Mwe Ndupwa Sha Bwina Kristu—mulepashanya Yesu!

“Kristu . . . amushilile ne cilangililo pa kuti mulekonka sana mu ntampulo shakwe.”—1 PET. 2:21.

1. (a) Mulimo nshi Umwana wa kwa Lesa akwete ilyo Lesa alepanga ifintu? (b) Bushe Yesu omfwa shani pa bantunse?

ILYO Lesa alepanga umuulu ne sonde, Umwana wakwe ibeli, alebombela pamo nankwe, e kutila aali “uwaishibisha umulimo.” Na kabili, Umwana wa kwa Lesa alibombele pamo na Wishi ilyo Yehova alepanga inama ishapusanapusana ne fimenwa pano isonde e lyo na lintu alepanga Paradaise umo ifibumbwa ifyapangilwe mu cipasho ca kwa Yehova fyali no kulaikala. Umwana wa kwa Lesa, uwaishileinikwa ukuti Yesu, ‘alitemenwe sana abana ba bantu.’—Amapi. 8:27-31; Ukute. 1:26, 27.

2. (a) Bushe finshi Yehova acitila fwe bantu ababembu pa kutwafwa? (b) Ni muli cinshi cimo umo Baibolo itwafwa?

² Ilyo Adamu na Efa babembwike, icikalamba ico Yehova alefwaya sana kufumya abantu mu lubembu. Yehova atumine Kristu ukuba ilambo lya kulubula abantunse. (Rom. 5:8) Na kabili Yehova alitupeela Icebo cakwe Baibolo, icitulanga ifya kwikala bwino pano calo nangu line twalipyana ulubembu. (Amalu. 119:105) Ukupitila mu Cebo cakwe, Yehova alitweba ifingatwafwa ukukwata indupwa sha nsansa kabili ishakosa. Ibuuku lya mu Baibolo ilya Ukutendeka litila, umwaume ‘akalambatila ku mukashi  wakwe, na bo bakaba umubili umo.’—Ukute. 2:24.

3. (a) Finshi Yesu asambilishe abantu pa cupo? (b) Finshi twalalandapo muli cino cipande?

³ Ilyo Yesu ali pano calo, alandile ukuti icupo tacalinga ukupwa. Alesambilisha ifishinte fya kututungulula ifingafwa aba mu lupwa ukutaluka ku fingalenga icupo cabo ukupwa nelyo ifingapwisha insansa mu lupwa lwabo. (Mat. 5:27-37; 7:12) Ici cipande calalanda pa fyo Yesu alesambilisha e lyo ne fyo ica kumwenako cakwe cingafwa abalume, abakashi, abafyashi na bana ukuba ne nsansa mu lupwa lwabo.

Ifyo Umulume Umwina Kristu Acindika Umukashi Wakwe

4. Bushe icifulo Yesu akwata capalana shani ne cifulo Umwina Kristu uwaupa akwata?

⁴ Lesa asala umwaume ukuba umutwe wa lupwa nga filya Yesu aba Umutwe wa cilonganino. Paulo atile: “Umulume e mutwe wa mukashi wakwe ifyo na Kristu e mutwe wa cilonganino, pantu e mupusushi wa mubili uyu. Mwe balume, muletemwa abakashi benu, filya na Kristu atemenwe icilonganino no kuipeela pali cena.” (Efes. 5:23, 25) Ca cine, ifyo Yesu alesakamana abasambi bakwe e fyo na baume Abena Kristu balingile ukusakamana abena mwabo. Natulande pa nshila shimo shimo Yesu abomfeshemo amaka Lesa amupeele.

5. Bushe Yesu aletungulula shani abasambi bakwe?

⁵ Yesu ali ‘uwafuuka kabili uwaicefya.’ (Mat. 11:29) Alebomba imilimo alingile ukubomba, talelekelesha imilimo yakwe nakalya. (Marko 6:34; Yoh. 2:14-17) Alefunda abasambi bakwe, kabili limo alebafunda imiku iingi pa cintu cimo cine. (Mat. 20:21-28; Marko 9:33-37; Luka 22:24-27) Na lyo line Yesu talebebaula nelyo ukubasaalula, atemwa ukulenga balaimona kwati te bantu abengatemwikwa nelyo abengacita ifyo alebasambilisha. Lelo aletasha abasambi bakwe no kubakoselesha. (Luka10:17-21) Kanshi ukutemwa kwakwe no kulangulukilako abasambi bakwe kwalengele balemucindika!

