Au Pamiri Kerititiano—Aru i te Akaraanga o Iesu!
Au Pamiri Kerititiano—Aru i te Akaraanga o Iesu!
“Kua vaoo oki [te Mesia] i te akaraanga na kotou, kia aru kotou i tona takainga vaevae.”—1 PETE. 2:21.
1. (a) Eaa te tuanga angaanga a te Tamaiti a te Atua i roto i te au mea ravarai tei angaia mai? (e) Mei teaa ra to Iesu manako no te tangata ravarai?
TE ANGA mai anga te Atua i te au rangi e te enua, tei te pae tana Tamaiti anau tai iaia “ei pu rave angaanga.” Kua angaanga taokotai katoa te Tamaiti a te Atua ki tona Metua, i to Iehova akapapa anga e te anga mai anga i te au manu e te au rakau tukeke o te enua, e te akateateamamao anga Aia i te Parataito te ka riro ei kainga no te au tangata tei angaia i roto i to Iehova tu, e tei aite mei tona uaorai tu. Ko te Tamaiti a te Atua, tei kiteaia i muri mai e ko Iesu, e inangaro maata tikai tona i te tangata ravarai. “Te au apinga tei akaperepereia e [ia] ra tei te tamariki ia a te tangata nei.”—Mase. 8:27-31, NW; Gene. 1:26, 27.
2. (a) Eaa ra ta Iehova i oronga mai no te tangata ara ravarai ei tauturu ia ratou? (e) Eaa ra tetai tuanga o te oraanga e oronga maira te Pipiria i te kaveinga?
2 I muri ake i te ara anga te nga tangata mua, kua riro te akaoraanga i te au tangata ara ei tuanga maata i roto i to Iehova akakoroanga. Kua oronga a Iehova i te atinga oko o Karaiti kia rauka taua akaoraanga ra. (Roma 5:8) Pera katoa, kua oronga a Iehova i tana Tuatua te Pipiria, tei oronga mai i te aratakianga ki te tangata kia puapingaia te oraanga noatu kua anauia mai i roto i te turanga ara. (Sala. 119:105) I roto i tana Tuatua, te oronga maira a Iehova i te kaveinga ei tauturu i te tangata kia akono tamou i te au pamiri matutu e te mataora. No runga i te akaipoipo, te akakite maira te puka o Genese e ka anoanoia te tangata kia ‘piri atu ki tana vaine; kia riro oki raua ei kopapa okotai.’—Gene. 2:24.
3. (a) Eaa ta Iesu i apii no runga i te akaipoipo? (e) Eaa ta tatou ka akamanako i roto i teia atikara?
3 I te tuatau o tana angaanga orometua i te enua nei, kua akaketaketa mai a Iesu e ko te akakoroanga o te akaipoipo koia oki kia vai tinamou ua. Kua apii mai aia i te au kaveinga, e me akonoia, ka tauturu te reira i te au mema pamiri kia kopae i te au tu e te angaanga te ka akakino i to ratou akaipoipo, me kore i te turanga mataora o to ratou pamiri. (Mata. 5:27-37; 7:12) Ka uriuri teia atikara e ka akapeea te au apiianga e te akaraanga ta Iesu i akanoo iaia i te enua nei, i te tauturu anga i te au tane akaipoipo, te au vaine akaipoipo, te au metua, e te tamariki, kia noo i tetai oraanga mataora e te merengo ua.
Te Tu me Akangateitei te Tane i Tana Vaine
4. Eaa te tu aiteite i rotopu i te tuanga angaanga a Iesu e ta te au tane Kerititiano?
4 Kua iki te Atua i te tane ei upoko no te pamiri, mei ia Iesu rai, ei Upoko no te putuputuanga. Kua akakite te apotetoro ko Paulo e: “Ko te tane oki te upoko o te vaine, mei te Mesia katoa ra te upoko ïa i te ekalesia; ko te ora oki aia no taua kopapa nona nei. E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko.” (Ephe. 5:23, 25) E tika rava e, te akanoo ra te tu i akono ei a Iesu i tana au pipi i te akaraanga no te mataara e anoanoia ra te au tane Kerititiano kia akono i ta ratou au vaine. Ka akamanako ana tatou i tetai au mataara i taangaanga ei a Iesu i tona mana, tei orongaia mai e te Atua.
