Sakhaw Dik Chuan Pathian Thu Zahna A Awmtîr

ISUA chuan Pathian Thu, Bible zahna a awmtîr a. Chu chu Diabola thlêm laia a chhân lêt dânah a lang a ni. (Matthaia 4:4-11) Entîr nân, Setana’n lung chhanga chantîr tûra a tih khân, Isua chuan engtin nge a chhân lêt? Chu thlêmna chu thlarau thâwk khuma Mosia ziah Deuteronomy 8:3-a thute la chhâwngin a hnâwl a ni. Diabola’n Isua hnêna, ‘Vawikhat chibai min bûk la, khawvêl ram zawng zawng hi ka pe ang che,’ tih a tiam khân, Isua’n engtin nge a chhân lêt? Ani chuan Deuteronomy 6:13-a Pathian Thu-a thu bul chu la chhuakin a hnâwl a ni.

Han ngaihtuah teh! Pathian Fapa mah ni se,  Isua chuan a zirtîrnaah Bible chu thuneitu angin a hmang tlat a. Tin, mihringte thurochhiah avângin Pathian Thu a ngaihthah ngai lo bawk. (Johana 7:16-18) Mahse, Isua hun laia sakhaw hruaitu tam takte chuan Pathian Thu a zahna chu an ṭâwmpui ve lo. Engvâng nge? Pathian Lehkha Thu Thianghlim aia mihringte thurochhiah an ngaih pawimawh zâwk vâng a ni. Isua chuan chûng sakhaw hruaitute hnênah chuan heti hian tlang takin a sawi dawt a ni: “In thuro chhiah avângin Pathian thu chu in bawh bo ta a nih hi. Vervêkte u, Isaia hian in chungchâng thu a lo hril lâwk dik zet mai, ‘He miteho hian an kain min chawimawi a, an thinlung erawh chuan mi hlat si a. Engpawh ni sela, an zirtîrnaah mihring thupêk an zirtîr avângin an mi biak ṭhin hi a thlâwn mai a ni,’” tiin.—Matthaia 15:6-9.

Khawvêla sakhaw tam tak, Kristian leh Kristian lote pawhin Bible chu zah viau niin an inchhâl a. Amaherawhchu, Pathian Thua awm zirtîrna chiang tak nêna a inkalh huna mihringte thurochhiah paih bo ngam sakhaw eng zât nge i hriat? Entîrna pahnih chauh lo ngaihtuah ta ila.

THUPUI: Sakhaw lama nihnate.

BIBLE-IN A ZIRTIR CHU: Isua chuan a hun laia sakhaw hruaitute chu nihna an ngainatna leh challan an châkna avângin a dem a. Isua chuan chûng mite chuan “ruaiṭhehnaah hmun ṭha ber te, inkhâwmna inah ṭhutphah ṭha ber te, dâwr hmuna chibai bûk te, miten ‘Rabbi’ an tih te an ngaina,” tih a sawi a. A zirtîrte hnênah: “Nangni erawh chu ‘Rabbi’ tihin awm suh u; in zirtîrtu chu pakhat chauh a ni a, nangni zawng zawng chu unau in ni si a. Tin lei chungah hian tumah ‘Ka pa’ ti suh u; in Pa chu pakhat chauh a ni, vâna mi khi,” tiin a hrilh a ni.—Matthaia 23:1-10.

ZAWHNA: He ka sakhaw vawn lai hruaitute hian chawimawina nihnaa koh chu an duhin, tualchhûnga challan chu an duh em? Nge ni a, chutianga ti lo tûra Isua thupêk chu an zâwm zâwk?

THUPUI: Pathian biaknaa milem hman.

BIBLE-IN A ZIRTIR CHU: “Milem siam chawp leh thil, a anpui rêng rêng—chung lam vâna mi emaw, hnuai lam leia mi emaw, lei hnuai lama tuia mi emaw—i tân i siam tûr a ni lo: chûng chu chibai i bûk tûr a ni lo va, an rawng i bâwl tûr a ni hek lo.”—Exodus 20:4, 5.

Tirhkoh Johana chuan Kristiante hnênah: “Milem lakah inthiarfihlîm rawh u,” tiin a ziak.—1 Johana 5:21.

ZAWHNA: He sakhua hian Pathian biaknaa milemte leh milimte hmang lo tûra Bible thupêk chiang tak chu a zâwm em?

Sakhaw Dik Chu I Hmu Chhuak Thei

Tûn laiah hian, lû tihai thei khawpin sakhaw chi hrang tam mah se, nunnaa hruaitu sakhua chu i hmu chhuak thei a ni. “Pathian . . . mithmuha sakhaw biak dân thianghlim leh sual tel lo” hriat hran theih dân chu kawng tam tak a awm a. (Jakoba 1:27) Hêng  thuziaka Bible châng târ lante hi sakhaw dika hruai theitu che kawng kawhhmuhna a ni thei a ni.

Engvângin nge Jehova Thuhretute chu hêng thuziaka târ lan zawhnate hi i chhântîr loh vang? An chhân dânte ngun taka i ngaihtuah pahin, kum zabi khatnaa Beroia khuaa chêngte entawn tûr siam ṭha tak chu zui ang che. Anni chuan tirhkoh Paula thusawi an ngaihthlâk hnuah, Paula “thusawi chu a dik leh dik loh hriat nân ni tin Pathian Lehkhaah an zawng ṭhîn” a ni. (Tirhkohte 17:11) Beroia khuaa mite ang bawka Pathian Thu zahna i neih a, taima taka i zir chuan, nunnaa hruaitu sakhua chu i hmu chhuak ngei ang. Mahse, chu sakhua i vawn dâwn leh dâwn loh chu nangma duhthlannaah a innghat a ni. (w09 8/1)

[Phêk 8-naa thu lâk chhuah]

Eng sakhuain nge mite chu an thu hriatte a dik leh dik loh Pathian Lehkha Thu aṭanga fiah tûra fuih?