Kristian Chhûngkuate U—Isua Entawn Tûr Siam Chu Zui Rawh U
Kristian Chhûngkuate U—Isua Entawn Tûr Siam Chu Zui Rawh U
“Krista pawh khân . . . a hniaka in zuina tûrin entawn tûr a hnutchhiah che u kha.”—1 PET. 2:21.
1. (a) Pathian Fapa chuan thil siamnaah eng chanvo nge a neih? (b) Mihringte chungah Isua’n eng rilru nge a put?
PATHIANIN lei leh vân a siam khân, a Fapa piang hmasa ber chu a kiangah “mi themthiam angin” a awm a. Pathian Fapa chuan a Pain ramsa leh thlai chi tinrêngte a siam lai leh Ama anpuia a siam mihringte chênna tûr Paradis A buatsaih lai pawh khân a Pa chu a thawhpui a ni. Pathian Fapa, a hnua Isua lo ni ta chuan mihringte a hmangaih êm êm a. “[A] lâwmna chu mihring fate chungah a ni.”—Thuf. 8:27-31; Gen. 1:26, 27.
2. (a) Pathian Jehova chuan mihring ṭha famkim lote ṭanpuitu tûr eng nge a pêk? (b) Eng chungchângah nge Bible chuan kaihhruaina a pêk?
2 Nupa tuak hmasa berin thil an tihsual hnu chuan, mihring suaksualte chhan chhuah chu Jehova thiltuma pêng pawimawh tak a lo ni a. Pathian Jehova chuan chu chhan chhuahna chu Krista tlanna inthâwina hmangin a pe a ni. (Rom 5:8) Chu bâkah, Pathian Jehova chuan a Thu, Bible min pe bawk a, chu chuan mihringte chu an ṭhat famkim lohna hmachhawn thei tûrin a kaihruai a ni. (Sâm 119:105) Pathian Jehova chuan a Thuah chhûngkaw hlim tak leh lungrual tak nei reng thei tûra an mamawh ṭanpuina a pe a. Nupui pasal neih chungchângah Genesis bu chuan mipain “a nupui a vuan ang: tichuan tisa pumkhat an lo ni tawh ang,” tiin kaihhruaina a pe a ni.—Gen. 2:24.
3. (a) Isua’n nupui pasal neih chungchângah eng thu nge a zirtîr? (b) He thuziakah hian eng nge kan sawiho vang?
3 Isua chuan leia rawng a bâwl chhûng khân inneihna chu dam chhûng daih tûr ruahmanna a nihzia a sawi uar a. Ani chuan nupa inkâr leh chhûngkuaa hman theih tûr thu bulte a zirtîr a; chûngte nunpuina chuan harsatna thlen thei miziate pumpelh tûrin mi tinte chu a ṭanpui ang. (Mt. 5:27-37; 7:12) He thuziakah hian leia Isua a awm laia a zirtîrnate leh a entawn tûr siamte’n pasalte, nupuite, nu leh pate, leh naupangte a ṭanpui theih dân sawiho a ni ang.
Kristian Pasalin A Nupui A Chawimawi Dân
4. Isua chanvo leh Kristian pasalte chanvo inanna chu eng nge ni?
4 Isua chu kohhran Lû a nih ang bawkin, Pathian chuan pasal pawh chhûngkaw lû ni tûrin a ruat a. Tirhkoh Paula chuan: “Krista chu amah ngei taksa chhandamtu nia kohhranho lû a ni ang bawk hian, pasal chu nupui lû a ni si a. Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khân,” tiin a ziak a ni. (Eph. 5:23, 25) Isua’n a hnungzuitute a cheibâwl dân chuan Kristian pasalte’n an nupuite an cheibâwl dân tûr kawngah entawn tûr a siam ngei a ni. Isua’n Pathian hnên aṭanga a dawn thu neihna a hman dân kawng ṭhenkhat lo ngaihtuah ta ila.
