Laef Blong Olwe Long Wol—Wan Gudfala Promes We God i Givim

‘Olgeta samting we God i wokem oli no karem frut long laef blong olgeta. Be oli gat janis blong kam fri long fiuja.’—ROM 8:20, NW.

1, 2. (a) ?From wanem promes ya blong laef olwe long wol i impoten long yumi? (b) ?From wanem plante man oli no bilif se man i save laef blong olwe long wol?

ATING yu save tingbaot yet glad ya we yu bin kasem taem yu jes lanem se i no longtaem, ol man bambae oli no moa kam olfala mo ded, be bambae oli laef blong olwe long wol. (Jon 17:3; Rev. 21:3, 4) Maet yu glad blong tokbaot gudfala promes ya blong Baebol long ol narafala man. Blong talem stret, promes ya blong laef olwe i wan impoten haf blong gud nius ya we yumi stap talemaot long ol man. Promes ya i gat paoa long tingting blong yumi long saed blong laef.

² Ol jos we oli giaman se oli Kristin, oli no wantem save long promes ya blong laef we i no save finis long wol. Baebol i tijim se i no gat wan haf  blong man we i gohed blong laef afta we bodi i ded. Be bighaf blong ol jos oli tijim ol man long wan tijing we i no stanap long Baebol. Oli tijim se i gat wan haf blong man we i no save ded mo taem man i ded, haf ya i go laef long ples blong ol spirit man. (Pri. 9:5) Taswe, plante man oli no bilif long promes ya se man i save laef blong olwe long wol. Ale, i gud we yumi askem kwestin ya se: ?Baebol i rili agri long promes ya? Sipos yes, ?wetaem stret hem i faswan taem we God i soemaot promes ya long ol man?

‘Oli No Karem Frut, Be Oli Gat Janis Blong Kam Fri’

3. ?Olsem wanem stamba tingting blong God i kamaot klia nomo, taem hem i wokem faswan man?

³ Stamba tingting we Jeova i gat long saed blong ol man, i kamaot klia nomo, taem hem i wokem faswan man. God i soemaot klia se sipos Adam i obei, bambae hem i laef blong olwe. (Jen. 2:9, 17; 3:22) I sua se ol faswan bubu blong Adam oli kasem save from wanem man i no moa stretgud olgeta, mo oli luk samting ya wetem ae blong olgeta. God i blokem rod, blong olgeta oli no moa save go insaed long garen blong Iden, mo oli stap kam olfala mo ded. (Jen. 3:23, 24) Taem ol yia oli pas, laef blong man i kam sotfala moa. Adam i laef kasem 930 yia. Man ya Sem, we i laef tru long taem ya we Bigfala Wota i ron, i laef kasem 600 yia mo boe blong hem, Apaksad, i laef kasem 438 yia. Papa blong Ebraham, nem blong hem Tera, i gat 205 yia blong hem taem i ded. Ebraham i laef kasem 175 yia, boe blong hem Aesak 180 yia, mo Jekob 147 yia. (Jen. 5:5; 11:10-13, 32; 25:7; 35:28; 47:28) !Taem ol man oli luk olsem wanem laef blong man i stap kam sotfala moa, plante long olgeta oli mas luksave se promes ya blong laef olwe i lus finis! ?Olsem wanem? ?I gat sam samting we oli save mekem tingting blong olgeta i strong se man i save kasem laef we i no save finis bakegen?

4. ?Wanem stamba samting we i mekem se ol man blong God bifo oli bilif se God bambae i putumbak ol blesing we Adam i bin lusum?

