Nos Lektornan Ta Puntra

Kuantu Mi Mester Duna?

“Dios ta stima esun ku ta duna ku alegria.” (2 Korintionan 9:7) Miónes di hende rònt mundu ta bon konosí ku e palabranan ei. Sinembargo, algun hende religioso ta sinti ku nan tin ku duna mas di loke nan por duna. I en realidat algun religion ta pidi nan miembronan un suma fiho, esta, diesmo. Esaki ta 10 porshento di un hende su entrada.

Pero realmente Beibel ta bisa ku nos tin ku duna un suma fiho komo donashon? Den mi kaso, ta kuantu mi tin ku duna?

Loke e Israelitanan Mester A Duna i Loke Nan Por A Duna Boluntariamente

Den Beibel tin instrukshonnan masha kla enkuanto e kantidat ku e nashon di Israel mester a duna Dios. (Levítiko 27:30-32; Numbernan 18:21, 24; Deuteronomio 12:4-7, 11, 17, 18; 14:22-27) E rekisitonan akí tabata rasonabel. Yehova a primintí e nashon ku si nan obedesé su leinan, e lo laga e nashon “abundá den prosperidat.”—Deuteronomio 28:1, 2, 11, 12.

Pero na otro okashon, e israelitanan por a duna boluntariamente e kantidat ku nan tabata deseá, sea ta tiki òf hopi. Por ehèmpel, ora Rei David a plania pa traha un tèmpel pa Yehova, su súpditonan a duna oro ku tabata bal “sinku mil talento.” * (1 Krónikanan 29:7) Kompará esaki ku loke Hesus a nota ora e tabata riba tera. El a mira “un biuda pober ta tira dos plaka di koper” ku tabatin masha poko balor den e kaha di ofrenda na e tèmpel. Ta kuantu su donashon a bal? Solamente 1/64 parti di un dia di trabou. Tòg, Hesus a bisa ku e suma chikí akí tabata aseptabel.—Lukas 21:1-4.

Kristiannan Tin Ku Duna un Suma Fiho?

Kristiannan no ta bou di e pakto di Lei ku Dios a duna Israel. Pues, nan no tin ku duna un suma fiho na Dios. Sinembargo, den e berdadero kongregashon kristian, nos ta sinti nos masha kontentu ora nos duna. Hesukristu mes a bisa: ‘Dunamentu ta hasi hende mas felis ku risibí.’—Echonan 20:35, BPK.

Testigunan di Yehova ta sostené nan obra mundial di prediká mediante donashonnan boluntario. Ta usa e donashonnan akí pa imprimí literatura, manera e revista akí ku bo ta lesando, i pa konstruí i mantené nan lugánan di adorashon, ku yama Salòn di Reino. No ta usa e donashonnan akí pa paga salario. Algun Testigu ku ta dediká un gran parti di nan tempu na e trabou di prediká ta haña un kompensashon pa nan por kubri nan gastunan di transportashon i otro gastunan personal nesesario. Pero ningun hende no ta eksigí ku nan mester haña e yudansa akí. En realidat, e gran mayoria di Testigu di Yehova no ta haña yudansa finansiero pa nan por hasi e trabou di prediká. Al kontrario, mayoria di nan ta traha pa nan sostené nan mes, meskos ku Pablo a traha tènt pa sostené su mes.—2 Korintionan 11:9; 1 Tesalonisensenan 2:9.

Si un hende ta deseá di hasi un donashon pa sostené e obra ku Testigunan di Yehova ta hasi, kuantu e mester duna? Apòstel Pablo a skirbi: “Laga kada un hasi manera el a proponé den su kurason; no kontra su gustu òf obligá; pasobra Dios ta stima esun ku ta duna ku alegria.”—2 Korintionan 8:12; 9:7.

[Nota]