Iviuwou Ileleikristi, Wha Lele Oriruo Jesu!
Iviuwou Ileleikristi, Wha Lele Oriruo Jesu!
“Kristi . . . fi oriruo họ-otọ kẹ owhai re wha rọ kpahe ithihi riẹ.”—1 PITA 2:21.
1. (a) Didi obọ Ọmọ Ọghẹnẹ o wo evaọ oke emama? (b) Ẹvẹ Jesu ọ rehọ ahwo-akpọ?
OKENỌ Ọghẹnẹ ọ jẹ ma odhiwu gbe otọakpọ na, Ọmọ otuyẹ riẹ ọ jọ abotọ riẹ wọhọ “osu iruo.” Ọmọ Ọghẹnẹ ọ tẹ jẹ jọ kugbe Ọsẹ riẹ okenọ Jihova ọ ma oghoghẹrẹ erao gbe ekakọ nọ e rrọ otọakpọ na gbe okenọ Ọ ruẹrẹ Aparadase họ kẹ ahwo, enọ Jihova ọ ma evaọ uwoho riẹ. Ọmọ Ọghẹnẹ, ọnọ a te riẹ uwhremu na wọhọ Jesu, o you ahwo-akpọ gaga.—Itẹ 8:27-31; Emu. 1:26, 27.
2. (a) Eme Jihova o ru re ọ sai fi obọ họ kẹ ahwo-akpọ nọ e gba ha? (b) Oware jọ vẹ evaọ uzuazọ ohwo-akpọ Ebaibol na e kẹ ohrẹ kpahe?
2 Okenọ ọzae avọ aye ọsosuọ na a raha uzi no, ẹtanigbo o te zihe ruọ abọ ologbo ọrọ ẹjiroro Jihova. Jihova o vi Ọmọ riẹ ze re ọ sai ru ẹtanigbo na lọhọ. (Rom 5:8) Ofariẹ, Jihova ọ kẹ omai Ebaibol na, onọ o be kẹ omai ọkpọvio re ma sai ru oware nọ u woma dede nọ ma gba ha. (Ol. 119:105) Jihova ọ jọ Ebaibol na kẹ ọkpọvio re u fi obọ họ kẹ ahwo wo iviuwou evawere. Obe Emuhọ o ta kpahe orọo inọ ọzae ọ rẹ “se ọsẹ gbe oni riẹ ba, ọ vẹ gbalọ aye riẹ, a vẹ jọ uwo ovo.”—Emu. 2:24.
3. (a) Eme Jesu o wuhrẹ kpahe orọo? (b) Eme ma ti wuhrẹ evaọ uzoẹme nana?
3 Evaọ etoke odibọgba riẹ evaọ otọakpọ, Jesu ọ ta nọ Ọghẹnẹ ọ gwọlọ re orọo o jọ ribri. Yọ ahwo a te fi eware nọ o wuhrẹ họ iruo, i ti fi obọ họ kẹ ai whaha uruemu nọ o rẹ wha ozighi họ orọo hayo raha evawere uviuwou. (Mat. 5:27-37; 7:12) Uzoẹme nana o te ta kpahe epanọ iwuhrẹ Jesu gbe oriruo nọ o fihọ otọ nọ ọ jọ otọakpọ e rẹ sai ro fi obọ họ kẹ ezae gbe eyae uwou-orọo, esẹgbini, gbe emọ re a yeri uzuazọ evawere.
Epanọ Ọzae Ọ rẹ rọ Kẹ Aye Riẹ Ọghọ
4. Ẹvẹ ọkwa nọ Jesu o wo gbe onọ ezae na a wo i ro thoma?
4 Ọghẹnẹ ọ rehọ ọzae na mu wọhọ ọnọ o wuzou uviuwou, wọhọ epanọ Jesu ọ rrọ Ọnowuzou ukoko na. Pọl ukọ na ọ ta nọ: “Ọzae họ ọnọ o wo uzou aye wọhọ epanọ Kristi o wo uzou [ukoko na], ọye-omariẹ kọ Osiwi riẹ. Whai ezae na, wha you eyae rai, wọhọ epanọ Kristi o you [ukoko] riẹ, ọ jẹ rehọ oma obọriẹ kẹe.” (Ẹf. 5:23, 25) Evaọ uzẹme, oghẹrẹ nọ Jesu o yeri kugbe ilele riẹ o rrọ oriruo epanọ ezae Ileleikristi a re yeri kugbe eyae rai. Joma ta ẹme kpahe idhere jọ nọ Jesu ọ rọ rehọ ọkwa nọ Ọghẹnẹ ọ kẹ riẹ ro ru iruo.
