Kristianon Pamilya​—Alig Yoy Ehemplo nen Jesus!

‘Angitilak si Kristo na panuliranan, pian tumboken yo so bakat to.’​—1 PED. 2:21.

1. (a) Anto so betang na Anak na Dios diad panamalsa? (b) Anto so nalilikna nen Jesus ed katooan?

SANEN gagawaen na Dios so tawen tan dalin, say panguloan ya Anak to et walad dikingan to bilang say “uloen a komikimey.” Inibaan met na Anak na Dios so Ama to, sanen denisinyo tan pinalsa nen Jehova so amayamay a klase na ayep tan tanaman diad dalin tan sanen imparaan To so Paraiso a panayaman na saray pinalsan ginawa ed indengan To. Say Anak na Dios, a diad saginonor et atawag a Jesus, et inad-aro toy katooan. “Say panggayagaan [to] wala nensaman ed saray anak na totoo.”​—Uli. 8:27-31; Gen. 1:26, 27.

2. (a) Anto so intarya nen Jehova bilang tulong ed imperpekton katooan? (b) Diad anton sakey ya aspekto na bilay a mangitatarya so Biblia na panangiwanwan?

² Sanen nankasalanan so inmunan sanasawa, nagmaliw ya importantin kabiangan na gagala nen Jehova so panondon ed makasalanan a katooan. Pian nagawa itan, intarya nen Jehova so dondon bagat nen Kristo. (Roma 5:8) Ontan met, intarya nen Jehova so Salita to, say Biblia, a mangiwawanwan ed too pian ontalona anggaman ed atawir a kasalanan. (Sal. 119:105) Panamegley na Salita to, igigiya nen Jehova iray totoo pian napansiansia ran mabiskeg tan maliket so pamilya ra. No nipaakar ed panangasawa, ibabaga na Genesis a say laki et  nepeg a “yamong to so asawa to, et saksakey ira a laman naani.”​—Gen. 2:24.

3. (a) Anto so imbangat nen Jesus nipaakar ed panamaley? (b) Anto so pantongtongan ed sayan artikulo?

³ Legan na ministeryo nen Jesus, indanet to a say panamaley et inggagalan magmaliw a permanente. Imbangat to met iray prinsipyon no iyaplika et ontulong ed saray membro na pamilya a napaliisan iray awawey tan kagagawan mameligro ed relasyon na sanasawa tan ed liket na pamilya. (Mat. 5:27-37; 7:12) Pantongtongan ed sayan artikulo no panon a saray bangat tan alimbawa nen Jesus sanen wadiad dalin et ontulong ed saray asawan lalaki tan bibii, atateng, tan ananak pian nawalaan iray maliket tan makapnek a bilay.

No Panon a Napagalangan na Asawan Laki so Asawa To

4. Anto so pamparaan na betang nen Jesus tan say betang na Kristianon asawan laki?

⁴ Tinuro na Dios so asawan laki bilang ulo na pamilya, singa met si Jesus ya Ulo na kongregasyon. Inkuan nen apostol Pablo: “Say asawan laki sikato so ulo na asawan bii, a singa si Kristo met sikato so ulo na iglesia, a sikaton dili so manangilaban ed laman. Asawan lalaki, aroen yo so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed sikato.” (Efe. 5:23, 25) Sirin, say impantrato nen Jesus ed papatumbok to et sakey ya uliran ed saray Kristianon lalaki no panon so nepeg dan pantrato ed asawa ra. Pantongtongan tayo pay pigaran paraan na impangusar nen Jesus ed autoridad ya inter na Dios ed sikato.

5. Panon ya inusar nen Jesus so autoridad to ed saray disipulo to?

⁵ Si Jesus et ‘mauyamo tan mapaabeba ed puso.’ (Mat. 11:29) Onaaksion met a tampol no nakaukolan. Agton balot pinaulyan iray responsabilidad to. (Mar. 6:34; Juan 2:14-17) Maaro ton binilin iray disipulo to, ya aminpiga ni ingen no nakaukolan. (Mat. 20:21-28; Mar. 9:33-37; Luc. 22:24-27) Balet, agto ra minelmelag odino pinabaingan, nisay impalikna ton agto ra inaro odino agda sarag a gawaen iray ibabangat to. Imbes, kinomendaan tan pinaseseg to ra. (Luc. 10:17-21) Agpankelawan a nala toy respeto na saray disipulo to, ta maaro tan mapangasi so panagtrato to ed sikara!

