Bijbel e kenki sma libi

Fa wan man di bigin smoko marwana nanga tabaka sensi di a yongu, feni a krakti fu tapu nanga a takru gwenti disi? Fa wan memre fu wan grupu yonguwan di ben e du ogri, leri fu hori ensrefi fu no atibron èn fu no teige sma fu tra ras? Luku san den sma disi e fruteri.

NEN: HEINRICH MAAR

YARI: 38

KONDRE: KASAKSTAN

A BEN DE WAN SMA DI BEN GWENTI SMOKO MARWANA NANGA TABAKA

A LIBI FU MI FOSI: Mi gebore na wan presi di de sowan 120 kilometer fu a foto Tashkent, na a zuidsei fu Kasakstan. Na ini a faya pisi ten fu a yari a drei èn a faya srefisrefi, sowan 45 graden Celsius. Ma na ini a kowru pisi ten fu a yari, a kowru srefisrefi, sowan 10 graden Celsius ondro nul. Fu dati ede a weer bun fu kweki droifi nanga marwana.

Mi papa nanga mama ben de fu Doisrikondre, èn den ben de Protestantsma. Ma aladi den no ben e go na kerki, toku den leri mi fu taki a Wi Tata begi na ede. Di mi ben abi 14 yari, mi mama nanga mi bigi sisa ben e studeri Bijbel nanga Yehovah Kotoigi fu wan pisi ten. Wan leisi mi ben arki di den tu Kotoigi ben studeri nanga mi mama, èn den ben sori en a nen fu Gado, Yehovah, na ini en eigi owru Bijbel. A sani dati ben naki mi ati. Fu di mi mama no go doro nanga a Bijbelstudie, meki mi no du muiti moro fu leri sabi Gado. Ma wan pisi ten baka dati di mi ben de na skoro, dan a skoromisi fu mi ben fruteri ala sortu lei di sma ben taki fu Yehovah Kotoigi, di sma ben kari wan sekte. Ma fu di mi ben go wan tu leisi nanga mi sisa na den konmakandra fu Yehovah Kotoigi, meki mi taigi a skoromisi taki den sani di a ben yere fu sma èn di a ben fruteri baka, no tru.

Di mi tron 15 yari, mi mama nanga mi papa seni mi go na a foto Leningrad, now a nen Sint-Petersburg, na Rosiakondre. Drape mi go leri fu du wan wroko. Aladi mi no ben sabi so furu fu Yehovah, toku mi ben fruteri den boi di ben de na ini wan kamra nanga mi, den sani di mi ben sabi fu En. Ma toku mi bigin smoko tabaka. Te mi ben go na oso na ini Kasakstan, a ben makriki gi mi fu bai marwana, aladi dati ben de teige lantiwet. Boiti dati, mi ben dringi tumusi furu tranga sopi nanga win di ben meki na oso.

Di mi kaba nanga a skoro, dan mi go tu yari na ini a legre fu Sovyet-Unie. Ma mi no ben  frigiti sonwan fu den sani di mi ben leri fu Bijbel di mi ben yongu. Te mi ben feni na okasi, dan mi ben taki nanga den tra srudati, fu Yehovah èn mi ben opo taki gi den Kotoigi te sma ben fruteri lei fu den.

Baka di mi komoto na ini a legre, mi froisi go na Doisrikondre. Di mi ben de na ini wan kampu fu sma di ben froisi kon libi drape, mi kisi wan Bijbelstudie buku, di Kotoigi ben tyari kon na doro. Mi leisi a buku nanga bigi prisiri èn mi kon si taki den sani di skrifi na ini, tru. Ma aladi mi ben sabi dati, toku mi no ben man tapu nanga a gwenti fu smoko tabaka nanga marwana. Baka wan pisi ten mi froisi go tan krosibei fu a foto Karlsruhe. Drape mi miti wan Kotoigi fu Yehovah èn a bigin studeri Bijbel nanga mi.

A FASI FA BIJBEL KENKI MI LIBI: Fu wan langa pisi ten kaba mi ben abi a denki taki Bijbel na Gado Wortu. Baka di mi leisi a Bijbelstudie buku di mi ben kisi, dan mi ben abi na overtoigi taki Bijbel e gi piki tapu ala den prenspari aksi fu a libi. Ma toku, a ben teki langa fosi mi kenki den gwenti fu mi. Te fu kaba, a rai na ini 2 Korentesma 7:1 naki mi ati èn mi teki a bosroiti fu krin misrefi fu ibri sani di kan ’doti mi skin nanga mi denki’. Dati ben wani taki dati mi ben musu tapu fu smoko marwana nanga tabaka.

A no ben teki langa fosi mi tapu nanga a smoko fu marwana. Ma a ben teki siksi mun langa fosi mi ben man tapu nanga a takru gwenti fu smoko tabaka. Wan dei, a Kotoigi di ben e studeri Bijbel nanga mi, aksi mi san na a marki fu mi libi. A sani dati poti mi na prakseri broki, fu di mi ben e smoko ete. Mi ben pruberi wan tu leisi kaba fu tapu nanga a gwenti disi. Ma a leisi disi mi bosroiti fu begi Gado fosi mi ben langa mi anu teki wan sikaret, na presi fu aksi En pardon baka te mi smoko. Na ini 1993, mi marki wan dei te mi ben o tapu fu smoko tabaka. Nanga yepi fu a krakti di Yehovah e gi, mi no smoko wan sikaret noiti moro sensi a dei dati.