5. Oghẹrẹ vẹ Jesu o ro yeri kugbe ilele riẹ?
5 Jesu ọ jọ “wowolẹ jegbọ eva i ro kpotọ.” (Mat. 11:29) Ọ tẹ jẹ jọ ohwo nọ ọ jọ jajaja. O siobọno ewha-iruo riẹ kẹ amọfa ha. (Mak 6:34; Jọn 2:14-17) Ọ rọ ẹwo kẹ ilele riẹ ohrẹ, ẹsejọ unuẹse buobu. (Mat. 20:21-28; Mak 9:33-37; Luk 22:24-27) Ghele na, Jesu ọ gbọku ai hayo kpomovuọ họ ai oma ha, yọ o ru rai roro ho inọ a fioka ha hayo inọ a sai ti ru eware nọ o bi wuhrẹ ai hi. Ukpoye, o jiri ilele riẹ ọ tẹ jẹ tuduhọ ae awọ. (Luk 10:17-21) Agbẹta nọ ilele na a jẹ rọ kẹ Jesu adhẹẹ gaga na fiki ẹwo nọ o ro yeri kugbe ai!
6. (a) Eme ọzae ọ rẹ sai wuhrẹ no oghẹrẹ nọ Jesu o yeri kugbe ilele riẹ ze? (b) Didi uduotahawọ Pita ọ kẹ ezae na?
6 Oriruo Kristi u wuhrẹ ezae na inọ a rẹ rehọ ọkwa rai dhuaro ho. Ukpoye, ọzae ọ rẹ kẹ ahwo uviuwou na ọghọ, o ve je you rai no eva ze. Pita ukọ na ọ tuduhọ ezae na awọ inọ a raro kele uyoyou Jesu re a “he tete” eyae rai. (Se 1 Pita 3:7.) Kọ ẹvẹ ọzae ọ rẹ rehọ ọkwa riẹ ru iruo, yọ evaọ oke ovo na o bi tete aye riẹ?
7. Edhere vẹ ọzae ọ rẹ rọ kẹ aye riẹ ọghọ? Kẹ oriruo.
7 Edhere jọ nọ ọzae ọ rẹ rọ kẹ aye riẹ ọghọ họ ọ rẹ nọe re ọ ta eva riẹ nọ ọ tẹ gwọlọ jiroro nọ i ti kpomahọ uviuwou na. Ẹsejọhọ ọzae na ọ gwọlọ jiroro kpahe oria nọ a rẹ kwa kpohọ hayo iruo nọ ọ gwọlọ nwene hayo oware ofa jọ, wọhọ obonọ a re ro kperẹ hayo araha nọ a rẹ whaha fiki eware nọ i bi dhe ẹghẹghare. Fikinọ ẹme na o kpomahọ uviuwou na soso, u re kiehọ re ọzae na ọ jiroro na kugbe aye riẹ, keme onana u ti fi obọ họ kẹe jiroro nọ e gba, u ve je ru ei lọhọ ziezi re aye na ọ thae uke. (Itẹ 15:22) Ezae Ileleikristi a tẹ be rọ ọghọ kẹ eyae rai, eyae rai a re you rai jẹ kẹ ae adhẹẹ, mai wuzou, a ve je wo ọjẹrehọ Jihova.—Ẹf. 5:28, 29.
Epanọ Aye Ọ rẹ rọ Kẹ Ọzae Riẹ Adhẹẹ Odidi
8. Fikieme Ivi ọ rọ rrọ ekpehre oriruo?
8 Jesu o fi emamọ oriruo omaurokpotọ họ kẹ eyae Ileleikristi. Oghẹrẹ nọ o rri udu-esuo u wo ohẹriẹ gaga no oghẹrẹ nọ aye ọsosuọ na o rri udu-esuo. Ivi o fi emamọ oriruo họ otọ kẹ eyae na ha. O wo ọzae nọ Jihova omariẹ o juzi kẹ. Ghele na, Ivi ọ rọ adhẹẹ kẹ ọzae riẹ hẹ. O koko uzi Ọghẹnẹ nọ Adamu ọ ta kẹe he. (Emu. 2:16, 17; 3:3; 1 Kọr. 11:3) Ma riẹ inọ ẹviẹ a viẹ Ivi họ, rekọ ọ hae nọ mi ọzae riẹ re ọ riẹ sọ u woma re o ru oware nọ urru jọ o jẹ ta kẹe na. Ukpoye, o tube gele ọzae riẹ fihọ uye.—Emu. 3:5, 6; 1 Tim. 2:14.
