Tsi Obɛŋkɛ Nyɔŋmɔ

Mɛi ni He Jɔ lɛ Ajara Wa yɛ Yehowa Hiɛ

4 Mose 12:1-15

HENƆWOMƆ, awuŋayeli, hegbɛ taomɔ. Sui nɛɛ ji sui ni anaa yɛ mɛi ni abuɔ amɛ akɛ amɛye omanye yɛ je nɛɛ mli lɛ ahe. Shi ani sui nɛɛ haa wɔtsiɔ wɔbɛŋkɛɔ Yehowa Nyɔŋmɔ kpaakpa? Dabi, nɔ ni tamɔɔɔ nakai lɛ, yɛ Yehowa hiɛ lɛ, ejálɔi ni he jɔ lɛ ajara wa. Wɔnaa enɛ faŋŋ yɛ amaniɛbɔɔ ni yɔɔ Mose Wolo ni Ji Ejwɛ lɛ yitso 12 lɛ mli. Amaniɛbɔɔ lɛ kɔɔ sane ko ni ba yɛ Sinai ŋa lɛ nɔ, beni akpɔ̃ Israelbii lɛ kɛjɛ Mizraim lɛ sɛɛ lɛ he.

Miriam kɛ Aaron ‘wie amɛshi’ amɛnyɛmi nuu fioo ni ji Mose lɛ. (Kuku 1) Yɛ nɔ najiaŋ ni amɛkɛ Mose baasusu nii ahe lɛ, amɛwie amɛshi lɛ, ni eeenyɛ efee akɛ amɛgbɛ wiemɔ ni amɛwie amɛshi lɛ lɛ amɛshwã ŋsara lɛŋ fɛɛ. Ekolɛ Miriam ni atsi egbɛi tã klɛŋklɛŋ lɛ ji mɔ ni nyiɛ hiɛ ni afee enɛ. Nɔ̃ klɛŋklɛŋ hewɔ ni amɛwie huhuuhu amɛshi Mose lɛ ji akɛ, ekɛ Kushyoo ko bote gbalashihilɛ mli. Ani eeenyɛ efee akɛ Miriam miiye awuŋa akɛni esusu akɛ yoo nɛɛ ni jeee Israelnyo lɛ baanyɛ ahe ehiɛ nyam yɛ edɛŋ lɛ hewɔ?

Jeee yiŋtoo nɛɛ pɛ hewɔ amɛwie huhuuhu lɛ. Miriam kɛ Aaron tee nɔ amɛkɛɛ akɛ: “Ani Mose kome kɛkɛ Yehowa kɛwieɔ? ani wɔ hu ekɛ wɔ ewieko pɛŋ?” (Kuku 2) Ani shwelɛ ni amɛyɔɔ akɛ amɛná hegbɛ kɛ hiɛnyam babaoo lɛ ji yiŋtoo tuuntu hewɔ ni amɛwie huhuuhu lɛ?

Yɛ amaniɛbɔɔ lɛ mli lɛ, jeee Mose ji mɔ ni tsu amɛhuhuuhu wiemɔ lɛ he nii. Ekã shi faŋŋ akɛ Mose to etsui shi kɛdamɔ wiemɔi ni awie ashi lɛ lɛ naa. Etsui shi ni eto yɛ sane nɛɛ mli lɛ ma nɔ mi akɛ nɔ ni Biblia lɛ wie yɛ ehe akɛ “ehe jɔ fe gbɔmɛi fɛɛ” ni yɔɔ shikpɔŋ lɛ nɔ lɛ ji anɔkwale. * (Kuku 3) Ehe ehiaaa ni Mose diɛŋtsɛ afã ehe. Yehowa nu amɛhuhuuhu wiemɔ lɛ, ni efã Mose he.

Yehowa bu huhuuhu wiemɔ nɛɛ akɛ lɛ amɛwieɔ amɛshiɔ lɛ. Nakai ni, ejaakɛ lɛ ji mɔ ni hala Mose eto amɛ nɔ. Nyɔŋmɔ kã huhuuhu wielɔi lɛ ahiɛ ni eha amɛle akɛ wekukpãa krɛdɛɛ ko kã ekɛ Mose teŋ, ekɛɛ akɛ: “Lɛ lɛ naabu kɛ naabu mikɛ lɛ wieɔ kpetekpelee.” Kɛkɛ ni Yehowa bi Miriam kɛ Aaron akɛ: ‘Belɛ mɛɛ hewɔ nyɛsheee gbeyei, ni nyɛwie nyɛshi Mose lɛ?’ (Kuku 8) Eyɛ mli akɛ amɛwie amɛshi Mose moŋ, shi Nyɔŋmɔ diɛŋtsɛ amɛwie amɛshi lɛ. Akɛni amɛjieee bulɛ kpo kwraa hewɔ lɛ, Nyɔŋmɔ mli fu amɛ.

Kpiti shwie Miriam, ní eeenyɛ efee akɛ lɛ ji mɔ ni hɔ huhuuhu wiemɔ lɛ sɛɛ lɛ. Amrɔ nɔŋŋ kɛkɛ ni Aaron kpa Mose fai koni ekpa fai eha Miriam. Bo lɛ susumɔ he okwɛ—agbɛnɛ kɛ́ Miriam he baawa lɛ lɛ, edamɔ mɔ ni amɛye lɛ sane fɔŋ lɛ faikpamɔ nɔ! Mose jɛ mlijɔlɛ mli ekpa fai eha lɛ. Nɛkɛ be nɛɛ mli ji be klɛŋklɛŋ kwraa ni Mose fã enaa yɛ sane nɛɛ mli, ni ekɛ hiɛdɔɔ kpa Yehowa fai eha enyɛmi yoo lɛ. Atsa Miriam kpiti lɛ, shi ehe bahia ni ekɛ hiɛgbele ahi ŋsara lɛ sɛɛ gbii kpawo.

Amaniɛbɔɔ nɛɛ haa wɔnaa sui ni jara wa yɛ Yehowa hiɛ kɛ sui ni enyɛ̃ɔ. Kɛ́ wɔmiisumɔ ni wɔtsi wɔbɛŋkɛ Nyɔŋmɔ kpaakpa lɛ, esa akɛ wɔbɔ mɔdɛŋ ni wɔfã henɔwomɔ, awuŋayeli, kɛ hegbɛ taomɔ kɛ amɛshishi fɛɛ kɛjɛ wɔmli. Yehowa sumɔɔ mɛi ni he jɔ lɛ. Ewo shi akɛ: “Mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.”—Lala 37:11; Yakobo 4:6.—w09 08/01-E.

[Shishigbɛ niŋmaa]