Din Maber Jiwo Ji Mondo Obed gi Hera e Kindgi kod Jomamoko

MUMA wacho kama: “Ng’a ma onge hera, pok ong’eyo Nyasaye, nikech Nyasaye en hera.” (1 Johana 4:8) Kuom mano, din maber onego ojiw ji obed gi hera e kind ng’ato gi nyawadgi.

Dinde mang’eny tiyo tije mabeyo kaka mag rito joma tuwo, joma oti, koda joma odhier. Gijiwo jokanyo maggi mondo oti gi puonj ma jaote Johana nondiko niya: “Ng’a man gi mwandu mag pinyni, kendo neno owadgi kochando gimoro, to chunye otho kode, hera mar Nyasaye osiko e iye nadi? Nyithinda, kik waher gi wach, kata gi lep;  to gi tich, kendo gi adiera.”—1 Johana 3:17, 18.

To nade sama ogendini kedo e lweny? Be onego wati gi chik Nyasaye mawacho ni ‘waher jowetewa kaka waherore wawegi’ mana e kinde mag kuwe kende, to wawe tiyo gi chikno e kinde ma jasiasa kata ruoth moro dwaro ni waked gi oganda moro?—Mathayo 22:39.

Yesu nowacho kama: “Ma eri e ma nomi ji duto ong’e ni un jopuonjrena, ka un uheroru ng’ato gi ng’ato.” (Johana 13:35) Sama idwoko penjo maluwogi, penjri kama, ‘Be jokanyo mag dinno nyiso hera ne dhano duto e kinde duto, to ok mana gi wechegi kende to bende gi timbegi?’

KUOM WACH: Lweny.

GIMA MUMA PUONJO: Yesu nochiko jopuonjrene kama: “Awachonu ni, heruru wasiku, kendo lamuru ni jo ma sandou.”—Mathayo 5:44.

Kane askeche obiro mako Yesu, jaote Petro nowuodho liganglane kodwaro kedo kik omak Yesu. Kata kamano, Yesu nowachone niya: “Dwok liganglani kare: nikech ji duto ma kawo ligangla notho tho ligangla.”—Mathayo 26:52.

Jaote Johana nondiko kama: “Nyithind Nyasaye kod nyithind Satan ng’ere kuom wachni: ng’a ma ok tim makare ok en mar Nyasaye, kata ng’a ma ok her owadgi; nikech ma e wach ma usewinjo nyaka a chakruok, ni waherre ng’ato gi ng’ato; to kik wabed kaka Kain, ma ne en mar Ng’a Marachno, kendo nonego owadgi.”—1 Johana 3:10-12.

PENJO: Be dinno jiwo jokanyo mondo oked e lweny?

KUOM WACH: Siasa.

GIMA MUMA PUONJO: Bang’ neno teko ma Yesu ne timo godo honini, jomoko ne dwaro ni odonj e weche siasa mag ogandano. Ne otimo ang’o? “Eka Yesu ka nong’eyo ni gidwaro biro kawe gi teko, gitime ruoth, notony modok e got kar kende.”—Johana 6:15.

Kane omak Yesu mi odonjne gi weche mag miriambo ni omiyo ji kwedo sirkal, ne odwoko kama: “Pinyruodha ok mar piny ka. Ka da pinyruodha en mar piny ka, da jotichna okedo, mondo kik oketa e lwet jo Yahudi; to koro pinyruodha ok en mar ka.”—Johana 18:36.

Kane okwayo Nyasaye e lamo nikech jopuonjrene, Yesu nowacho kama: “An asemiyogi wachni; kendo piny osesin kodgi,  nikech ok gin mag piny, kaka an ok an mar piny.”—Johana 17:14.

PENJO: Be dinno luwo ranyisi mar Yesu mar weyo donjo e weche mag siasa, kata mana ka timo kamano biro miyo josiasa moko osin gi jokanyo mag dinno?

KUOM WACH: Dewo wang’ ji.

GIMA MUMA PUONJO: Kane joma owuok e ogendini maok Jo-Yahudi obedo Jokristo, jaote Petro nowacho kama: “Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.”—Tich Joote 10:34, 35.

Kondiko ne Jokristo mokwongo, Jakobo nowacho kama: “Owetena, un muyie kuom Ruodh duong’, Ruodhwa Yesu Kristo, weuru dewo wang’ ji. Kamoro ng’ato man gi tere mar dhahabu, kendo orwakore gi law maber, nyalo donjo ka muchokoree, to jachan bende odonjoe man gi lewini mochido. Kudewo jalo morwakore gi law maber, kendo uwachone ni, ‘Bed ka maber ka,’ to uwacho ni jachan ni, ‘In, chung’ kacha, kata bed piny e dir tienda’; ok upogoru kendu koso, kendo udoko jong’ad bura ma parogi richo?”—Jakobo 2:1-4.

PENJO: Be dinno puonjo ni ji duto romre e wang’ Nyasaye, kendo jiwo jokanyo kik odew wang’ ng’ato nikech kit oganda mare, kata nikech en jamwandu kata jachan?

[Weche manie ite mar 7]

En din mane mapuonjo joge loyo gigo manyalo kelo pogruok e kind ji, kaka siasa, dewo oganda ng’ato, koda bedo ni ng’ato en jamwandu kata jachan?