CHEQAQ religionqa yuyaykusqanchispi kawsayninchispi iman yanapawananchis. Kallpachawananchismi allin kaqta ruwanapaq allin runa kananchispaqpas. ¿Yanapawasunmanchu chaykunapi?

Chayta yachanapaq apóstol Pablo Corinto llaqtapi (Grecia) cristianokunaman carta qelqasqanta qhawarisun. Chay llaqtapi tiyaq runakunaqa millay kawsaqmi karanku. Chaymi apóstol Pablo cristianokunata niran: “¿Manachu yachankichis mana chanin runakunaqa Diospa qhapaqsuyunman mana haykunankuta? Ama pantaychischu. Qhelli huchapi puriqkunapas, ídolo yupaychaqkunapas, wasanchaqkunapas, warmiman tukuqkunapas, qharipura t’inkikuqkunapas, suwakunapas, payllapaq kananta munaqkunapas, machaqkunapas, yanqa tumpaqkunapas, ch’achukunapas, Diospa qhapaqsuyunmanqa manan haykunqakuchu”, nispa. Ichaqa kaytan nillarantaq: “Chay hinan qankunapas wakinniykichisqa karqankichis, chaywanpas ñan Señor Jesuspa sutinpi, Diosninchispa Espiritunpa atiyninpiwan huchamanta mayllisqaña, ch’uyanchasqaña, chaninchasqaña kankichis”, nispa (1 Corintios 6:9-11). Arí, chay tiempopi Jesuspa qallarichisqan religionqa, runakunatan yanapasqa allin runaman tukupunankupaq Diospa kamachikusqanman hina ch’uyata kawsanankupaqpas.

¿Imaraykutaq kunanpas mana llapa runakunachu allin runaman tukupunku? Chaymantan Biblian willaranña: “Hamuq tiempo chayamuqtinmi cheqaq yachachikuyta mana uyariytapas munanqakuñachu, aswanmi yanqa uyariyllata munaq kaspanku paykunaqa munayninkuman hina askha yachachiqkunata huñunqaku”, nispa (2 Timoteo 4:3).

¿Imatan yachachinku reqsisqayki religionkuna? ¿Bibliaq nisqanman hinachu yachachinku? ¿Icha Bibliaq nisqanta qhepanchaspachu runakunaq ‘munayninman hinalla’ yachachinku?

‘Allin rurukunata ruruq’ religionta tarinapaqqa runakunaman yachachisqankutan allinta qhawarinanchis. Chaypaq qan kikiyki t’aqwiriy kay parrafoq qatiqninpi yachaykunata.

¿IMANINMI BLIBLIA? “Casarakuytaqa lliwlla ancha allinpaq hap’ichunku, casarasqakunapas amataq wasanchanakuchunkuchu. Ichaqa qhelli huchapi puriqkunatan wasanchaqkunatawanmi Diosqa huchachanqa” ninmi (Hebreos 13:4).

TAPUKUY: ¿Hinallatachu kay religionpi qhawanku mana casarakuspa tiyaqkunata?

¿IMANINMI BIBLIA? Divorciakuymanta Jesusta tapuqtinkun, pay niran: “Pipas warminmanta ima hawallapas t’aqakunman [otaq divorciakunman] wak qhariwan mana wasanchashaqtin, hinaspa wak warmiwan casarakapunman chayqa, wasanchay huchatan ruwan”, nispa (Mateo 19:9).

TAPUKUY: ¿Atikunmanchu kay religionpi divorciakuspa hukmanta casarakuyta? ¿Wasanchay hucha kallaqtinchu chayta ruwanku?

¿IMANINMI BIBLIA? “Ima huchatapas huk runa ruwan chayqa, manan cuerpon contrachu ruwan, qhelli huchapi puriqmi ichaqa kikin cuerpon contra huchallikun” ninmi (1 Corintios 6:18).

Nillantaqmi: “Chay hinapin warmikunapas qharita manaña munarqankuchu, aswanpas warmipuran t’inkinakurqanku, hinallataq  qharikunapas warmita manaña munarqankuchu, aswanpas aychankuq munayninpi rawrarispan qharipura p’enqayta t’inkinakurqanku, hinaspan kikin cuerponkupi mana chanin p’enqay ruwasqankumanta ñak’ariyta chaskirqanku”, nispa (Romanos 1:26, 27).

TAPUKUY: ¿Yachachinkuchu kay religionpi warmipura otaq qharipura puñuy otaq manaraq casarakushaspa warmi qhari puñuypas hucha kasqanta?

¿IMANINMI BIBLIA? “Mayqenpas ‘Diospi iñiqmi kani’ nishaspa qhelli huchapi purishanman, otaq payllapaq kananta munaqpas kanman, ídolo yupaychaqpas kanman, millay k’amiqpas kanman, machaqpas kanman, suwapas kanman chayqa, ama chay hina runawanqa huñukuychischu, amapuni chay hina millaywanqa kuskapas mikhuychischu”, ninmi (1 Corintios 5:11). ¿Huchanmanta mana pesapakuq runamantari? “Chay huchallikuq runataqa qankuna ukhumanta qarqoychis”, ninmi (1 Corintios 5:13).

TAPUKUY: ¿Qarqonkuchu kay religionmanta Diospa contranpi huchallikuq runakunata?