leh hriatna zawng zawng chu Kristaah chuan thuhrûka a awm avângin, Isua chungchâng kan zir theih apiang ngun taka zir tluka Pathian Jehova chungchâng hriat theihna kawng ṭha zâwk a awm lo.
11. Isua leh Bible hrilh lâwknate inkûngkaihna chu eng nge ni?
11 “Isua hriattîrna thu chu thu hrilhna thlarau a ni si a.” (Thup. 19:10) He thu hian Isua chu Bible-a hrilh lâwkna tam tak thlen famkimna ber a ni tih a târ lang. Genesis 3:15-a chhinchhiah, Pathian Jehova hrilh lâwkna puan chhuah hmasak ber aṭanga Thu Puan bu-a inlârna ropui tak thleng hian, Bible-a hrilh lâwknate hi Messia Lalrama Isua chanvo neih ngaihtuah tel a nih chauhvin dik taka hriat thiam theih a ni ṭhîn. Chu chuan Isua chu thutiam Messia a nihzia pawm lotute’n Hebrai Pathian Lehkhabu-a hrilh lâwkna tam tak an hriat thiam loh chhan min hrilh a. Chu bâkah, Messia chungchâng hrilh lâwk thu tam tak chuanna, Hebrai Pathian Lehkhabu ngaihlu lotute tân Isua chu mi ropui satliah mai anga a lan chhan pawh min hrilh bawk. Isua chungchâng hriatna chuan Pathian mite hnênah Bible hrilh lâwkna la thleng famkim tûrte hriatthiam theihna a pe bawk a ni.—2 Kor. 1:20.
12, 13. (a) Engtin nge Isua chu “khawvêl êntu” a nih? (b) Kristiante chuan sakhaw lam thimna ata chhuah zalên an nih hnuah, eng mawhphurhna nge an neih?
12 “Kei khawvêl êntu ka ni.” (Johana 8:12; 9:5 chhiar rawh.) Leia Isua a lo pian hma daih khân, zâwlnei Isaia chuan: “Mi thim hnuaia kalte chuan êng nasa tak an hmu ta a: thihna hlim rama awmte chungah ngei chuan êng chu a lo êng ta,” tiin a lo hrilh lâwk a. (Is. 9:2) Isua’n thu a hril ṭan a: “Sim rawh u! vân ram a hnai tawh e,” tia a sawi khân, chu hrilh lâwkna chu a tifamkim tih tirhkoh Matthaia chuan a hrilhfiah a ni. (Mt. 4:16, 17) Isua rawngbâwlna chuan mite chu thlarau lama bengvârna a thlen bâkah, sakhaw dik lo zirtîrna sal ata a chhuah zalên bawk a ni. Isua chuan: “Entua khawvêla lo kal ka nih hi, tupawh mi ring a piang thima an awm reng loh nân,” tiin a sawi.—Joh. 1:3-5; 12:46.
13 Kum tam tak hnuah, tirhkoh Paula chuan a Kristian unaute hnênah: “Hmânah khân thim in ni a, tûnah erawh chuan Lalpaah chuan êng in lo nih tâk hi . . . êng fate angin awm rawh u,” tiin a hrilh a. (Eph. 5:8-10) Sakhaw lam thim an nihna ata chhuah zalên an nih hnu chuan, Kristiante chuan êng fate anga awm tûrin mawhphurhna an nei a ni. Chu chu a hnungzuitute hnêna Tlâng Chunga Isua Thusawi: “In êng chu mi mithmuhin êng rawh se, chutichuan in thil tih ṭhatte an hmu ang a, in Pa vâna mi an chawimawi thei ang,” tih nên a inmil a ni. (Mt. 5:16) Isuaa i chhar chhuah thlarau lam ro hlute chu ṭawngkam leh Kristian nun dân ṭha hmanga mi dangte hnêna hrilh chhâwng tûr khawpin i hlut em?
14, 15. (a) Engtin nge Bible hun laia biakna dikah berâm leh ran dangte chu hman a nih ṭhin? (b) Engvângin nge “Pathian Berâm No” a nihna chuan Isua chu tehkhin rual loh ro hlu a nihtîr?
14 Isua chu “Pathian Berâm No” a ni. (Joh. 1:29, 36) Bible bu pumah hian berâm chu sual ngaihdamna leh Pathian panna kawnga entîr neia hman lâr tak a ni a. Entîr nân, Abrahama’n a fapa Isaaka hlan a inhuamzia a lantîr hnu chuan, Isaaka chu tina lo va, a aiah berâmpa chu hlân zâwk tûra hrilh a ni. (Gen. 22:12, 13) Israel fate Aigupta aṭanga hruai chhuah an nih pawh khân, berâm chu hman a ni leh a, anni chuan ‘LALPAN a kalhlên’ hmain berâm talh a, a thisen chu an kawngka biangahte leh a chungah an tah a ngai a ni. (Ex. 12:1-13) Chu bâkah, Mosia Dânah chuan berâm leh kêl pawh tiamin ran hrang hranga inthawina a awm a ni.—Ex. 29:38-42; Lev. 5:6, 7.