5. Akapeea a Iesu i te taangaanga anga i tona mana ki rungao i tana au pipi?
5 E ‘tu maru e te ngakau akaaka’ to Iesu. (Mata. 11:29) Kua rave katoa aia i te au angaanga tei anoanoia aia kia rave. Kare roa aia i kopae ana i te rave i tana au apainga. (Mare. 6:34; Ioa. 2:14-17) Kua ako aia i tana au pipi ma te takinga meitaki, e e rave ua ana aia i te reira me anoanoia. (Mata. 20:21-28; Mare. 9:33-37; Luka 22:24-27) Noatu ra, kare a Iesu i akariri ana me kore i taakama ana ia ratou, e kare katoa aia i mata piko ana ia ratou me kore i akariro ana ia ratou ei au kamakura, kare e kite i te rave i tana e apii ra ia ratou. Mari ra, kua akapaapaa aia e kua akamaroiroi i tana au pipi. (Luka 10:17-21) No reira i akangateiteiia ai a Iesu e tana au pipi no tona tu takinga meitaki e te ngakau aroa ia ratou!
6. (a) Eaa ta te tane ka tamou mai mei te mataara i akono ei a Iesu i tana au pipi? (e) Eaa te akamaroiroianga ta Petero e oronga maira no te au tane?
6 Te apii maira te akaraanga o Iesu i te au tane e, me aru ratou i tona taoonga upoko kare rava ratou e takinga kino i ta ratou au vaine mari ra, ka akono ratou i ta ratou au vaine ma te akangateitei e te aroa akaatinga uaorai. Kua akamaroiroi te apotetoro ko Petero i te au tane kia aru i to Iesu au mataara takinga meitaki na te ‘noo anga’ e ta ratou au vaine, ma ‘te akangateitei anga ia ratou.’ (E tatau ia 1 Petero 3:7.) Ka akapeea i reira tetai tane i te taangaanga anga i tona mana tei orongaia mai e te Atua, e i taua taime rai kia akono i tana vaine mei tetai tei tau kia akangateiteiia?
7. Na roto i teea mataara e rauka ai i te tane i te akangateitei i tana vaine? Akatutu mai.
7 Tetai mataara e rauka ai i te tane i te akangateitei i tana vaine koia oki, na te akamanako meitaki anga i tona aerenga manako e tona au manako ngakau, i mua ake ka rave ei i te au ikianga te ka o mai te pamiri. Penei ka anoanoia kia rave i tetai ikianga no runga i te nekeanga ki tetai ngai ke, me kore te taui anga i te ngai angaanga, me kore no runga i te au mea o te au ra ravarai, mei te ngai ka aere ka orote, me kore ka akapeea me akaiti mai te akapouanga moni a te pamiri i te tuatau manamanata. No te mea ka o mai te pamiri, e mea puapinga e te takinga meitaki no te tane kia akamanako i te inangaro o tana vaine no te mea, na te reira e tauturu iaia kia rave i tetai ikianga tau meitaki, e ka mama ua i te vaine i te turuturu iaia. (Mase. 15:22) Ko te au tane Kerititiano tei akangateitei i ta ratou au vaine, ka rauka ia ratou, kare anake ua i te aroa e te akangateiteianga a ta ratou au vaine, mari ra ko tei puapinga roa atu koia oki, kia mareka mai a Iehova.—Ephe. 5:28, 29.
Te Tu me Akaari te Vaine i te Akangateitei Oonu no Tana Tane
8. Eaa ra te akaraanga o Eva i tau ei kia kopaeia?
8 I roto ia Iesu, e akaraanga tiama takiri ta te au vaine Kerititiano ka rauka mai no te kauraro anga ki te mana upoko. E tuke maata tikai tei kiteaia i rotopu i tona manako no runga i te mana upoko e te tu tei akaariia mai e te vaine mua! Kare a Eva i te akaraanga meitaki no te au vaine kia aru. E upoko akamanaia tona, ta Iehova e na roto mai ana i te akakite mai i tana tuatua. Kareka ra, kare a Eva i akangateitei ana i te mana upoko o tana tane. Kare aia i ariki ana i te tuatua ta Adamu i akakite kiaia. (Gene. 2:16, 17; 3:3; 1 Kori. 11:3) Noatu e tika e kua akavareia a Eva; tikaanga tikai ka tau aia kia tuatua atu ki tana tane e me ka tau rai aia kia irinaki i te reo e akakite ra kiaia e “kua kite oki te Atua.” Inara kua manako aia e e tikaanga tona i te akaaere i tana tane.—Gene. 3:5, 6; 1 Timo. 2:14.