DEN WINI DI MI KISI: Fu di mi no e smoko a diri marwana nanga tabaka moro di ben e pori mi skin, meki mi kon de moro gosontu. Now mi abi a grani fu wroko leki wan friwani wrokoman na a bijkantoro fu Yehovah Kotoigi na Doisrikondre. Mi breiti srefisrefi taki mi fiti den rai fu Bijbel na ini mi libi! Fu di mi sabi san Bijbel e leri, meki dati e gi mi wan trutru marki na ini a libi.

NEN: TITUS SHANGADI

YARI: 43

KONDRE: NAMIBIA

A BEN DE WAN MEMRE FU WAN GRUPU YONGUWAN DI BEN E DU OGRI

A LIBI FU MI FOSI: Mi gro kon bigi na ini wan dorpu na Ohangwena, wan kontren na a noordsei fu Namibia. Na ini den yari baka 1980, wan orloku ben de na ini a kontren disi. Na a ten dati furu sma fu a dorpu pe mi ben e tan, kisi fonfon èn den lasi den libi. Na ini a dorpu fu mi, sma ben e si wan boi leki wan trutru man-nengre soso te a sabi feti bun èn fon tra boi. Dati meki mi leri fu feti.

Di mi kaba nanga skoro, dan mi froisi go tan  nanga mi omu na ini Swakopmund, wan foto di de na sekanti. Syatu baka dati, mi tron wan memre fu wan grupu yonguwan di ben e du ogri èn di no ben e gi yesi. Wi ben e go na presi soleki hotel nanga bar pe sma no ben wani taki blakaman kon, soso fu bigin wan feti. Na wan tu okasi wi ben feti nanga waktiman èn sosrefi nanga skowtu. Ibri neti mi ben waka nanga wan srapu langa nefi noso wan owru, fu man feti nanga iniwan sma di ben kon na mi pasi.

Wan neti, di wi ben feti nanga wan tra grupu di ben de wi feanti, dan den misi fu kiri mi. Wan fu den ben kon na mi baka èn pikinmoro a kapu mi ede puru, ma wan mati fu mi naki en flaw. Aladi mi misi fu dede, toku mi ben tan feti go doro. Efu mi ben kisi trobi nanga wan sma, awansi na wan mansma noso wan umasma, ala ten na mi ben de a sma di ben naki fosi.

A FASI FA BIJBEL KENKI MI LIBI: A fosi leisi di mi miti wan Kotoigi fu Yehovah, a leisi wan tu vers fu Psalm 37 gi mi èn a taigi mi taki a Bijbel buku Openbaring abi tra moi pramisi gi a ten di e kon. Ma fu di a no ben taki pe den pramisi disi ben skrifi na ini a buku dati, meki mi suku wan Bijbel èn mi leisi a heri buku Openbaring a neti dati. Mi ben lobi a pramisi di mi leisi na ini Openbaring 21:3, 4 di e taki dati „dede no sa de moro; nowan sari, noso krei, noso pen no sa de moro”. Di den Kotoigi kon baka na mi, dan mi bigin studeri Bijbel.

A ben muilek srefisrefi fu kenki a fasi fa mi ben e denki nanga a fasi fa mi ben e tyari misrefi. Ma mi ben leri fu Tori fu den Apostel 10:34, 35 taki „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun”. Mi ben du tranga muiti tu fu fiti a rai di skrifi na ini Romesma 12:18. A tekst dati e taki: „Efu a kan, efu a e didon na unu, dan libi na ini vrede nanga ala sma.”

Boiti taki mi ben musu leri fu hori misrefi, mi ben musu tapu nanga a takru gwenti di mi ben abi fu smoko tabaka. Nofo tron, nanga watra-ai mi ben e begi Yehovah fu yepi mi. Ma na a bigin mi ben e denki, taki mi ben o smoko mi lasti sikaret, èn baka dati mi ben o begi. Ma dati no ben de wan bun fasi fu handri. A Kotoigi di ben e studeri Bijbel nanga mi yepi mi fu si taki a de prenspari fu begi fosi mi teki wan sikaret fu smoko. Mi ben musu sorgu tu, taki mi no abi demakandra moro nanga sma di e smoko. Boiti dati, mi teki a rai fu taki nanga den sma na wrokope fu den takru bakapisi di sma abi te den e smoko. A sani disi yepi mi trutru fu di sma na wrokope no ben langa sikaret moro gi mi.

Te fu kaba, mi no ben smoko moro èn mi no ben tyari misrefi leki fosi moro. Baka di mi studeri Bijbel siksi mun, èn mi du san mi leri, mi ben man teki dopu èn tron wan Kotoigi fu Yehovah.

DEN WINI DI MI KISI: Mi kisi na overtoigi taki den Kotoigi fu Yehovah abi a tru bribi, di mi si taki den lobi makandra awansi fu sortu ras den de. Fosi mi dopu srefi, wan weti brada fu a gemeente gi mi wan kari fu kon nyan na en oso. A sani dati ben de leki wan dren, fu di dati ben de a fosi leisi taki mi ben abi switi demakandra nanga wan weti sma. Now mi abi tru brada nanga sisa na heri grontapu.

Na ini a ten di pasa, waktiman nanga skowtu pruberi fu dwengi mi fu kenki a fasi fa mi ben denki èn handri, ma den no ben man du dati. Soso Bijbel ben man kenki a fasi fa mi ben e libi èn mi kon de koloku now.

[Prenspari pisi na tapu bladzijde 29]

„Nofo tron, nanga watra-ai mi ben e begi Yehovah fu yepi mi”