⁴ Tok blong God i talem se: ‘Olgeta samting we God i wokem oli no karem frut long laef blong olgeta. Be oli gat janis blong kam fri long fiuja.’ (Rom 8:20, NW) ?Wanem janis? Faswan profet tok blong Baebol i talem se: “Bambae mi mi mekem we yu mo woman ya, yutufala i enemi blong yutufala, mo sid blong yu mo sid blong hem bambae tufala i enemi blong tufala. Hem bambae i smasem hed blong yu, mo yu bambae yu givim kil long bak blong leg blong hem daon.” (Ridim Jenesis 3:1-5, 15, NW.) Long ol man blong God, promes blong Sid ya i stamba blong strong tingting we oli holem, se God i no save lego faswan tingting we hem i gat long saed blong ol man. Promes ya i mekem se ol man olsem Ebel mo Noa, oli bilif se God  bambae i putumbak ol blesing we Adam i bin lusum. Maet ol man ya oli luksave se sipos snek i ‘givim kil long bak blong leg blong sid daon,’ blad blong hem i mas ron.—Jen. 4:4; 8:20; Hib. 11:4.

5. ?Wanem i soemaot se Ebraham i bilif long laef bakegen?

⁵ Tingbaot Ebraham. Taem Ebraham i kasem traem, hem i ‘rere blong kilim pikinini blong hem Aesak, wan pikinini nomo we hem i gat.’ (Hib. 11:17) ?From wanem Ebraham i rere blong mekem olsem? (Ridim Hibrus 11:19.) !From we hem i bilif se ol dedman oli save laef bakegen! Ebraham i luk wan strong pruf finis se laef bakegen i wan samting we i save kamtru. Yes, bodi blong Ebraham mo Sera i kam olfala tumas mo bodi blong tufala i no moa gat paoa blong wokem pikinini, be Jeova i mekem paoa blong bodi blong tufala i laef bakegen nao tufala i gat wan pikinini boe. (Jen. 18:10-14; 21:1-3; Rom 4:19-21) Mo tu, Ebraham i tingbaot tok we Jeova i talem long hem se: “Promes ya blong mi we mi talem se, ‘Bambae yu yu gat plante pikinini we bambae oli kamaot biaen long yu,’ hem bambae i kamtru long pikinini ya blong yu Aesak.” (Jen. 21:12) Taswe, i gat plante samting we oli givim strong tingting long Ebraham se God i save mekem Aesak i laef bakegen.

6, 7. (a) ?Wanem kontrak we Jeova i mekem wetem Ebraham? (b) ?Olsem wanem promes we Jeova i mekem long Ebraham i givim janis long ol man long fiuja?

⁶ From nambawan bilif blong Ebraham, Jeova i mekem wan kontrak wetem hem long saed blong ‘olgeta we oli kamaot biaen long hem,’ no sid blong hem. (Ridim Jenesis 22:18.) Biaen, oli kasem save se faswan impoten man long “sid” ya, hemia Jisas Kraes. (Gal. 3:16, NW) Jeova i talem long Ebraham se ‘olgeta we oli kamaot biaen long hem,’ no sid blong hem, bambae i kam plante “olsem ol sta long skae, mo olsem sanbij daon long solwota.” Hemia i min se Ebraham bambae i no save stret namba blong olgeta. (Jen. 22:17) Be plante yia biaen, Baebol i soemaot stret namba blong sid ya. Jisas Kraes wetem ol 144,000 man we bambae oli rul wetem hem long Kingdom blong hem, oli mekemap “sid” ya. (Gal. 3:29, NW; Rev. 7:4; 14:1) Kingdom blong Mesaea nao i rod ya blong ‘blesem ol man blong ol kantri’ long wol.

⁷ Ebraham i no save kasem save long ful mining blong kontrak ya we Jeova i mekem wetem hem. Nating se i olsem, Baebol i talem se ‘hem i stap wet long wan taon we fandesen blong hem i save stap oltaem nomo.’ (Hib. 11:10) Taon ya hemia Kingdom blong God. Blong Ebraham i kasem blesing aninit long Kingdom ya, hem i mas laef bakegen. Bambae hem i save laef blong olwe long wol afta we hem i girap bakegen. Mo olgeta we oli laef tru long Amagedon wetem olgeta we oli girap bakegen, bambae oli save laef blong olwe.—Rev. 7:9, 14; 20:12-14.

‘Spirit i Pusum Mi’

8, 9. ?From wanem buk blong Job i no jes stori blong wan man we i kasem plante trabol?