9. Eaa te akaraanga no te tu kauraro ta Iesu i akanoo?
9 Ko Iesu ra i tetai tua, kua oronga mai aia i te akaraanga tiama takiri no te kauraro anga ki tona Upoko. Te akaari maira tona tu e te tu o tona oraanga e, “kare aia i manako e, e apinga āru kia aite katoa aia i te Atua ra.” Ko te tuke ra, “kua tuku ke atura ra aia i tona uaorai tu, e kua rave i to te tavini.” (Phili. 2:5-7) I teia tuatau, ei Ariki e tutara ra, te akono tamou ra rai a Iesu i taua tu ra. Te kauraro akaaka ra aia ki tona Metua i roto i te au apinga pouroa e te turuturu ra i Tona taoonga upoko.—Mata. 20:23; Ioa. 5:30; 1 Kori. 15:28.
10. Ka akapeea ra te vaine i te turuturu anga i te taoonga upoko o tana tane?
10 Te tau ra te vaine Kerititiano kia aru ia Iesu na te turuturu anga i te taoonga upoko o tana tane. (E tatau ia 1 Petero 2:21; 3:1, 2.) Ka akamanako ana i tetai turanga te ka rauka iaia tetai atianga kia rave i teia. Te pati maira tana tamaiti me ka akatikaia aia i te rave i tetai angaanga te ka inangaroia tetai tikaanga nona, mei tona nga metua. No te mea kare tona nga metua i uriuri ana i taua mea ra i mua ana, e mea tau kia ui te mama e, “Kua pati koe ki toou papa?” Me kare te tamaiti i rave ana i te reira, ka tau aia i te uriuri i taua mea ra ki tana tane, i mua ake ka rave ei i tetai ikianga. Tei maata atu, kare te vaine Kerititiano e tau kia patoi i tana tane me kore kia akaao atu i te manako o tana tane i mua i ta raua tamariki. Me kare aia e ariki i te tuatua a tana tane no runga i tetai apinga, ka tuatua ngaro ua atu aia ki tana tane.—Ephe. 6:4.
Te Akaraanga o Iesu no te Au Metua
11. Eaa te akaraanga ta Iesu i akanoo no te au metua?
11 Noatu e kare a Iesu i akaipoipo ana me kore kare ana tamariki, e akaraanga meitaki tikai aia no te au metua Kerititiano. Mei teaa ra te tu? Kua apii aia i tana au pipi ma te takinga meitaki e te akakoromaki, na roto i tana tuatua e tana akaraanga. Kua akaari aia e ka akapeea ratou me rave i te angaanga tana i akaue ia ratou kia rave. (Luka 8:1) Kua riro te mataara e te tu i akono ei a Iesu i tana au pipi, ei apii ia ratou e ka akapeea te akono anga i tetai e tetai.—E tatau ia Ioane 13:14-17.
12, 13. Eaa te umuumuia ra me te inangaro ra te au metua i te utuutu i te tamariki kia mataku i te Atua?
12 E aru ana te tamariki i te akaraanga a to ratou au metua, noatu te meitaki e te kino. No reira e te au metua, e ui kia kotou uaorai e: ‘Eaa ta te tamariki e kite maira no runga i te taime e akapou ra tatou ki runga i te tivi e te tamataora i tetai tua, e te apii Pipiria e te piri anga ki roto i te angaanga orometua i tetai tua? Eaa tikai te au mea puapinga maata ki to tatou pamiri? Te akanoo ra ainei tatou i te akaraanga meitaki na te akamou anga i to tatou oraanga e ta tatou au ikianga ki runga i te akamorianga mou?’ E na mua te au metua i te tuku i te ture a te Atua ki roto i to ratou uaorai ngakau, me ka inangaro ratou i ta ratou tamariki kia tupu mai ei au tamariki mataku i te Atua.—Deu. 6:6.
