Bible Okpụhọde Mme Owo

Nso ikanam owo oro ekesin̄wọn̄de ikọn̄ekpo ye sika toto ke uyen etre ndin̄wọn̄ mme n̄kpọ emi? Nso ikanam owo emi okodụkde n̄ka afai ekeme ndikara esịt esie onyụn̄ etre ndisua mbon oro mîtoho orụk mmọ? Kop se mmọ ẹtịn̄de mi.

ENYỊN̄: HEINRICH MAAR

ISUA EMANA: 38

IDỤT: KAZAKHSTAN

UTỌ OWO EMI ENYE EKEDIDE: EKESIN̄WỌN̄ IKỌN̄EKPO YE SIKA

NTE N̄KESIDUDE UWEM: N̄kamana ke usụk usụk Kazakhstan emi edide kilomita 120 tọn̄ọ ke Tashkent. Obio oro ama esifiop etieti ke ini ndaeyo onyụn̄ enen̄ede ebịt ke ini etuep—utọ ini emi esifọn ẹtọ grape ye ikọn̄ekpo.

Ete ye eka mi ẹketo Germany. Mmọ ẹma ẹsika ufọkabasi, edi mmọ ikenen̄ekede isịn idem ke mme edinam ufọkabasi mmọ. Kpa ye oro, mmọ ẹma ẹkpep mi nditịn̄ Akam Ọbọn̄ ke ibuot. Ke ini n̄kedide isua 14, eka mi ye adiahaeka mi ẹma ẹsikpep Bible ye Mme Ntiense Jehovah. Usen kiet, mma n̄kop Mme Ntiense iba oro ẹkesikpepde ẹka mi Bible ẹwụtde enye enyịn̄ Abasi, Jehovah, ke akani Bible esie. Mma nnen̄ede mma se n̄kokopde oro. Edi eka mi ama etre ndisikpep Bible, ami n̄ko n̄konyụn̄ nnyeneke udọn̄ aba ke n̄kpọ Abasi. Ke ufọkn̄wed, andikpep nnyịn ama esibụk nsunsu mbụk aban̄a Mme Ntiense Jehovah ọnọ nnyịn. Sia edide mma nsitiene adiahaeka mi ndụk ndusụk mbono esop Mme Ntiense Jehovah, mma ndọhọ andikpep ke se enye etịn̄de idịghe akpanikọ.

Ke ini n̄kedide isua 15, ẹma ẹdọhọ n̄ka Leningrad emi ẹkotde St. Petersburg idahaemi ke Russia n̄kekpep utom. Mma nsitịn̄ ekpri se n̄kekpepde mban̄a Jehovah nnọ mbon ubet mi. Edi mma ntọn̄ọ ndin̄wọn̄ sika. Ke ini n̄kakade ufọk ke Kazakhstan, ama enen̄ede emem utom ndidep ikọn̄ekpo, kpa ye oro ikọn̄ekpo ekedide n̄kpọ mbet. Mma nsin̄wọn̄ ufọfọp ye iken̄ka etieti.

Ke mma n̄kekpep utom mma, mma nnam utom ekọn̄ isua iba ke Soviet Union. Edi n̄kosụk nteti mme n̄kpọ oro n̄kekpepde ke Bible ke ini n̄kedide eyenọwọn̄. Mma nsida ifet oro nnyenede ntịn̄ n̄kpọ mban̄a Jehovah  nnọ mbonekọn̄ oro ikanamde utom ntre, ndien ke ini ẹsude nsu ẹdian Mme Ntiense, mma ndọhọ mmọ ke ikọ oro idịghe akpanikọ.

Ke mma n̄kọkpọn̄ utom ekọn̄, mma n̄wọrọ n̄kodụn̄ ke Germany. Ke ini n̄kosụk ndude ye mbon oro ẹwọrọde idụn̄, mma mbọ n̄wed oro Mme Ntiense Jehovah ẹsidade ẹkpep mme owo Bible. Mma n̄kot n̄wed emi ke ofụri esịt nnyụn̄ n̄kụt ke se ẹtịn̄de ke n̄wed oro edi akpanikọ. Edi n̄kekemeke nditre ndin̄wọn̄ sika ye ikọn̄ekpo. Ekem mma n̄wọrọ n̄kodụn̄ ke Karlsruhe. Mma nsobo kiet ke otu Mme Ntiense Jehovah do, ndien enye ama ọtọn̄ọ ndikpep mi Bible.

