Baibolo Ilaalula Abantu

Bushe umwaume uwatendeke ukupeepa ibange na fwaka ilyo ali fye umwaice acitile shani pa kuti aleke iyi misango? Cinshi ca-afwile umulumendo umo uwali mu kabungwe ka bacintomfwa, akaleimya ifyongo no kupuma abantu, ukuba umuntu wafuuka no kuleka ukupata abantu ba mishobo imbi? Yumfwileni ifyo abene balondolola.

ILYASHI LYA KUBALILAPO

ISHINA: HEINRICH MAAR

IMYAKA: 38

ICALO: KAZAKHSTAN

IFYO BALI: BALEPEEPA IBANGE NA FWAKA

INKULILO YANDI: Nafyalilwe mu Kazakhstan. Ukufuma pali iyi ncende ukufika ku musumba wa Tashkent, paba amakilomita 120. Kuli iyi ncende kuloma sana no kukaba nga nshi mu nshita ya lusuba, kabili mu nshita ya mpepo na lyo kulatalala icine cine. Mu miceele ya musango yu, imyangashi (ama grapes) ne bange filakula bwino.

Abafyashi bandi bali bena Germany. Bonse balepepa ku calici lya Evangelical Church, nomba tabapoosele amano ku kupepa. Lelo kwena balinsambilishe ukusungila ipepo lya We Shifwe. Ilyo nali ne myaka 14, bamayo no mukalamba wandi umwanakashi balisambilileko Baibolo ne Nte sha kwa Yehova. Bushiku bumo ilyo balesambilila, nalekutika kabili baNte babili balangile bamayo ishina lya kwa Lesa ilya kuti Yehova ukubomfya Baibolo ya bamayo iya kale. Nalitemenwe nga nshi. Nomba bamayo balilekele ukusambilila Baibolo, e fyo na ine nafumishe amano ku kusambilila ifya kwa Lesa. Ilyo papitileko inshita, bakafundisha wesu libili libili balelanda amalyashi ya bufi ayo baleumfwa pa Nte sha kwa Yehova. Apo limo nalesangwa ku kulongana kwa Nte sha kwa Yehova na nkashi yandi, naebele bakafundisha ukuti amalyashi balelanda lyonse pa Nte sha kwa Yehova yali ya bufi.

Ilyo nali ne myaka 15, bantumine ku Leningrad, iyo nomba beta ati St. Petersburg, mu calo ca Russia, uko naile mu kusambilila ifya ncito. Ilyo nali kulya, naleshimikilako abanandi tumo tumo uto nasambilile pali Yehova. Lelo na-ambile ukupeepa fwaka. Ilyo naleya mu kutandala ku mwesu ku Kazakhstan, caleyanguka ukushita ibange nangu ca kuti ifunde lyalibindile. Kabili nalenwa sana ubwalwa bulya bwine ubukali.

Ilyo napwishishe amasambililo, naingile ncito ya bushilika iyo nabombele imyaka  ibili. Lelo fimo ifyo nasambilile muli Baibolo ilyo nali umwaice nalefibukisha. Limo nga nashukila inshita, nale-ebako na bashilika banandi pali Yehova kabili nalepokololako Inte sha kwa Yehova nga naumfwa abantu balelanda ifya bufi pali bena.

Ilyo nalekele ukubomba ubushilika, naile ku Germany. Ilyo nali mu nkambi umwaleikala abafumine ku fyalo fimbi, napokelele icitabo ca kubomfya pa kusambilila Baibolo icalembelwe na baNte. Nalibelengele sana ici citabo kabili nali-imwenene ukuti ifyo calelanda fyali fya cine. Lelo nalifililwe ukuleka ukupeepa ibange na fwaka. Pa numa, nakukiile ku musumba wali mupepi uwa Karlsruhe. Uku e ko namonene na Nte uwatendeke ukunsambilisha Baibolo.

