Sakhaw Dik Chuan Nungchang Ṭha A Zirtîr
Sakhaw Dik Chuan Nungchang Ṭha A Zirtîr
SAKHAW dik chuan thil ṭha ngaihtuah dân min zirtîrin, nungchang ṭha neih chhoh dân min kawhhmuh a. Thil ṭha tih kan tumna kawngah min ṭanpuiin, kan tlin ang tâwka mi ṭha ni tûrin min ṭanpui bawk. Engtin nge sakhaw dik chuan chutiangin min ṭanpui a ni tih kan hriat theih?
Kum zabi khatnaa Grik ram, Korinth khuaa Kristiante hnêna tirhkoh Paula lehkha thawn hi lo chhinchhiah teh. Chu hmân lai khawpui chu nungchang bawlhhlawhna lama hriat hlawh tak a ni a. Paula chuan: “Inngaih hmangte emaw, milem betute emaw, uirête emaw, mi hurte emaw, mawngkawhurte emaw, rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang,” tiin a vaukhân a. “Nangni ṭhenkhat chutiang mi in nih ṭhin kha; nimahsela Lalpa Isua Krista hmingah leh kan Pathian thlarauvah tlenfai in ni tawh a, tihthianghlim in ni tawh a, thiam chang in ni tawh,” tiin a sawi belh a ni. (1 Korinth 6:9-11) Hei hi han ngaihtuah teh—sakhaw dik chuan tûn hmaa nungchang ṭha lo ṭhenkhatte pawh lo thianghlim a, Pathian chhiahhlawh dik tak lo ni tûrin a ṭanpui tih chu!
Chu mi nêna inkalh takin, Bible chuan: “Zirtîrna dik an ngaih peih loh hun a la thleng dâwn si; an bengte a zat avângin anmahni duhzâwng angin zirtîrtute an hnênah an khâwm zâwk ang,” tiin a vaukhân a ni.—2 Timothea 4:3.
He mi kawngah hian i sakhaw hriatte chu eng nge an an? Nungchang lama Bible tehnate chu an zâwm em? Nge ni a, mite hnênah ‘an beng tizatu’ thu hrilhin, Pathian Thu-a tehna chiang tak chu an pawlh dal zâwk?
Sakhua engemaw tak chuan rah ṭha a chhuah leh chhuah loh i hriat theih nân, engvângin nge a hnuaia zawhnate hi i ngaihtuah loh vang?
THUPUI: Inneihna.
BIBLE-IN A ZIRTIR CHU: “Mi zawng zawng zîngah inneih hi chawimawiin awm se la, khum pawh tihbawlhhlawh lovin awm rawh se; inngaite leh uirête chu Pathianin a ngaihtuah dâwn si a.”—Hebrai 13:4.
ZAWHNA He sakhua hian a mi leh sate zînga nupa anga khawsate chu sawrkâr dân ang thlapa innei tûrin a phût em?
THUPUI: Nupa inṭhenna.
BIBLE-IN A ZIRTIR CHU: Nupa inṭhen theihna tûr a awm leh awm loh an zawhin, Isua chuan: “Tupawh tlangvâl ngaih vâng ni lova, nupui maa mi dang nei apiang chu, a uirê a ni; mâk hnu nei apiang pawh a uirê a ni,” tiin a chhâng a ni.—Matthaia 19:9.
ZAWHNA: He sakhua hian Isua kaihhruaina chu zahin, nungchang bawlhhlawhna avâng chauhva nupa inṭhen leh mi dang neih leh chu a phal em?
THUPUI: Mipat hmeichhiatna lama thianghlimna.
BIBLE-IN A ZIRTIR CHU: “Inngaih hi tlânsan rawh u. Mihring thil tihsual tinrêng hi taksa pâwn lamah a ni; mi ngaih hmang erawh chuan ama taksa chungah thil a tisual a ni.”—1 Korinth 6:18.
“An hmeichhiate meuh pawhin an awm dân pianpui chu dân lo anga awm tûrin an intidanglam si a; mipate pawhin hmeichhe hman dân pângngai bânsana hurin an inît a, mipa leh mipa ṭha lo takin an inti a, an sual man hmuh tûr chu anmahniah an hmu a.”—Rom 1:26, 27.
ZAWHNA: He sakhua hian nupa ni si lova mipa leh hmeichhe inkâr emaw, mipatpui leh hmeichhiatpuite inkâr emawa mipat hmeichhiatna hman chu sual niin a zirtîr em?
THUPUI: A mi leh sate chunga huai taka Bible tehnate kenkawhna.
BIBLE-IN A ZIRTIR CHU: “Tupawh, unau hming pu siin, inngaih hmang mi emaw, mi duhâm emaw, milem be mi emaw, hauh hmang mi emaw, zu ruih hmang mi emaw, hlêpru mi emaw ni sela, pâwl lo tûrin in hnênah ka ziak a ni; mi chutiang hnênah chuan ei pawh ei lo tûrin.” (1 Korinth 5:11) Kristiana inchhâl chung sia, thil sual ti inlamlêt duh miah lote chu engtia tih tûr nge? Bible chuan: “Mi sual chu in zîng ata hnawt chhuak rawh u,” tiin min hrilh.—1 Korinth 5:13.
ZAWHNA: He sakhua hian inlam lêtna nei miah lova Bible tehnate hnâwltu a mi leh sa tupawh chu a pâwl aṭangin a hnawt chhuak em? (w09 8/1)
[Phêk 5-naa thu lâk chhuah]
Eng sakhuain nge nungchang lama Bible tehna sângte kenkawhna kawngah hriat hlawh?