NTE BIBLE OKOKPỤHỌREDE UWEM MI: Mma nsikere ke Bible edi Ikọ Abasi. Ke mma n̄kokot n̄wed ukpep Bible oro n̄kụre, mma nnen̄ede nnịm ke Bible ọbọrọ kpukpru akpan mbụme oro owo ekemede ndibụp. Kpa ye oro, ama ada mi ini ndikpụhọde uwem mi. Ekem, mma ntie n̄kere item oro odude ke 2 Corinth 7:1 nnyụn̄ mbiere ndiyet “kpukpru se isabarede [mi] obụkidem ye spirit” mfep, oro edi, nditre ndin̄wọn̄ ikọn̄ekpo ye sika.

Ikọsọn̄ke mi nditre ndin̄wọn̄ ikọn̄ekpo. Edi ama ada mi ofụri ọfiọn̄ itiokiet nditre ndin̄wọn̄ sika. Usen kiet, Ntiense oro ekesikpepde mi Bible ama obụp mi ete, “Nso ke oyom ndida uwem fo nnam?” Mbụme oro ama anam nnen̄ede ntie n̄kere nte ndụkde ufụn nnọ sika. Mma ndomo ediwak ini nditre ndin̄wọn̄ sika, edi n̄kekemeke. Mma ndibiere ndien ndisibọn̄ akam ini ekededi oro ọdọn̄de mi ndin̄wọn̄ sika utu ke ndidi mma n̄n̄wọn̄wọn̄ mma mbemiso ndibọn̄ akam ndọhọ Abasi efen ọnọ mi. Ke 1993, mma nnịm usen oro nditrede ndin̄wọn̄ sika. Ndien Jehovah ama an̄wam mi ntre ndin̄wọn̄ sika toto ke usen oro.

UFỌN ORO MBỌDE: Idem mi enen̄ede ọsọn̄ idahaemi, sia mmen̄wọn̄ke aba ikọn̄ekpo ye sika emi n̄kodụkde ufụn ye atahade nnọ. Nnam utom idahaemi ke n̄kọk itieutom Mme Ntiense Jehovah ke Germany. Mmenen̄ede n̄kop inemesịt ke ndikanam se Bible ekpepde! Ndifiọk se Bible ekpepde anam nnen̄ede mfiọk se n̄kpadade uwem mi nnam.

ENYỊN̄: TITUS SHANGADI

ISUA EMANA: 43

IDỤT: NAMIBIA

UTỌ OWO EMI ENYE EKEDIDE: OWO N̄KA AFAI

NTE N̄KESIDUDE UWEM: N̄kokpon ke obio-in̄wan̄ Ohangwena ke edem edere Namibia. Ke ini ẹken̄wanade ekọn̄ ke iduọk isua 1980 ke edem nnyịn, ẹma ẹsimụm mbon obio nnyịn ẹtịm ẹwot. N̄ko, ẹkeda erenowo nte akparawa edieke enye enen̄erede ọdiọn̄ọ en̄wan onyụn̄ ekemede ndikan ke en̄wan. Ntre mma n̄kpep ndin̄wana en̄wan.

Ke mma n̄kokụre ufọkn̄wed, mma n̄kodụn̄ ye eyeneka eka mi ke Esụk Swakopmund. Ikebịghike  ke mma n̄kesịm do, mma ndụk n̄ka afai. Ima isika ikọtọn̄ọ en̄wan ke mme ebiet emi owo mîkesiyakke mbubịt owo ẹdụk, utọ nte, ufọkisen ye itie un̄wọn̄ n̄kpọ. Ima isin̄wana ye mbon ukpeme ye mme bodisi ediwak ini. N̄kesikakama nsọsọp anyan ikwa nsan̄a okoneyo man owo ekededi eke oyomde mfịna, ami nnọ enye.

Ayak nsịn̄, ẹkpekewot mi okoneyo kiet ke ini ikan̄wanade ye mbon n̄ka afai en̄wen. Owo n̄ka afai oro ama asan̄a edem edem edi ndisịbe mi ibuot, edi owo n̄ka nnyịn ama eyịbi enye, enye ọduọ osụhọ. Kpa ye oro n̄kọbọhọde n̄kpa usen oro, n̄kosụk n̄kaka iso ndu uwem afai. Edieke owo ekededi afan̄ade se ntịn̄de, edide eren m̀mê n̄wan, ami nsibem iso nsiak enye ufia.