IFYO BAIBOLO YA-ALULA UBUMI BWANDI: Pa nshita iitali, nalishibe ukuti Baibolo Cebo ca kwa Lesa. Ilyo nabelengele icitabo ca kubomfya pa kusambilila Baibolo ico napokelele, nalishininkishe ukuti Baibolo ilasuka amepusho yonse ayacindama. Lelo nangu nashininkishe, palipoosele inshita pa kuti fye njalule imibele yandi. Pa kulekelesha nasukile naumfwila ififunda Baibolo ifyalembwa pali 2 Abena Korinti 7:1 kabili nasalilepo ukuisangulula ne mwine kuli “fyonse ifikowesha umubili no mupashi.” E ico nalekele ukupeepa ibange na fwaka.

Nalekele ukupeepa ibange lilya line fye napingwilepo ukuti naleka. Lelo papitile imyeshi 6 pa kuti fye ndeke ukupeepa fwaka. Bushiku bumo, Nte walensambilisha Baibolo anjipwishe ati, “Cinshi wabela pa calo?” Ili lipusho lyalengele ndetontonkanya pali filya nalepeepa fwaka. Nale-esha imiku fye iingi ukuti ndeke ukupeepa. Nomba natendeke ukulapepa kuli Lesa libe nshilapeepa fwaka, ukucila ukulalomba Lesa ukunjelela ninshi nimpeepa fwaka kale. Mu 1993, nalibikile ubushiku bwa kulekelapo ukupeepa fwaka. Yehova alingafwile, kabili ukutula pali ubo bwine bushiku nabikile, nshabala njikatapo umushanga na kabili.

IFYO NANONKELAMO: Ifi naleka ukupeepa fwaka ne bange, nshonaula indalama no bumi bwandi kuli ifi fintu fyabipa kabili ubumi bwandi bwaliwaminako. Fino ndelanda nalikwata ne shuko lya kubombela pa maofeshi ya Nte sha kwa Yehova aya mu Germany. Nalitemwa nga nshi ifi nakonkele ukupanda amano kwaba mu Baibolo! Ukwishiba ifyo Baibolo isambilisha, kwalilenga ubumi bwandi ukuwama nga nshi.

ILYASHI LYA BUBILI

ISHINA: TITUS SHANGADI

IMYAKA: 43

ICALO: NAMIBIA

IFYO BALI: BALI MU KABUNGWE KA BACINTOMFWA

INKULILO YANDI: Nakuliile mu mushi, mu ncende beta ati Ohangwena iyabela ku kapinda ka ku kuso aka calo ca Namibia. Ilyo inkondo yabuukile muli ici citungu mu myaka ya ba 1980, abantu mu mushi naleikala, baleboma no kubepaya. Muli uyu mushi, baleti nga tawaishiba ifya kulwa ulubuli, tauma na balumendo banobe ninshi tauli mwaume wine wine. E calengele ukuti nsambilile ukuuma abantu!

Ilyo napwile isukulu, naile mu kwikala na bayama  mwi tauni lya Swakopmund ilyapalamina kuli bemba. Tapakokwele ukutula apo nafikiile kuli iyi ncende, nailundile ku kabungwe ka balumendo bacintomfwa. Twaleya ku ncende sha mu tauni pamo nga ku fikuulwa fya bwalwa na ku mahotela uko abantu abafiita bashabatemenwe. Ico twalecitila ifi kufwaya fye ukubuusha ulubuli. Ilingi line twalelwa na bamalonda na bakapokola. Lyonse ubushiku, nale-enda ne cimwele icatwa icikulu nangu ulupanga ulwa kulashilako onse uwambala.

Bushiku bumo, mu nshita ya bushiku, bapene banjipaye ilyo twalelwa na ba mu kabungwe ka bacintomfwa kambi. Ilyo twalelwa, umuntu umo apitile ku numa yandi kabili ali fye pa kumputulako umutwe, lelo umunandi aishileuma uyu muntu icabipisha ica kuti alifwile ne cipuupu. Nangu ca kuti kwashele fye kwempe nga nalifwile, nshalekele ukutemwa ulubuli. Nga ndeumana no muntu uuli onse, umwaume nelyo umwanakashi, lyonse nine nalebalilapo ukuuma mu muntu.