5. Engtin nge Isua’n a zirtîrte chungah a thu neihna a hman?
5 Isua chu “thuhnuairawlh leh rilrua inngaitlâwm tak” a ni a. (Mt. 11:29) A ṭûl huna thil ti nghâl vat ṭhîn mi a ni bawk. A mawhphurhnate pawh a ngaihthah ngai lo. (Mk. 6:34; Joh. 2:14-17) A zirtîrte chu ngilnei takin a zilh ṭhîn a, a ṭûl hunah phei chuan vawi tam tak a zilh nawn ṭhîn. (Mt. 20:21-28; Mk. 9:33-37; Lk. 22:24-27) Mahse, Isua chuan anni chu a hau hrep emaw, a tizak emaw ngai lo va, hmangaih loh nia inhriatna emaw, a thil tihtîrtte tithei ngai lo nia inhriatna emaw a neihtîr ngai hek lo. Chutih ahnêkin, anni chu a fakin, a fuih zâwk mah ṭhîn. (Lk. 10:17-21) Isua’n hmangaih tak leh lainat taka a cheibâwl avânga a zirtîrte’n amah an zah hle pawh chu a mak lo ve!
6. (a) Isua’n a zirtîrte a cheibâwl dân aṭangin pasal chuan eng nge a zir theih? (b) Petera’n pasalte hnênah eng fuihna nge a pêk?
6 Isua entawn tûr siam chuan pasalte chu Krista lû nihna entawn tûr chuan an nupuite râwng taka awp bet lovin, zah tak leh mahni hmasial lo hmangaihna nên an cheibâwl zâwk tûr a ni tih a zirtîr a ni. Tirhkoh Petera chuan pasalte chu an nupuite ‘nêna an khawsak dânah’ anmahni ‘chawimawi a,’ Isua hmangaihna entawn tûrin a fuih a ni. (1 Petera 3:7 chhiar rawh.) A nih chuan, engtin nge pasal chuan a thu neihna a hman rual a, a nupui chu chawimawi phu anga a cheibâwl theih ang?
7. Eng kawngin nge pasalin a nupui a chawimawi theih? Entîrna pe rawh.
7 Pasalin a nupui a chawimawi theih dân kawng khat chu chhûngkaw nghawng thei thu tlûkna a siam hmaa a nupui thil thlîr dân leh ngaih dânte ṭha taka ngaihtuah tel hi a ni. Entîr nân, pêm chhuah emaw, hna dang thawh emaw, a nih loh leh nî tin nuna tel, chawlh hmanna tûr thlan ang chi te emaw, ei leh bâr lama harsatna pung chho zêl avânga chhûngkaw sum hman dân insiam rem ang chi te emaw chungchângah thu tlûkna siam a ngai a ni thei a. Chhûngkaw nghawng thei thil a nih avângin, pasal tân a nupui ngaih dân lâk chu a ṭangkaiin, a ngilneihthlâk ang a, chu chuan thu tlûkna inbûk tâwk leh awmze nei zâwk a siamtîr theih bâkah, a nupui tân amah thlâwp a tiawlsam sawt bawk ang. (Thuf. 15:22) Mahni nupuite chawimawitu Kristian pasalte chuan an nupuite hmangaihna leh zahna an dawn mai bâkah, a aia pawimawh zâwk Pathian Jehova lawm an hlawh bawk a ni.—Eph. 5:28, 29.
Nupuiin A Pasal Zahna Thûk Tak A Lantîr Dân
8. Engvângin nge Evi chu entawn tlâk a nih loh?
8 Kristian nupuite chuan Isuaah chuan thu neihna laka intukluhna kawnga entawn tûr ṭha famkim an hmu a. Isua thu neihna thlîr dân leh nupui hmasa ber Evi thlîr dân chu a va inang lo êm! Evi chuan nupuite tân entawn tûr ṭha a siam lo. Ani chuan Pathian pêk lû a nei a, chu mi kal tlang chuan kaihhruaina a dawng a ni. Mahse, Evi chuan chu ruahmanna chu a zah lo va. A pasal Adama’n a hrilh kaihhruaina chu a pawm lo a ni. (Gen. 2:16, 17; 3:3; 1 Kor. 11:3) Evi chu bum a ni ngei mai; mahse, ‘Pathian thil hriat reng’ hrilhtu nia inchhâl aw chu ngaihthlâk âwm a nih leh nih loh a pasal chu râwn tûr a ni a. Mahse, chutianga ti lovin, a pasal chu a kaihruai ta zâwk a, chu chu a chapothlâk a ni.—Gen. 3:5, 6; 1 Tim. 2:14.