13 Me tauta te au metua i te akono i te au kaveinga Pipiria i roto i te au mea i te au ra ravarai, ka kite te tamariki i teia. Ka riro te au tuatua e te au apiianga a te au metua ei akakeu i ta ratou tamariki. Inara, me kite te tamariki e kare te au metua e aru ana i te turanga ta te au metua i akanoo no te tamariki, ka manako ratou e kare te au kaveinga Pipiria e puapinga roa ana, me kore kare e tau ana. Te ka tupu mai, penei kare e rauka i te tamariki i te patoi atu i te au taomianga o teianei ao.
14, 15. Eaa te au mea puapinga ka tau no te au metua kia akatupu i roto i ta ratou tamariki, e eaa tetai mataara ka rauka ia ratou i te rave i teia?
14 Te kite ra te au metua Kerititiano e e maata atu te o maira ki roto i te ngaki anga i te tamariki i te oronga ua anga i te au mea tei anoanoia i te pae materia. No reira, kare i te mea pakari kia apii i te tamaiti kia aruaru i te au akakoroanga te ka puapingaia aia i te pae materia ua. (Kohe. 7:12) Kua apii atu a Iesu i tana au pipi kia kimi i te patireia na mua e tana tuatua tika. (Mata. 6:33) No reira, i te aru anga ia Iesu, kia tauta te au metua Kerititiano i te akatupu i te inangaro i roto i ta ratou tamariki, kia akamaata atu i ta ratou angaanga i te tavini anga i te Atua.
15 Tetai mataara no te au metua no te rave i teia koia oki, na te kimi anga i te au atianga no ta ratou au tamariki kia piri atu ki te aronga i roto i te angaanga orometua tamou. E akamanako ana i te akamaroiroianga no te au mapu kia akamatau ia ratou ki te au painia me kore ki te akaaere kotinga e tana vaine. Ka rauka i te au mitinari e atoro mai ana, te aronga angaanga i roto i te Betela, e te aronga angaanga patu are i te pa enua i te tuatua oraora no runga i te au tu mataora ta ratou e kite ra i te tavini anga ia Iehova. Kare e ekoko anga e, e au tupuanga mataora ta taua au taeake ra ka akakite mai. Penei ka riro to ratou akaraanga no te tu akaatinga uaorai ei tauturu maata i taau tamariki kia rave i te ikianga pakari, kia akanoo i te au akakoroanga te piri atura ki ta ratou tavinianga i te Atua, e kia rauka mai te terenianga tei tau kia rauka ia ratou i te akono ia ratou uaorai i roto i te angaanga orometua tamou.
Tamariki—Eaa te ka Tauturu ia Kotou kia Aru i te Akaraanga o Iesu?
16. Akapeea a Iesu i te akangateitei anga i tona nga metua i te enua nei e tona Metua i te rangi?
16 E te au tamariki, te oronga katoa maira a Iesu i te akaraanga meitaki tikai no kotou. Kua orongaia a Iesu kia Iosepha raua ko Maria kia akono, e kua akarongo aia kia raua. (E tatau ia Luka 2:51.) Kua kite aia e, noatu to raua turanga apa ua, kua oronga te Atua i te apainga kia raua kia akono iaia. No te reira, e mea tau kia akangateitei a Iesu ia raua. (Deu. 5:16; Mata. 15:4) I tona pakari mai anga, e rave ua ana a Iesu i te au mea te akamareka ra i tona Metua i te rangi. Ko te aiteanga o te reira ka patoi aia i te au timataanga. (Mata. 4:1-10) Penei i tetai au taime ka timataia kotou te au mapu kia kore e akarongo ki to kotou au metua. No reira, eaa te mea te ka tauturu ia kotou kia aru i te akaraanga o Iesu?
17, 18. (a) Eaa te tu taomianga ta te au mapu e aro atura i te apii? (e) Na te akamaara anga i teaa e tauturu i te au mapu kia akakoromaki i te au timataanga?
