LAMALAM mi mürinnö a äiti ngenikich ifa usun sipwe ekieki woon minne mi limöch me ifa usun sipwe amürinnölo napanapach. A älisikich ach sipwe achocho le föri minne mi pwüng, a pwal älisikich le ämääraatä napanap mi mürinnö. Ifa usun sia silei pwe lamalam mi mürinnö a tufichin föri ekkeei mettoch?

Sipwe nengeni met ewe aposel Paul a makkeei ngeni chienan kewe chon Kraist lon Korint. Ena leeni a iteföülo ren föfför mi limengaw. Paul a öüröürer ren an apasa: “Chon föri föförün lisowu, ika chon angang ngeni anümwäl, ika chon lisowu ngeni mi pwüpwülü, ika chon amömö inisir, ika chon lisowufengen lefilen mwän me mwän ika fefin me fefin, ika chon solä, ika chon tipemong, ika chon ünüpuch, ika chon aitengaua aramas, ika chon achomau resap mwüni mwün Kot.” Mwirin, Paul a pwal apasa: “Iwe, ekoch me leimi ra föri ekei sokun föför me lom. Nge oua fen küna limöch seni ämi tipis, oua küna pin, oua küna pwüng fän iten ach Samol Jesus Kraist, pwal ren ewe Ngünün ach Kot.” (1 Korint 6:9-11, Paipel are Testamentin Lom me Testament Söfö) Ekieki mwo ewe lamalam mi mürinnö a fen älisi ekkoch mi limengaw manauer loom nge iei ra manaueni manau mi limöch me wiliti nöün Kot chon angang mi pwüng!

Nge sokko seni ena, ewe Paipel a öüröürakich pwe: “Ewe fansoun epwe wareto nupwen ekkewe aramas resap ausening ngeni ewe afanafan murinno, nge repwe chok fiti pwisin mochenin netiper o repwe achommongano nour ekkewe sense, ekkewe repwe erenir met ra mochen rong.”​—2 Timoti 4:3, Ewe Kapasen God.

Ekkewe lamalam ka sissilei, met meefier ren ekkeei mettoch? Ra apöchökküla än Paipel kapasen emmwen usun minne mi pwüng me mwääl? Are ra eingawalo ekkewe kapasen emmwen mi fataffatöch lon än Kot kapas ren ar repwe chök ereni aramas “met ra mochen rong”?

Ren om kopwe etittina ika eü lamalam mi uwaani uwa mi mürinnö, pwata kese awora fansoun le pölüweni ekkeei kapas eis fan?

ITELAP: Pwüpwülü.

MET EWE PAIPEL A WESEWESEN APASA: “Aramas meinisin repwe asamolu pupulu, o kiekin pupulu epwe limelimoch; pun Kot epwe apungu ekkewe mi lisou o ekkewe mi mocheisou.”​—Ipru 13:4, Testament Mi Fö Pwal Kol Fel.

KAPAS EIS: Ei lamalam a kütta seni eü me eü pean pwüpwülü an epwe wor nöür taropween pwüpwülü?

ITELAP: Mufesen.

MET EWE PAIPEL A WESEWESEN APASA: Ekkewe Farisi ra eisini Jises ika a wor och popun epwe wor mufesen. Iei met a pölüweni: “Are emön mwän epwe mwüü seni pwülüwan nge a pwal pwülüweni emön; iwe, i a tipisin lisowu, chiilon chök are neminewe e föri sokkun föfförün lisowu. Nge are emön mwän a pwülüweni emön fefin mi mwüü seni pwülüwan, ätewe a tipisin lisowu.”​—Mattu 19:9, Paipel: Än Kot Kapas Testament Söfö.

KAPAS EIS: Ei lamalam a süföliti än Jises ei kapasen emmwen me mutatä än pwüpwülü repwe mufesen me pwüpwülüsefäl ren ewe chök föfförün lisowu mwääl?

ITELAP: Föfför lefilen mwän me fefin.

MET EWE PAIPEL A WESEWESEN APASA: “Ousap fokun föri sokun föförün lisowu! Ekewe sokun tipis meinisin eman aramas a föri esap küü inisin, nge are eman aramas a föri föförün lisowu a tipis ngeni püsin inisin.”​—1 Korint 6:18, PT.

 “Ekkewe fefin ra siwili ekkewe fofor mi fich ngeni inisir ngeni ekkewe ese fich. O pwal usun chok ekkewe mwan, ra likitalo ekkewe fofor mi fich ngeni puluer, o ra pwisin kenirelo ren ar kewe mochenian fituk lefiler, mwan me mwan ra forfengenni minne ese fich, o ra angei won inisir ewe liwinin ingau mi fich ngeni ar fofor ese pung.”​—Rom 1:26, 27, TF.

KAPAS EIS: Ei lamalam a asukula pwe föfförün lisowu lefilen mwän me fefin esap iir pwüpwülü are lefilen mwän me mwän, fefin me fefin ina eü tipis?

ITELAP: Apöchökküla än Paipel kewe kapasen emmwen lein chon lon ewe lamalam ren pwora.

MET EWE PAIPEL A WESEWESEN APASA: “Ousap chiechi ngeni emon aramas mi iteni emon pwiich Souneng, nge i mi tipisin nisou are mochenia are pin ngeni anu-muan are emon mi chofona are emon mi unupuch are emon mi sona. Ousap fiti ei sokkun aramas ne mongo.” (1 Korint 5:11, KG) Met epwe fis ngeni chokkewe ra apasa pwe iir chon Kraist nge iir mi föri tipis nge rese aier? “Öüpwe atowu seni lefilemi ewe aramas mi föfföringaw.”​—1 Korint 5:13, PK.

KAPAS EIS: Ei lamalam mi atowu are tölüolo iten chokkewe mi föri tipis me leir nge rese aier me ra tunalo än Paipel kewe kapasen emmwen?

[Ekis Pworous lon pekin taropwe 6]

Menni lamalam ka küna pwe a kan apöchökküla ekkewe kapasen emmwen lon Paipel usun minne mi pwüng me minne mi ngaw?