Finama Nzambi

Yave Lulembamu Keyangalelanga

Ntalu 12:​1-15

LULENDO, kimpala ye keto, i fu yitoma songwanga kw’awana bevavanga etunda mu nza yayi. Nga e fu nze yayi, yikutufinamesanga kwa Yave wa Nzambi? Ve kikilu, kadi Yave lulembamu kevavanga kuna kwa asambidi andi. E ziku kia diambu diadi kimonekanga muna lusansu luna muna Ntalu kapu kia 12. E diambu diadi diavangama muna makanga ma Sinai vava Aneyisaele bavaika muna Engipito.

Mireyame ye Arone mpangi za Mose, bayantika ‘kumba’ Mose wa mbunzi au. (Tini kia 1) Vana fulu kia vovana yo Mose, bayantika kunkumba yo fila akaka muna ndo babayikama muna yidima. Mireyame nanga yandi wavit’o ntu muna ngidima zazi. E diambu diantete bayidimina i kuma kia nkento a Kusi kasompa o Mose. Nga Mireyame kimpala kamonanga vo ketoma tambulwa ko kwa nkento ndioyo una vo ke Nyinsaele ko?

Bakwamanana yidima. Mireyame yo Arone bavova vo: “O Yave nga kamokena kaka yo Mose? kamokena yeto ko e?” (Tini kia 2) O luzolo lwa kala y’etunda yo tambul’o nkembo nga i mbut’a diambu diabafila mu yidima?

Nze una usonganga lusansu, Mose kavana mvutu ko muna ngidima zau. Wabutama yo lembi yidimina ampangi zandi. O luzindalalu lwandi lukwikidisanga dina Nkand’a Nzambi kevovanga mu kuma kiandi vo ‘nkwa unleka kikilu, ke mu wantu awonso’ ko bena ova ntoto. * (Tini kia 3) Mose kafunga makasi ko. Yave wawanga e ngidima zazi ye wasadisa Mose mu zizidila.

Yave wabadikila e ngidima zazi nze kwa yandi bayidiminanga. Kadi yandi wasola Mose. Muna tumba ayidimi, Nzambi wabasungamesa vo yandi ngwizani ambote kakala yau yo Mose yo “mokena yandi o mantalani.” Yave wayuvula Mireyame yo Arone vo: “Adieyi nulembele mwen’o wonga wa kumba . . . Mose?” (Tini kia 8) Muna yidimina Mose, Nzambi kikilu bayidiminanga. Mu kuma kia kondwa luzitu, bamona makasi ma Nzambi.

Mireyame wavit’o ntu muna ngidima zazi, wabakama wazi. Vana vau, Arone wadodokela Mose kalomba lusadisu kwa Nzambi mu kuma kia Mireyame. Se yindula ediadi, muna wukwa Mireyame lusadisu lwa muntu kayidiminanga kavavanga. Kuna lembama kwawonso, Mose wavanga dina Arone kalomba. E nkumbu antete kavovana yo Yave muna lusansu lwalu, Mose wadodokela Yave muna wete dia mpangi andi a nkento. Mireyame wawukwa kansi wateka zizidila e nsoni za yingwa kuna mbazi a ndo lumbu nsambwadi.

Lusansu lwalu, lukutusonganga e fu keyangalelanga o Yave ye ina keyangalelanga ko. Avo tuzolele finama Nzambi, tufwete sia ngolo za katula konso fu kia lulendo kina mu yeto, kimpala y’eketo. O lwalu i lulembamu kezolang’o Yave. Wa sia nsilu vo: “Alembami bevwa nza; beyangalela muna mawete mayingi.”​—⁠Nkunga 37:11; Yakobo 4:⁠6.

[Mvovo Vana Yand’a lukaya]