Pamangkot sang mga Bumalasa

Pila Gid Bala ang Dapat Ko Iamot?

“Ginahigugma sang Dios ang nagahatag sing malipayon.” (2 Corinto 9:7) Ini nga mga pulong pamilyar sa minilyon ka tawo sa bug-os nga kalibutan. Pero, ang pila sa mga nagasimba nagabatyag nga obligado sila sa paghatag sing labaw pa sa ila masarangan. Ang matuod, ginaobligar sang iban nga relihion ang ila mga miembro nga maghatag sing espesipiko nga kantidad. Ginatawag ini nga ikanapulo, ukon paghatag sa simbahan sang 10 porsiento sang imo kinitaan.

Ginapatuman gid man bala sang Biblia ang pag-amot sing espesipiko nga kantidad? Pila gid man bala ang dapat ko iamot?

Mga Alamutan kag Boluntaryo nga mga Donasyon sang Una

Ang Biblia nagaunod sang maathag nga instruksion sang Dios sa pungsod sang Israel kon pila ang dapat nila iamot. (Levitico 27:30-32; Numeros 18:21, 24; Deuteronomio 12:4-7, 11, 17, 18; 14:22-27) Ini nga obligasyon indi mabudlay para sa ila. Nagsaad si Jehova nga kon tumanon sang pungsod ang iya sugo, mangin ‘bugana sila sa kaayohan.’—Deuteronomio 28:1, 2, 11, 12.

Sa iban nga kahimtangan, mahimo makahatag ang mga Israelinhon sing diutay ukon daku nga amot, suno sa ila luyag. Halimbawa, sang nagplano si Hari David nga magpatindog sang templo para kay Jehova, nag-amot ang iya mga sakop sing “lima ka libo ka talanton nga bulawan.” * (1 Cronica 29:7) Ipaanggid ini sa naobserbahan ni Jesus sang ari sia sa duta. Nakita niya ang ‘isa ka imol nga balo nga babayi nga naghulog sing duha ka gamay nga sensilyo nga may tuman ka diutay nga balor’ sa bahandian sang templo. Pila ang iya ginhulog nga amot? Nagabalor lamang ini sing 1.5 porsiento sang isa ka adlaw nga sueldo. Pero, nagsiling si Jesus nga ginapabaloran ining diutay nga kantidad.—Lucas 21:1-4.

Dapat Bala Maghatag sing Espesipiko nga Kantidad ang mga Cristiano?

Ang mga Cristiano wala napaidalom sa Kasuguan nga katipan nga ginhatag sa Israel. Gani, indi sila obligado nga maghatag sing espesipiko nga kantidad para sa Dios. Pero, sa matuod nga Cristianong kongregasyon, ang paghatag nagaresulta sa daku nga kalipay. Si Jesucristo mismo nagsiling: “May kapin nga kalipay sa paghatag sangsa pagbaton.”—Binuhatan 20:35.

Ginasuportahan sang mga Saksi ni Jehova ang ila bug-os kalibutan nga pagbantala paagi sa boluntaryo nga mga amot. Ini nga mga amot ginagamit sa pag-imprinta sang mga balasahon, kaangay sini nga magasin nga imo ginabasa, kag sa pagpatindog kag pagmentenar sang ila tilipunan nga ginatawag Kingdom Hall. Ang mga natipon nga amot wala ginasueldo. Ang mga bug-os tion nga nagapakigbahin sa paghimo sing disipulo nga hilikuton nagabaton sing bulig para sa ila plete kag iban pa nga personal nga kagastuhanan. Pero wala sing may nagapamilit nga dapat sila hatagan sini nga bulig. Ang matuod, ang kalabanan sang mga Saksi ni Jehova wala nagabaton sing kuarta agod suportahan ang ila pagbantala. Kundi nagatrabaho sila agod suportahan ang ila kaugalingon kaangay sang ginhimo ni Pablo nga nagtrabaho subong manughimo sing tolda.—2 Corinto 11:9; 1 Tesalonica 2:9.

Kon gusto sang isa nga mag-amot para sa buluhaton sang mga Saksi ni Jehova, pila ang iya dapat ihatag? Nagsulat si apostol Pablo: “Maghimo ang kada isa suno sa ginpamat-od niya sa iya tagipusuon, indi sing paganot ukon ginapilit, kay ginahigugma sang Dios ang nagahatag sing malipayon.”—2 Corinto 8:12; 9:7.

[Nota]