Tũudum hakɩkã neb waoogda Wẽnnaam Gomdã

A ZEZI ra waoogda Biiblã sẽn yaa Wẽnnaam Gomdã. A Sʋɩtãan sẽn da wa n mak-a t’a leok-a to-to wã wilgda rẽ vẽenega. (Matɩe 4:4-11) Wala makre, a Sʋɩtãan sẽn da wa n yeel a Zezi t’a kɩt tɩ kug lebg burã, a manesem yɩɩ wãna? A tõdgame, la a sõdg Wẽnnaam sẽn da vẽeneg a Moiiz t’a gʋls goam nins sẽn be Tõod 8:3 wã. La a Sʋɩtãan sẽn wa n yeel a Zezi, t’a wõgemd n waoog yẽ t’a kõ-a dũniyã soolem toɛy-toɛyã naam ne b ziirã fãa wã, a leokame tɩ bõe? A zãgsame, n sõdg noor sẽn be Tõod 6:13.

Yãmb we n tags n gese! Baa ne a Zezi sẽn yaa Wẽnnaam meng bi-riblã, a ra tikda Biiblã goam n zãmsd nebã Wẽnnaam daabã. La yaa vẽeneg me t’a pa tol n bas Wẽnnaam Gomdã sẽn yetã n zãms nebã ninsaalb minimd ye. (Zã 7:16-18) La a Zezi wakatẽ tũudmã taoor dãmb yaool n da pa waoogd Wẽnnaam Gomdã ye. Bõe yĩnga? Bala b ra zãmsda nebã ninsaalb minimdu, n getẽ tɩ rẽ yõod n yɩɩd Biiblã sẽn yetã. La a Zezi yeel-b-la vẽeneg woto: “Yãmb kɩtame tɩ Wẽnnaam goamã lebg zaalem, tɩ yãmb minungã reeg zĩiga. Zãmb dãmba, a Ezayi sɩd togsa bãngr-goam ne yãmb yell n yeele: ‘Nin-kãensã waoogda maam ne no-bɩmse, la b sũyã zãra ne maam. Bãmb sẽn waoogd maamã yaa zaalem, bala, bãmb zãmsda nebã ninsaalb tõod bala.’ ”—Matɩe 15:6-9, Kãab-paalgã Koe-noogo.

Yaa sɩd tɩ dũniyã tũudum dãmb wʋsg sẽn yet tɩ b tũuda Kiristã la tũudum dãmb a taab  yetame tɩ b waoogda Biiblã. La yãmb mii tũudum dãmb a wãn sẽn sɩd pa sakd n pʋgd ninsaalb minimd sẽn kɩɩsd Wẽnnaam Gomdã? Ges-y makr a yiib bala.

MAKRE: Waoogr yʋy nins b sẽn pʋt tũudmã taoor dãmbã wɛɛngẽ.

BIIBLÃ YETA WOTO: A Zezi ninga a wakatẽ tũudmã taoor dãmb taal b sẽn da nong naam-yʋy la waoogrã yĩnga. A yeelame tɩ b kẽer “baooda pipi zĩiga, rɩɩb rotẽ la pʋʋsg rotẽ. B nongame tɩ neb waoog-b kʋʋng sʋka, b nongame tɩ b bool-b tɩ karen-saamba.” Rẽ poore, a Zezi yeela a karen-biisã woto: “Yãmb da saag n bas tɩ b bool-y tɩ karen-saamb ye, tɩ yãmb karen-saamb ya a ye bala, la y fãa yaa ba-biisi. Da bool-y ned ba a ye tɩ y ba tẽng zugu, tɩ y ba ya a ye tãa la yaa Ba ninga sẽn be-b arzãna.”—Matɩe 23:1-10, Sebr Sõngo.

SOKRE: Tũudum kãng taoor dãmbã nonga naam yʋy la waoogr nin-buiidã sʋk bɩ, bɩ b sakda a Zezi sẽn yeel tɩ b ra maan dẽ wã?

MAKRE: Bõn-naandsã pʋʋsg wɛɛngẽ.

BIIBLÃ YETA WOTO: “Da mams bũmb baa a ye wẽneg n waoog-a ye: A ra yɩ yĩngri, saag zug bũmb ye, a ra yɩ tẽng zug ka bũmb ye, a ra yɩ koomẽ, mogrã pʋgẽ bũmb ye. Ra wõgemd bũmb sẽn dõog bɩ sẽn pees taoor ye, da waoog-a ye.”—Yikri 20:4, 5, Sebr Sõngo.

Tʋmd-tʋmd a Zã me ra gʋlsa kiris-nebã n yeel-b woto: “Mam kom-bõonego, gũus-y y mense n da pʋʋs bõn-naands ye.”—1 Zã 5:21.

SOKRE: Rẽ yĩnga tũudum kãng tũuda Biiblã sẽn yeel vẽeneg tɩ b ra tũnug ne bõn-naands la teed a taab n pʋʋs Wẽnnaamã bɩ?

Y tõe n bãnga so-sõngã n bake

Baa ne tũudmã sõor sẽn ka tɛkã, y tõe n bãnga sor ninga sẽn tar n debd vɩɩm zĩigẽ wã n bake. Yɛl toor-toor n be n tõe n sõng-y tɩ y bãng tũudum ning “sẽn yaa sõma sẽn ka tar yell tõnd Ba a Wẽnnaam nifẽ” wã. (Zak 1:27) Vɛrse nins d sẽn sõdg sõs-kãensã pʋsẽ wã yaa wa pano rãmb sẽn be sor noor n wilgd so-loaad a sore, n tõe n sõng-y tɩ y bãng tũudum hakɩkã.

Kos-y-yã a Zeova Kaset rãmbã tɩ b leok sogsg nins sẽn be sõs-kãensã pʋsẽ wã tɩ y kelge. Tags-y b leoorã zug neere, la y maan wa Beere nebã sẽn da maan bũmb ning pipi kiris-nebã wakatã. Nin-kãens sẽn kelg tʋm-tʋmd a Poll koe-moonegã poore, “bãmb baoo Gʋlsg Sõamyã pʋgẽ daar fãa tɩ bãng bũmb nins b sẽn yet bãmbã sã n yaa tɩrga.” (Tʋʋma 17:11) Y sã n waoogd Wẽnnaam Gomdã wa Beere nebã, n sak n na n maag y yĩng n bao n bãng a sẽn sɩd yet bũmb ningã, y na n yãa sor ninga sẽn tar n debd vɩɩm zĩigẽ wã. La y sã n yã-a me, y na sak n tũ-a wã bee ne yãmba.

[Foto, seb-neng a 9]

Tũudum bʋg n sagend nebã tɩ b zãms Biiblã n bãng b sẽn yet-b bũmb ninsã sã n yaa sɩda?