IFYO BAIBOLO YA-ALWILE UBUMI BWANDI: Ilyo nakumene na Nte ya kwa Yehova umwanakashi, ambelengele ifikomo fyaba mu Baibolo mwi buuku lya Amalumbo 37, kabili anjebele ukuti mwi buuku na limbi ilya mu Baibolo ilya Ukusokolola, balilandamo ifintu na fimbi ifisuma ifikaba ku ntanshi. Nomba apo talandile apasangwa ifi fyebo mwi buuku lya Ukusokolola, ilyo naile ku ng’anda, nailebelenga ibuuku lya Ukusokolola lyonse mu nshita ya bushiku. Nalitemenwe nga nshi ubulayo bwaba pa Ukusokolola 21:3, 4 apatila “imfwa tayakabeko na kabili, takwakabe no kuloosha nangu ukuteta nangu ukukalipwa na kabili.” Ilyo aba baNte babwelele, nalisumine ukuti balensambilisha Baibolo.

Calinkoseele ukwalula imibele ne ncitilo shandi. Lelo nasambilile mwi buuku lya Imilimo 10:34, 35 ukuti “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.” Na kabili nalibombeshe ukukonka ifyo Abena Roma 12:18 ilanda ati: “Mule-esha na maka yenu yonse ukuba aba mutende ku bantu bonse.”

Ukulunda pa kusambilila ukucefyako ubukali, cimbi ico nalingile ukuleka, kupeepa fwaka. Ilingi nalepepa kuli Yehova ukuti angafwe ninshi ndelukusha ne filamba. Lelo kwena nshalecita bwino pa kubala, pantu naleti uyu wine mushanga nalapeepa “e wa kulekeleshako” e lyo pa numa napepa kuli Lesa ukuti angafwe. Nte walensambilisha Baibolo alingafwile ukwishiba ifyo cacindama ukubalilapo ukupepa kuli Lesa ukucila ukubalilapo ukupeepa e lyo napepa kuli Lesa. E lyo kabili nalilekele ukula-angala na bantu abapeepa fwaka. Cimbi na co ca kuti nalikonkele ifyo banjebele ukuti mfwile ukwebako abo nalebomba nabo pa fyo fwaka yabipa. Ici calingafwile sana pantu abo nalebomba nabo balilekele ukumpeelako fwaka.

Nasukile naleka ukupeepa fwaka ne mibele yabipa iyo nakwete. Pa numa ya kusambilila Baibolo no kulacita ifyo nalesambilila pa myeshi 6, nalibatishiwe no kuba Inte ya kwa Yehova.

IFYO NANONKELAMO: Nalishininkishe ukuti Inte sha kwa Yehova baba mu kupepa kwa cine ilyo namwene ifyo batemwanene, nangu ca kuti bali abapusana inkanda ne mishobo. Nelyo nali nshilabatishiwa, Nte umo uwabuuta mu cilonganino alinjitile ku mwakwe ku kulya ica kulya. Namwene kwati bufi, ndelota fye. Nshabalile njikalapo no muntu wabuuta mu mutende nga filya, pali bufi ukuliila nankwe pamo ifya kulya mu ng’anda yakwe. Nomba naishileba mu lupwa ulukalamba ulwa Bena Kristu ba cine.

Kale, bamalonda na bakapokola balyeseshe ukumpatikisha ukwalula amano ne mibele yandi lelo balifililwe. Maka ya Baibolo fye epela e yangafwile ukwalula ubumi bwandi no kuba umuntu wa nsansa.

[Amashiwi pe bula 29]

“Ilingi nalepepa kuli Yehova ukuti angafwe ninshi ndelukusha ne filamba”