6. (a) Anto so naaralan na asawan laki ed panagtrato nen Jesus ed saray disipulo to? (b) Anto so impaseseg nen Pedro ed kaasawaan a lalaki?

⁶ Say ehemplo nen Jesus et mangibabangat ed kaasawaan a lalaki a pian naalig day inkaulo to, agda dodominaen ed maruksan paraan so kaasawaan da, noagta patnagan da ray respeto tan masakripisyon aro. Pinaseseg nen apostol Pedro iray asawan lalaki a mangalig ed maaron pidedeneng nen Jesus diad piamong da ed asawa ra tekep na ‘galang.’ (Basaen so 1 Pedro 3:7.) Panon sirin ya usaren na asawan laki so autoridad to tan kabansag na satan et tratoen toy asawa to bilang indibidual a makanepegan na galang?

7. Panon a napagalangan na asawan laki so asawa to? Iyilustra.

⁷ Say sakey a paraan a napagalangan na asawan laki so asawa to et diad pangikonsidera to  ed panmoria tan liknaan nen akulaw to sakbay a manggaway desisyon a mangapekta ed pamilya. Nayarin nipaakar itan ed iyalis ed arum a pasen o pansalat na trabaho o nipaakar ed inagew-agew a pamaakaran, alimbawa, no iner kasi pambakasyonan da odino no panon so panggaway pananguman ed badyet lapud iyiirap na bilay. Lapud naapektoan so pamilya, pakagunggonaan na asawan laki tan nipatnag toy aro no ikonsidera toy opinyon na asawa to, ta nayarin ontulong itan ed sikaton makagaway balanse tan mas maabig a desisyon. Diad ontan et mas mainomay ed asawan bii so onsuporta. (Uli. 15:22) No papagalangan na Kristianon asawan laki so asawa to, aliwa labat a say aro tan respeto na akulaw to so nagamoran to, noag pati say panangabobon nen Jehova, a mas importante.​—Efe. 5:28, 29.

No Panon a Nipatnag na Asawan Bii so Baleg a Respeto ed Asawa To

8. Akin et agnepeg ya aligen so alimbawa nen Eva?

⁸ No nipaakar ed panagpasakop ed autoridad, si Jesus so perpekton uliran na kaasawaan a bibii. Talagan duma so awawey to ed autoridad no ikompara ed samay impatnag na sankaunaan ya asawan bii! Si Eva et ag-akapangiter na maabig ya ehemplo ed saray asawan bibii. Walay apabtangan ya ulo to a pangiparalanan nen Jehova na saray instruksion. Ingen, ag-itan nirespeto nen Eva. Agto tinumbok so instruksion ya impasabi nen Adan ed sikato. (Gen. 2:16, 17; 3:3; 1 Cor. 11:3) Tua ya apalikdo si Eva, balet nepeg komon ya inkonsulta to ni ed masiken to no kasin panisiaan to imay boses a mankukunwarin ipapasabi toy “amta na Dios.” Ingen ta mapalakbat ton pinatulok so asawa to.​—Gen. 3:5, 6; 1 Tim. 2:14.

9. Anton ehemplo na inkamapasakop so impatnag nen Jesus?

⁹ Diad pidumaan, angiter si Jesus na perpekton uliran na panagpasakop ed Ulo to. Diad awawey tan impanbilay to, impatnag ton “agto ninonot so panamsam, salanti, pian sikatoy makapipara ed Dios.” Noag ingen “tinaynan toy amin a walad sikato tan nagmaliw a singa sakey ya aripen.” (Fil. 2:5-7, NW) Natan, bilang manuuley lan Ari, ontan nin siansia so awawey to. Sikatoy mapaabeban manpapasakop ed si Ama to diad amin a bengatla tan susuportaan toy inkaulo To.​—Mat. 20:23; Juan 5:30; 1 Cor. 15:28.

10. Panon so nayarin panuporta na asawan bii ed inkaulo na masiken to?

¹⁰ Maabig no aligen na Kristianon asawan bii si Jesus diad panuporta ed inkaulo na asawa to. (Basaen so 1 Pedro 2:21; 3:1, 2.) Nia so sakey a situasyon a nipatnag to itan. Manpapatanir so anak to a mibiang ed sakey ya aktibidad a mankaukolan na permisoy ateng. Lapud agni itan apantongtongan na sanasawa, matukoy ya oniay itepet na sayan ina, “Imbagam la ’ya ed si amam?” No agni itan ginawa na anak, nepeg ya itongtong itan na ina ed asawa to antis a mandesisyon. Siempre, paliisan met na sakey a Kristianon asawan bii a kontraen so asawa to odino kuestionen so opinyon to ed arapan na  ugugaw. No agmiabobon ed masiken to nipaakar ed sakey a bengatla, itongtong to itan no siksikara labat a dua.​—Efe. 6:4.

