JESUSQA anchatan Bibliata respetaran. Chaytan rikuchiran Saqra tentashantin (Mateo 4:4-11). ¿Imatan Jesús ruwaran Satanás urmachiyta munaspa, kay rumikunata t’antaman tukuchiy, niqtin? Jesusqa mana kasuspan Deuteronomio 8:3 textopi nisqanwan kutichiran. ¿Ima nirantaq Jesús yupaychananrayku kay pachapi imaymana qhapaq kaykunata Satanás munachiqtin? Manan chaymanpas urmaranchu, aswanmi Deuteronomio 6:13 textoq nisqanman hina kutichiran.

Kaypi allinta yuyaykuy, Diospa Churinña kashaspapas Jesusqa manan yuyaykusqanman hinallachu imatapas kutichiran, aswanmi Bibliaq nisqanman hina kutichiq. Anchatan Bibliata respetaran chaymi Bibliaq nisqanman hina kawsaran manan runakunaq costumbrenman hinachu (Juan 7:16-18). Religionpi umalliqkunan ichaqa mana respetaqkuchu Diospa Siminta, aswanmi costumbrenkuman hina kawsay aswan importante karan. Chaymi Jesusqa mana manchakuspa niran: “Ñawpa runakunaq yachachisqanta ruwaspan Diospa kamachikuyninta p’akinkichis. ¡Iskay uyakuna! Allintamá qankunamanta profeta Isaiasqa nisqa: ‘Kay runakunaqa simillanwanmi yupaychawan, sonqonkutaq ichaqa ñoqamanta karupi kashan. Yanqanpaqmi yupaychawanku, yachachikuyninkupas runaq yachachikuynillanmi’”, nispa (Mateo 15:6-9).

Bibliataqa askha religionkunan respetowan qhawarinku. Ichaqa, ¿imaynatan qhawarinku  reqsisqayki religionkuna Bibliaq contranpi costumbrekunata? ¿Saqepunkuchu icha qatikushallankuchu? Chaypaq qhawarisun iskay costumbrekunamanta.

¿IMANINMI BIBLIA? Jesusqa huchacharanmi religionpi umalliq runakunata allin reqsisqa, allin qhawarisqa kayta munasqankurayku. Kaytan niran: “Hatun mikhuykunapin allinkaq tiyanakunapi tiyayta munanku, sinagogakunapipas kurak runakunaq tiyanankunapin tiyayta munanku, plazakunapipas runakunaq napaykunantan munanku, “Yachachiq” ninankutawan munanku. Qankuna ichaqa ama munaychischu ‘Yachachiq’ ninataqa, yachachiqniykichisqa ch’ullallan, qankunaqa llapaykichismi wawqellantin kankichis. Amataq pitapas kay pachapiqa ‘Yayay’ niychischu, Yayaykichisqa ch’ullallan, hanaq pachapi kaqllan”, nispa (Mateo 23:1-10).

TAPUKUY: ¿Kasukushankuchu kay religionpi umalliqkuna Jesuspa kamachikusqanta icha allin qhawarisqa kanankuraykuchu hatunchasqa sutikunata churakunku?

¿IMANINMI BIBLIA? “Aman ima idolotapas, ima rikch’aytapas ruwakunkichu, hanaq pachapi kaqman rikch’akuqtapas, kay pachapi kaqman rikch’akuqtapas, kay pachaq ukhun unupi kaqman rikch’akuqtapas. Aman chaykunaman k’umuykukunkichu, amallataq chaykunata yupaychankipaschu”, ninmi (Éxodo 20:4, 5).

Apóstol Juanpas nillarantaqmi: “Idolokunataqa amapuni yupaychaychischu”, nispa (1 Juan 5:21).

¿TAPUKUY?: ¿Kasukunkuchu kay religionpi chay kamachikuyta icha yupaychankuchu idolokunata?

Askha religionkuna kasqanwanpaschá mana mayqenman riyta atishankichu. Chaywanpas tariwaqmi kawsayman apaq cheqaq religionta. Ñawpaqta t’aqwirisqanchis textokunapin yacharanchis cheqaq religión imayna kasqanta. Arí, “Dios Yayaq sonqonman chayaq chanin mana ima qhelliyoq” religionqa kawsasqankupi yachachisqankupi iman reqsichikun (Santiago 1:27).

Cheqaq religionta maskhasqaykiman hina, kay revistapi tapuykunaman hina Jehová Diospa testigonkunata tapuriy. Chaymantataq ñawpa tiempopi Berea llaqtapi runakunaq ruwasqanta hina ruwawaq. Paykunaqa manan apóstol Pabloq willasqallanwanchu contentakuranku, aswanmi ‘hinapunichus kasqanta Diospa Simin Qelqakunapi sapa p’unchay t’aqwiranku’ (Hechos 17:11). Sichus qanpas paykuna hina Bibliata respetanki allintapunitaq t’aqwirinki chayqa tarinkin wiñay kawsayman apaq cheqaq religionta. Chayqa qanmantañan kanqa.