15 Chûng inthawinate—a nihna takah chuan mihringte hlan inthawina a eng amah—chuan sual leh thihna ata min chhuah zalên hlen thei lo. (Heb. 10:1-4) Mahse, Isua erawh chu “Pathian Berâm No, khawvêl sual kalpuitu” a ni thung. Hei mai pawh hian Isua chu khawvêla ro hlu hmuh chhuah tawh eng pawh aia hlu zâwk a nihtîr a ni. Chuvângin, tlanna chungchâng thu ngun taka zir nân hun kan inpein, chu tlanna ropui tak chu kan ring tûr a ni. Chutianga kan tih chuan, malsâwmna leh lâwmman ropui tak kan beisei thei ang—“pâwl tlêmte” tâna vâna Krista nêna ropuina leh chawimawina dawn beiseina leh “berâm dang” tâna lei Paradis-a chatuana nun beiseina chu.—Lk. 12:32; Joh. 6:40, 47; 10:16.
16, 17. Engvângin nge “kan rinna Siamtu leh Tifamkimtu” a nih anga Isua chanvo kan hriat thiam chu thil pawimawh tak a nih?
16 Isua chu “kan rinna Siamtu leh Tifamkimtu” a ni. (Hebrai 12:1, 2 chhiar rawh.) Hebrai bung 11-ah chuan rinna chungchânga Paula thusawi thiltithei tak kan hmu a, chutah chuan rinna lama mi entawn tlâk tak tak Nova te, Abrahama te, Sari te, leh Rahabi te chanchin pawh tawi fel takin a tel a ni. Chûngte chu rilrua vawng reng chungin, Paula chuan a Kristian unaute chu ‘Isua, kan rinna Siamtu leh Tifamkimtu lam chu en tlat’ tûrin a fuih a ni. Engvângin nge?
17 Hebrai bung 11-a târ lan mi rinawm takte chuan Pathian thutiamah rinna nghet tak nei mah se, chu a thutiam chu Messia leh Lalram hmanga a hlen chhuah dân tûr chu akip akawiin an hre lo va. Chutiang kawng chuan an rinna chu a famkim lo tih theih a ni. Dik tak chuan, Messia chungchâng hrilh lâwkna thu tam tak ziak tûra Pathian Jehova mi hmante ngei pawhin an thil ziakte awmzia chu an hre thiam kîlh kêlh chuang lo. (1 Pet. 1:10-12) Isua kal tlang chauhvin rinna chu tihfamkim theih a ni. Chuvângin, “kan rinna Siamtu leh Tifamkimtu” a nih angin, Isua chanvo kan hriat chian a, kan pawm chu a va pawimawh tak êm!
Zawng Zêl Rawh
18, 19. (a) Kristaa thuhrûka awm thlarau lam ro hlu dangte chu sawi rawh. (b) Engvângin nge thlarau lam ro hlute hmuh chhuah nân Isua lam kan hawi zêl ang?
18 Mihringte chhandam nâna Pathian thiltuma Isua chanvo hlu takte zînga tlêm tê chu kan lo hmu ta a. Kristaah chuan ro hlu thuhrûk dangte pawh a la awm cheu a ni. Chûngte zawn hmuhna chuan lâwmna leh hlâwkna min pe ang. Entîr nân, tirhkoh Petera chuan Isua chu “Nunna Siamtu” leh “vârparh arsi” ti pawhin a ko va. (Tirh. 3:15; 5:31; 2 Pet. 1:19) Tin, Bible chuan “Amen” tih chu Isua sawi nân a hmang bawk. (Thup. 3:14) Chûng chanvote awmzia leh a pawimawhna chu in hria em? Isua sawi angin, “zawng [zêl] rawh u, tichuan in hmu ang.”—Mt. 7:7.
19 Mihring zîngah hian Isua nun ang rênga nun awmze neia khat leh kan chatuan ṭhatna tûr nêna inzawmna nei tumah dang an awm lo. Amahah chuan, tih tak zeta zawngtu apiangte tâna hmuh mai theih tûr thlarau lam ro hlu chu a awm a. Kristaa ro ‘thuhrûk’ hlu takte hmuh chhuah chu i tân lâwmna leh malsâwmna thlentu ni zêl rawh se. (w09 7/15)
Kan Hre Chhuak Em?
• Kristiante chu eng ro hlu nge zawng tûra fuih an nih?
• Engvângin nge Kolossa khuaa mite hnêna Paula fuihna thu chu tûn laia kan tân pawh inâwm tak a nih?
• Kristaa ‘thuhrûka’ awm thlarau lam ro hlu ṭhenkhat chu sawi la, hrilhfiah bawk rawh.
[Zirlai Atâna Zawhnate]
[Phêk 11-naa milemte]
Bible chu Kristaa ro ‘thuhrûk’ hlu takte awmna min kawhhmuhtu ram lem (map) ang a ni