Din Maber Jiwo Ji Mondo Obed gi Timbe Maler

DIN maber en din mapuonjowa kaka wanyalo bedo gi paro kuom gik mabeyo kendo timo lokruok e timbewa. Okonyowa e nyagruok gi timo gik mabeyo, kendo bedo joma beyo kaka nyalore. Wanyalo ng’eyo nade ni din maber timo kamano?

Ne ane gima jaote Paulo nondiko ne Jokristo mokwongo ma nodak Korintho e piny Grik. Dala machonno ne ong’ere ahinya kuom timbe mag anjawo. Paulo nochiwo siem kama: “Jochode, kata jolam nyiseche manono, kata jo ma terore, kata chwo ma terore gi chwo, kata jokuo, kata jogombo, kata jomer, kata joyenyo, kata jomecho, ok ginicham gikeni mag pinyruodh Nyasaye.” Kae to Paulo nomedo wacho niya: “Jo moko kuomu ne uchalo ka jogi, to nolwokou, nopwodhou, noketou kare e nying Ruoth Yesu, kuom Roho mar Nyasachwa.” (1 Jo Korintho 6:9-11) Donge ineno kaka din maber nokonyo jomoko ma timbegi chon ne richo, mi gibedo jo maler kendo joma ratiro matiyo ne Nyasaye!

Mopogore gi mano, Muma chiwo siem niya: “Ndalo biro ma ji ok noyie puonj mangima, to giniluw gombogi giwegi, kendo ginihind jopuonj mathoth nikech gin gi it ma sakni.”—2 Timotheo 4:3.

Dinde ming’eyo timo nade kuom wachni? Be gimakre chuth gi luwo chike mag Muma e okang’ mamalo? Koso gimbeko puonj mag Nyasaye manie Muma ka ginyiso ji mana gik ma ‘itgi masakni’ gombo winjo?

Mondo ing’e kabe din nyago olemo mabeyo, donge diber ka ikawo thuolo mondo idwok penjo maluwogi?

KUOM WACH: Kend.

GIMA MUMA PUONJO: “Kend mondo ji duto omi duong’, kendo kitanda kik dwany. Nikech Nyasaye nong’ad bura ni ndhegini kod jo terruok.”—Jo Hibrania 13:4.

PENJO: Be dinno chiko joge ni dichwo gi dhako modak kanyachiel onego obed gi barup kend kaluwore gi chik sirkal?

KUOM WACH: Ketho kend chuth.

GIMA MUMA PUONJO: Kane openje kabe nitie gima ne nyalo miyo dichwo gi dhako mokendore owere chuth, Yesu nodwoko niya: “Ng’ato ma oriembo chiege, mak mana kuom terruok, mi okendo machielo, oterore.”—Mathayo 19:9.

PENJO: Be dinno luwo gima Yesu nowacho ni joma okendore nyalo were chuth mi gidonj e kend machielo—to mana ka achiel kuomgi odonjo e terruok?

KUOM WACH: Terruok.

GIMA MUMA PUONJO: “Weuru terruok. Richo mamoko duto ma ng’ato timo gin oko mag ringruok; to ng’a ma terore oketho ringre owuon.”—1 Jo Korintho 6:18.

“Mondgi noloko tich ringregi obed mano ma ok nochuegi ni giti; kamano chwo bende, koweyo mon, notimo gombogi kendgi; chwo kod chwo, ne  gitimo timbe modwanyore, kendo ne giyudo giwegi gir tich mar kethruokgi monego giyudi.”—Jo Rumi 1:26, 27.

PENJO: Be dinno puonjo ni nindruok e kind joma ok okendore, kata terruok e kind dichwo gi dichwo kata dhako gi dhako en richo?

KUOM WACH: Jiwo jokanyo mondo obed gi chir kuom luwo chike manie Muma.

GIMA MUMA PUONJO: “Kik uwuothi kod ng’at miluongo ni owadu ka en ng’at ma terore, kata jagombo, kata ng’a ma lamo nyiseche manono, kata jayenyo, kata jamer, kata jamecho; kik uchiem ngang’ kod ng’at ma kama.” (1 Jo Korintho 5:11) En ang’o monego otimne jogo mawacho ni gin Jokristo to gitamore loko chunygi mondo giwe richogi? Wach Nyasaye wacho kama: “Un to goluru ng’at marachno e kindu.”—1 Jo Korintho 5:13.

PENJO: Be dinno golo oko jakanyo moro amora maok lok chunye kendo ketho chike mag Muma gi wang’ matek?

[Weche manie ite mar 6]

En din mane mong’ere kuom mako kendo rito chike mag Muma e okang’ mamalo?