A JESUS a millisiich er a omengull el kirel a Tekingel a Dios, el Biblia. Tia el tekoi a ulebeketakl er sera longer er a Diabelong er a lolasem el mengesuseu er ngii. (Matteus 4:4-11) El di ua tiang, ngmilekerang a Jesus er a longer er a Satan er a loldurech er ngii me lomult a bad el mo blauang? A Jesus a ultngeklii a Satan er a lolekoi a mlukreng el tekingel a Moses el sebeched el menguiu el ngar er a Duteronomi 8:3. Ngmilekerang a Jesus er a ledu er ngii a Diabelong el mo terrob e longull er ngii me lebsang a klisichel a dereder er a beluulechad? Ngultngeklii a Diabelong el uluusbech er a omellach er a Bades el sebeched el mesang er a Duteronomi 6:13.

Ka di molatk er tiang! A Jesus alta e ngmle Ngelekel a Dios engdi ngii a mle blechoel el ultuil er a Biblia sel lolisechakl. E mle blechoel el oltirakl a Tekingel a Dios e dimlak loltirakl a osisecheklir a rechad. (Johanes 7:16-18) Me nguaisei, engdi a rebetok el mengeteklel a klechelid a dimlak loltirakl er a Jesus el uleba omengull el kirel a Tekingel a Dios. E ngera me ngdiak? E le te ngilai a siukang er a rechad el mo er a uchei er a Chedaol el Llechukl. A Jesus a mle bleketakl el melekoi er tirka el mengeteklel a klechelid el kmo: “Iseikid e ko meruul a tikingel a Dios el mo diak a blkul, el tekoi er kemiu ra rechuodel el mei a uchul. Kemiul cheblad! A Jesaia ulemlaoch a ikang el kiriu, el tmaut er kemiu el kmo: ‘Ar chad er tial renged a mengull er ngak era di berdel a ngerir, e a rengrir a cheroid er ngak, te mla ngma llach rar chad me ngosisecheklir e olisechakl, me te mengull el meluluuch er ngak el diak a blkul.’”​—Matteus 15:6-9.

 Betok el klechelid el ngar er tia el beluulechad, el leko te Kristiano me a rediak, a melekoi el kmo te mengull er a Biblia. Engdi, ngtela er aika el klechelid a omodengei el kongei el chemoit a osisecheklir a rechad, a lsekum ngdiak loltirakl a osisechakl el debetik er a Tekingel a Dios, el Biblia? Ka momes aika el eru el olechotel.

TEKOI EL SOADEL: Chetengakl me a dui.

A OSISECHEKLEL A BIBLIA: A Jesus a mle mesisiich el omtok er a remengeteklel a klechelid el kmal mle sorir a chetengakl me a dui. Ngmillekoi el kirir el kmo ng “sorir a ngarbab el kingall ra mur ma ngarbab el kingall ra blil chongdibel, e sorir el muetkeu ra makit, ma lomekedong er tir ar chad el kmo rabbi. Ngdi kemiu lak mokedong el kmo rabbi, e a sensei er kemiu a di tang, e kemiu chodam el rokui. E dirrek el lak momekedong er techa er tial belulechad el kmo chedam, e a Demmiu a di tang, el ngikel ngara eanged.”​—Matteus 23:1-10.

KER: A remengeteklel tia el klechelid ngsorir el okedongall er aike el diirir e osiik a chetengall er a beluu, me a lechub e te oltirakl a omellach er a Jesus el mengeroid er tir er aika el tekoi?

TEKOI EL SOADEL: Omengull el bleob.

A OSISECHEKLEL A BIBLIA: “Ng diak moruul a bleob el chedum ma lechub okesiul a ngar a eanged, ma lechub e ng ngar a chutem, ma lechub e ng ngar a ralm er eungel a chutem. Ng diak mosus er a ngii di le bleob el chelid ma lechub e mongull el meluluuch er ngii.”​—Exodus 20:4, 5.

A apostol el Paulus a milluches el mo er a Rekristiano el kmo: “Mchiis er chomengull el meluluuch el bleob.”​—1 Korinth 10:14.

KER: Tia el klechelid ngoltirakl a llechul a Biblia el diak lousbech a bleob el chaus el kirel a omengull er tir el mo er a Dios?

Ngsebechem el Metik er a Melemalt el Rael

Alta e ngbetok a klechelid el ngar er ngii er a chelecha el taem, engdi kau a sebechem el metik er a melemalt el rael el mo er a klengar. Ngbetok a tekoi el sebechem el ousbech el mo dongchii a klechelid el “klikiid e diak a idek er ngii er medal a Dios.” (Jakobus 1:27) Aike el bades el dulsaod er a chelsel aika el suobel a sebechel el mekrolau el mo er tia el klechelid.

Moutekangel el omekedong er a Resioning er a Jehovah me bo losaod a nger er tir el kirel aika el ker el ngar er aika el suobel. E sel morriter aike el lolekoi, e moltirakl er a ungil el kerebai er a rechad er a Beroea er a kot el dart el rak, el “mlerriter a chedaol Llechukl ra bek el sils, el sorir el mo medengei el kmo ngiil tekoi nguaisei ngdiak,” er a uriul er a lerenges a osisecheklel a Paulus. (Rellir 17:11) Me a lsekum e ke ua rechad er a Beroea el mengull er a Tekingel a Dios e blak a rengum el mesuub er ngii, e ngsebechem el metik er a klechelid el sebechel el choitikikau el mo er a klengar. Me a omerollem a di mo ultuil er a tekoi el molilt el mo meruul.

[Blurb er a 9 el llel]

Ngera el klechelid a melisiich er a rechad el mo merriter er a Biblia el kmo a tekoi el losuub ngklemerang me a lechub e ngdiak?