9. Intukluhna kawngah Isua’n entawn tûr eng nge a siam?
9 Isua erawh chuan a Lû laka intukluhna kawngah entawn tûr ṭha famkim a siam thung. A rilru put hmang leh a nun dân chuan “Pathian tluka awm chu thil thlâkhlelh hleih theihah a ruat lo” tih a târ lang a. “Bâwih angah a insiam a, amah leh amah a intitlâwm ta zâwk” a ni. (Phil. 2:5-7) Tûna Lal anga ro a rêl hnuah pawh, Isua chuan chutiang rilru put hmang tho chu a la nei reng a. Kawng engkimah inngaitlâwm takin a Pa lakah a intulût a, a Pa lû nihna chu a thlâwp tlat a ni.—Mt. 20:23; Joh. 5:30; 1 Kor. 15:28.
10. Engtin nge nupui chuan a pasal lû nihna chu a thlâwp theih?
10 Kristian nupui chuan a pasal lû nihna chu thlâwp tlatin, Isua chu a entawn tûr a ni. (1 Petera 2:21; 3:1, 2 chhiar rawh.) Chutianga a tih theihna hun remchâng pakhat han ngaihtuah ta ila. An fapa chuan nu leh pa phalna lâk ngai thiltih engemawa tel chu a rawn dîl a. A thil dîl chungchâng chu an nupaa sawi dun a la nih loh avângin, a nu tân chuan “I pa i dîl tawh em?” tia zawh chu a âwm hle ang. A la dîl loh chuan, thu tlûkna a siam hmain a pasal a râwn phawt tûr a ni. Chu bâkah, Kristian nupui chuan fate hmaa a pasal thusawi emaw, ngaih dân emaw kalh chu a duh miah lo vang. Thil engemaw chungchânga a pasal ngaih dân a pawm theih loh chuan, a hrangin a tîtîpui zâwk ang.—Eph. 6:4.
Nu leh Pate Tâna Isua Entawn Tûr Siam
11. Isua’n nu leh pate tân entawn tûr eng nge a siam?
11 Isua chu nupui fanau nei ni lo mah se, Kristian nu leh pate tâna entawn tûr ṭha ber a ni. Engtin nge a nih theih? Ani chuan a zirtîrte chu hmangaih tak leh dawhthei takin a thusawi leh a entawn tûr siam hmangin a zirtîr ṭhîn a. A hna pêkte an thawh zawh theih dân tûr pawh a zirtîr bawk. (Lk. 8:1) A zirtîrte chunga a lantîr rilru put hmang leh anmahni a cheibâwl dân chuan an incheibâwl tawn dân tûr chu a zirtîr a ni.—Johana 13:14-17 chhiar rawh.
12, 13. Nu leh pate’n Pathian ṭih tak fate an neih theih nân eng nge ngai?
12 Naupangte chuan a ṭha emaw, a ṭha lo emaw pawh ni se, an nu leh pate tih dân chu an zir duh hle a. Chuvângin, nu leh pate u, hetiang hian inzâwt rawh u: ‘TV en nân leh intihhlim nâna kan hun hman zât leh Bible zir nân leh thlawhhma rawngbâwl nâna kan hun hman zât chungchângah fate tân entawn tûr eng nge kan siam? Kan chhûngkaw thil ngaih pawimawh berte chu eng nge ni? Kan nun leh kan thu tlûkna siamah biakna dik dah pawimawh berin, entawn tûr ṭha kan siam em?’ tiin. Pathian ṭih tak fate nei tûr chuan nu leh pate thinlungah Pathian dân chuan nghet takin zung a kaih phawt tûr a ni.—Deut. 6:6.