9. Oriruo vẹ Jesu o fihọ otọ kẹ omai evaọ oma nọ o ro kpotọ?
9 Wo ohẹriẹ, Jesu o fi oriruo ọgbagba họ otọ evaọ oma nọ o ro kpotọ kẹ Ọnowuzou riẹ. Ọ rehọ uruemu gbe uzuazọ riẹ kpobi dhesẹ nọ ‘tei te Ọghẹnẹ a rrọ ẹrẹrẹe he.’ Ukpoye, “o se omariẹ gbe oware ovo ho, ọ tẹ rehọ oghẹrẹ oma odibo.” (Fil. 2:5-7) Nẹnẹ, Jesu o wo uruemu ovona dede nọ o zihe ruọ Ovie no. Ọ be roma kpotọ kẹ Ọsẹ riẹ evaọ eware kpobi je bi vuhumu inọ Ọghẹnẹ o wuzou riẹ.—Mat. 20:23; Jọn 5:30; 1 Kọr. 15:28.
10. Ẹvẹ aye ọ rẹ rọ rehọ uruemu dhesẹ inọ ọzae na họ ọnọ o wuzou riẹ?
10 Aye nọ ọ rrọ Oleleikristi ọ tẹ be rọ uruemu dhesẹ inọ ọzae na họ ọnọ o wuzou riẹ yọ ọ be raro kele Jesu. (Se 1 Pita 2:21; 3:1, 2.) Joma ta ẹme kpahe edhere jọ nọ ọ rẹ sai ro ru onana. Ọmọzae riẹ o bi mi ei uvẹ re o ru oware jọ. Fikinọ ọsẹ na avọ oni na a re keria ta ẹme kpahe iẹe he, u re fo re oni na ọ nọ ọmọ na nọ, “Whọ ta ẹme na kẹ ọsẹ ra no?” O gbe ri ru ere he, aye na ọ rẹ rọ ẹme na jiroro kugbe ọzae riẹ tao. Ofariẹ, aye nọ ọ rrọ Oleleikristi ọ rẹ whaha eruo oware nọ o wọso ẹjiroro ọzae riẹ hayo ẹkparesuọ ọzae riẹ evaọ iraro emọ riẹ. Ọzae riẹ o te ru oware jọ nọ o were riẹ hẹ, ọ rẹ ta ẹme na kẹe nọ aimava ọvo a tẹ rrọ oria.—Ẹf. 6:4.
Oriruo nọ Jesu O Fihọ Otọ kẹ Esẹgbini
11. Oriruo vẹ Jesu o fihọ otọ kẹ esẹgbini?
11 Dede nọ Jesu o wo aye gbe emọ họ, ọ rrọ obọdẹ oriruo kẹ esẹgbini nọ e rrọ Ileleikristi. Evaọ oghẹrẹ vẹ? Avọ uyoyou gbe odiri, ọ rehọ ẹmeunu gbe uruemu riẹ wuhrẹ ilele riẹ. O dhesẹ kẹ ae epanọ a re ro ru iruo nọ ọ kẹ rai na. (Luk 8:1) Oghẹrẹ nọ Jesu o ro yeri kugbe ilele na u wuhrẹ i rai oghẹrẹ nọ a re yeri kugbe ohwohwo.—Se Jọn 13:14-17.
12, 13. Ẹvẹ esẹgbini a sai ro fi obọ họ kẹ emọ rai wo ozodhẹ Ọghẹnẹ?
12 Emọ e rẹ raro kele esẹgbini rai, o tẹ make rọnọ uruemu rai u woma hayo u yoma. Fikiere, whai esẹgbini, wha nọ oma rai nọ: ‘Didi oriruo ma bi fihọ otọ kẹ emọ mai evaọ unuoke nọ ma bi ro riwi etehe-ughe gbe onọ ma be rọ zaro, avọ oke nọ ma bi ro se Ebaibol je kpohọ usiuwoma ota? Eme ma rọ karo evaọ uviuwou mai? Kọ ma rrọ emamọ oriruo evaọ egagọ Ọghẹnẹ nọ ma be rọ karo?’ Uzi Ọghẹnẹ o rẹ kake jọ udu esẹgbini na a tẹ gwọlọ nọ emọ rai a rẹ dhozọ Ọghẹnẹ.—Izie. 6:6.
