Ukupepa kwa Cine Kulasambilisha Abantu Imibele Isuma

UKUPEPA kwa cine kulatufunda ukulatontonkanya pa fisuma kabili kulatulanga ifya kuwamya imibele yesu. Kulatwafwa ilyo tulelwisha ukukwata imibele isuma kabili kulenga twaba abantu abasuma. Twaishiba shani ukuti ifi fine twalanda e fyo ukupepa kwa cine kucita?

Umfweni ifyo umutumwa Paulo alembeele Abena Kristu ba kale abaleikala mu Korinti, ku Grisi. Muli uyu musumba abantu bali ne mibele iyabipa icine cine. Paulo abasokele ati: “Aba bulalelale, nangu abapepo tulubi, nangu bacende, nangu ababembuka na baume banabo, nangu bapupu, nangu ba lwinso, nangu abakolwo bwalwa, nangu ba nsele, nangu fipondo, tabakapyane ubufumu bwa kwa Lesa.” Alundilepo no kutila: “Kabili imwe bamo e fyo mwali; lelo mwalisambilwe, lelo mwalishishiwe, lelo mwalungamikilwe kwi shina lya kwa Shikulu Yesu Kristu na mu Mupashi wa kwa Lesa wesu.” (1 Abena Korinti 6:9-11) Ukupepa kwa cine, kwalyafwile abantu bamo abali ne mibele yabipa ukwaluka no kuba ababomfi ba kwa Lesa aba busaka!

Nomba umfweni na fimbi ifyo Baibolo isoka, itila: “Inshita ikesa ilyo abantu tabakalefwaya ukumfwa amafunde yacine cine. Lelo bakalakonkafye ifyo balefwaya abene. Bakaikolonganikila bakafundisha abengi abakubeba ifyo abene bafwaya ukumfwa.”—2 Timote 4:3.

Bushe ifi ilembo lyalanda e ficita imipepele mwaishiba? Bushe ilasambilisha imibele isuma iyo Baibolo yalandapo? Nelyo bushe yalisuula ifyo Baibolo isoka pa mibele yabipa ica kuti yeba abantu “ifyo abene bafwaya ukumfwa”?

Pa kumwafwa ukwishiba nga ca kuti imipepele imo ilatwala ifisabo fisuma, asukeni amepusho yakonkapo.

NATULANDE PA: Cupo.

IFYO BAIBOLO ISAMBILISHA: “Ukuupana kube ukwa mucinshi kuli bonse, no busanshi bwa cupo bube ubushakowela: pantu aba bulalelale na bacende Lesa akabakanda.”—AbaHebere 13:4.

ICIPUSHO: Bushe imipepele mwaishiba ilasambilisha abantu bapepamo ukuti umwaume no mwanakashi bafwile ukuupana ukulingana ne funde?

NATULANDE PA: Kulekana.

IFYO BAIBOLO ISAMBILISHA: Ilyo Yesu bamwipwishe nga ca kuti paliba umulandu uuli onse uwa kulekaninapo, atile: “Ndemweba, nati onse uwaleka umukashi wakwe no kuupa umbi, acito bucende, kano pa mulandu wa bulalelale; no waupa uwalekwa, acito bucende.”—Mateo 19:9.

ICIPUSHO: Bushe imipepele mwaishiba ilakonka ifyo Yesu alandile pa cupo kabili isuminisha fye umuntu ukulekana no mwina mwakwe no kuupana no muntu umbi nga ca kuti umo acita ubulalelale?

NATULANDE PA: Bulalelale.

IFYO BAIBOLO ISAMBILISHA: “Fulumuko bulalelale. Ulubembu lonse ulo umuntu acita lwa ku nse ya mubili; lelo uucito bulalelale abembukilo mubili wakwe wine.”—1 Abena Korinti 6:18.

“Abanakashi balecita ubupulumushi na banakashi banabo, ici tefyo cifwile ukuba. Abaume nabo balileka ukulala na banakashi, nomba baikatwa no lunkumbwa lubi ulwa baume banabo. Kanshi abaume balecita  ubupulumushi na baume banabo. Ici cintu camusebanya nganshi. Kanshi abene ebailetelela ukukandwa pa kulungana kwabo.”—Abena Roma 1:26, 27.

ICIPUSHO: Bushe imipepele mwaishiba isambilisha ukuti ukulungana kwa mwaume no mwanakashi nangu ukwa baume beka beka nelyo abanakashi beka beka lubembu?

NATULANDE PA: Kukonka ifyo Baibolo isambilisha ifyo aba mu mipepele bafwile ukulakonka.

IFYO BAIBOLO ISAMBILISHA: “Muletaluka ku muntu uwakuti aleti, ‘Ndi munyinenwe muli Kristu,’ lelo kabili ni cilende, nangu walunkumbwa lwa fyuma, nangu alapepa utulubi, nangu wamusaalula, nangu ni cakolwa, nangu ni mpupu. Umuntu wa musango uyo tecakwesha ukwikala nankwe nangu ukulya nankwe.” (1 Abena Korinti 5:11) Cinshi cilingile ukucitwa ku batila Bena Kristu nomba abashilapila ku membu bacita? Icebo ca kwa Lesa citila: “Fumyeni muli imwe bene imbifi iyo.”—1 Abena Korinti 5:13.

ICIPUSHO: Bushe imipepele mwaishiba ilatamfya umuntu wa kuti lyonse fye alakaana ukukonka ifyo Baibolo isosa?

[Amashiwi pe bula 6]

Kupepa nshi mwaishiba ukukonka imibele isuma iyo Baibolo ilandapo?