NTE BIBLE OKOKPỤHỌREDE UWEM MI: Ke akpa ini oro n̄kosobode ye n̄wan kiet emi edide kiet ke otu Mme Ntiense Jehovah, enye ama okot mme ufan̄ikọ oro ẹdude ke Psalm 37 ọnọ mi onyụn̄ ọdọhọ mi ke n̄wed Ediyarade ọnọ utịbe utịbe un̄wọn̄ọ kaban̄a ini iso. Edi sia enye mîketịn̄ke ebiet emi mme un̄wọn̄ọ oro ẹsịnede ke n̄wed Ediyarade, mma n̄kot ofụri n̄wed Ediyarade mma okoneyo oro. Mma nnen̄ede mma un̄wọn̄ọ oro odude ke Ediyarade 21:3, 4 emi ọdọhọde ke “n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.” Ntiense oro ama afiak edise mi, ndien mma ndọhọ enye esidikpep mi Bible.

Ama enen̄ede ọsọn̄ mi ndikpụhọde ekikere mi ye nte n̄kesinamde n̄kpọ. Edi se n̄kokotde ke Utom 10:34, 35 ama ekpep mi ke “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.” N̄ko, mma nsịn ifịk nnam se ẹwetde ke N̄wed Mbon Rome 12:18 emi ọdọhọde ete: “Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.”

Mma n̄kpep ndisikara esịt mi, nnyụn̄ ntre sika oro n̄kodụkde ufụn nnọ. Ediwak ini, n̄kesitatua ke ini mbọn̄de akam nnọ Jehovah nte an̄wam mi. Edi ke akpa, n̄kesinamke nnennen n̄kpọ. Ekesidi mma nsio sika kiet n̄kama, ndọhọ Abasi ke “akpatre” sika oro ndin̄wọn̄de edi emi, ndien ke mma n̄kọn̄wọn̄ mma, mbọn̄ akam nnọ Enye. Ntiense oro ekekpepde mi Bible ọkọdọhọ ke n̄kpakam nsibọn̄ akam ini ekededi oro ọdọn̄de mi ndin̄wọn̄ sika. Akana ntre n̄ko ndidụk nsan̄a ye mbon oro ẹsin̄wọn̄de sika. Ntiense oro ama ọdọhọ nsitịn̄ nnọ mbon itieutom nnyịn ke ifọnke ndin̄wọn̄ sika, ntre mma nsinam oro. Ekikere emi ama enen̄ede ọfọn, koro mbon itieutom nnyịn oro ẹsin̄wọn̄de sika ikesinọhọ mi sika aba.

Nte ini akade, mma ntre sika nnyụn̄ n̄kpụhọde uwem mi. Ke ọfiọn̄ itiokiet ama ekebe tọn̄ọ n̄kekpep Bible nnyụn̄ nnam se Bible ekpepde, mma nna baptism nte kiet ke otu Mme Ntiense Jehovah.

NTE MBỌDE UFỌN: Ke ini n̄kokụtde nte Mme Ntiense Jehovah ẹmade kiet eken, inamke n̄kpọ m̀mê owo edi mbakara m̀mê obubịt owo, mma nnịm ke ido ukpono mmọ edi nnennen ido ukpono. Idem mbemiso n̄kanade baptism nte kiet ke otu Mme Ntiense Jehovah, mbakara kiet ke esop nnyịn ama okot mi udia ke ufọk esie. Ama enen̄ede akpa mi idem! Akanam ntiehe kiet ye mbakara, man ẹketetịn̄ ẹban̄a nditiene mbakara ndia udia ke ufọk esie. Idahaemi ndisịne ke ubon nditọ Abasi oro ẹdude ke ofụri ererimbot.

Mbon ukpeme ye mme bodisi ẹma ẹsidomo ndinam mi n̄kpụhọde ekikere ye nte n̄kesidude uwem, edi ikekemeke. Bible kpọt okpụhọde uwem mi onyụn̄ anam n̄kop inemesịt idahaemi.

[Se ẹwetde ke ikpọ abisi ke page 29]

“Ediwak ini, n̄kesitatua ke ini mbọn̄de akam nnọ Jehovah nte an̄wam mi”