Ka Ui ta Tatou Aronga Tatau

Eia ka Tau kia Oronga Au?

“Te tangata oronga ma te rekareka ta te Atua e inangaro.” (2 Korinetia 9:7) Kua kite ua te mirioni ua atu i te ao katoa i taua au tuatua ra. Inara, penei ka inangaro tetai aronga aere pure kia maata atu ta ratou ka oronga. E umuumu ana tetai au akonoanga kia oronga to ratou au mema i tetai tuanga moni tinamou. E karangaia ana te reira e e tuanga ngauru, koia oki, kia oronga e 10 patene o taau moni angaanga na te akonoanga.

Te umuumu maira tikai ainei te Pipiria kia oronga tatou i tetai tuanga moni tinamou ei tauturu oronga ua? E ui kia koe uaorai e, eia ka tau kia oronga au?

Umuumuanga e te Tauturu Oronga ua i Mua Ana

Taka ua te au ikuikuanga i roto i te Pipiria ki te iti tangata Iseraela no runga i te maata o ta te Atua e umuumu maira kia oronga ratou. (Levitiku 27:30-32; Numero 18:21, 24; Deuteronomi 12:4-7, 11, 17, 18; 14:22-27) Kare e maata ana te umuumuia maira. Kia akarongo ratou, kua taputou a Iehova e ka ‘akamaata rava aia i te au mea memeitaki’ na te iti tangata.—Deuteronomi 28:1, 2, 11, 12.

No tetai au mea, ka oronga ratou i ta ratou ua i inangaro me e maata me e iti ua. Ei akaraanga, te parani anga te Ariki a Davida e patu i tetai iero no Iehova, kua oronga mai tona iti tangata i ‘te auro e rima tausani i te tareni.’ * (1 Paraleipomeno 29:7) Akaaite i teia ki ta Iesu i kite iaia i te enua nei. E kite atura aia “i tetai vaine takaua apinga kore i te tuku anga i nga lepeta e rua ki roto” i te pia apinga. Eaa te maata o tana i oronga? Mei te 1.5 patene o te moni angaanga i te ra. E oti akera kua akakite a Iesu e kua rava rai teia.—Luka 21:1-4.

Ka Anoanoia Ainei te Au Kerititiano kia Oronga i Tetai Tuanga Tinamou?

Kare te au Kerititiano i raro i te Ture koreromotu kia Iseraela. No reira kare ratou e umuumuia kia oronga i tetai tuanga tinamou ki te Atua. I roto ra i te putuputuanga Kerititiano, e mea mataora tikai kia oronga. Kua akakite a Iesu Karaiti e: “E mea meitaki i te oronga atu i te rave mai.”—Angaanga 20:35.

Te turuturu nei te Au Kite o Iehova i ta ratou angaanga tutu aere i te ao katoa na roto i te au tauturu oronga ua. Taangaangaia ana teia au tauturu ei nenei i te au puka, mei te makatini e tatau ra koe, ei patu e te akono i te au ngai akamorianga koia, te au Are Uipaanga Patireia. Te moni e akaputuia nei kare e taangaangaia ana ei tutaki aronga angaanga. Te aronga e akapou nei te maataanga i to ratou taime i roto i te angaanga akariro i te tangata ei pipi, e orongaia ana te tauturu ei tutaki i te au apinga akaoro e te au mea tei anoanoia no ratou uaorai. Inara kare e tangata e manono mai ana kia tutakiia. Ko te tika, kare te maataanga o te Au Kite o Iehova e tauturuia ana i te pae moni no ta ratou angaanga tutu aere. E angaanga moni ana ra te maataanga ei turuturu rai ia ratou, mei ia Paulo rai iaia e angaanga ra ei tangata maani puakapa.—2 Korinetia 11:9; 1 Tesalonia 2:9.

Me inangaro tetai tangata i te tauturu mai i te angaanga e raveia nei e te Au Kite o Iehova, eia te ka tau kia oronga mai aia? Kua tata te apotetoro ko Paulo e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.”—2 Korinetia 8:12; 9:7.

[Tataanga Rikiriki i Raro]