Say Alimbawa nen Jesus Parad Atateng

11. Anton ehemplo nen Jesus so nepeg ya aligen na atateng?

¹¹ Anggaman ag-angasawa o agnanilalak si Jesus, sikatoy alay abig ya uliran parad saray Kristianon ateng. Panon? Maaro tan maan-anos ton imbangat iray disipulo to diad salita tan gawa. Impanengneng to’d sikara no panon so panumpal ed kimey ya inter to. (Luc. 8:1) Diad impantrato tan awawey nen Jesus ed saray disipulo to, imbangat to no panon dan pidenengan so sakey tan sakey.​—Basaen so Juan 13:14-17.

12, 13. Anto so nepeg a gawaen na atateng pian napabaleg dan matakot ed Dios so ananak da?

¹² Kaslakan lan aaligen na ananak so atateng da, maabig man o mauges so nanenengneng da. Kanian sikayoran atateng, tepetan pay inkasikayo: ‘Anto kasi nanenengneng ed sikami na ananak mi no kasabi’d karakel na panaon ya uusaren mi’d panagbantay na TV tan panagligliwaan, ontan met diad panagaral na Biblia tan panagpulong? Anton talaga iray prayuridad na pamilya mi? Maabig kasi ipapanengneng min alimbawa diad pangiyuuna mi ed tuan panagdayew?’ Nepeg ya ipapuso nin mismo na atateng so ganggan na Dios, pian napabaleg dan matakot ed Dios so ananak da.​—Deu. 6:6.

¹³ No panggunaetan na atateng ya iyaplika iray prinsipyo na Biblia ed inagew-agew, seguradon naimano iya na ananak da. Mas walay belat na saray ibabaga tan ibabangat da. Balet no naimano na ananak a dumay gagawaen na atateng ed ibabangat da, nayarin isipen dan saray prinsipyo na Biblia et agtalaga importante odino praktikal. Bilang resulta, sano nidunget iray anak ed desdes na mundo, main-inomay iran onsuko.

14, 15. Antoray nepeg ya ipaslep na atateng ed ananak da, tan antoy sakey a paraan a nagawaan da iya?

¹⁴ Amta na saray Kristianon ateng ya aliwa labat a say pangitaryay materyal so nalalanor diad panamabaleg ed ananak. Kanian baleg a kakulangkulangan no bangatan so anak a mandampot na saray kalat a pakagunggonaan to labat ed materyal. (Ecl. 7:12) Say imbangat nen Jesus ed saray disipulo to et iyuna ray Panarian tan say inkatunong na satan. (Mat. 6:33) Kanian bilang panangalig ed Jesus, nepeg a pampelengan na saray Kristianon ateng ya ipaslep ed ananak da so pilalek a dampoten iray espiritual a kalat.

¹⁵ Say sakey a paraan pian nagawaan iya na atateng et diad pananap day pankanawnawa pian nakalimog na ananak da iray walad sigpot-panaon a serbisyo. Nonoten pay panamaseseg a nayarin nagamoran na saray tinedyer diad pilimog da ed saray payunir odino ed manangasikasoy sirkito tan say asawa to. Saray misionero, Bethelite, tan boluntaryo ed internasyonal a konstruksion et maligligsan makapangistorya nipaakar ed maliket a panaglingkor ed Jehova. Seguradon walaray mararakep  ya eksperiensyan ninabang na onia ran bisita. Say masakripisyon panaglingkor da et nayarin makatulong na baleg ed ananak yo pian makapanggaway makabat a desisyon, makapangiletneg na espiritual a kalat, tan makapampili na matukoy ya edukasyon a makatulong pian nasuportaan day pampayunir da.

Ananak, Antoy Ontulong ed Sikayon Natumbok so Ehemplo nen Jesus?

