Beibele e Fetoša Maphelo

Monna yo a ilego a thoma go kgoga patše le motšoko e sa le yo monyenyane o hweditše bjang matla a go kgaotša go dira bjalo? Ke’ng seo se ilego sa kgontšha setho sa sehlopha sa disenyi go laola kgalefo ya sona le go fenya lehloyo la semorafe? Ela hloko seo ba se bolelago.

PEGO YA BOPHELO BJA GAGWE

LEINA: HEINRICH MAAR

NYWAGA: 38

NAGA: KAZAKHSTAN

BOPHELO BJA PELE E E-BA MOKRISTE: GO LEMALELA PATŠE LE MOTŠOKO

BOPHELO BJA-KA BJA NAKONG E FETILEGO: Ke belegetšwe borwa bja Kazakhstan, mo e ka bago dikhilomithara tše 120 go tšwa motseng wa Tashkent. Lefelo leo le be le omile e bile le fiša selemo, le e-na le dithempheretšha tše di fihlago go 45°C, gomme marega thempheretšha e be e theoga go fihla mo e ka bago go −10°C—maemo a mabotse bakeng sa go bjala diterebe le patše.

Batswadi ba-ka e be e le Majeremane. Bobedi bja bona e be e le Bakriste ba baebangedi eupša ba be ba sa latele bodumedi bja bona. Lega go le bjalo, ba ile ba nthuta go boeletša thapelo ya Tatawešo ka hlogo. Ge ke be ke e-na le nywaga e 14, mma le kgaetšedi ya-ka ba ile ba ithuta Beibele ka nakwana le Dihlatse tša Jehofa. Lebakeng le lengwe, ke ile ka kwa ge Dihlatse tše pedi tšeo di bego di ithuta le mma di mmontšha leina la Modimo, Jehofa, ka Beibeleng ya gagwe ya kgale. Seo se ile sa nkgahla. Mma o ile kgaotša go ithuta, gomme ga se ka ka ka gata megato e oketšegilego ya go ithuta ka Modimo. Lega go le bjalo, lebakeng le lengwe re le sekolong, morutiši wa rena o ile a re botša maaka ka sehlotswana seo go thwego ke sa Dihlatse tša Jehofa. Ka ge ke ile ka ya dibokeng tše dingwe tša Dihlatse tša Jehofa le kgaetšedi ya-ka, ke ile ka botša morutiši wa-ka gore dilo tšeo a bego a di bolela e be e se therešo.

Ge ke e-ba le nywaga e 15, ke ile ka romelwa Leningrad, yeo ga bjale e bitšwago St. Petersburg, Russia, go ithutela mošomo. Ke ile ka botša batho bao ke bego ke dula le bona ka phapošing bonyenyane bjoo ke bego ke ithutile bjona ka Jehofa. Lega go le bjalo, ke ile ka thoma go kgoga. Ge ke be ke etela lapa lešo kua Kazakhstan, go be go le bonolo go reka patše, gaešita le ge go dira bjalo go be go sa dumelelwa. Le gona ke ile ka nwa vodka e ntši kudu le beine ya go itirelwa.

Ke ile ka aloga sekolong sa go ithutela mošomo gomme ka tsenela sešole sa Soviet nywaga e mebedi. Lega go le bjalo, ke sa dutše ke gopola tše  dingwe tša ditherešo tšeo ke ithutilego tšona go tšwa Beibeleng ge ke be ke le yo monyenyane. Ge dibaka di be di bulega, ke be ke boledišana le mašole ao ke šomago le ona ka Jehofa le go emelela Dihlatse ge go bolelwa maaka ka tšona.

Ge ke se na go fetša tirelo ya tša bohlabani, ke ile ka hudugela Jeremane. Ge ke be ke le kampeng ya bafaladi, ke ile ka amogela kopi ya puku ya go ithuta Beibele yeo e gatišitšwego ke Dihlatse. Ke ile ka e bala ka mafolofolo gomme ka phetho ka gore seo e se bolelago ke therešo. Lega go le bjalo, ke ile ka palelwa ke go kgaotša go kgoga motšoko le patše. Nakwana ka morago, ke ile ka hudugela kgaufsi le motse wa Karlsruhe. Moo ke ile ka kopana le yo mongwe wa Dihlatse tša Jehofa, gomme o ile a thoma go ithuta Beibele le nna.