13 Esẹgbini a tẹ be daoma fi izi Ebaibol họ iruo kẹdẹ kẹdẹ, emọ rai a ti muẹrohọ onana. Emọ na a ve ti se ẹme esẹgbini rai gboja. Rekọ emọ a tẹ ruẹ nnọ esẹgbini rai a tẹ ta ojọ no a ve ru ofa, a ti ku ei họ nnọ kpakọ izi Ebaibol e roja tere he jegbe nọ a rẹ sai koko ai hi. Onana o vẹ te whae ze nọ emọ na a te rọ kaki kie ruọ iruemu iyoma akpọ na.
14, 15. Eware ezi vẹ esẹgbini a re fi isiuru rai họ iroro emọ rai, kọ edhere jọ vẹ a rẹ sai ro ru onana?
14 Esẹgbini nọ e rrọ Ileleikristi a riẹ inọ re a yọrọ ọmọ orọnikọ re a dẹ eware kẹe ọvo ho. Fikiere, o rrọ oware areghẹ hẹ re a kpọ ovao ọmọ rri ilale eware akpọ na ọvo. (Ọtausi. 7:12) Jesu o wuhrẹ ilele riẹ re a rehọ eware abọ-ẹzi karo. (Mat. 6:33) Fikiere, evaọ aruorokele Jesu, esẹgbini a rẹ daoma re a wuhrẹ emọ rai re a wo isiuru ilale eware abọ-ẹzi.
15 Edhere jọ nọ esẹgbini a re ro ru onana họ a re ru re emọ rai a raha oke kugbe inievo nọ e rrọ odibọgba oke-kpobi na. Dai roro epanọ o rẹ jọ uduotahawọ te kẹ emoha re a kẹle ekobaro hayo ọsẹro okogho avọ aye riẹ. Nọ imishọnare, ahwo uviuwou Ebẹtẹle, gbe enọ i bi ru iruo ebabọ a tẹ be hai weze ziọ uwou ra, onana u ti fi obọ họ kẹ emọ na ruẹ oghọghọ nọ o rrọ ẹgọ Jihova. Ababọ avro, inievo yena a ti gbiku nọ e rẹ sasa oma. Oma nọ a be dawo evaọ iruo Ọghẹnẹ u ti fi obọ họ gaga kẹ emọ ra re a jẹ emamọ iroro, re a fi emamọ itee họ, re a je kpohọ isukulu te umuo nọ a rẹ rọ rẹrote oma rai evaọ odibọgba oke-kpobi na.
Emaha—Eme O ti Fi Obọ Họ kẹ Owhai Lele Oriruo Jesu?
16. Ẹvẹ Jesu ọ rọ rehọ adhẹẹ kẹ Josẹf avọ Meri gbe Ọsẹ obọ odhiwu riẹ?
16 Emaha na, Jesu ọ rrọ obọdẹ oriruo kẹ owhai re. Josẹf avọ Meri họ enọ e yọrọ Jesu, yọ o yoẹme kẹ ae. (Se Luk 2:51.) Ọ riẹ inọ dede nọ a gba ha, Ọghẹnẹ ọ kẹ rai iruo inọ a rẹro tei. Fiki oyena, ọ rẹ kẹ ae adhẹẹ. (Izie. 5:16; Mat. 15:4) Nọ Jesu o te ohwo no, ọ jẹ hai ru eware nọ e rẹ were Ọsẹ obọ odhiwu riẹ ẹsikpobi. Oyena o gwọlọ nnọ o re mugba kẹ edawọ. (Mat. 4:1-10) Ẹsejọ o rẹ jọ bẹbẹ kẹ owhai emaha na re wha yoẹme kẹ esẹgbini rai. Rekọ, eme o rẹ sai fi obọ họ kẹ owhai lele oriruo Jesu?
17, 18. (a) Ebẹbẹ vẹ izoge na a be rẹriẹ ovao ku evaọ obọ isukulu? (b) Eme izoge a rẹ kareghẹhọ nọ u re fi obọ họ kẹ ae dikihẹ ga?
