Kua Kite Ainei Koe?

Koai te au tata tuatua tei patoi ia Iesu?

Te tuatau o tana angaanga orometua, kua aravei a Iesu i te au tata tuatua i Ierusalema e i roto katoa i te au oire rikiriki e te au vira. I vao ake ia Ierusalema—e i roto katoa i te au tapere o te ngati Iuda i vao ake ia Paretaina—ko taua au tangata ra e aronga mana rikiriki ua, tei apiiia i te Ture, penei i tavini ana ei aronga tata tuatua me kore ei au akava i reira.—Mareko 2:6; 9:14; Luka 5:17-21.

I Ierusalema, e angaanga kapiti ana te au tata tuatua ki te kavamani ngati Iuda. (Mataio 16:21) Ta ratou angaanga, i karanga ai The Anchor Bible Dictionary, “i te akaraanga e angaanga kapiti ana ratou e te au taunga, i roto i te au angaanga a te ture e te akamana anga i te peu matau a te ngati Iuda e te ture, e te pitiniti e raveia ra i roto i te Sunederi.” Ei au puapii teitei no te Ture, tetai pae o teia au tata tuatua e au mema tikai ratou no te Sunederi, me kore no te akavaanga teitei o te ngati Iuda. E tavini kapiti ana ratou ki te kau taunga nunui e te au Pharisea.

E akataka putuputuia ana te au tata tuatua ei aronga akonoanga tei patoi ia Iesu. Tera ra, ko tetai pae kare e patoi ana iaia. Ei akaraanga, kua akakite tetai tata tuatua kia Iesu e: “E aru atu au ia koe i toou au aerenga katoa.” Kua akakite a Iesu ki tetai mai e: “Kare koe i atea ke atu i te basileia o te Atua ra.”—Mataio 8:19; Mareko 12:28-34.

Eaa te aiteanga no tetai tangata kia akatainuia?

I te Itinga Rotopu i te tuatau Pipiria, te akatainu anga i te upoko o tetai tangata ki te inu e akairo akangateiteianga iaia me kore ei takinga meitaki i te manuiri. Tei matauia, ko te inu e taangaangaia ana e inu orive tei kairoia ki te akari pipi. E riringi katoa ana te au Epera i te inu ki runga i te upoko o te tangata, me kore kua akatainu iaia, me ikiia aia no tetai taoonga mana teitei. Ei akaraanga, kua akatainuia a Aarona, i te akamanaia anga kia tavini ei taunga maata. (Levitiku 8:12) No runga i te Ariki ko Davida, ‘Kua rave iorā Samuela i taua āriki manongi ra, e kua akatainu atura iaia . . . , e mei taua rā maira te vaerua o Iehova i te tae anga mai ki runga ia Davida.’—1 Samuela 16:13.

I roto i te reo Epera, ko te kupu tei taangaangaia no taua akatainuanga koia oki e ma·shachʹ, no roto mai i te kupu ma·shiʹach, me kore, Mesia. Te kupu Ereni aiteite, koia oki khriʹo, no roto mai a khri·stosʹ me kore a Karaiti i te reira. No reira, ka tau a Aarona raua ko Davida kia karangaia e e mesia, me kore tei akatainuia. Kua karanga katoaia a Mose e e karaiti, me kore tei akatainuia, i roto i te tu e na te Atua i iki iaia kia tavini ei mata Nona.—Ebera 11:24-26.

Kua ikiia a Iesu o Nazareta e te Atua uaorai ki tetai taoonga mana maata. Kare i akatainuia ki te inu tikai, kua akatainuia ra a Iesu ki te vaerua tapu o te Atua. (Mataio 3:16) I te mea koia Tei Akatainuia e tei ikiia e Iehova, kua tau rai a Iesu kia kapikiia e ko te Mesia, me kore ko Karaiti.—Luka 4:18.