KAMOO BEIBELE E FETOTŠEGO BOPHELO BJA-KA: Ke na le nako e telele ke nagana gore Beibele ke Lentšu la Modimo. Le gona ka morago ga go bala puku yeo ke e amogetšego ya go ithuta Beibele, ke ile ka kgodišega gore Beibele e araba dipotšišo ka moka tše bohlokwa bophelong. Lega go le bjalo, go fetoša mekgwa ya-ka go ntšere nako e telele. Mafelelong, ke ile ka tutuetšwa ke keletšo ya Beibele e tšwago go 2 Bakorinthe 7:1 gomme ka dira phetho ya go itlhwekiša ‘ditšhileng tšohle tša nama le tša moya,’ e lego seo se bolelago gore ke kgaotše go kgoga patše le motšoko.

Ke ile ka kgona go kgaotša go kgoga patše mo e nyakilego go ba ka yona nako yeo. Eupša go tšere dikgwedi tše tshela gore ke kgaotše go kgoga motšoko. Ka letšatši le lengwe, Hlatse yeo e bego e ithuta Beibele le nna e ile ya mpotšiša gore, “Morero wa gago wa bophelo ke ofe?” Seo se ile sa ntira gore ke nagane ka go lemalela ga-ka motšoko. Ke ile ka leka go kgaotša go kgoga ka makga a mmalwa. Lega go le bjalo, ga bjale ke phethile ka gore ke rapele pele ke obelela sekerete go e na le gore ke kgopele Modimo tebalelo ka morago. Ka 1993, ke ile ka bea letšatši leo ka lona ke bego ke tla kgaotša go kgoga. Ka thušo ya Jehofa, ga se ka ka ka kgoma sekerete ga e sa le go tloga ka nako yeo.

KAMOO KE HOLEGILEGO KA GONA: Ka ge ga bjale ke kgaoditše mokgwa o bitšago kudu le o senyago wa go kgoga patše le motšoko, bophelo bja-ka bo kaonefetše. Lehono, ke na le tokelo ya go ba mošomi wa moithapi ofising ya lekala ya Jeremane ya Dihlatse tša Jehofa. Ke thabišwa kudu ke gore ke ithutile go diriša bohlale bja Beibele bophelong bja-ka! Go tseba seo Beibele e se rutago go nneile morero wa kgonthe wa bophelo.

PEGO YA BOPHELO BJA GAGWE

LEINA: TITUS SHANGADI

NYWAGA: 43

NAGA: NAMIBIA

BOPHELO BJA PELE E E-BA MOKRISTE: SETHO SA SEHLOPHA SE ŠORO SA DISENYI

BOPHELO BJA-KA BJA NAKONG E FETILEGO: Ke goletše motsaneng wa magaeng wa Ohangwena wo o lego leboa la Namibia. Batho ba motsaneng wa gešo ba ile ba bethwa le go bolawa ntweng yeo e bego e lwelwa lefelong le ka bo-1980. Motsaneng wa gešo, mošemanyana o be a lebelelwa e le monna ge feela a kgona go lwa gabotse le go betha bašemanyana ba bangwe. Ka gona, ke ile ka ithuta go lwa!

Ge ke fetša sekolo, ke ile ka yo dula le malome  toropong ya Swakopmund yeo e lego lebopong. Kapejana ka morago ga go fihla ga-ka, ke ile ka ba setho sa sehlopa sa disenyi sa masogana a marabele. Re be re e-ya mafelong a mangwe toropong moo batho ba baso ba bego ba sa amogelwe, a bjalo ka dihotele le mafelo a go rekišetša bjala, e le gore re tsoše ditshele. Ka makga a mmalwa, re be re e-lwa le bahlapetši le maphodisa. Bošego bjo bongwe le bjo bo bongwe ke be ke itlhama ka thipa e bogale e kgolo e le go itokišeletša go hlasela motho le ge e le ofe yo a lwago le nna.