17 Ẹsejọhọ ibe emọ-isukulu ra a rẹ daezọ izi Ebaibol ho. A rẹ sae bẹbẹ owhẹ họ ru eware nọ i yoma, rekọ whọ tẹ se a ve se owhẹ ẹkoko. Kọ ibe emọ-isukulu ra a mu odẹ kẹ owhẹ no fikinọ who bi lele ai ru eware jọ họ? O tẹ rrọ ere, eme whọ be hai ru? Whọ riẹ nnọ whọ tẹ rọ fiki ozodhẹ ru onọ a gwọlọ na, who ti ru eva dha ọsẹgboni ra gbe Jihova. Eme o te via kẹ owhẹ who te kie lele ibe emọ-isukulu ra? Ẹsejọhọ who fi itee jọ họ kẹ oma ra no, wọhọ iruo ọkobaro hayo re who te odibo oruiruo, re who kpohọ oria nọ a mae jọ gwọlọ etausiuwoma, hayo re whọ jọ Ebẹtẹle ru iruo. Kọ ibe emọ-isukulu ra nọ who re kie lele u ti fi obọ họ kẹ owhẹ le itee ra te obọ?
18 Kọ whai izoge nọ e rrọ ukoko na wha be hae nyaku edawọ jọ ẹsejọ? Eme whọ be hai ru? Roro kpahe Jesu, oriwiruo ra. Jesu o kie kẹ edawọ họ, rekọ o dikihẹ ga je ru oware nọ ọ riẹ nnọ u kiete. Onana nọ whọ rẹ kareghẹhọ o te kẹ owhẹ udu nọ whọ rẹ rọ ta kẹ ibe emọ-isukulu ra inọ whọ gwọlọ kuomagbe ai hi evaọ eruo oware nọ whọ riẹ nnọ o thọ. Wọhọ Jesu, tẹrovi oghọghọ nọ who re wo nọ whọ tẹ be gọ Jihova je yoẹme kẹe.—Hib. 12:2.
Oware nọ O rẹ Wha Evawere Ziọ Uviuwou
19. Ẹvẹ ma rẹ sai ro wo uvi evawere?
19 Jihova Ọghẹnẹ avọ Jesu Kristi a gwọlọ uzuazọ nọ o mai woma kẹ ahwo-akpọ. Dede nọ ma gba ha, ma rẹ sae wereva. (Aiz. 48:17, 18; Mat. 5:3) Jesu o wuhrẹ eware nọ e rẹ kẹ ahwo-akpọ evawere, rekọ orọnikọ eware nana ọvo o wuhrẹ ilele riẹ hẹ. O wuhrẹ ilele riẹ edhere nọ ọ mai woma nọ a re ro yeri uzuazọ. Maero, ọ nya siọ oriruo uzuazọ nọ o rrọ kpatiẹ ba kẹ ae. Mai kpobi, te ọzae, te aye, te emọ, ma rẹ sai wo erere no oriruo riẹ ze. Fikiere jomai kpobi ma lele oriruo Jesu. Ma te bi lele iwuhrẹ Jesu jẹ raro kele oriruo riẹ, ma te ginẹ reawere uzuazọ uviuwou.
Ẹvẹ Whọ te k’Uyo?
• Ẹvẹ ezae a rẹ rọ udu nọ Ọghẹnẹ ọ kẹ rai na ru iruo?
• Ẹvẹ aye ọ rẹ rọ raro kele oriruo Jesu?
• Eme esẹgbini a rẹ sai wuhrẹ no oghẹrẹ nọ Jesu o yeri kugbe ilele riẹ ze?
• Eme emaha na a rẹ sai wuhrẹ no oriruo Jesu ze?
[Enọ Uwuhrẹ]
[Uwoho nọ o rrọ ẹwẹ-obe avọ 8]
Taure ọzae nọ o wo uyoyou ọ tẹ te jiroro nọ u ti kpomahọ uviuwou na soso, eme o re ru?
[Uwoho nọ o rrọ ẹwẹ-obe avọ 9]
Etoke vẹ aye o re jo dhesẹ inọ o vuhumu nnọ ọzae na o wuzou riẹ?
[Uwoho nọ o rrọ ẹwẹ-obe avọ 10]
Emaha a rẹ raro kele emamọ eware nọ esẹgbini rai a bi ru