6. (a) Cinshi umulume engasambililako ku fyo Yesu aletungulula abasambi bakwe? (b) Cinshi Petro akoseleshe abalume?

⁶ Abena Kristu abaupa kuti basambililako kuli Yesu ukuti tabafwile ukulatitikisha abakashi babo, lelo bafwile ukubatemwa no kubacindika. Umutumwa Petro akoseleshe abalume ukupashanya ukutemwa kwa kwa Yesu mu fyo ‘bekala’ na bakashi babo no ‘kubacindika.’ (Belengeni 1 Petro 3:7.) Bushe umulume kuti aletungulula shani umukashi wakwe e lyo no kumupeela umucinshi?

7. Bushe umulume kuti acindika shani umukashi? Langilileni.

⁷ Inshila imo iyo umulume engacindikilamo umukashi wakwe, kulatontonkanya na pa fyo umukashi engatemwa ilyo alepingula ukucita ifintu ifikumine ulupwa. Napamo kuti aletontonkanya pa kukuukila kumbi nelyo ukuleka incito no kwingila imbi. Nangu  kuti aletontonkanya pa fintu fye fimbi pamo nga ukwa kuyatuushisha, nelyo ifya kubomfya indalama ulu ifintu fikosele umutengo. Apo ifi fikuma bonse mu lupwa, kuti cawama umulume nga aumfwa ifyo umukashi engatemwa. Ici kuti calenga basala ifingawamina bonse kabili kuti cayangukila no mukashi ukutungilila umulume. (Amapi. 15:22) Abaume Abena Kristu abapeela abena mwabo umucinshi na bo balacindikwa ku bakashi babo, lelo ne cacilapo ukuwama ca kuti balatemuna Yehova.—Efes. 5:28, 29.

Ifyo Umukashi Engacindika Sana Umulume

8. Mulandu nshi abanakashi abaupwa bashilingile ukupashanishisha Efa?

⁸ Abanakashi abaupwa abatiina Lesa na bo kuti basambilila ukunakila nga balepashanya Yesu. Ifyo Yesu amona ukunakila fyalipusana sana ne fyo umwanakashi wabalilepo ukuupwa alekumona! Abanakashi abaupwa tabalingile ukupashanya Efa. Yehova alipeele Efa uwa kumutungulula kabili e o alepeela amafunde. Lelo Efa tacindike umutwe uo Lesa amupeele. Takonkele ifunde lyafumine kuli Lesa ilyo Adamu amwebele. (Ukute. 2:16, 17; 3:3; 1 Kor. 11:3) Kwena, Efa balimubepele; na lyo line alekabila ukwipusha umulume wakwe nga cali fye bwino ukukonka ifyalandile uwatile ifyo alemweba fintu na ‘Lesa aishiba.’ Lelo ena atampile ukweba umwina mwakwe ifya kucita.—Ukute. 3:5, 6; 1 Tim. 2:14.

9. Bushe ca kumwenako nshi Yesu apeela abakashi ica kunakila?

⁹ Yesu ena alenakila Lesa, Umutwe wakwe, kanshi e walinga ukupashanya. Umutima wakwe ne mikalile yakwe filanga ukuti “tatalile atontonkanya ukutila kuti alingana na Lesa.” Lelo “aisangwile uwa fye no kubuula icipasho ca busha.” (Fil. 2:5-7) Na pali ino nshita ilyo aba Imfumu, Yesu aba no mutima umo wine. Alanakila Wishi muli fyonse kabili alatungilila ubutungulushi bwa kwa Wishi.—Mat. 20:23; Yoh. 5:30; 1 Kor. 15:28.

10. Bushe umukashi kuti atungilila shani umwina mwakwe?

¹⁰ Umukashi Umwina Kristu afwile ukupashanya Yesu. Akacite fi nga aletungilila umwina mwakwe ilyo aletungulula ulupwa. (Belengeni 1 Petro 2:21; 3:1, 2.) Moneni ifintu fimo umo engatungilila umwina mwakwe. Tutile umwana alelomba ukuti amusuminishe ukucita icintu cimo. Apo ena no mwina mwakwe tabalalanshanya pa co umwana alefwaya ukucita, kuti cawama aipusha umwana ukuti, “Bushe nawipusha bawiso?” Umwana nga tacipusha bawishi, umukashi afwile ukulanshanya no mulume ilyo ashilaeba umwana icili conse. E lyo kabili umukashi Umwina Kristu tafwile ukulapilika umulume nangu ukusuusha ifyo alelanda pa menso ya bana. Nga tatemenwe ifyo umulume  apingula ukuti ficitwe, kuti alanda nankwe ilyo bali fye babili.—Efes. 6:4.

