Skul We i Gud i Tijim Ol Man Blong Respektem Tok Blong God

JISAS i pulum ol man blong respektem Tok blong God, Baebol. Yumi luksave samting ya long ansa we hem i givim taem Setan i traem hem. (Matiu 4:4-11) Setan i talem long hem blong jenisim ol ston oli kam bred. ?Jisas i talem wanem? Blong stanap strong agensem Setan, hem i yusum tok we tabu spirit i pulum Moses blong raetem long Dutronome 8:3. Setan i talem long Jisas se bambae hem i givim olgeta kingdom blong wol long hem blong i rul long olgeta, sipos Jisas i mekem wan samting nomo blong wosipim hem. ?Jisas i talem wanem? Hem i yusum tingting we i stap long Baebol  long Dutronome 6:13, blong agensem tok blong Setan.

!Tingbaot! Nating se Jisas i stret Pikinini blong God, be hem i dipen long tok blong Baebol blong tijim ol man, i no long ol prapa tok blong hem nomo. Mo neva hem i sakemaot Tok blong God blong folem ol kastom blong man. (Jon 7:16-18) Be plante lida blong skul long taem blong Jisas oli no respektem Tok blong God olsem Jisas. ?From wanem? From we oli luk ol kastom blong man olsem samting we i moa impoten i bitim Tabu Baebol. Jisas i no fraet blong talem stret long ol lida blong skul ya se: “Yufala i mekem tok ya blong God i nating nomo, blong bambae yufala i save holem kastom blong yufala. !Yufala i man blong giaman! Taem Profet Aesea bifo i talemaot tok we God i givim long hem, hem i makemgud yufala, long tok ya we God i talem se, ‘Ol man ya oli stap ona long mi long ol toktok blong olgeta nomo, be tingting blong olgeta i longwe tumas long mi. Oli stap mekem wosip long mi blong nating nomo, from we taem oli tijim ol man, oli talem se tok ya i blong mi, be i tingting blong man nomo.’”—Matiu 15:6-9.

Plante skul blong wol, hemia ol Kristin skul mo olgeta we oli no Kristin, oli stap talem se oli respektem Baebol. ?Be yu yu save hamas skul we oli sakemaot kastom blong man taem kastom ya i agensem ol klia tijing long Tok blong God? Bambae yumi tekem tufala eksampol ya.

LONG SAED BLONG: Ol spesel nem blong ol lida blong skul.

?BAEBOL I TALEM WANEM?: Jisas i tok agensem ol lida blong skul long taem blong hem, from we oli laekem ol spesel nem mo hae posisen. Hem i talem se oli laekem tumas “blong go sidaon long ples blong ol haeman. Mo insaed long ol haos blong prea, oli wantem go sidaon long ol nambawan ples. Mo long maket, oli wantem tumas blong ol man oli leftemap han long olgeta, mo blong oli singaot olgeta se ‘Tija.’” Be Jisas i talem long ol disaepol blong hem se: “Yufala, bambae yufala i no letem ol man oli singaot yufala se ‘Tija’, from we yufala i gat wan tija nomo, mo yufala evriwan i brata. Mo bambae yufala i no singaot wan man long wol ya se ‘Papa’, from we yufala i gat wan Papa nomo blong yufala, we hem i stap long heven.”—Matiu 23:1-10.

KWESTIN: ?Ol lida blong skul ya we mi stap skelem, oli laekem se ol man oli singaot olgeta long ol spesel nem, mo oli laekem blong gat hae posisen long taon no vilej? ?Oli obei long tok blong Jisas blong no wantem ol samting ya?

LONG SAED BLONG: Yusum ol aedol blong mekem wosip.

?BAEBOL I TALEM WANEM?: “Bambae yufala i no mas mekem pija blong ol samting long heven, no long wol, no long solwota we wol ya i stanap long hem, blong yufala i mekem wosip long hem. Bambae yufala i no mas bodaon long aedol olsem blong mekem wosip long hem.”—Eksodas 20:4, 5.

Aposol Jon i raetem tok ya i go long ol Kristin se: “Yufala i mas lukaot gud blong yufala i no go mekem wosip long ol giaman god.”—1 Jon 5:21.

KWESTIN: ?Skul ya we mi stap skelem, i obei long ol klia tok blong Baebol se man i no mas yusum ol pija mo aedol blong mekem wosip long God?

Yu Yu Save Faenem Stret Rod

Nating se tingting blong plante man i fasfas tede from fulap defdefren skul we oli save jusum, be yu  yu save faenem skul we i save lidim yu blong kasem laef. I gat plante fasin we oli makemaot skul we i ‘stap klin oltaem, we ol rabis fasin blong wol i no spolem hem.’ (Jemes 1:27) Olsem ol saen we oli save soemaot stret rod blong yu wokbaot long hem, ol vas we yu luk long ol haf ya oli save givhan long yu blong faenem gudfala skul ya.

I gud yu askem long ol Witnes blong Jeova blong oli eksplenem ansa blong ol kwestin long ol haf ya. Taem yu stap tingting long ansa blong olgeta, i gud yu folem eksampol blong ol man long taon blong Berea long faswan handred yia. Afta we oli lesin long ol tok we aposol Pol i talem, ‘oli ridimgud ol tok blong Baebol, blong faenemaot se ol tok blong Pol i tru no i no tru.’ (Ol Wok 17:11) Sipos yu yu olsem ol man Berea we oli respektem Tok blong God mo stadi gud long hem, bambae yu faenem skul ya we i save lidim yu blong kasem laef. Biaen, i stap long yu nao blong jusum sipos bambae yu folem skul ya no nogat.

[Tok makem poen pija long pej 8]

?Weswan skul nao i pulum ol man blong stadi Baebol blong jekem sipos tijing we oli stap kasem i rili tru?