13 Nu leh pate’n nî tin thiltih engkima Bible dân bulte nun pui an tum ṭâng ṭâng chuan, chu chu fate’n an hmuh hmaih lo vang a. An ṭawngkam leh zirtîrnate chuan an fate a hneh thei dâwn a ni. Mahse, naupangte chuan an tâna dân zamtu ngei ngei an nu leh pate pawhin chûng dânte chu an zâwm lo tih an hmuh chuan, Bible thu bulte chu thil pawimawh lêm lo leh ṭangkai tak tak lo angah an ngai thei a. Khawvêl nêksâwrna hnuaiah an tlâwm hma phah thei a ni.
14, 15. Nu leh pate chuan an fate thinlungah eng tih duhna nge an tuh ang a, chutianga an tih theih dân kawng khat chu eng nge ni?
14 Kristian nu leh pate chuan fate enkawlnaah chuan tisa lam mamawh pêk aia tam a tel tih an hria a ni. Chuvângin, hausakna lam thil chauh ûm tûra zirtîr chu a finthlâk loh hle ang. (Thur. 7:12) Isua chuan a zirtîrte chu lalram leh Pathian felna zawng hmasa zâwk tûrin a fuih a. (Mt. 6:33) Chuvângin, Kristian nu leh pate pawhin Isua entawnin, an fate chu thlarau lam thiltumte ûm duhna thinlung neihtîr an tum tlat bawk tûr a ni.
15 Nu leh pate’n chutianga an tih theih dân kawng khat chu an fate’n hunbi kima rawngbâwltute an kawm theih nâna hun remchâng siamsak hi a ni. Pioneer-te leh bial kantu leh an nupuite hmêl hriat chu tleirâwlte’n an chakpui theih dân tûr chu ngaihtuah teh. Tlawhtu missionary-te, Bethel-a rawngbâwltute, leh khawvêl pum huap insak rawngbâwlnaa telte chuan Jehova rawngbâwlnaa an hlimnate chu phûr takin an sawi thei a ni. Anni chuan thiltawn rilru khawih tak tak sawi tûr an nei ang tih rinhlelh rual a ni lo. Chûng mite inpêkna chuan in fate chu thu tlûkna fing siam tûr te, thlarau lam thiltum fakawm tak insiam tûr te, leh hunbi kima rawngbâwlnaa mahni intodelhtîr thei chi zirna thlang thiam tûr tein a ṭanpui ang.
Naupangte U—Isua Entawn Tûrin Engin Nge Ṭanpui Ang Che U?
16. Engtin nge Isua’n leia a nu leh pa leh vâna a Pa chu a chawimawi?
16 Naupangte u, in tân pawh Isua’n entawn tûr ṭha tak a hnutchhiah che u a ni. Ani chu Josefa leh Mari te enkawlna hnuaiah a awm a, an thu zâwmin a awm a ni. (Luka 2:51 chhiar rawh.) Josefa leh Mari chu ṭha famkim lo an ni chung pawhin, amah enkawl tûrin Pathianin mawhphurhna a pe tih a hria a ni. Chutiang an nih avâng chuan, a nu leh pate chuan chawimawi an phu a ni. (Deut. 5:16; Mt. 15:4) A puitlin hnuah pawh Isua chuan a Pa vâna mi duhzâwng a ti reng ṭhîn a. Chutiang ni tûr chuan thlêmna pawh a do a ngai a ni. (Mt. 4:1-10) Nangni naupangte pawhin nu leh pate thu âwih lo tûra thlêmna tawh châng in nei ngei ang a. Chutih hunah chuan, engin nge Isua entawn tûra ṭanpui ang che u?
17, 18. (a) Eng ang chi thlêmna nge ṭhalaite’n school-ah an tawh? (b) Eng thil hriat rengnain nge ṭhalaite chu fiahna do thei tûrin ṭanpui ang?
