E RELIGION ku ta bon ta siña nos kon pa pensa riba kosnan ku ta bon i ta mustra nos kon pa mehorá nos kondukta. E ta yuda nos den e lucha pa hasi loke ta bon i ta yuda nos hasi nos máksimo esfuerso. Kon nos por sa ku e religion ku ta bon ta hasi tur e kosnan ei?

Tuma nota di loke apòstel Pablo a skirbi na kristiannan di promé siglo ku tabata biba na Korintio, Gresia. E hendenan di e stat di antigwedat ei tabata konosí pa nan estilo di bida inmoral. Apòstel Pablo a duna e spièrtamentu akí: “Hende inmoral, hende ku ta adorá diosnan falsu, ta kometé adulterio, ta praktiká homoseksualidat òf ta drumi ku un homoseksual, ta hòrta, ta golos pa kos, ta bebe fuma, ta kana zundra otro hende òf ta hasi kos di ladron, niun di nan lo no haña parti den reino di Dios.” Despues Pablo a agregá: “Ántes algun di boso tambe tabata asina. Ma den nòmber di Señor Hesukristu, pa medio di spiritu di nos Dios, boso a keda purifiká di piká, a keda dediká na Dios i el a aseptá boso komo hustu den su bista.” (1 Korintionan 6:9-11, BPK) Para ketu i pensa riba e punto akí: e religion ku ta bon a yuda algun hende ku anteriormente no tabatin normanan moral haltu bira sirbidónan limpi i rekto di Dios!

Na kontraste ku esei, Beibel ta spièrta ku “e tempu lo bin ku [hende] lo no soportá doktrina sano mas; ma al kontrario, pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende.”—2 Timoteo 4:3.

Kiko e religionnan ku abo konosé ta hasiendo den e aspekto akí? Nan ta sigui e normanan moral haltu di Beibel? Òf nan ta debilitá e konseho bon kla ku nos ta haña den e Palabra di Dios dor di bisa hende solamente “loke nan orea ku ta kishikí kier tende”?

Pa yuda bo determiná si un sierto religion ta produsí bon fruta òf nò, pakiko no tuma tempu pa kontestá e siguiente preguntanan?

LOKE BEIBEL TA SIÑA: “Laga matrimonio wòrdu onrá pa tur hende, i laga e kama matrimonial ta sin mancha; pasobra Dios lo husga fornikadónan i adúlteronan.”—Hebreonan 13:4.

PREGUNTA: E religion akí ta rekerí di su miembronan pa e parehanan ku ta biba huntu ta legalmente kasá?

LOKE BEIBEL TA SIÑA: Ora hende a puntra Hesus si tabatin un base pa pidi divorsio, el a kontestá: “Ken ku divorsiá su esposa, si no ta pa motibu di inmoralidat seksual, i kasa ku otro muhé, ta kometé adulterio.”—Mateo 19:9.

PREGUNTA: E religion akí ta respetá e mandato di Hesus i ta permití hende divorsiá i bolbe kasa solamente a base di inmoralidat seksual?

LOKE BEIBEL TA SIÑA: “Hui for di inmoralidat. Tur otro piká ku un hende kometé ta pafó di e kurpa, ma e hende inmoral ta peka kontra su mes kurpa.”—1 Korintionan 6:18.

“Asta e muhénan ta praktiká relashonnan seksual innatural na lugá di loke ta natural. Anto e hòmbernan tambe ta keda sin tene  relashon natural ku hende muhé i ta kima di pashon pa otro hòmber. Hòmber ta hasi kos bergonsoso ku otro hòmber i den nan mes kurpa nan lo haña e kastigu meresí pa nan pervershon.”—Romanonan 1:26, 27, BPK.

PREGUNTA: E religion akí ta siña ku inmoralidat seksual entre hòmber i muhé òf entre pareha di e mesun sekso ta piká?

LOKE BEIBEL TA SIÑA: ‘No asosiá ku ningun hende ku ta ruman pa nòmber, si e ta un hende inmoral, òf golos pa plaka, òf un adoradó di dios falsu, òf un blasfemadó, òf un buraché, òf un estafadó—ni kome mes huntu ku un hende asina.’ (1 Korintionan 5:11) Kiko mester hasi ku esnan ku ta bisa ku nan ta kristian pero ku ta pekadónan ku no ta repentí? E Palabra di Dios ta bisa: “Saka e hòmber malbado for di meimei di boso.”—1 Korintionan 5:13.

PREGUNTA: E religion akí ta kita nòmber di kualke persona for di nan lista di miembro si e persona akí violá normanan di Beibel i no ta repentí?