⁸ Josef, hem i smol bubu blong Aesak we i boe blong Ebraham. Job i laef afta long taem blong Josef mo bifo long taem blong profet Moses. I luk olsem se Moses i raetem buk blong Job, mo buk ya i eksplenem from wanem Jeova i letem Job i safa, mo olsem wanem ol samting oli kamgud bakegen long saed blong hem. Be buk blong Job i no jes tokbaot stori blong wan man we i kasem plante trabol, nogat. Buk ya i soemaot sam impoten samting we olgeta man long wol mo ol spirit man long heven  tu oli mas save long hem. Buk ya i mekem yumi kasem save se Jeova i rul wetem stret fasin. Mo buk ya i soemaot tu se bigfala kwestin we Setan i stanemap long garen blong Iden, i joen wetem fasin blong ol man blong God blong holemstrong long hem, mo i joen wetem janis blong olgeta blong kasem laef we i no save finis. Job i no kasem save long bigfala kwestin ya we Setan i stanemap. Nating se i olsem, hem i no agri wetem trifala fren blong hem we oli talem se hem i lego God finis. (Job 27:5) Samting ya i mas mekem bilif blong yumi i kam strong moa, mo i mas givhan long yumi blong luksave se yumi tu yumi naf blong holemstrong long Jeova mo leftemap hae rul blong Hem.

⁹ Afta we trifala giaman fren blong Job oli toktok, Elihu, pikinini blong Barakel we i kamaot long laen blong Bus, “i tok.” ?Wanem samting i pusum hem blong toktok? Hem i talem se: “Tingting blong mi i fulap long ol toktok we mi mas talemaot. Mo spirit i pusum mi blong mi talemaot.” (Job 32:5, 6, 18, NW) Ol toktok we tabu spirit i pusum Elihu blong talemaot, oli kamtru taem Jeova i mekem Job i kamgud bakegen. Mo ol tok ya oli stret long plante narafala man tu. Ol tok ya oli olsem wan promes long ol man we oli holemstrong long God, mo oli save putum tingting blong olgeta i stap strong long promes ya.

10. ?Wanem samting i soemaot se toktok we Jeova i talem long wan man, i save stret long ol narafala man tu?

¹⁰ Samtaem Jeova i toktok long wan man, be tok blong hem i save stret long ol narafala man tu. Yumi luk samting ya long profet tok we Daniel i talem long saed blong drim blong Nebukadnesa, King blong Babilon. King ya i drim long wan bigfala tri we wan enjel i katemdaon. (Dan. 4:10-27) Profet tok we Daniel i talem long saed blong drim ya i kamtru long Nebukadnesa, be profet tok ya i talemaot wan samting we i bigwan moa bakegen. Hem i soemaot se 2,520 yia afta long yia 607 B.K.T., * * God bambae i soemaot hae rul blong hem bakegen, tru long wan kingdom we wan man long laen blong King Deved bambae i rul long hem. Long yia 1914, God i stanemap hae rul blong hem bakegen antap long wol, taem hem i putumap Jisas Kraes olsem King long heven. !Traem tingbaot olsem wanem rul blong Kingdom ya klosap nao bambae i mekem evri promes blong God long saed blong ol man, oli kamtru!

“!Bambae Hem i No Godaon Long Hol!”

11. ?Ol tok blong Elihu oli soemaot wanem samting long saed blong God?

¹¹ Taem Elihu i ansa long Job, hem i tokbaot wan ‘man blong karem tok, wan man long medel blong plante taosen man, wan man we i toktok long bihaf blong narafala, blong talemaot stret fasin blong hem.’ ?Be olsem wanem sipos man ya blong karem tok i ‘prea long God blong i glad long hem’? Elihu i talem se: “God bambae i glad long hem mo i talem se, ‘!Bambae hem i no godaon long hol! !Mi faenem ransom finis! Letem bodi blong hem i kam yangfala olsem we long yang taem blong hem. Letem hem i kasem paoa bakegen olsem long ol dei blong yangfala taem blong hem.’” (Job 33:23-26, NW) Ol tok ya oli soemaot se God i rere blong agri long wan “ransom,” no wan samting we i save kavremap sin blong olgeta man we oli tanem tingting blong olgeta from sin blong olgeta.—Job 33:24, NW.