17 I school kalpui a tam zâwk chuan Bible tehnate an ngaisâng vak lo emaw, engah mah an ngai lo tawp emaw pawh a ni thei a. Thil dik lo tihna engemawah teltîr ṭâlh che an tum a, i hnar tâkah chuan an nuihzat che pawh a ni thei. I school kalpuite’n an thiltih engemawa i tel duh loh avângin, hmusit takin an ko tawh ngai che em? An ko tawh che a nih chuan engtin nge i chhân lêt? Chutianga an tih che avânga i tlâwm mai a, mipui tih dân i zui mai chuan, i nu leh pa leh Jehova i tibeidawng dâwn tih i hria a ni. I school kal puite chu zui ta la, i chungah eng nge thleng ang? Pioneer emaw, kohhrana rawngbâwltu emaw, Lalram thuchhuahtu mamawh zualna hmuna rawngbâwl emaw, a nih loh leh Bethel-a rawngbâwl emaw chu i tum a ni mai thei. I school ṭhiante chuan chu i thiltum chu hlen tûrin an ṭanpui che ang em?
18 Kristian kohhrana ṭhalaite u, in rinna fiahna in tâwk tawh ngai em? Chu chu engtin nge in chhân lêt? In entawn tûr Isua chu ngaihtuah rawh u. Ani chuan thlêmna a do va, thil dikah chuan a ding nghet tlat a ni. Chu mi hriat rengna chuan thil dik lo tihnaa tel i duh loh thu i school kalpuite hnêna fiah taka hrilh tûrin huaisenna a pe ang che. Isua ang bawkin dam chhûnga rawngbâwlna hlimawm neih beiseina leh Jehova thu âwihnaah chuan i rilru pe tlat ang che.—Heb. 12:1, 2.
Chhûngkaw Nun Hlim Neih Nâna Thil Pawimawh Ber
19. Eng nun kawngin nge hlimna dik tak thlen?
19 Pathian Jehova leh Isua Krista chuan mihringte tân thil ṭha ber an duhsak a. Ṭha famkim lo kan ni chung pawhin hlimna engemaw chen chu kan nei thei a ni. (Is. 48:17, 18; Mt. 5:3) Isua chuan mihringte hlimna thlen thei tûr thutak a zirtîr a; mahse, chu chauh chu a zirtîr lo va. Nun kawng ṭha ber pawh a zirtîr bawk. Chu mai bâkah, nun dân leh rilru put hmang inbûk tâwk neihna kawngah entawn tûr min hnutchhiah bawk a. Kan vai hian, chhûngkuaa kan dinhmun chu eng pawh ni se, Isua entawn tûr siam zui chu kan hlâwkpui thei a ni. Chuvângin, pasal te, nupui te, nu leh pate, leh naupangte u, Isua entawn tûr siam chu zui ang che u! Isua zirtîrna pawm leh a entawn tûr siam zuina chu chhûngkaw nun hlim leh lungawithlâk tak neih nâna thil pawimawh ber a ni tak zet a ni. (w09 7/15)
Engtin Nge Kan Chhân Ang?
• Engtin nge pasal chuan Pathian pêk a thu neihna chu a hman ang?
• Engtin nge nupui chuan Isua entawn tûr siam chu a zui theih?
• Isua’n a zirtîrte a cheibâwl dân aṭangin nu leh pate chuan eng nge an zir theih?
• Isua entawn tûr siam aṭangin ṭhalaite’n eng nge an zir theih?
[Zirlai Atâna Zawhnate]
[Phêk 14-naa milem]
Chhûngkaw nghawng thei thu tlûkna a siam hmain, hmangaihna nei pasal chuan eng nge a tih ang?
[Phêk 15-naa milem]
Eng dinhmunin nge nupui chu a pasal lû nihna thlâwp theihna hun remchâng pe?
[Phêk 16-naa milem]
Naupangte chuan an nu leh pate thil chîn ṭhate an entawn ṭhîn