Ifyo Abafyashi Bengapashanya Yesu

11. Abafyashi balingile ukupashanya Yesu muli finshi?

¹¹ Nangu ca kuti Yesu tabalile opa no kukwata abana, e o abafyashi Abena Kristu balingile ukupashanya sana. Kuti bamupashanya shani? Alitemenwe abasambi bakwe kabili alebasambilisha ku fyo alecita na ku fyo alebeba. Alibalangile ifya kubomba umulimo abapeele. (Luka 8:1) Ifyo alebamona ne fyo alebasunga fyalibasambilishe ifyo na bo baali no kulacita ku basambi banabo.—Belengeni Yohane 13:14-17.

12, 13. Cinshi cikabilwa pa kuti abafyashi bakushe abana abengalatiina Lesa?

¹² Abana balapashanya abafyashi babo, nampo nga balecita ifisuma nelyo ifibi. E ico mwe bafyashi mulingile ukuipusha ukuti: ‘Bushe cinshi tusambilisha abana pa nshita tupoosa ukutamba TV ne fya kusekesha e lyo na pa nshita tupoosa ukubelenga Baibolo no kushimikila? Bushe finshi twacindamika sana mu lupwa lwesu? Bushe tulabalanga ica kumwenako mu fyo tusala ukucita mu bumi na ku fyo twacindikisha ukupepa kwa cine?’ Amafunde ya kwa Lesa yafwile ukuba intanshi mu mitima ya bafyashi nga balefwaya ukukusha abana abengalatiina Lesa.—Amala. 6:6.

¹³ Nga ca kuti cila bushiku abafyashi balekonka ifishinte fya mu Baibolo ifitutungulula, abana babo bakalamona ico. Abana bakalakonka ifyo abafyashi babo balebasambilisha ne fyo balelanda. Lelo abana nga bamona ukuti abafyashi tabacita ifyo beba abana ukucita, bakamona fye ati ifishinte fya mu Baibolo tafyacindama kabili te kuti fibaafwe. Ne ci cikalenga abana ukunenuka nga batunkwa ukucita ifyabipa.

14, 15. Fintu nshi ifyacindama ifyo abafyashi balingile ukwafwa abana ukutemwa, kabili ni nshila nshi imo bengacitilamo ifi?

¹⁴ Abafyashi Abena Kristu tabafwile ukulaba ukuti ukukusha bwino abana te kubapeela fye ifyo bakabila pa kuba abomi, kwaliba na fimbi ifyacindama ifyo bafwile ukubacitila. Kanshi te kuti ciwame ukusambilisha umwana ukubika amano ku fintu fye ifingamuletela ifyuma. (Luk. Mil. 7:12) Yesu asambilishe abasambi bakwe ukubika sana amano ku kufwaya Ubufumu no bulungami. (Mat. 6:33) Kanshi abafyashi Abena Kristu balingile ukupashanya Yesu no kwesha ukwafwa abana babo ukulafwaya ukubombesha mu mulimo wa kwa Lesa.

¹⁵ Cimo ico abafyashi bengacita pa kwafwa abana, kufwaya inshita sha kuti abana baleba pamo na baba mu mulimo wa nshita yonse. Tontonkanyeni pa fyo abana bengakoseleshiwa nga ca kuti baishibana na bapainiya nelyo bakangalila benda na bena mwabo. Bamishonari, ababombela pa Bethel, na babomba umulimo wa makuule mu fyalo fimbi balomfwa bwino ukulanda pa busuma bwaba mu  kubombela Yehova. Ukwabula no kutwishika aba bamunyinefwe balakwata amalyashi ayasuma aya kushimika. Ukuipeelesha uko baipeelesha mu mulimo babomba kuti kwayafwa abaice ukusala bwino ifya kucita mu bumi e lyo no kukwata ubuyo bwa kubombela Lesa e lyo no kubika amano ku sukulu pa kuti baishibako fimbi ifyo bengacita pa kusanga umwa kuliila ilyo balebomba umulimo wa nshita yonse.

Mwe Bana, Cinshi Cingamwafwa Ukupashanya Yesu?