16. Panon ya impanengneng nen Jesus ya igagalang to ray ateng to diad dalin tan say mangatatawen ya Ama to?

¹⁶ Sikayoran ananak, angiter met si Jesus na alay abig ya alimbawa ed sikayo. Sikatoy nipudir ed panangasikaso nen Jose tan Maria, tan tinulok to ra. (Basaen so Lucas 2:51.) Anggaman ag-ira ayadyari, binidbir ton sikara so angimatalkay Dios na responsabilidad a mangasikaso ed sikato. Lapud satan, nepeg sirin ya igalang ira nen Jesus. (Deu. 5:16; Mat. 15:4) Sanen baleg la, lawas ginawa nen Jesus no antoy makapaliket ed mangatatawen ya Ama to. Kabaliksan na satan a labanan to iray tukso. (Mat. 4:1-10) Sikayoran kalangweran, nayarin no maminsan et natukso kayon ag-onuren iray ateng yo. Anto sirin so ontulong ed sikayon tumboken so ehemplo nen Jesus?

17, 18. (a) Anton klase na desdes so kipapaarapan na saray kalangweran diad eskuelaan? (b) Antoy nepeg a nodnonoten na saray kalangweran pian natulongan iran manresisti ed saray subok?

¹⁷ Nayarin maslak a kaeskuela yo et ngalngali, o talagan agda italtalek iray estandarte na Biblia. Ompan piliten da kayon mibiang ed kuestionablin aktibidad tan kankantiawan da kayo no agyo labay. Asali yo la kasi apangaranan lapud walaray gagawaen dan agyo pibibiangan? No ontan, antoy gawaen yo ey? Amta yon no pataktakot kayo, tan mibiang kayo’d gagawaen da, napaermen yoy atateng yo tan si Jehova. No tumboken yo ray kaeskuela yo, maabig kasi pansumpalan yo? Nayarin labay yoy magmaliw a payunir odino ministeryal a lingkor, manlingkor ed pasen a babaleg so pankaukolan, o man-Bethelite. Natulongan kayo kasin nadampot iratan no saray kaeskuela yoy pikaaroan yo?

¹⁸ Sikayoran kalangweran ed kongregasyon, asali yo ta lay niiyan ed situasyon ya asubok so pananisia yo? Antoy ginawa yo ey? Nonoten so uliran yo a si Jesus. Agto nampadaeg ed tukso tan mapekder ed no antoy amta ton duga. No nodnonoten yo iya, natulongan kayon manpakpel a mangibaga ed saray kaeskuela yo ya agyon talaga labay so mibabali ed gagawaen dan amta yon aliwa. Singa si Jesus, isentroy imano yo ed maliket ya ilalon napanlingkoran tan natulok si Jehova a legay bilay.​—Heb. 12:2.

Say Sekreto Pian Magmaliw a Maliket so Pamilya

19. Anton kurang so makapangipagamor na tuan liket?

¹⁹ Labay nen Jehova a Dios tan si Jesu-Kristo no antoy sankaabigan parad katooan. Anggaman agtayo ayadyari, napanggayagaan tayo nin siansia so bilay. (Isa. 48:17, 18; Mat. 5:3) Angibangat si Jesus na saray espiritual a katuaan a mangitarok na liket parad katooan, balet aliwa labat a satan so imbangat to’d saray disipulo to. Imbangat to met no antoy sankaabigan a paraan na pambilay. Nilikud ed satan, sikatoy angitilak na praktikal ya alimbawa na balansin kabibilay tan awawey. Amin tayo et nagunggonaan no aligen tayoy alimbawa to, antokaman so betang tayo ed pamilya. Kanian, sikayoran kaasawaan a lalaki tan bibii, atateng, tan ananak, tumbok yoy alimbawa nen Jesus! Say pangiyaplika ed bangabangat nen Jesus tan pangalig ed ehemplo to so peteg a sekreto pian magmaliw a makapnek tan maliket so pamilya.

Panon Mon Ebatan?

• Panon so nepeg a pangusar na kaasawaan a lalaki ed inter na Dios ya autoridad da?

• Panon a naalig na asawan bii so alimbawa nen Jesus?

• Antoy naaralan na atateng ed panagtrato nen Jesus ed saray disipulo to?

• Anto so naaralan na saray kalangweran ed ehemplo nen Jesus?

[Tepetepet Parad Panagaral]

[Litrato ed pahina 8]

Anto so gawaen na sakey a maaron asawan laki antis a manggawa na desisyon a mangapekta ed pamilya?

[Litrato ed pahina 9]

Diad anton situasyon nipanengneng na asawan bii so suporta ed inkaulo na asawa to?

[Litrato ed pahina 10]

Aaligen na ananak so maabig iran ugali na atateng da