Bošegong bjo bongwe ke ile ka phologa lehu ge re be re dutše re e-lwa le sehlopha se sengwe sa disenyi. Setho se sengwe sa sehlopha seo re bego re e-lwa le sona se ile sa ntla ka morago se nyaka go nkgaola hlogo, gomme setho se sengwe sa sehlopha sa rena se ile sa mmetha gomme a idibala. Bošoro bo be bo dutše bo laola bophelo bja-ka go sa šetše gore ke nyakile ke e-hwa. Ge ke be ke ngangišana le motho yo mongwe le yo mongwe, monna goba mosadi, ke be ke dula ke le wa pele wa go foša letswele.

KAMOO BEIBELE E FETOTŠEGO BOPHELO BJA-KA: Ge ke be ke kopana le yo mongwe wa Dihlatse tša Jehofa ka lekga la pele, mosadi yoo o ile a bala ditemana go tšwa go Psalme 37 ke moka a mpotša gore puku ya Beibele ya Kutollo e hupere dikholofetšo tše dingwe tše di kgahlišago tša bokamoso. Eupša ka ge a se a ka a bolela gore dikholofetšo tšeo di kae kamoo pukung, ke ile ka nyaka Beibele gomme ka bala puku ya Kutollo ka moka bošego bjoo. Ke ile ka rata kholofetšo yeo ke e hweditšego go Kutollo 21:3, 4 e rego “lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” Ge Dihlatse tšeo di boa, ke ile ka dumela go ithuta Beibele le tšona.

Ke ile ka thatafalelwa ke go fetoša tsela yeo ke bego ke nagana le go dira dilo ka yona. Eupša ke ithutile go tšwa go Ditiro 10:34, 35 gore “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira go loka o a amogelega go yena.” Le gona, ke ile ka katanela go diriša seo se bolelwago ke Baroma 12:18 ge e re: “Ge e ba go kgonega, go fihla moo go ithekgilego ka lena, e-bang le khutšo le batho bohle.”

Go oketša go ithuteng go laola kgalefo ya-ka, gape ke be ke swanetše go kgaotša go kgoga motšoko. Gantši, ke tletše megokgo mahlong, ke be ke rapela Jehofa gore a nthuše. Eupša mathomong go molaleng gore ke be ke dira dilo ka tsela e fošagetšego, ka go bolela gore ke be ke kgoga sekerete sa mafelelo ke moka ke rapela ka morago. Hlatse yeo e bego e ithuta Beibele le nna e ile ya nthuša go lemoga bohlokwa bja go rapela pele nka tšea sekerete. Gape go be go nyakega gore ke pheme go gwerana le bao ba bego ba kgoga. Go feta moo, ke ile ka latela tšhišinyo ya go bolela le bašomi-gotee mabapi le kamoo go kgoga go bego go se gwa loka ka gona. Se se ile sa nthuša e le ruri, ka ge se ile sa dira gore ba se sa hlwa ba mpha disekerete.

Mafelelong, ke ile ka kgona go kgaotša go kgoga gomme ka tlogela tsela ya-ka ya bophelo ya peleng. Ka morago ga dikgwedi tše tshela ke ithuta le go diriša melao ya motheo ya Beibele, ke ile ka swanelegela go kolobetšwa ke le yo mongwe wa Dihlatse tša Jehofa.

KAMOO KE HOLEGILEGO KA GONA: Ke ile ka kgolwa gore Dihlatse tša Jehofa di bodumeding bja therešo ge ke be ke bona lerato leo di ratanago ka bona, go sa šetšwe morafo goba mmala wa tšona. Gaešita le pele ke kolobetšwa ke le Hlatse, setho se sešweu sa phuthego se ile sa ntaletša legaeng la sona e le gore re thabele dijo gotee. E be eka ke a lora. Ke be ke se ka ka ka dula ka khutšo le motho yo mošweu, ke se sa bolela ka go ja dijo ka lapeng la gagwe. Ga bjale ke be ke le karolo ya borwarre bja kgonthe bja ditšhaba-tšhaba.

Nakong e fetilego, bahlapetši le maphodisa ba ile ba leka go nkgapeletša go fetoša tsela yeo ke bego ke nagana le go dira dilo ka yona, eupša ga se ba ka ba atlega. Ke Beibele feela yeo e bilego le matla a go nthuša go fetoša semelo sa-ka le go ba monna yo a thabilego.

[Ntlhakgolo go letlakala 29]

“Gantši, ke tletše megokgo mahlong, ke be ke rapela Jehofa gore a nthuše”