16. Bushe Yesu alecindika shani abafyashi bakwe pano isonde e lyo na Wishi wa mu muulu?

¹⁶ Mwe bana, Yesu alimulanga bwino bwino ifyo na imwe mulingile ukuba. Lesa apeele Yosefe na Maria umulimo wa kukusha Yesu kabili Yesu alebanakila. (Belengeni Luka 2:51.) Alimwene ukuti nangu ca kutila bali abashapwililika, Lesa alibapeele umulimo wa kumukusha. Kanshi alingile ukubacindika. (Amala. 5:16; Mat. 15:4) Ilyo akulile Yesu alecita ifintu ifyo Wishi wa mu muulu atemenwe. Alekaana na matunko. (Mat. 4:1-10) Na imwe limo kuti mwatunkwa ukukanaumfwila abafyashi benu. Bushe cinshi cingamwafwa ukupashanya Yesu?

17, 18. (a) Finshi abaice batunkwa ukucita ku sukulu? (b) Cinshi abaice balingile ukwibukisha icingabafwa ukukanawila mu matunko?

¹⁷ Abanenu abengi ku sukulu tabacindika ifyo Baibolo ilanda. Napamo kuti balemutunka ukucitako ifintu fimo ifishawama no kumuseka nga mwakaana ukucite fyo. Bushe abo musambilila na bo balamwita amashina yabipa nga mwakaana ukucitako ifyo balecita? Nga cabe fyo, mucita shani? Mwalishiba ukuti nga mulebatiina no kubakonkelesha, abafyashi benu na Yehova bakomfwa ububi. Cinshi cingacitika nga mulekonkelesha abo musambilila na bo? Napamo mwalisala fimo ifyo mufwaya ukucita mu bumi, pamo nga ukuba painiya, nelyo umubomfi utumikila, ukuyabombela uko bakabila ba Bufumu bashafula, nelyo ukubombela pa Bethel. Bushe abana be sukulu banenu kuti bamwafwa ukwisafikilisha ubuyo bwenu?

¹⁸ Mwe baice Abena Kristu, bushe kulaba inshita ilyo icitetekelo cenu ceshiwa? Mucita shani? Tontonkanyeni pali Yesu uo mufwile ukupashanya. Alikeene ukuwila mu fya kutunka lelo apampamine pa kucita ico aishibe ukuti e calungama. Nga muleibukisha ifi mukaba na maka ya kweba abana be sukulu banenu ukwabula ukupita na mu mbali ukuti tamulefwaya ukucitako ifyo balecita pantu mwalishiba ukuti tafyawama. Nga filya Yesu alecita, na imwe mulebika amano ku fingamwafwa ukulaumfwila Yehova no kulamubombela ne nsansa.—Heb. 12:2.

Icingalenga Ulupwa Ukuba ne Nsansa

19. Cinshi cingalenga abantu ukuba ne nsansa?

¹⁹ Yehova Lesa na Yesu Kristu bafwaya abantunse bonse ukuba ne nsansa. Nangu ca kutila tatwapwililika, kuti twakwata insansa. (Esa. 48:17, 18; Mat. 5:3) Yesu alesambilisha icine icilenga abantu ukuba ne nsansa, lelo kwali na fimbi ifyo alesambilisha abasambi bakwe. Alebasambilisha ne mikalile isuma. E lyo kabili imikalile yakwe yalibalangile ifingalenga bakwata insansa. Cila muntu mu lupwa kuti apashanya Yesu kabili kuti amwenamo. E ico, mwe balume, abakashi, abafyashi na bana, pashanyeni Yesu! Nga mulecita ifyo Yesu atusambilisha no kumupashanya, e lyo mukaba ne nsansa mu lupwa lwenu.

Kuti Mwa-asuka Shani?

• Bushe abalume balingile ukubomba shani umulimo Lesa abapeela uwa kutungulula ulupwa lwabo?

• Bushe umukashi kuti apashanya shani Yesu?

• Finshi abafyashi bengasambilila ku fyo Yesu alesunga abasambi bakwe?

• Finshi abana bengasambilila ku fyo Yesu ali?

[Amepusho]

[Icikope pe bula 8]

Bushe umulume uwatemwa umukashi wakwe akacita shani ilyo ashilapingula ifya kucita ifikumine ulupwa?

[Icikope pe bula 9]

Cinshi cingacitika icingapeela umukashi ishuko lya kulanga ukuti alatungilila ifyo umwina mwakwe atungulula?

[Icikope pe bula 10]

Abana balapashanya ifisuma ifilecita abafyashi babo