¿Yacharqankichu?

¿Pikunataq leymanta yachachiqkuna karqanku?

Bibliaqa, Jesuspa willayninmanta parlachkaspa, leymanta yachachiqkunamantapis achkha kutista parlallantaq. Paykunaqa, mana Jerusalenllapichu kachkarqanku, manaqa juchʼuy llaqtitaspipis kachkallarqankutaq. Palestinamanta karupi judíos tiyakurqanku chaypipis paykunaqa, juecesjina karqanku, Hebreo simipi Diospa Palabranta qillqakusqanmantataq copiasta ruwaq kanku (Marcos 2:6, 7; 9:14; Lucas 5:17-21).

Jerusalén llaqtapitaq leymanta yachachiqkunaqa, kuraqkunawan, kuraq sacerdoteswan ima llamkʼaq kanku (Mateo 16:21). Bibliap rimaykunasninta ukhunchaq juk diccionario nisqanmanjina, “leymanta yachachiqkunaqa, sacerdoteswan khuska juecesjinasina llamkʼaq kanku, judiospa leyesninkuta, ususninkuta ima juntʼachinankupaq”. Leymanta yachachiqkunamanta wakinqa, kuraq kaq sacerdoteswan, fariseoswan ima, Jatun juntapi kaqkunamanta karqanku.

Leymanta yachachiqkunamantaqa, mana tukuyninkuchu Jesusman churanakurqanku. Sutʼincharinapaq; juk kuti leymanta juk yachachiq Jesusman jinata nirqa: “Yachachej Señor, qanwan risaj, maymancha rinki, chayman”, nispa. Wak kutipitaq Jesusqa, leymanta juk yachachiqman nirqa: “Diospa reinonmanta mana karupichu kashanki”, nispa (Mateo 8:19; Marcos 12:28-34).

¿Imaraykutaq unay tiempopi runasta aceitewan jawiykuq kanku?

Unay tiempopi runasqa, juk runata sumaq qʼapachkaq oliva aceitewan jawiykuq kanku, payta allinpaq qhawasqankuta rikuchinankupaq chayri wasinkuman allin jamusqa kasqanta rikuchinankupaq. Chantapis israelitasqa, juk israelitata sacerdote kananpaq chayri kamachiq kananpaq aceitewan jawiykuq kanku. Sutʼincharinapaq; Moisesqa, Aaronta aceitewan jawiykurqa kuraq kaq sacerdotejina llamkʼananpaq (Levítico 8:12). Kamachiq Davidmanta parlaspataq, Biblia nin: “Samuelqa wajramanta ruwasqa botellata japʼispa, chay waynata jawiykorqa [...]. Chay pʼunchaymantapachataj Tata Diospa Espiritonqa Davidman jamorqa”, nispa (1 Samuel 16:13).

Jawiy rimayqa, hebreo simipi mascháj rimaymanta jamun, kay rimaytaq maschíaj chayri mesías niyta munan. Chantá kay rimayqa griego simipi kjríō rimayman tikrakun, ninayantaq kjristós chayri cristo. Chayrayku nisunman Aarón, David ima, mesías chayri akllasqas kasqankuta. Moisesmantapis Bibliaqa, cristo chayri akllasqa kasqanta nillantaq, nisunman Diospa akllasqan kasqanta Paypa sutinpi parlananpaq (Hebreos 11:24-26).

Chaywanpis Jesustaqa, Dios kikin rey kananpaq akllarqa, manataq aceitewan jaywispachu akllarqa, manaqa espíritu santonwan (Mateo 3:16). Jesús, Jehovap akllasqan kasqanrayku, chiqamanta Mesías chayri Cristo sutichakun (Lucas 4:18, 19).