Abantu Abafuuka Balicindama Kuli Yehova
Palameni Kuli Lesa
Abantu Abafuuka Balicindama Kuli Yehova
ABANTU abatunguluka muli cino calo baliba sana ne cilumba, ubufuba, no kufwaya ukulumbuka. Lelo bushe iyi mibele ilatulenga ukupalama kuli Yehova Lesa? Awe nakalya. Yehova afwaya abamupepa ukuba abafuuka. Kuti twashininkisha ici nga twabelenga ilyashi lyaba mu Impendwa icipandwa 12, ilyacitikile mu matololo ya Sinai, ilyo abena Israele balubwike mu Egupti.
Miriamu na Aarone, abakalamba ba kwa Mose, “batendeke ukulanda ifibi” pa mwaice wabo. (Icikomo 1) Mu nshita ya kulanda na Mose, batendeke ukulanda ifibi pali ena, bafwile batendeke ukuilishanya mu nkambi. Miriamu, uo batendekelapo ukulumbula, afwile e wali na pa ntanshi ukuilishanya. Ica kubalilapo ico baleilishanyapo ca kuti Mose aupile umwanakashi umwina Kushi. Bushe bufuba bwalengele ukuti Miriamu aleilishanya ukutontonkanya ukuti abantu tabakalemubikako amano, lelo bakalabika amano kuli uyu mwanakashi umbi fye uushali no mwina Israele?
Kwali na fimbi ifyalengele ukuti baleilishanya. Miriamu na Aarone baikalile fye ukusosa ukuti: “Bushe ni muli Mose fye e mo Yehova alandila? Bushe talandila na muli ifwe?” (Icikomo 2) Bushe icikalamba icalengele ukuilishanya mulandu wa kuti balefwaya ukukwata amaka no kulumbuka?
Ilyashi lilangilila ukuti Mose talandilepo nangu cimo pali filya balelanda ifibi pali ena. Cimoneka ukuti alitekenye kabili alishipikishe. Apo ali fye uwatekanya, bushininkisho bwa fyo Baibolo imulondolola ukuti ali “uwafuukisha pa bantu bonse” abali pano isonde. * (Icikomo 3) Mose talekabila no kulalondolwela abantu umulandu Yehova alemubomfesha. Yehova alekutika kabili alimulandileko.
Filya Miriamu na Aarone balelanda ifibi pali Mose, Yehova alemona ukuti ni ena balelandapo. Pantu na kuba, e wasontele Mose. Pa kukalipila aba babili, Lesa abacinkwileko ukuti ali na bucibusa bwaibela na Mose. Atile: “Nanda nankwe mu kulungatika.” Yehova lyena aipwishe Miriamu na Aarone ukuti: “Nga kanshi cinshi mushatiinine ukulanda ifibi pali . . . Mose?” (Icikomo 8) Apo balelanda ifibi pali Mose, ninshi uo balelandapo ni Lesa. Pa mulandu wa kukanakwata umucinshi, Lesa ali no kubakanda.
Miriamu, napamo uwali pa ntanshi ukulanda ifyabipa pali Mose, alilwele ifibashi. Apo pene Aarone alombele Mose ukuti apapaatileko Miriamu. Tontonkanyeni pali ici cintu—Miriamu ali no kupola fye nga ca kutila ulya wine muntu uo balelandapo ifibi amupapaatilako! Mose mu bufuuke alicitile filya fine bamulombele. Muli ili lyashi, uyu e muku wa kubalilapo uo Mose alandile, kabili apapaatileko nkashi yakwe kuli Yehova. Miriamu alipolele, lelo alingile ukwikala eka pa nshiku 7, ne ci calengele aseebane.
Ili lyashi liletulanga imibele iyo Yehova atemwa ne misango iyo apata. Nga tulefwaya ukupalama kuli Lesa, tufwile ukwesha na maka ukuleka imibele yonse iisanshamo icilumba, ubufuba, no kufwaya ukulumbuka. Abafuuka e bo Yehova atemwa. Alaya ukuti: “Abafuuka e bakekala mu calo, kabili bakasekelela nga nshi pantu umutende ukafula.”—Amalumbo 37:11; Yakobo 4:6.
[Futunoti]
^ para. 7 Ukufuuka mibele iilenga umuntu ukuba fye uwatekanya no kushipikisha ilyo bamufyenga kabili ukwabula ukufwaya ukulandula.