Diospa chaskisqan religionqa sumaqta kawsakunapaqmi yachachin

ARÍ, cheqap religionqa imayna piensayninchikpi hinaspa imayna kawsayninchikpipas yanapawananchikmi. Yanapawananchiktaqmi allin runa kanapaq hinaspa kallpanchawananchiktaq allin kaqkunata ruranapaqpas. ¿Cheqaptachu chaykunapi yanapawanchikman?

Chaypaqqa qawasun Corinto llaqtapi cristianokunaman apostol Pablopa qellqasqanta. Chay llaqtapi runakunaqa reqsisqam karqaku munasqankuman hina kawsasqankuwan. Chaymi Pablo nirqa: “¿Manachu yachankichik Diospa munaychakusqanmanqa mana allin ruraqkunaqa mana yaykunanta? Amayá pantaychikchu, Diospa munaychakusqanmanqa manam yaykunqachu huchapakuypi puriqkunapas, taytacha-mamacha adoraqkunapas, casado kachkaspa hukwan kakuqkunapas nitaq qarimasinwan kaqkunapas nitaq suwakunapas, qollqella kuyaqkunapas, sinkakuqkunapas, cuento qepikunapas nitaq engañakuqkunapas. Chaynamá karqankichik qamkunapas, ichaqa Diosmi mayllaykusurqankichik, [. . .] Señor Jesuspa sutinpim hinaspa Diosninchikpa Espiritunpa yanapakuyninwanmi mana huchayoqpaqña chaskisqa kachkankichik”, nispa (1 Corintios 6:9-11). Arí, cheqap religionqa chayna runakunatam yanaparqa vidankuta cambiaspanku tukuy sonqonkuwan Diosta servinankupaq.

Ichaqa, ¿imanasqataq kunan tiempopi runakunaqa mana chaynatachu cambianku? Bibliam willakurqaña: ‘Chayamunqam tiempokuna allin yachachikuykunata manaña chaskinankupaq, paykunaqa achkallaña yachachikuqkunata huñukuruspam munasqallankuta uyarinqaku’, nispa (2 Timoteo 4:3).

Hinaptinqa, ¿imatam rurachkanku reqsisqayki religionkuna? ¿Bibliapa yachachisqanman hinachu allin kawsakuyta yachachichkanku? Icha, ¿qepanchachkankuchu consejonkunata hinaspa runakunapa uyariy ‘munasqallankutachu’ yachachichkanku?

Cheqap religiontaqa reqsichwanmi, runakunaman imakuna yachachisqanta qawaspa. Qatiqnin yachachikuykunam yanapasunki chaykunamanta cuentata qokunaykipaq.

CASADO VIDAMANTA

¿IMA NINTAQ BIBLIA? Ninmi: “Casado vidaqa llapallanpa respetasqanyá kachun, respetasqataqyá kachun puñunankupas. Hukwan tupakuruqkunatawan huchapakuqkunataqa Diosmi juzganqa”, nispa (Hebreos 13:4).

TAPUKUY: ¿Reqsisqay religionqa saqenchu warmi-qari manaraq casarasqa kachkaspanku uywanakunankuta?

DIVORCIAKUYMANTA

¿IMA NINTAQ BIBLIA? Imaraykulla divorciakuymanta Jesusta tapuptinkum, nirqa: “Huk qariwan mana pierdekuchkaptin yanqamanta warminta wischuspan [otaq divorciakuspan] hukwan casarakuqqa hukwan pierdekuy huchapim kachkan”, nispa (Mateo 19:9).

TAPUKUY: ¿Reqsisqay religionpiqa Jesuspa nisqanman hina pierdekuy kaptillanchu divorciakunku?

WARMI-QARI PUÑUYMANTA

¿IMA NINTAQ BIBLIA? Ninmi: “Amamá huchapakunkichikchu [. . .], huchapakuqmi ichaqa kikinpa cuerponpa contranpi huchallikun”, nispa (1 Corintios 6:18).

Nintaqmi: “Warmikunapas qariwan manaña kaspa mana ruranakunataña ruranku.  Chaynallataqmi qarikunapas warmiwan manaña kaspa [. . .] qaripuraña munapayanakunku hinaspam penqaypaq mana ruranakunata kikinkupura ruranakunku, chaynapim kikinkupa cuerponpi castigota chaskispanku ñakarinku mana allin rurasqankumanta”, nispa (Romanos 1:26, 27).

TAPUKUY: ¿Reqsisqay religionqa yachachinchu warmi puralla otaq qari puralla huchapakuy, hinaspa mana casarasqa kaspa huchapakuypas Diospaq hucha kasqanta?

YACHACHKASPA HUCHALLIKUQMANTA

¿IMA NINTAQ BIBLIA? Ninmi: “Nirqaykichikqa ‘Wawqem kani’ otaq ‘Panim kani’ nispa huchapakuqkunawan, qollqella kuyaqkunawan, taytacha-mamacha adoraqkunawan, cuento qepikunawan, sinkakuqkunawan hinaspa suwakunawan mana hukllawanakunaykichikpaqmi. Chaykunawanqa amam kuskapas mikunkichikchu”, nispa (1 Corintios 5:11). ¿Ima nintaq Biblia mana wanakuspan hinalla huchallikuqmanta? Ninmi: “Qamkuna ukupi kaq chay mana allin runataqa wischuychikyá”, nispa (1 Corintios 5:13).

TAPUKUY: ¿Reqsisqay religionqa qarqonchu mana wanakuspan huchallikuqta?

[22 kaq paginapi suti rikuylla kaq willakuy]

¿Ima religiontaq reqsichikun Bibliapa yachachisqanta kasukusqanwan?