HESUS a promové rèspèt pa Beibel, e Palabra di Dios. Esaki ta bisto na e manera ku el a kontestá ora Diabel a tent’é. (Mateo 4:4-11) Por ehèmpel, kon Hesus a reakshoná ora Satanas a bis’é pa laga e piedranan bira pan? Hesus a rechasá e tentashon dor di sita Moisés su palabranan inspirá ku nos por lesa na Deuteronomio 8:3. Anto kiko Hesus a hasi ora ku Diabel a ofres’é dominio riba tur e reinonan di mundu a kambio di djis ún akto di adorashon? El a rechasá e oferta dor di referí na un prinsipio bíbliko ku nos por lesa na Deuteronomio 6:13.

Pensa riba lo siguiente: Ounke Hesus tabata Yu di Dios, el a dependé riba Beibel komo su outoridat ora e tabata siña hende. I siguramente nunka e no a ignorá e Palabra di Dios pa sigui tras di tradishon di hende. (Juan 7:16-18) Sinembargo, hopi lider religioso den tempu di Hesus no tabatin e mesun rèspèt ku e tabatin pa e Palabra di Dios. Dikon? Pasobra nan a konsiderá tradishon di hende mas importante ku e Skritura Santu. Hesus a bisa e hòmbernan religioso ei frankamente: “Asin’ei boso a kita tur outoridat for di palabra di Dios pa boso sigui boso tradishonnan. Hipókritanan, profeta Isaías a deskribí boso bon bon ora el a bisa: ‘E pueblo aki, Dios ta bisa, ta alabá mi ku nan boka so, ma den nan kurason nan ta leu fo’i mi. Nan adorashon no ta sirbi pa nada; nan doktrina no ta nada mas ku tradishon di hende.’”—Mateo 15:6-9, BPK.

 Hopi religion di e mundu akí, tantu kristian komo no-kristian, ta bisa ku nan ta respetá Beibel. Sinembargo, kuantu religion bo konosé ku ta rechasá tradishon di hende ora esakinan no ta kuadra ku siñansa kla for di e Palabra di Dios? Laga nos konsiderá djis dos ehèmpel.

LOKE BEIBEL TA SIÑA: Hesus a kondená e lidernan religioso di su tempu pasobra nan tabata stima títulonan di onor i tabata gusta prominensia. El a bisa ku e hòmbernan ei a gusta “e lugá di onor na bankete, i e mihó asientonan den snoa, i saludonan di rèspèt riba plasa, i pa hende yama nan rabi. ‘Ma boso no mester wòrdu yamá rabi, pasobra ta ún ta boso Maestro, i boso tur ta ruman. I no yama ningun hende riba tera boso tata, pasobra ta ún ta boso Tata, esun ku ta den shelu.’”—Mateo 23:1-10.

PREGUNTA: E lidernan di e religion akí ta gusta pa hende referí na nan ku título di onor i ta buska prominensia den komunidat, òf nan ta obedesé Hesus su mandato pa no hasi esei?

LOKE BEIBEL TA SIÑA: “No traha niun imágen di niun dios, den niun forma: ni di loke tin na shelu, ni di loke tin riba tera, ni di loke tin den awa bou di tera. No hinka rudia adorá nan.”—Éksodo 20:4, 5, BPK.

Apòstel Juan a skirbi kristiannan: “Warda boso di ídolonan.”—1 Juan 5:21.

PREGUNTA: E religion akí ta obedesé mandamentu kla di Beibel pa no usa imágen i ídolo den adorashon na Dios?

Apesar ku tin asina tantu religion awendia i ku esaki por konfundí bo, bo por haña esun ku ta hiba na bida. Tin hopi karakterístika ku ta identifiká “e religion puru i sin mancha den bista di nos Dios.” (Santiago 1:27) E tekstonan di Beibel ku nos a konsiderá ta manera bòrchinan di indikashon ku ta dirigí bo na e religion ei.

Lo ta bon pa bo pidi Testigunan di Yehova splika bo ki kontesta nan tin riba e preguntanan ku e artíkulonan akí ta hasi. Segun ku bo ta analisá loke nan ta bisa, sigui e bon ehèmpel di e personanan den e promé siglo ku a biba den e stat Berea. Despues di a tende loke apòstel Pablo tabata prediká, nan “tabata skudriñá Skritura diariamente pa mira si e kosnan ku Pablo tabata bisa tabata bèrdat.” (Echonan 17:11, BPK) Si abo tambe tin rèspèt pa e Palabra di Dios meskos ku e hendenan di Berea i ta studi’é diligentemente, lo bo haña e kaminda di bida òf e religion korekto. Pero, ta abo tin ku disidí si lo bo kana riba e kaminda ei.