12. ?Ol tok blong Elihu oli mekem se olgeta man oli save putum tingting blong olgeta i stap strong long wanem samting?

¹² Maet Elihu i no kasem save long ful mining blong ransom, olsem we plante profet tu oli no kasem save long ful mining blong ol tok we oli raetem. (Dan. 12:8; 1 Pita 1:10-12) Nating sipos Elihu i no kasem save, be ol tok blong hem oli soemaot promes ya se wan dei God bambae i agri long wan ransom, mo mekem ol man oli kam fri long trabol ya we oli stap kam olfala mo oli ded. Ol tok blong Elihu oli soemaot nambawan promes ya blong laef olwe. Mo buk blong Job i soemaot tu se bambae ol dedman oli laef bakegen.—Job 14:14, 15.

13. ?Ol Kristin oli luksave se ol tok blong Elihu oli gat wanem bigfala mining?

¹³ Tede, ol tok blong Elihu oli gohed blong gat bigfala mining long ol milian Kristin we oli putum tingting blong olgeta i stap strong long promes ya blong stap laef taem rabis fasin blong wol ya i lus. Ol olfala we oli stap long taem ya, bambae oli kam yangfala bakegen. (Rev. 7:9, 10, 14-17) Mo tu, promes ya blong luk olgeta we oli laef bakegen oli kam yangfala bakegen, i gohed blong mekem ol man blong God oli glad tumas. Be i tru se, sipos ol tabu  Kristin oli wantem kasem laef we i no save finis samtaem long heven, mo sipos ol “narafala sipsip” blong Jisas oli wantem kasem laef blong olwe long wol, tugeta oli mas bilif long ransom sakrefaes blong Jisas.—Jon 10:16; Rom 6:23.

Ded Bambae i Lus Olgeta

14. ?Wanem i soemaot se ol man Isrel oli nidim wan samting antap long Loa blong Moses, blong oli save gat strong tingting ya blong laef olwe?

¹⁴ Taem God i mekem wan kontrak wetem ol pikinini blong Ebraham, olgeta oli kam wan neson. Taem Jeova i givim Loa long olgeta, hem i talem se: “Yufala i mas obei long ol loa blong mi, mo yufala i mas folem ol tingting blong mi.” (Lev. 18:5) Be from we ol man Isrel oli no naf blong folem Loa ya we i stret gud olgeta, Loa ya i jajem olgeta se oli mas panis, mo oli nidim wan samting no wan man, blong sevem olgeta.—Gal. 3:13.

15. ?Tabu spirit i pulum Deved blong raetem ol tok long saed blong wanem blesing we bambae i kamtru long fiuja?

¹⁵ Afta long Moses, Jeova i putum long tingting blong sam narafala man we oli raetem Baebol, blong oli tokbaot promes ya blong laef we i no save finis. (Sam 21:4; 37:29) Tingbaot, Deved i raetem wan Sam we i tokbaot fasin joengud blong ol man we oli mekem trufala wosip long Saeon. Long en blong Sam ya, hem i talem se: “Long ples ya Saeon, Hae God i promes finis blong givim wan gudfala samting blong hem long ol man blong hem, we hemia laef ya we i no save finis.”—Sam 133:3.

16. ?Wanem promes we Jeova i talem tru long Aesea, long saed blong fiuja long wol?

¹⁶ Jeova i putum long tingting blong Aesea blong i talemaot profet tok long saed blong laef we i no save finis long wol. (Ridim Aesea 25:7, 8.) Sin mo ded i olsem wan hevi blangket we i jokem ol man. Jeova i mekem ol man blong hem oli sua se bambae hem i finisim, no i tekemaot, sin mo ded long olgeta ples long wol.

