¿Lliw religionkunatachu Dios chaskinman?

KUNAN tiempopim achkallaña religionkuna kachkan mayqantapas runakuna akllakunankupaq. Enteron pachapim kan chunka isqonniyoq reqsisqa religionkuna, chaynataq chunka waranqa mana ancha reqsisqa religionkunapas. Chaymi tapukuchwan: “¿Allinchu kanman mayqan religionniyoq kaypas?”, nispa.

Wakin runakunam ninku: “Lliw religionkunaqa chaynallam kanku, chullalla Dios kaptinqa llapallankuchá Diosman pusawanchik”, nispa. Huk rimaypiqa nichkankum, achka ñankuna hinam religionkunaqa pusawanchik hina kaqllaman nispa.

¿Llapallan religionkunachu Diosman pusawanchik?

Qawasunchik llapallan yachachiqkunamantapas aswan allin yachachiq Jesucristo kaymanta ima nisqanta, paymi qatiqninkunaman kaynata nirqa: “Kichki punkuntayá yaykuychikqa”, nispa. ¿Imanasqam chaynata nirqa?, paymi nin: “Hatun punkunta hinaspa hatun ñannintaqa richkanku infiernomanmi [“wañuymanmi”, NM], chaynintaqa achkallañam richkanku. Kichki punkunta hinaspa kichki ñannintaqa richkanku wiñay kawsaymanmi, aschallam chaynintaqa richkanku”, nispa (Mateo 7:13, 14).

Kaywanqa Jesusqa nichkarqamá wakin religionkuna ‘wañuyman’ apasqanta. Ichaqa achka runakunam piensanku kay nisqanwan mana iñiq runakunamanta Jesus rimasqanta, piensankutaqmi kichki ñannintaqa llapan religionpi runakuna risqankuta. ¿Chaynatachu Jesus rimachkanman karqa?

 Qatiqninpi Jesuspa rimasqanmi yanapawanchik kaymanta allinta entiendenanchikpaq, paymi nirqa: “Cuidakuychik ‘Diosmantam willakuchkani’ niq llulla runakunamanta. Paykunaqa oveja hina rikchayniyoq hamuspapas sonqonkupiqa kachkan suwa atoqkuna hinam”, nispa (Mateo 7:15). Nirqataqmi: “Manam: ‘¡Señorlláy, Señorlláy!’ nispa llapallan niwaqniykunachu Diospa munaychakusqanmanqa yaykunqa aswanqa hanaq pachapi kaq Taytaypa munasqan ruraqllam”, nispa (Mateo 7:21). Qawasqanchikman hinaqa, Jesusqa nirqam ‘Diosmanta willakuqkuna’ nispa, paykunaqa nirqakutaqmi Jesucristo Señorninku kasqanta, hinaptinqa religionniyoq runakunamantamá Jesusqa rimachkarqa. Chaynaqa sutillatamá Jesusqa rimachkarqa llapallan religionkuna Diosman mana pusawasqanchikta.

¿Tariyta atichwanchu cheqap religionta?

Achkallaña religionkuna kasqanrayku hinaspa llapallanku Diosman mana pusawasqanchikrayku, ¿imaynatam cheqap religionta tarichwan? Huk rikchanachiywan kay tapukuyta kutichisun. Mana reqsisqayki llaqtapi chinkaruwaq, hinaspa pitapas tapukuwaq munasqayki sitioman imayna chayanaykipaq. Hinaptin punta kaq tapukusqayki runa nisunkiman, ichoq lawninta rinaykipaq, hukninñataq alliq lawninta rinaykipaq, hukñataq munasqayki lawninta rinaykipaq. Chaywanpas hinallachá pantasqa tarikuwaq, ¿aw? Ichaqa mapayoq runata tariruwaq, hinaptin qawachisunkiman mayninta rinaykipaq chaynataq chay mapatapas qoykusunkimanraq qawa-qawaykuspa rinaykipaq. Chayna yanapakuywanqa atiwaqmá munasqayki sitioman chayaytaqa.

Chaynallataqmi ñoqanchikpas cheqap religionta tarinapaqqa, necesitanchikmi “mapa” hina yanapakuyta. ¿Kapuwanchikchu chayna yanapakuy? Arí, chayqa Bibliam. “Bibliapi llapallan qellqasqa kaqkunaqa Diospa Espiritunpa qosqanmi, allinmi yachachiwananchikpaq, faltanchikkuna qawachiwananchikpaq, pantaypi puriptinchikpas allin ñanman kutirichiwananchikpaq hinaspa imaynam allin kawsakuy yachachiwananchikpaq” (2 Timoteo 3:16).

Arí, qampapas kanpaschá Bibliaykiqa, kunan tiempopiqa achkallañamá kachkan. Kay qellqata ruraq Jehová Diospa testigonkunaqa Traducción del Nuevo Mundo de las Santas Escrituras nisqa Bibliatam ruranku, kayqa achka idiomakunapim tikrasqa kachkan. Yaqapaschá mana Testigo kasqaykirayku munanki huk Bibliakuna qawayta chaynapi cheqap religionta tarinaykipaq. Kay yachachikuykunapi lliw textokunaqa horqosqam kachkan Chuya Qellqa Bibliamanta.

Leesqaykiman hinam kallpanchaykiku lliw yachasqaykikunata Bibliapa nisqanwan tupachinaykipaq. Ama qonqaychu Jesuspa kayna nisqanta, paymi nirqa: “Allin sachaqa allintam rurun, mana allin sacham ichaqa rurun mana allinllata. Allin sachaqa manam mana allintaqa rurunmanchu nitaqmi mana valeq sachapas rurunmanchu allin rurutaqa”, nispa (Mateo 7:17, 18). Chaynaqa, qawasunchikyá Bibliapa yachachisqanman hina ‘allin sacha’ imayna kasqanmanta.

[19 kaq paginapi suti rikuylla kaq willakuy]

Bibliaqa mapa hinam yanapawanchik cheqap religionta tarinapaq