Skul We i Gud i Tijim Ol Man Long Ol Gudfala Fasin

SKUL we i gud i tijim yumi blong tingbaot ol gudfala samting, mo olsem wanem blong mekem ol fasin blong yumi oli kamgud moa. Skul olsem i givhan long yumi blong traehad blong mekem samting we i stret, mo i halpem yumi blong mekem bes blong yumi. ?Olsem wanem yumi save se skul we i gud i mekem ol samting ya?

Traem tingbaot tok we aposol Pol i raetem long faswan handred yia, long ol Kristin long taon ya Korin, long Gris. Long taem bifo, ol man oli save taon ya from ol rabis fasin blong hem. Pol i givim woning se: ‘Man we i stap ronem woman, man we i stap prea long ol narafala god, man we i stap slip wetem woman blong narafala man mo woman we i stap mekem i krangke wetem narafala man, mo man we i stap slip wetem man, mo woman we i stap slip wetem woman, man we i stap stil, man we i wantem plante samting tumas, man we i stap dring we i lusum  hed, man we i stap spolem nem blong narafala man, mo man we i stap mekem ol bisnes blong stilim mane, bambae oli no save go insaed samtaem long niufala wol ya we God i king long hem.’ Nao Pol i talem se: ‘Bifo, sam long yufala oli olsem nomo. Be naoia, long nem blong Jisas Kraes, Masta blong yumi, mo long paoa blong spirit blong God, God i mekem yufala i klin. Hem i mekem yufala i tabu, yufala i stret man long fes blong hem.’ (1 Korin 6:9-11) !Traem tingbaot! !Skul we i gud i givhan long ol man ya we fastaem oli mekem ol rabis fasin, blong oli kam ol man blong God we oli klin mo oli mekem i stret!

Be Baebol i tokbaot ol narafala man we oli defren olgeta, mo i givim woning agens long olgeta, i se: “I gat taem i stap kam, we ol man bambae oli no moa wantem harem ol trutok. Bambae oli save mekemhed, blong go lukaot plante narafala tija olbaot, we oli save talem wanem tok we olgeta oli wantem harem.”—2 Timoti 4:3.

?Olsem wanem long ol skul we yu yu save long olgeta? ?Oli mekem wanem fasin? ?Oli tijim ol man long ol fasin we Baebol i talem se oli gud mo ol fasin we oli nogud? ?No oli jenisim advaes long Tok blong God, blong talem ol tok ya nomo ‘we ol man oli wantem harem’?

Blong givhan long yu blong luksave sipos wan skul i stap karem gudfala frut, i gud yu tektaem blong ansa long ol kwestin we oli kam biaen.

LONG SAED BLONG: Mared.

?BAEBOL I TALEM WANEM?: “Mared i wan fasin we yufala evriwan i mas tinghae long hem. Yufala we i mared, yufala i mas lukaot gud long mared blong yufala, blong i stap klin gud oltaem. God bambae i jajem boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.”—Hibrus 13:4.

KWESTIN: ?Skul ya we mi stap skelem, i folem rul ya se ol man mo woman we oli memba blong hem, oli no mas stap tugeta nomo be oli mas mared folem loa?

LONG SAED BLONG: Divos.

?BAEBOL I TALEM WANEM?: Taem samfala oli askem kwestin long Jisas blong save wanem samting we i givim raet long man mo woman blong divos, Jisas i ansa se: “Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.”—Matiu 19:9.

KWESTIN: ?Skul ya we mi stap skelem, i obei long tok ya blong Jisas se i gat wan samting nomo i givim raet long man mo woman blong divos mo mared bakegen long narafala, hemia sipos wan long tufala i mekem i krangke long narawan?

LONG SAED BLONG: Klin fasin long saed blong seks.

?BAEBOL I TALEM WANEM?: “Bambae yufala i no moa mekem fasin nogud wetem woman. Ol narafala sin we man i stap mekem, oli no spolem bodi blong hem, be taem man i mekem nogud wetem woman, hem i spolem bodi blong hem.”—1 Korin 6:18.

“Ol woman, oli stap tanem stret fasin blong woman wetem man, nao oli stap mekem ol fasin we i no stret. Mo long sem fasin, ol man tu oli lego ol stret fasin blong man wetem woman, nao oli stap wantem tumas ol narafala man. Nao ol man oli stap mekem ol fasin ya wetem ol narafala man, we i blong sem nomo. From samting ya, oli stap kasem panis blong olgeta, we i stret nomo long ol fasin nogud ya we oli stap mekem.”—Rom 1:26, 27.

KWESTIN: ?Skul ya we mi stap skelem, i tijim ol man se i wan sin blong man mo woman i slip olbaot, mo i wan sin blong man i tekem man mo woman i tekem woman bakegen?

LONG SAED BLONG: No fraet blong mekem ol rul blong Baebol oli stanap strong insaed long skul.

?BAEBOL I TALEM WANEM?: ‘Yufala i no mas go joen wetem ol man ya we oli stap talem se oli brata blong yumi, be oli stap mekem ol fasin nogud wetem woman, no oli stap wantem tumas samting, no oli stap prea long ol narafala god. Sipos oli stap spolem nem blong narafala man, no oli stap dring we oli lusum hed, no oli stap stil, bambae yufala i no go joen wetem olgeta. Bambae yufala i no go sidaon wetem ol man olsem blong kakae wetem olgeta.’ (1 Korin 5:11) ?Skul i mas mekem wanem long man we i stap talem se hem i Kristin be i no tanem tingting blong hem from ol sin ya? Baebol i talem se: “Yufala i mas putumaot hem, blong hem i no moa save stap wetem yufala.”—1 Korin 5:13.

KWESTIN: ?Skul ya we mi stap skelem, i putumaot ol memba we oli brekem loa blong Baebol mo oli no tanem tingting blong olgeta?

[Tok blong makem poen long pej 4]

?Weswan skul nao we ol man oli savegud se i stap tijim man long ol gudfala fasin blong Baebol?