17 Kare e kore, ko te maataanga o toou au oa i te apii e iti ua me kore kare o ratou akangateiteianga no te au turanga i roto i te Pipiria. Penei ka titau mai ratou ia koe kia piri atu ki roto i te au angaanga tarevake e ka tatiaeae mai ia koe me patoi atu koe. E kapiki ana toou au oa i te apii i te au ingoa akakino ki runga ia koe no te mea te patoi ra koe i te piri kia ratou i roto i tetai au angaanga? Me koia ia, e akapeea ana koe me ariu atu? Kua kite koe e me akatika koe ia koe uaorai kia tamatakuia mai e kia aru atu i taua aronga ra, ka akataitaia koe i toou nga metua e ia Iehova katoa. Eaa te ka tupu kia koe me aru koe i toou au oa i te apii? Penei kua akanoo koe i tetai au akakoroanga noou uaorai, mei te riro anga ei painia me kore ei orometua tauturu, te tavini anga i roto i tetai ngai te anoano maataia maira te au papuritia no te Patireia, me kore i te riro anga ei tangata angaanga i Betela. Ka rauka ainei te piri atu anga ki toou au oa i te apii ei tauturu ia koe kia taeria toou au akakoroanga?
18 Te kite ra ainei kotou te au mapu i roto i te putuputuanga Kerititiano ia kotou uaorai i roto i te au turanga e timataia maira to kotou akarongo? E akapeea ana kotou me ariu atu? E akamanako ana i to kotou akaraanga, ko Iesu. Kua patoi aia i te au timataanga, e kua vai ngaueue kore ua no tana i kite e ko te tika. Na te akamaaraara anga i teia, e tauturu i te oronga mai i te maroiroi, kia akakite taka meitaki ki to kotou au oa i te apii, e kare kotou e inangaro i te piri atu kia ratou i te rave anga i te au mea kua kite kotou e e mea tarevake. Mei ia Iesu rai, e akara tamou ua ki runga i te manakonakoanga no tetai oraanga i te tavini rekareka e te akarongo ia Iehova.—Ebe. 12:2.
Tumu Maata no te Oraanga Mataora o te Pamiri
19. Eaa te tu o te oraanga te ka apai mai i te mataora mou tikai?
19 Te inangaro maira te Atua ko Iehova e Iesu Karaiti i te mea meitaki roa atu no te tangata ravarai. Noatu to tatou tu apa ua nei, ka rauka ia tatou kia rekareka. (Isa. 48:17, 18; Mata. 5:3) Kua apii a Iesu i te au tuatua mou no runga i te Atua tei riro ei tumu no te turanga mataora o te tangata ravarai, inara kare ko te reira ua tana i apii atu ki tana au pipi. Kua apii katoa a Iesu i te mataara meitaki rava atu no te oraanga. Kapiti katoa atu ki tana i akakite, kua akaruke mai aia i tetai akaraanga meitaki no tetai oraanga e tetai tu tau. Noatu eaa ta tatou tuanga angaanga i roto i te pamiri, ka puapingaia tatou katoatoa mei te aru anga i tona akaraanga. No reira, te au tane, te au vaine, te au metua, e te au tamariki, e aru i te akaraanga o Iesu! Na te ariki anga i te au apiianga a Iesu e te aru anga i tana akaraanga, ko te tumu maata tikai ia no te rekareka i tetai oraanga pamiri merengo ua e te mataora.
Akapeea Koe me Pau?
• Akapeea te au tane i te taangaanga anga i to ratou mana upoko tei orongaia mai e te Atua?
• Akapeea te vaine i te aru anga i te akaraanga o Iesu?
• Eaa ta te au metua ka mou mai mei te mataara i akono ei a Iesu i tana au pipi?
• Eaa ta te au mapu ka mou mai mei te akaraanga o Iesu?
[Au Uianga Apii]
[Tutu i te kapi 8]
I mua ake i tetai ikianga e o maira te pamiri, eaa ta te tane takinga meitaki ka rave?
[Tutu i te kapi 9]
Eaa te turanga e oronga maira i tetai atianga no te vaine kia turuturu i te taoonga upoko o tana tane?
[Tutu i te kapi 10]
E aru ana te tamariki i te au tu meitaki o to ratou au metua