Ia Mafuta Atu i le Atua

E Tāua iā Ieova le Agamalu

Numera 12:1-15

O LE faamaualuga, le matauʻa, ma le fiasili. O na uiga ua taatele iā i latou ua taulau manuia i lenei lalolagi. Ae pe e mafai e na uiga ona tatou māfana atu ai i le Atua? Nai lo lenā, e tāua iā Ieova le agamalu i ona tagata tapuaʻi. E faamaonia lenei manatu i le tala o loo maua i le Numera mataupu e 12. Na tupu lenei mea i le vao o Sinai, ina ua mavae le laveaʻiga o Isaraelu mai i Aikupito.

Na “fai upu” Miriama ma Arona iā Mose, o lē sa laʻitiiti ifo iā i laʻua. (Fuaiupu 1) Nai lo le talanoa lelei atu iā Mose, sa la fai upu pe faitio iā te ia, ma e foliga mai ua salalau atu le la faitioga i tagata i le togālauapi. O Miriama lea o loo taʻua muamua, e manino o ia na taulamua i le faitio. O le māfuaaga muamua o le muimui, ona ua faaipoipo atu Mose i se fafine Kuso. Pe na matauʻa Miriama ina neʻi lē amanaʻia o ia e tagata, ae uaʻi atu i le avā a Mose e lē o se Isaraelu?

Na iai nisi māfuaaga o le faitio. Na faaauau pea ona fai mai Miriama ma Arona: “Ua na o Mose ea ua fetalai mai ai Ieova? e lē o i maʻua foʻi ea ua fetalai mai ai o ia?” (Fuaiupu e 2) Pe e lē o le māfuaaga moni ea o le faitio ona o le fia manaʻo i le pule ma ia amanaʻia e tagata?

I lenei tala, e leʻi tali atu Mose i na faitioga. Ae sa ia onosaia pea na tulaga. O lona onosai, ua faamaonia ai le faamatalaga a le Tusi Paia e faapea, “na matuā agamalu lava le tagata nei o Mose, e sili lava i tagata uma” i le lalolagi. * (Fuaiupu e 3) E leʻi tau faamatala atu e Mose le māfuaaga ua faaaogā ai o ia e Ieova. Na faafofoga ma lagolagoina e Ieova Mose.

Sa silasila Ieova i faitioga na fai iā Mose, e tusa o lea ua fai atu iā te ia. Ma o ia foʻi na tofia Mose. I le aʻoaʻia o ē na faitio, na faamanatu atu e le Atua iā i laʻua o loo iai se la faiā mataʻina ma Mose i le faapea atu: “Ma te faafesagaʻi ona ma tautala ma ia.” Ona fesili atu lea o Ieova iā Miriama ma Arona: ‘Na oulua lē fefefe ea i se ā e fai upu iā Mose?’ (Fuaiupu e 8) O le mea moni, o lo la faitio iā Mose, e tusa o lea ua la faitio atu i le Atua. Ona o le lē migao, o le a la lagona ai le lē fiafia o le Atua.

E manino mai o Miriama lea sa uunaʻia na gaoioiga leaga, ma taia ai o ia i le lepela. Sa vave ona ʻaiʻoi atu Arona iā Mose ina ia tatalo mo Miriama. Seʻi mafaufau foʻi, o lea ua faalagolago nei le lelei o Miriama i le fesoasoani a Mose lea sa la faitio i ai! Na faia ma le agamalu e Mose le mea sa ʻaiʻoi atu ai Arona. O le taimi muamua lea i lenei tala ua tautala ai Mose, ina ua ia tatalo faatauanau iā Ieova mo lona tuafafine. Sa toe faafoʻisia le malosi o Miriama, ae e ao lava ona ia onosaia lona māsiasi i aso e fitu lea e tatau ona nofo ese ai.

O lenei tala ua tatou malamalama ai i le uiga e tāua iā Ieova ma uiga e na te teena. Pe a tatou mananaʻo e mafuta atu i le Atua, e tatau ona tatou liaʻi ese le faamaualuga, matauʻa, ma le fiasili. E fiafia Ieova i ē e agamalu. Na ia folafola mai e faapea: “A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Salamo 37:11; Iakopo 4:6.

[Faaopoopoga i lalo]