Din Maber Jiwo Ji Mondo Ochiw Luor ne Wach Nyasaye

YESU nochiwo luor ne Wach Nyasaye, ma en Muma. Mano nenore maler kuom dwoko ma ne ochiwo kane Jachien teme. (Mathayo 4:4-11) Kuom ranyisi, Yesu ne otimo nade kane Satan teme ni mondo ochik kite odok kuon? Yesu nokwedo temno konwoyo weche ma ne Musa ondiko kotelne gi much Nyasaye, mwanyalo somo e Rapar mar Chik 8:3. To kane Jachien dwaro miyo Yesu loch e wi pinjeruodhi duto mag piny, mana kotimo tim achiel mar lame, Yesu ne odwoke nade? Ne otamore konwoyo puonj moro mayudore e Rapar mar Chik 6:13.

Par ane wachni! Kata obedo ni ne en Wuod Nyasaye, Yesu ne tiyo gi Muma kaka gima siro weche ma nopuonjo. Kendo ne ok oweyo luwo Wach Nyasaye ngang’ ni mondo oluw puonj koda chike mag dhano. (Johana 7:16-18) Kata kamano, thoth jopuonj din e kindego ne ok chiw luor ne Wach Nyasaye kaka Yesu ne timo. Nikech ang’o? Nikech ne giseweyo chike koda puonj mag dhano okaw kar Ndiko Maler. Yesu nowacho ne jotend din-go e yo ma ratiro kama: “Useketho chik Nyasaye nikech timu. Un jo ma gango wach, Isaya nowacho kare kuomu ni, ‘Ogandani paka gi dhogi, to chunygi bor koda. Gilama kayiem, ka gipuonjo chik dhano ka puonj mag Nyasaye!’”—Mathayo 15:6-9.

Thoth dinde mag Jokristo koda mago maok mag Jokristo, wacho ni giyie kuom  Muma. Kata kamano, gin dinde adi ming’eyo ma kwedo puonj koda chike mag dhano kapo ni puonjgo ok owinjore gi gima nie Wach Nyasaye? We wane ane ranyisi moko ariyo kende.

KUOM WACH: Nyinge mag telo miluongogo jotend din.

GIMA MUMA PUONJO: Yesu nokwedo jotend din ma kindene nikech ne gihero nyinge mag telo kendo ne gigombo bedo gi huma. Nowacho ni, jogo ne ohero “kuonde bet moyiedhi e chiemo, kod kombe manyien e sunagoke, gi mos e chirini, kendo mondo ji oluonggi Rabbi.” Kae to Yesu nowachone jopuonjrene kama: “Kik luongu ni Rabbi; nikech ng’at achiel e japuonju, to un duto un owete. Kik uluong ng’ato ni wuonu e piny ka; nikech ng’at achiel e Wuonu, manie polo.”—Mathayo 23:1-10.

PENJO: Be jotend dinno ohero ni mondo oluonggi gi nyinge mag telo ka gimanyo huma kuom ji, koso giwinjo wach ma Yesu nochiko ni wabed motang’ gi tim ma kamano?

KUOM WACH: Tiyo gi kido e lamo.

GIMA MUMA PUONJO: “Kik ilosni kido mopa moro, kata gi moro maket gi gimoro ma ni e polo malo, kata ma ni e piny mwalo, kata ma ni e pi tiend piny: kik ikulrinigi kata tiyonigi.”—Wuok 20:4, 5.

Jaote Johana nondiko ne Jokristo kama: “Ritreuru kuom nyiseche manono.”—1 Johana 5:21.

PENJO: Be dinno luwo chik mayudore maler ei Muma ma kwerowa tiyo gi kido e lamo Nyasaye?

Inyalo Nwang’o Yo Makare

Kata obedo ni nitie dinde mopogore opogore e kindegi ma puonjgi chocho ji, podi inyalo nwang’o mano mabiro teri e ngima. Nitie ranyisi mang’eny manyalo konyi fwenyo “lemo maler, kendo maonge mbala.” (Jakobo 1:27) Ndiko mowuo kuomgi e sulagi, nyalo tayi e yudo dinno.

Inyalo penjo Joneno mag Jehova mondo olerni dwoko mag penjo moket e sulagi. Kaka imedo nono gik ma giwacho, luw ranyisi maber mar Jo-Beria ma ne odak e kinde Jokristo mokwongo. Bang’ kane gisewinjo weche ma jaote Paulo ne lando, ne “ginono weche manie Ndiko pile, mondo gine ka wechego dibed kamano.” (Tich Joote 17:11) Kapo ni, mana kaka Jo-Beria, ichiwo luor ne Wach Nyasaye kendo itimo kinda mar puonjruok Muma, ibiro nwang’o yo materi e ngima. Kabe ibiro yiero wuotho e yorno, mano en yiero ma ibiro timo in iwuon.

[Weche manie ite mar 9]

En din mane majiwo ji mondo opuonjre Ndiko mondo gine kabe gik ma gipuonjore gin adier chuth?