Ebaibol na O re Nwene Uzuazọ Ahwo

Ẹvẹ ọzae jọ nọ o vovo ige gbe isigareti no emaha ze ọ sai ro si obọ no uruemu na? Eme o fi obọ họ kẹ omọvo otu-ugbarugba jọ si obọ no ofu ọgaga jẹ whaha omukpahọ nọ o wo kẹ ahwo ovioma ofa? Rri ẹme nọ a ta.

UDHESẸ

ODẸ: HEINRICH MAAR

IKPE: 38

ORẸWHO RIẸ: KAZAKHSTAN

IKU RIẸ: Ọ JẸ HAI VOVO IGE GBE ISIGARETI

UZUAZỌ MẸ EVAỌ OKE NỌ U KPEMU: Ofẹ obọze ovatha-ọre Kazakhstan a jo yẹ omẹ, onọ o rehọ emaele udhosa gbe ikpe thabọ no okpẹwho ọ Tashkent. Ẹkwotọ na ọ rẹ roro jẹ ya fia evaọ oke uvewhru, uvo riẹ o rẹ mahe oma, yọ evaọ ezi uriri ekpahe riẹ e rẹ jọ gaga—onọ u ru rie kiehọ kẹ ekakọ wọhọ itiowo gbe ige.

Ọsẹgboni mẹ ahwo Germany. Aimava a jọ ahwo Evangelical Church, rekọ a se egagọ na gboja ha. Dede na, a wuhrẹ omẹ epanọ me re ro se Olẹ Olori na uzuzou. Nọ mẹ jọ ikpe 14, Isẹri Jihova a wuhrẹ Ebaibol kugbe oni gbe oniọvo-ọmọtẹ ọkpako mẹ evaọ etoke jọ. Ẹdẹjọ nọ Isẹri ivẹ na a je wuhrẹ oni mẹ, me te yo nọ a jọ Ebaibol ọwhawho oni mẹ dhesẹ odẹ Ọghẹnẹ, Jihova, kẹe. Onana u duobọte omẹ udu. Oni mẹ ọ ruabọhọ uwuhrẹ na ha, yọ mẹ gbẹ jowọ nọ me re ro wuhrẹ kpahe Ọghẹnẹ viere he. Rekọ nọ oke jọ o vrẹ no, iticha mai ọ jẹ hai gbe iku erue buobu kpahe utu-egagọ nọ a re se Isẹri Jihova na. Fikinọ mẹ avọ oniọvo-ọmọtẹ mẹ ma kpohọ ewuhrẹ Isẹri Jihova unuẹse jọ no, mẹ tẹ ta kẹ iticha na inọ eware nọ ọ be hae ta kpahe Isẹri na yọ erue.

Okenọ me te ikpe 15 no, a te vi omẹ nyai wuhrẹ iruo evaọ Leningrad, oria nọ a bi se St. Petersburg enẹna evaọ Russia. Mẹ jẹ hae ta umutho eware nọ mẹ riẹ kpahe Jihova kẹ emọ nọ ma gbẹ jẹ rria uwou. Dedena, me kie ruọ ivovavovo. Dede nọ o wọso uzi egọmeti, o jọ lọlọhọ kẹ omẹ re mẹ dẹ ige okenọ me te kpobọ ẹwho mẹ evaọ Kazakhstan. Mẹ jẹ da udi ogaga vrẹ oma gbe idi efa nọ a rẹ jọ obomai ru.

Nọ me nwrotọ no iruo iwuhrẹ no, me te kuomagbe ogbaẹmo egọmeti Russia ikpe ivẹ. Dede na, eware jọ nọ me wuhrẹ no Ebaibol na ze okenọ mẹ jọ ọmaha e gbẹ jọ omẹ uzou. Nọ uvẹ u te rovie, mẹ jẹ hae ta kpahe Jihova  kẹ ibe isoja mẹ, yọ mẹ jẹ hae thọ Isẹri na nọ ahwo a tẹ be ta erue kpahe ae.

Nọ etoke odibọgba mẹ wọhọ osoja u re no, mẹ tẹ kwa kpohọ Germany. Nọ mẹ jọ evuẹ erara nọ i no erẹwho efa ze, a kẹ omẹ omobe Isẹri Jihova jọ nọ a re ro wuhrẹ ahwo Ebaibol. Me se rie avọ ọwhọ jẹ ruẹ inọ eware nọ omobe na o ta uzẹme. Dede na, o jọ bẹbẹ kẹ omẹ re me si obọ no ige gbe isigareti ivovo. Nọ omoke jọ o vrẹ no, mẹ tẹ kwa kẹle ẹwho nọ a re se Karlsruhe. Mẹ jọ etẹe nyaku omọvo Isẹri Jihova jọ, o te mu omẹ Ebaibol na họ ewuhrẹ.

