E Aʻoaʻo e le Lotu Moni Tapulaa Maualuluga Tau Amio

E AʻOAʻO e le lotu moni i tatou ia manatunatu i mea e lelei, ma le auala e faaleleia ai a tatou amio. E fesoasoani i a tatou taumafaiga e fai le mea saʻo, ma atiaʻe ai uiga e sili ona lelei. E faapefea ona tatou iloa o le mea lenā e mafaia e le lotu moni?

Ia mātau upu a le aposetolo o Paulo i Kerisiano sa i Korinito i Eleni, i le uluaʻi senituri. Sa lauiloa lenā aai i amioga lē mamā. Na lapataʻi atu Paulo e faapea: “O ē e faia feusuaʻiga lē mamā, o ē e ifo i tupua, o ē e mulilulua, o alii talitane, o tane e momoe ma isi tane, o ē e gāoi, o ē e matapeʻapeʻa, o ē e onanā, o ē e taufaaleaga, ma ē e taufaavalea, e lē fai mo latou tofi le malo o le Atua.” Ona toe faapea atu lea o Paulo: “Sa faapea foʻi nisi o outou. A ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu Keriso ma le Agaga o lo tatou Atua.” (1 Korinito 6:9-11, The Holy Bible—New International Version) Ioe, ua fesoasoani le lotu moni i nisi sa ola muamua i ni olaga lē mamā, ina ia avea o ni auauna mamā ma amiosaʻo a le Atua!

Ae i le isi itu, ua lapataʻi mai le Tusi Paia: “E iai le taimi e latou te lē toe taliaina ai aʻoaʻoga aogā, ae e mulimuli e tusa ma o latou lava tuʻinanauga, e latou te aoaoina aʻoaʻo mo i latou ina ia faalogo o latou taliga i mea e logolelei iā i latou lava.”—2 Timoteo 4:3, Today’s English Version.

O le ā o loo faia e lotu o e iloaina e tusa ai ma lenei mea? Pe e latou te faatāuaina tapulaa maualuluga tau amio a le Tusi Paia? Po ua latou faanenefu fautuaga manino o loo i le Afioga a le Atua, i le taʻu atu i tagata e na o “mea e logolelei iā i latou”?

Ina ia fesoasoani iā te oe e iloa po o fua mai e se lotu ni fua lelei, aiseā e lē faaavanoa ai sou taimi e tali ai fesili nei?

MATAUPU: Faaipoipoga.

LE AʻOAʻOGA A LE TUSI PAIA: “Ia faamamaluina e tagata uma le faaipoipoga, ma ia tausia e le tane ma le avā le mamā o le faaipoipoga. Auā e taʻusalaina e le Atua i latou o ē e faia feusuaʻiga lē mamā.”—Eperu 13:4, New Century Version.

FESILI:Po o se faatulagaga a lea lotu le faaipoipoina faaletulafono o ulugalii o le ʻaulotu?

MATAUPU: Talagā Faaipoipoga.

LE AʻOAʻOGA A LE TUSI PAIA: Ina ua fesiligia pe e iai se faavae talafeagai e tatala ai le faaipoipoga, na fetalai Iesu e faapea: “Ai sē faateʻa i lana avā, ae e leʻi faia e ia se amio lē mamā, ma faaipoipo i se isi, ua mulilua ia.”—Mataio 19:9, New Catholic Edition of the Holy Bible.

FESILI:Pe e faatāua e lenei lotu le taʻiala a Iesu, ma e pau le māfuaaga e mafai ai ona tatala le faaipoipoga ma toe faaipoipo, ona ua faia e le paaga se amioga lē mamā?

MATAUPU: Feusuaʻiga Mamā Faaleituaiga.

LE AʻOAʻOGA A LE TUSI PAIA: “Ia sosola ese i feusuaʻiga lē mamā. O isi agasala uma e faia e le tagata, e lē o faia i lona lava tino, a o lē e faia feusuaʻiga lē mamā, ua agasala o ia i lona lava tino.”—1 Korinito 6:18, NIV.

“E oo lava i fafine, ua latou suia feusuaʻiga  e masani ai i feusuaʻiga e lē masani ai. E faapena foʻi tane, ua latou tuua tū e masani ai ma fafine, a ua mū i le tuʻinanau i isi tane. Ua fefaiaʻi tane iā i latou lava i amioga matagā, ma faasalaina ai i latou lava i mea sesē ua latou faia.”—Roma 1:26, 27, TEV.

FESILI: Po o aʻoaʻo e lenei lotu o le agasala le faia o feusuaʻiga lē mamā i le va o se tane ma se fafine, faapea foʻi i le va o tagata o le itupā e tasi?

MATAUPU: E lagolagoina ma le faamaoni e ona tagata tapulaa a le Tusi Paia.

LE AʻOAʻOGA A LE TUSI PAIA: “Aua neʻi outou faifaimea faatasi ma ē e fai mai e talitonu iā Keriso ae e faia feusuaʻiga lē mamā, pe e matapeʻapeʻa, pe e ifo i tupua, pe e upuleaga, pe e onā, pe e taufaavalea. Aua foʻi tou te aai faatasi ma tagata faapena.” (1 Korinito 5:11, NCV) O le ā e tatau ona fai i ē e faapea mai o Kerisiano, ae e faia le agasala e aunoa ma le salamō? Ua faapea mai le Afioga a le Atua, “Ia faateʻaese le tagata leaga mai iā te outou.”—1 Korinito 5:13, NIV.

FESILI: Pe e faateʻa ese e lenei lotu se tagata e teena ma le lē salamō tapulaa a le Tusi Paia?

[Faamatalaga faaopoopo i le itulau 6]

O lē fea lotu e lauiloa i le tausisia o tapulaa maualuluga tau amio a le Tusi Paia?