Diospa chaskisqan religionqa Diospa Palabrantam respetan

JESUSQA Diospa Palabrantaqa respetarqam. Chaytam qawanchik Diablo tentaptin imayna nisqanpi (Mateo 4:4-11). Rumikunata tantayachinanpaq Satanas niptin, ¿imatam Jesus rurarqa? Payqa Deuteronomio 8:3, nisqanpi Moisesnintakama Diospa nisqanta rimaspanmi mana rurayta munarqachu. ¿Imatawanmi nirqa ‘kay pachapi llapallan nacionkunatam [. . .] qosqayki qonqorakuykuspa adorawaptikiqa’ nispa Satanas niptin? Deuteronomio 6:13, nisqanta rimaspanmi kaqllamanta Jesusqa mana kasurqachu.

Piensariy kaypi: Jesusqa Diospa churin kachkaspanpas manam piensasqanman hinachu kutichirqa, aswanmi Bibliapa nisqanman hina. Anchatam payqa Bibliata respetarqa, chaymi lliw kamachikuyninkunata kasukurqa runakunapa costumbrekunata kasukunanmantaqa (Juan 7:16-18). Ichaqa chay tiempopi judiokunaqa manam chaynachu karqaku. Paykunapaqqa costumbrenkum ancha respetanapaq karqa. Chaymi Jesus nirqa: “Diospa kamachikuyninta[m] yanqachankichik costumbrekichikkunallata ruraspaykichik. ¡Iskay uyakuna! Allintam Diosmanta willakuq Isaias qamkunamanta kaynata qellqarqa: ‘Simillanwanmi yupaychawan kay runakunaqa, ñoqamanta karupim kachkan sonqonkuqa. Paykunaqa adorawankupas yanqapaqmi, yachachisqankupas runapa kamachisqallanmi’”, nispa (Mateo 15:6-9).

Kunan tiempopi religionniyoq runakunapas yachankum Biblia respetana kasqanta. Ichaqa, ¿mayqan religionkunataq costumbrenkuta  saqenku Bibliapa yachachisqanwan mana tupaptin? Qawasunchikyá Bibliapa yachachikuyninwan mana tupaq iskay costumbrekunamanta.

REQSISQA KANAPAQ SUTICHAKUYMANTA

¿IMA NINTAQ BIBLIA? Jesuspa tiemponpim religioso runakuna munarqaku hatun sutikunawan reqsisqa kayta, chaymi paykunamanta nirqa: “Convidokunapipas hinaspa huñunakunanku wasipipas ñawpaqllapi tiyaytam munanku. Munankutaqmi plazakunapi hatun respetowan runakuna rimaykunantapas chaynataq ‘yachachikuq’ nispa ninankutapas”, nispa. Chaymi qatiqninkunata nirqa: “Qamkunayá ichaqa yachachikuqwanqa ama sutichachikuychikchu. Hukllam yachachiqnikichikqa kani, qamkunaqa wawqentillanmi kankichik. Amataqyá pitapas kay pachapiqa taytawanqa sutichaychikchu, hukllam Taytaykichikqa, payqariki hanaq pachapim kachkan”, nispa (Mateo 23:1-10).

TAPUKUY: ¿Reqsisqay religionpi punta apaqkuna, chay kamachikuyta kasukunkuchu, icha reqsisqa kayta munaspankuchu hatun sutikunawan reqsichikunku?

TAYTACHA-MAMACHA YUPAYCHAYMANTA

¿IMA NINTAQ BIBLIA? Ninmi: “Amam taytacha-mamachataqa rurankichu imaman rikchakuqtapas [. . .]. Amam qonqorakunkichu chaykunapa ñawpaqninpiqa, amataqmi adorankichu”, nispa (Exodo 20:4, 5).

Apostol Juanpas nirqataqmi: “Karunchakuychikyá taytacha-mamachakunamantaqa”, nispa (1 Juan 5:21).

TAPUKUY: ¿Reqsisqay religionqa kasukunchu taytacha-mamacha yupaychay mana allin kasqanta?

Diosman pusasuqniki religiontayá qatikuy

Yaqapaschá achkallaña religionkuna kasqanrayku pantasqa tarikunki. Chayna kaptinpas tariwaqmi Diosman pusasuqniki cheqap religiontaqa. Arí, Diospa chaskisqan cheqap religiontaqa sutillatam reqsichwan (Santiago 1:27). Kay yachachikuykunapi qawamusqanchik textokunaqa wakillanmi, kaykunam yanapawanchik cheqap religionmanta cuentata qokunapaq.

Hinaptinqa cheqap religionta maskaspaykiqa, ¿imanasqataq Jehová Diospa testigonkunata mana tapunkichu yachamusqanchik tapukuykunamanta astawan yachachisunaykipaq? Hinaspam Berea llaqtapi punta cristianokuna hina rurawaq. Paykunaqa manam apostol Pablopa willasqallanwanchu contentakurqaku, aswanmi “Bibliata estudiarqaku” Pablopa rimasqan cheqap kasqanta yachanankupaq (Hechos 17:11). Sichu qampas paykuna hina Bibliata respetanki chaynataq estudiankipas, hinaspaqa tarinkimá wiñay kawsayman apaq cheqap religionta. Hinaptinqa, ¿imatam ruranki? ¿Diosman pusasuqniki religiontachu qatikunki?

[25 kaq paginapi suti rikuylla kaq willakuy]

¿Ima religiontaq runakunata kallpanchan Bibliata estudiaspa cheqap kaqta yachanankupaq?