EPANỌ EBAIBOL NA O RO NWENE UZUAZỌ MẸ: Mẹ jọ udu mẹ riẹ kri no inọ Ebaibol na yọ Ẹme Ọghẹnẹ. Nọ me se omobe-uwuhrẹ Ebaibol nọ a kẹ omẹ na no, u te mu omẹ ẹro viere inọ Ebaibol na o kẹ iyo enọ kpobi nọ i wuzou evaọ uzuazọ. Ghele na, o rehọ omẹ oke krẹkri re mẹ sai si obọ no iruemu anwae mẹ. Uwhremu na, me te ti si ohrẹ nọ o rrọ 2 Ahwo Kọrint 7:1 na te iroro, jẹ gbaemu inọ me re ru oma mẹ fo rono “eware [kpobi] nọ i re zue oma gbe ẹzi,” onọ u dhesẹ nọ mẹ rẹ siọ ivovavovo ba.

O raha oke mẹ tẹ siọ ige ivovo ba ha. Rekọ o rehọ omẹ emerae ezeza soso taure me te ti si obọ no isigareti. Ẹdẹjọ, Osẹri nọ o je ru uwuhrẹ Ebaibol kugbe omẹ na ọ tẹ nọ omẹ nọ, “Eme họ ẹjiroro nọ whọ rọ rrọ uzuazọ?” Onọ yena o lẹliẹ omẹ roro gaga kpahe isigareti ivovo nọ o reria omẹ obọ no na. Mẹ daoma ẹsibuobu re mẹ siọ ivovavovo ba. Rekọ no umuo oke yena vrẹ, mẹ tẹ gbaemu nọ mẹ rẹ lẹ nọ isiuru isigareti ivovo e tẹ nwane nyaze, ukpenọ me re vovo no mẹ tẹ yare Ọghẹnẹ kẹ erọvrẹ. Me te fi ẹdẹ jọ họ evaọ ukpe 1993 nọ mẹ rẹ rọ siọ ivovavovo ba. Avọ obufihọ Jihova, me ri dhobọte isigareti anwọ oke yena ze he.

IRERE NỌ ME WO NO: Enẹna nọ me si obọ no ige gbe isigareti ivovo nọ e rẹ rehọ ugho jẹ raha ugboma na, oma mẹ u woma vi epaọ ọsosuọ no. Enẹna, me wo uvẹ-ọghọ nọ mẹ rọ rrọ omọvo ahwo nọ e be rọ unevaze ru iruo evaọ uwou ogha Isẹri Jihova nọ o rrọ Germany. Eva e be were omẹ inọ me fi ohrẹ areghẹ Ebaibol họ iruo evaọ uzuazọ mẹ! Ẹriẹ oware nọ Ebaibol na o wuhrẹ o kẹ omẹ uvi ẹjiroro no evaọ uzuazọ.

UDHESẸ

ODẸ: TITUS SHANGHADI

IKPE: 43

ORẸWHO RIẸ: NAMIBIA

IKU RIẸ: OMỌVO OTU UGBARUGBA

UZUAZỌ MẸ EVAỌ OKE NỌ U KPEMU: Iwhre jọ evaọ ẹkwotọ Ohangwena evaọ ofẹ ẹkpẹlobọ ovatha-ọre Namibia mẹ jọ whẹro. Evaọ ẹmo jọ nọ a jọ ẹkwotọ na fi evaọ etoke ikpe ọ 1980, a kpe ahwo iwhre mai jọ ukpe ugbobọ je kpe ejọ whu. Evaọ iwhre mai, ọmọzae nọ ọ goma ohọre nọ ọ rẹ sae rọ ugbobọ kpe ibe emezae efa ọvo họ ọnọ o te ọzae. Fikiere, me te wuhrẹ epanọ a rẹ họre!

Nọ me nwrotọ no isukulu no, me te kpohọ  ẹwho Swakopmund evaọ Namibia nyai lele oniọvo oni mẹ rria. Nọ mẹ nwani te obei, me te kuomagbe izoge emezae ugbarugba jọ. Ma jẹ hae nyai ru ozighi evaọ eria wọhọ ehọtẹle gbe iwou nọ a rẹ jọ da idi, enọ a kẹ ahwo obiebi uvẹ nọ a kpohọ họ. Ma lele ahwo nọ i re roro ẹwho gbe iporisi họre unuẹse buobu. K’aso k’aso, mẹ jẹ hae wha amagha hayo ọpia ọdada lele oma, onọ mẹ sae rọ họre ohwo kpobi nọ ọ gwọlọ omẹ ẹme.

Kiọkọ omojọ re a kpe omẹ kufiẹ aso ẹdẹjọ nọ utu mai avọ utu ugbarugba ofa ma jẹ họre. Ohwo utu odekọ na jọ ọ vẹruọ omẹ evaọ emu je ti bru uzou mẹ no, rekọ ohwo utu mẹ jọ ọ tẹ tehe iẹe kie, whu fithọ. Dede nọ me je ti whu no na, mẹ rọwo siọ ozighi ba ghele he. Ẹsikpobi nọ me te wo ẹwhọ kugbe ohwo, makọ ọzae hayo aye, mẹ họ ọnọ ọ rẹ kake kpaobọ tehe.

