Yu ben sabi a sani disi?

Suma ben de den leriman fu Wet di ben e gens Yesus?

Na ini a ten fu Yesus en diniwroko, a ben e miti nanga leriman fu Wet na ini Yerusalem, èn sosrefi na ini tra pikin foto nanga dorpu. Den man disi ben de tu dorosei fu Yerusalem, èn na ini den Dyu libimakandra dorosei fu Palestina. Den ben e wroko na lanti, den ben sabi a Wet, èn a kan de so tu taki den ben e skrifi sani abra noso den ben de krutuman na den krutubangi drape.​—Markus 2:6; 9:14; Lukas 5:17-21.

Na ini Yerusalem, den leriman fu Wet ben e wroko makandra nanga den Dyu tiriman (Mateyus 16:21). Wan buku e taki dati den leriman fu Wet ben e „wroko makandra nanga den priester te den ben e koti krutu, èn den ben musu sorgu taki sma ben e hori densrefi na den Dyu gwenti nanga wet. Boiti dati, den ben abi sani fu du tu na ini a Sanhedrin” (The Anchor Bible Dictionary). Leki prenspari leriman fu Wet, sonwan fu den man disi ben de memre fu a Sanhedrin, noso fu a hei krutubangi fu den Dyu. Den ben e wroko makandra nanga den edeman fu den priester èn nanga den Fariseiman.

Furu tron te Bijbel e taki fu den leriman fu Wet, dan a e sori taki den ben e gens Yesus. Ma sonwan fu den no ben e du dati. Fu eksempre, wan leriman fu Wet ben taigi Yesus: „Mi sa waka na yu baka awansi pe yu e go.” Yesus ben taigi wan tra leriman fu Wet: „Yu no de fara fu a kownukondre fu Gado.”​—Mateyus 8:19; Markus 12:28-34.

San a ben wani taki dati wan sma salfu?

Na ini Bijbel ten, den sma fu a Mindri Owstusei ben abi a gwenti fu poti oli na tapu wan sma en ede fu sori bigi lespeki gi en. Boiti dati, den ben du dati tu fu gi wan fisitiman wan switikon. Furu tron den ben e gebroiki olèif-oli di ben moksi nanga switismeri. Den Hebrewsma ben e kanti oli na tapu wan sma en ede, noso den ben salfu en, te a sma dati ben kisi wan spesrutu posisi. Fu eksempre, di Aron tron granpriester, dan den poti oli na tapu en ede (Lefitikus 8:12). Di David ben o tron kownu, dan ’Samuel teki a tutu di ben abi oli na ini, èn a salfu en. Sensi a dei dati, a yeye fu Yehovah ben de na tapu David.’​—1 Samuel 16:13.

Na ini Hebrewtongo, a wortu di sma ben e gebroiki fu taki dati wan sma salfu, na ma·shachʹ, èn a wortu ma·shiʹach, noso Mesias komoto fu a wortu dati. Na ini Grikitongo a wortu dati na khriʹo, èn a wortu khri·stosʹ, noso Krestes komoto fu a wortu disi. Sobun, wi kan taki dati Aron nanga David ben de wan mesias noso wan salfuwan. Bijbel e kari Moses sosrefi wan salfuwan, fu di Gado ben gi en a frantwortu fu taki gi En.​—Hebrewsma 11:24-26.

Gado srefi ben gi Yesus fu Nasaret wan hei posisi. Ma Yesus no ben salfu nanga oli. Na presi fu dati, Yesus ben salfu nanga a santa yeye fu Gado (Mateyus 3:16). Fu di Yehovah srefi poti Yesus leki Salfuwan, meki a fiti fu kari Yesus a Mesias, noso Krestes.​—Lukas 4:18.