17. ?Aesea i tokbaot wanem wok we Mesaea bambae i mekem, blong openem rod blong ol man oli kasem laef we i no save finis?

¹⁷ Tingbaot samting ya tu we Loa blong Moses i talem long saed blong nani blong Asasel. Wan taem wan yia, long Dei blong Stretem Sin, hae pris i mas ‘putum tufala han blong hem long hed blong nani ya, mo i mas talemaot olgeta rabis fasin blong ol man Isrel wetem ol fasin blong olgeta we oli stap girap agens long God, nao long fasin ya, bambae hem i putum olgeta sin ya i go long nani ya. Nao hem i mas go putum nani ya long han blong wan man mo man ya i mas tekem nani ya i go long draeples, mo long ples ya, hem i mas letem i go fri. Nao nani ya bambae i karem sin ya i go long ples we i no gat man long hem.’ (Lev. 16:7-10, 21, 22) Aesea i talemaot profet tok ya se Mesaea bambae i kamtru, mo bambae hem i mekem wan wok we i sem mak olsem hemia we nani ya i mekem, bambae i karem ‘ol samting we oli stap mekem yumi harem nogud,’ “ol sobodi blong yumi,” mo “ol sin” blong yumi. Long fasin ya, hem i openem rod blong ol man oli kasem laef we i no save finis.—Ridim Aesea 53:4-6, 12.

18, 19. ?Aesea 26:19 mo Daniel 12:13 i tokbaot wanem promes?

¹⁸ Jeova i yusum profet Aesea blong talem long ol man Isrel se: “Ol man blong yumi we oli ded, oli stap slip long beregraon, bambae oli laef bakegen. Ol bodi blong olgeta bambae oli girap, oli laef bakegen. Olgeta ya bambae oli wekap, oli glad, oli stap singsing. Olsem we wota blong naet i folfoldaon, i mekem graon i kam sofsof, i kam niuwan bakegen, long sem fasin, Hae God bambae i mekem olgeta ya oli laef bakegen.” (Aes. 26:19) Hibru haf blong Baebol i soemaot klia promes ya se ol dedman bambae oli laef bakegen, mo se man i save laef olwe long wol. Olsem nao, taem Daniel i gat klosap 100 yia blong hem, Jeova i talem long hem se: “Bambae yu yu ded, be bambae yu laef bakegen  blong kasem pei blong yu long en blong wol.”—Dan. 12:13.

¹⁹ Mata i save long promes ya blong laef bakegen, taswe hem i save toktok long Jisas long saed blong brata blong hem we i ded finis, se: ‘Mi mi save we bambae long las dei, hem i save laef bakegen long taem ya we olgeta man bambae oli laef bakegen.’ (Jon 11:24) ?Olsem wanem? ?Ol tijing blong Jisas mo ol tok we tabu spirit i pulum ol disaepol blong hem blong raetem, oli mekem promes ya i jenis? ?Jeova i promes yet long ol man se bambae oli save laef blong olwe long wol? Bambae yumi tokbaot ansa blong ol kwestin ya long nekis stadi.

[Ol futnot]

Yu Yu Save Eksplenem?

• ?Olgeta man we God i wokem oli no “karem frut long laef blong olgeta” be oli gat wanem janis long fiuja?

• ?Wanem i soemaot se Ebraham i bilif long laef bakegen?

• ?Ol tok blong Elihu oli mekem se ol man oli save putum tingting blong olgeta i stap strong long wanem promes?

• ?Olsem wanem Hibru haf blong Baebol i makemgud promes ya se ol dedman bambae oli laef bakegen, mo se man i save laef olwe long wol?

[Kwestin]

[Tok blong pija long pej 9]

Ol tok we Elihu i talem long Job, oli mekem tingting blong yumi i strong se God bambae i mekem ol man oli fri long trabol ya we oli stap kam olfala mo ded

[Tok blong pija long pej 10]

God i mekem Daniel i sua se ‘bambae hem i laef bakegen blong kasem pei blong hem long en blong wol’