EPANỌ EBAIBOL NA O RO NWENE UZUAZỌ MẸ: Orọ ọsosuọ nọ mẹ rọ kezọ kẹ omọvo Isẹri Jihova, aye na o se awọ jọ Olezi 37 kẹ omẹ, jẹ vuẹ omẹ nọ eyaa omawere efa kpahe obaro na e rrọ obe Eviavia. Rekọ fikinọ ọ fodẹ ugogo eria nọ eyaa yena e rrọ kẹ omẹ hẹ, mẹ tẹ gwọlọ Ebaibol jọ je se oma obe Eviavia na kpobi aso yena. O were omẹ oma nọ me se ku eyaa nọ e rrọ Eviavia 21:3, 4, inọ “uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.” Nọ Isẹri na a zihe bru omẹ ze, mẹ tẹ jẹ uwuhrẹ Ebaibol rehọ.

O jọ bẹbẹ re me nwene iroro gbe uruemu mẹ. Rekọ me te ti wuhrẹ no Iruẹru Ikọ Na 10:34, 35 ze inọ “Ọghẹnẹ ọ rẹ jẹ ahwo [jọ] ọvo rehọ họ, rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.” U te no ere no, mẹ daoma gaga re me fi Ahwo Rom 12:18 họ iruo, onọ o ta nọ: “Epa umutho nọ orọ owhai oma na, wha rehọ iẹe lele ahwo kpobi ria dhedhẹ.”

Nọ mẹ be daoma whaha ofu ọgaga na, yọ mẹ be daoma epanọ me re ro si obọ no ivovavovo nọ e reria omẹ obọ no. Ẹsibuobu mẹ jẹ hae lẹ se Jihova avọ irui-oviẹ inọ o fi obọ họ kẹ omẹ. Rekọ oke ọsosuọ mẹ jẹ riẹe ru hu, mẹ jẹ hae tọlọ isigareti vovo no, be ta kẹ omamẹ nọ onana họ “orọ urere,” taure mẹ tẹ lẹ se Ọghẹnẹ kẹ obufihọ. Osẹri nọ o je wuhrẹ Ebaibol kugbe omẹ na o fi obọ họ kẹ omẹ ruẹ epanọ u wuzou te re mẹ hae lẹ nọ isiuru isigareti ivovo e tẹ nyaze, orọnọ me te vovo no ho. O tẹ jẹ gwọlọ nọ mẹ rẹ whaha usu amọfa nọ i re vovo. Me te je fi ohrẹ ofa nọ a kẹ omẹ họ iruo inọ mẹ vuẹ ibe iruiruo mẹ kpahe epanọ ivovavovo i yoma te. Onana u fi obọ họ kẹ omẹ gaga, keme u ru nọ me gbe je ro wo isigareti ọvọvẹ hẹ—ibe iruiruo mẹ nọ i je vovo a gbẹ jẹ kẹ omẹ hẹ.

Ukuhọ riẹ, me te si obọ no ivovavovo gbe ekpehre uzuazọ nọ me je yeri. Nọ me wuhrẹ Ebaibol na te emerae ezeza no je bi fi eware nọ me bi wuhrẹ họ iruo, me te ti te kẹ ame-ọhọ wọhọ omọvo Isẹri Jihova.

IRERE NỌ ME WO NO: Uyoyou nọ mẹ jọ udevie rai ruẹ ghelọ uyẹ hayo orẹwho sa-sa nọ a no ze u ru rie mu omẹ ẹro inọ Isẹri Jihova họ egagọ uzẹme. Taure mẹ tẹ họ-ame wọhọ omọvo Isẹri Jihova dede, oyibo jọ evaọ ukoko na o zizie omẹ kpohọ uwou riẹ nyai lele ai re emu. O jọ wọhọ ewezẹ kẹ omẹ. Mẹ avọ oyibo ma re keria kugbe ẹdẹvo ho, kabikọ lele iei re emu evaọ uwou riẹ. Whaọ me zihe ruọ omọvo inievo akpọ-soso no.

Oke nọ u kpemu, otu nọ o re rro iro gbe elakpa a jẹ daoma gba omẹ họ nwene eriwo gbe uruemu mẹ, rekọ a sai ru ei hi. Ebaibol na ọvo o wo ogaga nọ o sai ro nwene uruemu mẹ je ru omẹ wo evawere.

[Ẹme nọ a fi ẹgba họ nọ ọ rrọ ẹwẹ-obe avọ 31]

“Ẹsibuobu mẹ jẹ hae lẹ se Jihova avọ irui-oviẹ inọ o fi obọ họ kẹ omẹ”